योएल 3 - लिम्बुमे़न्छाम् सुवाङ्हाॽरे़न् खासे़न् 1 “खे़न् ये़न्हाॽओ नु हाबा खे़न् ये़म्मो आङ्गाॽ यहुदाओ हे़क्क्याङ् यरुसले़मओ नुॽमादामान् नुःक्तुङ्लो॥ 2 आङ्गाॽ के़रे़क् मे़न्छाम् सुवाङ्हाॽ सुप्सुङ्सिङ्लो, हे़क्क्याङ् खे़ङ्हाॽ यहोसापातबा ने़ने़बादे़न्नो तारुङ्सिङ्लो॥ आङ्गाॽ आमना आलक्खोमा इस्राइलिहाॽ मे़न्छाम् सुवाङ्हाॽरे़ खुन्छिॽ लुम्मो फुत्छिङ्ज्याङ् के़से़बा के़देबा नु आङ्गाॽ आलाजेन् कुलक् कुलक्को के़भःङ्बाहाॽ खे़प्मो खुम्दिङ् पिरुङ्सिङ्लो॥ 3 खे़ङ्हाॽरे़ आङ्गाॽ आमनाहाॽओ तॽयाःन्सोन् मे़गे़सुरो, हे़क्क्याङ् याम्बोःप्मा याःम्बक्ले़ लागि थाङ्बे़न्हाॽ ले़ङ्हङ् मे़जोगुसिरो, हे़क्क्याङ् सिसागे़न् मे़न्छ्याहाॽ मे़सङ्घुसिआङ् थि मे़धुङुरो॥ 4 “आल्ल तुरोस नु सिदोन ये़क्यक्हाॽ हे़क्क्याङ् पलिस्ति ते़ङ्गप्पोबा मनासे, आङ्गाॽ आदक्ले़ङ्वाओ खिनिॽ थे पान् के़गत्तुम्बे? थे आङ्गाॽ चोगुङ्बा कुभा याःम्बक्किल्ले़ कुले़क्वा नुःक्मा के़गोःत्तुम्बि? खिनिॽ कुले़क्वा के़नुःक्तुम्ल के़वयिने़भग्र, खे़न् आङ्गाॽ खिनिॽ थे़गेःक्पो हाराए चुक्ल याःन्दुङ्ॽ॥ 5 थेआङ्भे़ल्ले़ आङ्गाॽ आसाम्म्याङ् नु आयुप्पा हे़क्क्याङ् के़रे़क् नुःब्नुबा आजिगक्वाहाॽ खिनिॽ माङ्हिम्हाॽओ के़देॽरुम्माङ् वाॽ॥ 6 खिनिॽ यहुदा नु यरुसले़मबा मनाहाॽ हिम्धाःङ्हाॽलाम् माःङ्घा पाङ्मादेमासिरे़ लागि ग्रिकहाॽरे़ खुन्छिॽ हुक्को के़सङ्घुम्सिम्॥ 7 “ओमे़त्ते़म्मे़ॽ, खिनिॽ खे़ङ्हाॽ के़सङ्घुम्सिम्बा ते़न्हाॽओलाम् आङ्गाॽ लःत्तुङ् तारुङ्सिङ्ॽ, हे़क्क्याङ् खिनिॽ खे़ङ्हाॽ के़मे़त्तुम्सिम्बे़ल्ले़ कुले़क्वाॽ आङ्गाॽ खिनिॽए थे़गेःक्पो थासुङ्ॽ॥ 8 आङ्गाॽ खिनिॽ ये़म्बित्छा मे़न्छुमा साहाॽ यहुदाबा मनाहाॽरे़ खुन्छिॽ हुक्को सङ्घुङ्सिङ्ॽ, हे़क्क्याङ् खे़ङ्हाॽरे़ कन्हाॽ माःङ्घा के़युङ्बा लत्छा मे़न्छाम् सुवाङ् सबाबा मनाहाॽओ मे़सङ्घु मे़देसुसिॽ॥” यहवे दाङ्बे़ल्ले़ पाःत्तुङ्आङ् वाॽरो॥ 9 “मे़न्छाम् सुवाङ्हाॽरे़ खुन्छिॽ लुम्मो कन् उवा चोगे़म्मे़ॽओ— थङ् चोःक्मारे़ लागि खिनिॽ यारिप् पोःक्खे़म्मे़ॽओ॥ के़रे़क्नुःल्ले़ के़आःप्पा थक्लिहाङ्हाॽ उःत्ते़म्सिम्मे़ॽओ, थङ् के़जोःक्पा के़रे़क् मनाहाॽ निःत्ताङ् मे़दाआङ् मे़भत्तुसिररो॥ 10 खिनिॽ के़क्चुॽओबा चुगे़ङ्हाॽ थगे़म्मे़ॽआङ् ताभे चोगे़म्मे़ॽओ हे़क्क्याङ् फाःत्ले़ःङ्मा कात्च्याहाॽ थगे़म्मे़ॽआङ् लाःक् चोगे़म्मे़ॽओ॥ मे़न्धुम्नाबाहाॽरे़आङ् ‘आङ्गाॽ के़धुम्बा चोक्का’ मे़बाःत्तुररो॥ 11 के़रे़क् पिसाङ्बा मे़न्छाम् सुवाङ्से, हारा त्ये़म्मे़ॽओ, हे़क्क्याङ् खिनिॽ खे़प्मो सोरिक् चुप्से़म्मे़ॽओ॥” यहवे दाङ्बाए, मुक्के़गुबा के़मनाहाॽ यो युरे़से़ॽओ॥ 