योएल 2 - लिम्बुनिःङ्घुक्वा पन्ज्याङ्मा 1 सियोनओ थुत्तुरिःप्पा मुःत्ते़म्मे़ॽओ, आसेसे कोःक्मालाम् साम्दिङ् इक्ला से़से़म्मे़ॽओ॥ लाजेॽओ के़युङ्बाहाॽ चिरिम्लिम्ना मे़यङ्लरो, थेआङ्भे़ल्ले़ यहवे दाङ्बे़ल्ले़ कुये़न्निन् तार पत्लो, खे़न् ये़न्निन् साॽरिक् निःत्ताङ्ङे वाॽरो, 2 खागे़माक्पा नु मुदोखाम्दोबा ये़न् पोङ्लो, माक्सिःङ्ग्याःप्पा नु मुगे़दःम्बा ये़न् पोङ्लो॥ कोःक्मा फाङ्जङ् थे़गुहाॽओ खाओःप्मान् से़बा हे़क्के मुक्के़गुबा थक्सुबाहाॽ कुइसिक् साॽरिक् यरिक् निःङ्घुक्वाहाॽ मे़दारो॥ तगि हे़क्तङ्बा आप्फाल्ले़आङ् मे़म्बोङ्ङे वये़रो हे़क्क्याङ् याम्मो थाःक्थाःक्को थारिक् आभे़ल्ले़आङ् मे़बोङ्ने़न्लो॥ 3 खे़ङ्हाॽरे़ खुन्छिॽ तगि तगि मिःल्ले़ खाप्पुथ्यःङ् चोगुरो खे़ङ्हाॽरे़ खुन्छिॽ एगाङ् एगाङ् मिधुङ् मिराःक् तिःत्लो॥ खे़ङ्हाॽरे़ खुन्छिॽ तगाङ् खाम्बाङ्ङिन् अदनबा सिङ्सेॽइक् हे़क्तङ्बा चोक्लो, खे़ङ्हाॽरे़ खुन्छिॽ एगाङ् मुरे़ःक् खे़रे़ःक् थेआङ् के़होःप्पादे़न् हे़क्तङ्बा चोक्लो, खे़ङ्हाॽओलाम् थेःन्नाङ् खे़त्छिङ्मा मे़सुक्ने़न्लो॥ 4 खे़ङ्हाॽ अन्निल्ले़ कुनारा हे़क्तङ्बा निमे़धाःप्लो हे़क्क्याङ् थङ्ङोबा अन्हाॽ हे़क्के मे़लोःक्लो॥ 5 अन्लाधाहाॽ कुदुङ्दुङ्ना मे़लोःक्पा इक्ला कुइसिक् खे़ङ्हाॽ कोःक्मा फाङ्जङ् सम्धाङ् मे़लोःक्लो, सिङ्मुजिॽहाॽ मिगे़धिङ्बा मिन् लाइक्पा कुइसिक् थक्सुबाहाॽ ते़न्धङ् चोःक्से़ मे़बेःक्किल्ले़ थुरुप्लुप् लॽरिक् के़लःम्बा इक्ला हे़क्तङ्बा पोङ्लो॥ 6 खे़ङ्हाॽ मे़निसुसिआङ् मे़न्छाम् सुवाङ्वाहाॽ किमा यङ्मो मे़धारो, के़रे़क्ले़ खुन्छिॽ नाराहाॽ अम्गे़लॽबा पोङ्लो॥ 7 थक्सुबाहाॽ कुइसिक् खे़ङ्हाॽरे़ मे़भत्तुसिरो, थक्लिहाङ्हाॽ हे़क्के खे़ङ्हाॽरे़ लुङ्धाक्किन् मे़लिङुरो॥ खे़ङ्हाॽरे़ खुन्छिॽ थे़ःक्पे़प्पा तिःक्लाःन् फे़त्मे़न्लाःन्दुन्लो, के़रे़क् लत्छा तिःक्लाओ पे़न्बे़न् लाङ्मे़घेःक्लो॥ 8 खे़ङ्हाॽरे़ थिक्हाॽरे़ वेॽहाॽ मे़जन्दुसिर लाङ्मे़ङ्घेःक्ने़न्लो के़रे़क् खुन्छिॽ आप्फेक् आप्फेक् तिःक्लाओ तगि मे़बेःक्लो, खे़ङ्हाॽरे़ खुन्छिॽ आप्फेक् तिःक्लान् फे़त्मे़ल्लाःन्ने खुन्छिॽ निङ्मिहाॽरे़ यक्हाॽ मे़लिसु मे़देॽरुरो॥ 9 खे़ङ्हाॽरे़ ये़क्यक्हाॽ थङ्ङो मे़भत्तुरो, खे़ङ्हाॽ लुङ्धाक्के लुङ्धाक् सम्धाङ् थोधो मे़लोःक्लो॥ खुःन्द्रिक्पाहाॽ पेधाःप्हाॽओलाम् सिगाङ् मे़लाःप्पा हे़क्के खे़ङ्हाॽरे़ हिम्हाॽ कुसम्धाङ् मे़लिङुआङ् मे़लाःत्लो॥ 10 खे़ङ्हाॽरे़ खुन्छिॽ तगि इक्सादिङ् खाम्बेःक्मान् मुन्लो, हे़क्क्याङ् ताङ्साङ्बे़न् थे़गक्कक्ना यङ्लो॥ नाम्मिन् नु लाबान् माक्सिःग्याःप्पा पोङ्सिरो हे़क्क्याङ् खेःम्सिक्पाहाॽ ओःप्मा मे़नाॽरो॥ 11 यहवे दाङ्बे़न् खुने़ॽ कुधक्सुबाहाॽरे़ खुन्छिॽ तगि हुःक्लो, खुने़ॽ कुधक्सुबा तुराहाॽ निःत्मे़न्दे़त्ते यरिक् मे़वाॽरो, हे़क्क्याङ् कुइङ्जाङ् के़इःप्पा के़नाःप्पाहाॽ मुक्साम्साबा मे़जोक्लो॥ यहवे दाङ्बे़ल्ले़ कुये़न्निन् पयम् यम्बा चोक्लो, हे़क्क्याङ् चाॽरिक् किप्मा के़घुबा चोक्लो॥ खे़न् हाःत्ले़ थम्मा सुक्तुआङ्बे? यहवे दाङ्बे़ल्ले़ मनाहाॽ लायोलाम् हिम्मारे़ लागि उःत्तुसि 12 यहवे दाङ्बे़ल्ले़ अक्खेलॽरिक् उवा चोगुरो, “आल्लोसाङ् खिनिॽ आप्फेक् के़रे़क् निङ्वाॽओ तःक्ने़त् युङे़म्मे़ॽआङ् हाबे़म्मे़ॽर मे़रिङ् थक्ते़म्मे़ॽओ हे़क्क्याङ् खिनिॽ आङ्गाॽ ले़प्माङ् नुःक्खे़म्मे़ॽओ॥” 13 खिनिॽ चाङ्ङिन् थे़ःक्खे़म्मे़ॽआङ्ग मेःन्दुक्लो, कर खिनिॽ निङ्वाॽओ लायोलाम् हिन्दे़म्मे़ॽओ हे़क्क्याङ् यहवे दाङ्बा खिनिॽ निङ्वाॽफुमाङ्ङो नुःक्खे़म्मे़ॽओ॥ थेआङ्भे़ल्ले़ खुने़ॽ कुलुङ्माॽ स्याःत् के़लॽबा, साॽरिक् के़नुॽबा, हारा कुसिक् मे़म्बोःक्मनाबा नु लुङ्माॽ आदुक्तुक्पा चोक्लो, खम्भ्याङ् खुने़ॽ तुक्खे लाक्खे तारुल्ले़ कुनिङ्वाॽ तुक्लो॥ 14 हाग यहवे दाङ्बा खिनिॽ निङ्वाॽफुमाङ्ङिन् कुनिङ्वाॽ तुक् हे़क्क्याङ् कुनिङ्वाॽ नुःक्तुआङ् खिनिॽ मुॽइसाम् के़बिरिॽ— खे़ब्याङ् खुने़ॽ कुलागि खिनिॽ कुजा सिदुङ्जभाहाॽ नु चे़ल्ले़क्सेॽ सेजःङ्वा सिदुङ्जभाहाॽ के़दोन्दुम्ॽ फाॽआङ् हाःत्ले़ निसुबे? 15 सियोन कोःक्माओ थुत्तुरिप्पान् मुःत्ते़म्मे़ॽओ, सेसे तःक्ने़त् युङ्मारे़ लागि उवा चोगे़म्मे़ॽओ हे़क्क्याङ् सेसे चुम्लुङ् युङ्से़ मनाहाॽ उःत्ते़म्सिमे़ॽओ॥ 16 मनाहाॽ सुप्से़म्सिम्मे़ॽ, चुम्लुङ्ङिन् सेसे चोगे़म्मे़ॽओ, लाम्लोबाहाॽ खिनिॽ फुक्खे़म्सिम्मे़ॽओ, हिन्जाॽबित्छाॽहाॽ नु आम्ब्रे़ःङ्वा अङे़ःक्वाहाॽ फुक्खे़म्सिम्मे़ॽओ॥ मेःक्खिम् के़जोःक्पा नालिसाङ्हाॽ खुन्छिॽ याक्फाङ्ङोलाम् हे़क्क्याङ् सिसामेःत्हाॽ खुन्छिॽ याक्फाङ्ङोलाम् मे़लःन्लरो॥ 