12 “मे़न्छाम् सुवाङ्हाॽ फे़जुम्भे़या मे़गाप्सिङ्ङाङ् मे़बोक्लरो हे़क्क्याङ् यहोसापातबा ने़ने़बादे़न्नो तगि मे़बोररो, थेआङ्भे़ल्ले़ हाबा खे़प्मोए के़रे़क् पिसाङ्बा मे़न्छाम् सुवाङ्हाॽ खासे़न् चोःक्मासिरे़ लागि आङ्गाॽ युङ्ङारो॥ 13 कात्च्यान् खिनिॽ याङाम्मे़ॽओ, थेआङ्भे़ल्ले़ चासुम्मा ये़म् पोःक्खे़चुरे़आङ् ने़रो॥ त्ये़म्मे़ॽओ, चे़ल्ले़क्सेॽहाॽ तोॽरे़म्मे़ॽओ, थेआङ्भे़ल्ले़ चे़ल्ले़क्सेॽ एःप्मादे़न्निन् तिम्से़आङ् ने़रो॥ हे़क्क्याङ् कुःन्दाहाॽ तिम्से़आङ् वे़प्पेःक्ल पत्लो, थेआङ्भे़ल्ले़ खे़ङ्हाॽरे़ खुन्छिॽ फे़न्याःम्बक्किन् साॽरिक् इःत्ते़रो॥” 14 खासे़न् चोःक्मा ने़ने़बादे़न्नो चिए़त् चिए़त् मे़ए़त्छिङ्ल मे़वाॽरो, थेआङ्भे़ल्ले़ खासे़न्निन् निःन्धो चोःक्मा ने़ने़बादे़न्नो यहवे दाङ्बे़ल्ले़ कुये़न्निन् निःत्ताङ् त्ये़आङ् वाॽरो॥ 15 नाम्मिन् नु लाबे़न् माक्सिःङ्ग्याःप्पा पोङ्लो हे़क्क्याङ् खेःम्सिक्पाहाॽ मे़न्ओःत्ने़न्लो॥ 16 यहवे दाङ्बे़न् सियोन कोःक्मालाम् हुःक्लो, हे़क्क्याङ् यरुसले़मलाम् खुने़ॽ यम्बा इक्लाओ अःक्लो, ताङ्साङ्बान् नु इक्सादिङ् खाम्बेःक्मान् थे़गक्कक्ना यङ्लो॥ कर यहवे दाङ्बे़न् खुने़ॽ कुमनाहाॽरे़ लागि से़ःप्सिङ्मादे़न् हे़क्क्याङ् कुमना इस्राइलिहाॽरे़ लागि हाङ्यक् पोङ्लो॥ निङ्वाॽफुमाङ्ङिल्ले़ कुमनाहाॽ मुॽइसाम् पिरुसिॽ 17 “खे़ब्याङ् सेसे कोःक्मा सियोनओ के़युङ्बा यहवे दाङ्बा खिनिॽ निङ्वाॽफुमाङ्ङिन् आङ्गाॽए फाॽआङ् निङ्वाॽ के़घोसुम्लो॥ यरुसले़ःम्मिन् सदादिङ् सेसे पोङ्लो, हे़क्क्याङ् वेॽ लाजेॽबा आत्तिन्हाॽरे़आङ् खे़न् याम्मो आभे़ल्ले़आङ् थङ्ङो मे़म्भत्तुन्लो॥ 18 खे़न् ये़न्नो कोःक्मा फाङ्जङ्हाॽओलाम् कुबोक् चे़ल्ले़क्सेॽ थिहाॽ वयु युरो, हे़क्क्याङ् थे़गु माङ्वाहाॽलाम् पित्नु कुङ्मा हेःक्लो यहुदाबा के़रे़क् पाक्लुम्लुम्बादे़न्हाॽओ च्वाःत् लाङ्घेःक्लो, यहवे दाङ्बे़ल्ले़ कुहिम्मोलाम् च्वाःत् वदुन्दाक्वा थिक् लःन्लो हे़क्क्याङ् सित्तिमबा ने़ने़बादे़न्निन् वारक्खुरो॥ 19 “कर यहुदाबा मनाहाॽ मे़युक्तुसिआङ् कुदोःप्माहाॽरे़ खुन्छिॽ माक्खिॽ मे़से़सुआङ् वये़बे़ल्ले़ चोगुल्ले़, मिस्र लाजेन् मुरे़क् खारे़क् थेआङ् के़होःप्पादे़न् पोङ्लो, हे़क्क्याङ् एदोमे़न् थेनाधेबा ये़ःङ्घादे़न् पोङ्लो॥ 20 कर यहुदान् सदादिङ्ले़ लागि मनाहाॽरे़ खुन्छिॽ युङ्मादे़न् पोङ्लो हे़क्क्याङ् यरुसले़ःम्मिन् थाःक्थाःक् थारिक् युक्नादे़न् पोङ्लो॥ 21 खे़न् मनाहाॽरे़ माक्खिॽ मे़से़सुबा, खुन्छिॽ आप्तिक्किन् ले़प्मि मे़म्बिए कत्तुङ्सिङ्लो, आङ्गाॽ खुन्छिॽ खे़न् आप्तिक्किन् ले़प्मि मे़बिरुङ्सिङ्ङिल्लो॥” यहवे दाङ्बे़न् सियोन कोःक्माओ युङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.