17 यहवे दाङ्बे़ल्ले़ कुदगि याःम्बक् के़जोःक्पा निङ्वाॽफुसाम्बाहाॽ माङ्हिम्मोबा आःम्भोॽ नु ले़त्ति तोःम्मादे़न् लुम्मो मे़हाःप्लरो॥ खे़ङ्हाॽरे़ अक्खे मे़बाःत्तुर, “यहवे दाङ्बाए, के़मनाहाॽ से़ःप्ते़से़ॽओ॥ खे़ने़ॽ के़लक्खोमा मनाहाॽ कुनामे़न्छाॽ पोङ्मा चाहाक् नु मे़न्छाम् सुवाङ्हाॽ लुम्मो कुनामे़न्छाॽ पोङ्मा मे़बाङ्घे़से़न्ने़ॽओ॥ वेॽ सुवाङ्बा मनाहाॽरे़ थेआङ् अक्खे पाःप्मा मे़घोसुरबे? ‘खे़ङ्हाॽरे़ खुन्छिॽ निङ्वाॽफुमाङ्ङिन् आत्ति वाॽबे?’” निङ्वाॽफुमाङ्ङिल्ले़ खाम्मिन् याम्मो चागे़नुॽबा चोगुॽ 18 खे़ब्याङ् यहवे दाङ्बे़न् कुलाजेःल्ले़ लागि कुनागे़हे़म्बा पोङ्लो, हे़क्क्याङ् खुने़ॽ आबाङे कुमनाहाॽ लुङ्माॽ तुक्तुसिरो॥ 19 यहवे दाङ्बे़ल्ले़ कुमनाहाॽ अक्खे मे़त्तुसिआङ् नुगप् पिरुसिरो, “कुजा, कुबोक् चे़ल्ले़क्सेॽ थि नु चैतुन निःङ्गेॽ हाक्निङ्लो, खे़ब्याङ् खिनिॽ के़रे़क् सिक्एःप्तुआङ् के़घासिरो॥ आङ्गाॽ याम्मो आभे़ल्ले़आङ् मे़न्छाम् सुवाङ्हाॽरे़ खुन्छिॽ लुम्मो खिनिॽ कुनामे़न्छाॽ मे़प्मा चाहाक् पोङ्मा मे़बाङ्निङ्ङिल्लो॥ 20 थाङ्गे़त् ले़प्माङ्लाम् के़युबा थक्सुबा तुराहाॽ आङ्गाॽ खिनिॽलाम् माःङ्घा नाःत्तुङ्देसुङ्सिङ्लो, मे़न्धोःङ्ङे के़ने़बा नु मुरे़क् खारे़क्पा लाजेॽओ आङ्गाॽ खे़ङ्हाॽ पुबेलाप्सा नाःत्तुङ्देसुङ्सिङ्लो, खे़ङ्हाॽरे़ खुन्छिॽ तगिबा तिःक्लाहाॽ कुसिवे़त् वरःङ्ङो हे़क्क्याङ् एगाङ्बा तिःक्लाहाॽ लुम्बाङ् वरःङ्ङो खे़त्तुङ्सिङ्लो॥ खे़ब्याङ् खे़ङ्हाॽरे़ खुन्छिॽ नाम्सुमा, किःक् नाम्मिन् थाःङ् पोःक्लो॥” से़क्खाए खुने़ॽ किप्मा के़घुबा यम्बयम्बा याःम्बक् चोगुआङ् वाॽरो॥ 21 “लाजेॽए, मे़गिसे़न्ने़ॽओ, सःत्ते़ॽआङ् ये़ये़ लॽरे़ओ, से़क्खाए यहवे दाङ्बे़ल्ले़ यम्बयम्बा याःम्बक् चोगुआङ् वाॽरो॥ 22 ताम्भुङ् थक्सासे, मे़गिसे़म्मिन्ने़ॽओ॥ थेआङ्भे़ल्ले़ ताप्मे़रा चाराम्मादे़न्हाॽ सरेःक्याःप्पा पोङ्ल पत्लो॥ सिङ्बुङ्हाॽओ कुजाॽ थोःक्ल पत्लो, पःत्छेल्ले़ कुबुङ्हाॽओ नु चे़ल्ले़क्सेल्ले़ कुबुङ्हाॽओ आत्तातान्ने यरिक् कुजाॽहाॽ थोःक्ल पत्लो॥ 23 सियोन के़युङ्बा मनासे, खिनिॽ सःत्ते़म्मे़ॽओ, यहवे दाङ्बा खिनिॽ निङ्वाॽफुमाङ्ङो निङ्वाॽ तासाम्मे़ॽओ, थेआङ्भे़ल्ले़ खुने़ॽ चुङ्वाःम्मो थासुबा वहित्तिल्ले़ खुने़ॽ नसाःन्साबा चोःक्पा पाःन्निन् ओसेःन्धाङ् पोङ्लो॥ खुने़ॽ तगि हे़क्केए चुङ्वाःम्मा नु फुङ्वाःम्मा ये़म्मो पाङ्गे़न्दिङ् वहित्ते़न् थ्ये़र याःन्दुआङ् वाॽरो॥ 24 खे़ब्याङ् चाधाम्मा लक्खुम्मिन् चाहाॽरे़ सधे़क् तिम्लो, कुःन्दाहाॽ चे़ल्ले़क्सेॽ थि नु चैतुन निःङ्गेल्ले़ तिम्माङ् वे़त्लो॥ 25 “खे़न् तङ्बेहाॽओबा खिनिॽ कुजाहाॽ कुबन्ज्याङ्मा निःङ्घुक्वा च्याःक्हाॽरे़ मे़जबान् के़वे़म्बा निःङ्घुक्वाहाॽरे़ मे़जबान्, यम्बयम्बा निःङ्घुक्वाहाॽरे़ मे़जबान्, हे़क्क्याङ् कुदुम्स्याक् निःङ्घुक्वाहाॽरे़ मे़जबान् आङ्गाॽ खिनिॽ लुम्मो पाङ्घुङ्सिङ्बा खे़न् यरिक् आधक्सुबाहाॽरे़ मे़जबान् नुःक्तुङ् पिनिङ्लो॥ 26 आल्ल खिनिॽ वे़त्ते़सरे़ खाघा कुजा चामा के़घोसुम्लो, हे़क्क्याङ् खिनिॽ लागि निङ्वाॽ के़माबा याःम्बक् के़जोःक्पा यहवे दाङ्बा खिनिॽ निङ्वाॽफुमाङ्ङिन् कुनारा के़भोसुम्लो, आमनाहाॽ याम्मो आप्फाल्ले़आङ् सिरिङ्ममो मे़न्धाने़न्लो॥ 27 खे़ब्याङ् आङ्गाॽ इस्राइलिहाॽरे़ खुन्छि लुम्मो वाॽआरो, हे़क्क्याङ् आङ्गाॽ यहवे दाङ्बा खिनिॽ निङ्वाॽफुमाङ्आरो, खम्भ्याङ् आङ्गाॽनुःल्ले़ वेॽ हाःत्ताङ् होप् फाॽआङ् के़निसुम्लो, आमनाहाॽ याम्मो आप्फाल्ले़आङ् सिरिङ्ममो मे़न्धाने़न्लो॥ यहवे दाङ्बे़ल्ले़ कुये़न् 28 खे़न् एगाङ् आयाम्साम्मिन् के़रे़क् मनाहाॽ सम्धाङ् पाङ्घुङ्लो, खिनिॽ ये़म्बित्छा मे़न्छुमासाहाॽरे़ माङ्निङ्वाॽपान् मे़बाःत्तुरो॥ खिनिॽ खदाक्मि मनाहाॽरे़ ताॽदिगे़न् से़प्माङ् मे़माक्तुरो, हे़क्क्याङ् खिनिॽ नालिगे़न् थाङ्बे़न् मनाहाॽरे़ सुफो मे़निसुरो॥ 29 खे़न् ये़न्हाॽओ के़रे़क् से़वारोबा से़वारोमाहाॽओआङ् आङ्गाॽ आयाम्साम्मिन् पाङ्घुङ् युसुङ्लो॥ 30 आङ्गाॽ तरःङ्दिङ् ताङ्साङ् नु इक्सादिङ् खाम्बेःक्मो निङ्वाॽ के़माबा याःम्बक्हाॽ ओःन्धाक्तुङ्सिङ्लो, माक्खिॽसिवा, मि नु खाम्दःम्बा मिःक्खुॽ इक्सिङ्लो॥ 31 यहवे दाङ्बे़ल्ले़ खे़न् पयम् यम्बा नु किप्मागे़घुबा कुये़न्निन् तामानुःल्ले़ तगि नाम्मिन् माक्सिःङ्ग्याःप्पा पोङ्लो हे़क्क्याङ् लाबान् मराःक्क्याःप्पा माक्खिॽओ ले़ङ्लो॥ 32 कर यहवे दाङ्बे़ल्ले़ कुमिङ्ङो पेलि के़भाक्पाहाॽ के़रे़क् मे़हिङ्लो, थेआङ्भे़ल्ले़ यहवे दाङ्बे़ल्ले़ उःत्तुसिबाहाॽ सियोन कोःक्माओ ताङ्मे़से़ःप्लो, यहवे दाङ्बे़ल्ले़ पाःत्तुआङ् वाॽबा इसिःक् ताङ्से़ःप्मा के़घोबाहाॽरे़ यरुसले़मओ से़ःप्सिङ्मादे़न् मे़घोसुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.