योएल 1 - लिम्बुनिःङ्घुक्वाहाॽरे़ कुजाहाॽ मे़ज 1 पतुएलरे़ कुस्सा योएलओ के़रे़बा यहवे दाङ्बे़ल्ले़ कुइङ्घङ्॥ 2 लाम्लोबासे, खिनिॽ कन् पाःन्निन् खे़प्से़म्मे़ॽओ, लाजेॽओबा यक्युङ्बासे, नुरिक्काङ् खे़प्से़म्मे़ॽओ॥ थे खिनिॽ ये़म्मो इग्र खिनिॽ पाधे़बाहाॽरे़ खुन्छिॽ ये़म्मो अक्तङ्बा पान् आप्फाल्ले़ पोःक्खे़आङ् वये़बे? 3 खिनिॽ साएहाॽ कन् पाःन्निन् मे़त्ते़म्सिम्मे़ॽओ, हे़क्क्याङ् खिनिॽ साहाॽरे़ खुन्छिॽ साहाॽ मे़मे़त्तुसिररो, हे़क्क्याङ् खे़ङ्हाॽरे़ खुन्छिॽ साएहाॽरे़ खे़न् एगाङ्बा थाःक्हाॽ मे़मे़त्तुसिररो॥ 4 कुबन्ज्याङ्मा निःङ्घुक्वा च्याःक्हाॽरे़ मे़ले़रु मे़धबान् खे़न् के़वे़म्बा निःङ्घुक्वाहाॽरे़ मे़जरो, के़वे़म्बा निःङ्घुक्वाहाॽरे़ मे़ले़रु मे़धबान् खे़न् यम्बयम्बा निःङ्घुक्वाहाॽरे़ मे़जमे़देसुरो, यम्बयम्बा निःङ्घुक्वाहाॽरे़ मे़ले़रु मे़धबान् खे़न् कुदुम्स्याक् निःङ्घुक्वाहाॽरे़ मे़जमे़देसुरो॥ 5 थिःल्ले़ के़मसिङ्बासे, सोरे़म्मे़ॽआङ् हाबे़म्मे़ॽओ, खिनिॽ के़रे़क् चे़ल्ले़क्सेॽ थि के़धुङ्बासे॥ कुबोक् चे़ल्ले़क्सेॽ थिःल्ले़ लागि मे़रिङ् थक्ते़म्मे़ॽओ, थेआङ्भे़ल्ले़ खे़न् हाबा खिनिॽ मुराओलाम्बाए खिनिॽ के़म्नाप्ति के़म्देॽरिआङ् वाॽरो॥ 6 निःत्मे़न्दे़त् खानिःत् के़वाॽबा मुक्साम्साबा मे़न्छाम् सुवाङ्ङिल्ले़ आलाजेन् फत्तुआङ् वाॽरो॥ खे़ल्ले़ कुहाबोॽबाहाॽ खिरिङ्बाल्ले़न् हे़क्के लॽरो हे़क्क्याङ् खे़ल्ले़ कुगेङ्हाॽ थे़रिङ्मे़ल्ले़न् हे़क्के लॽरो॥ 7 खे़न् सुवाङ्ङिल्ले़ आजे़ल्ले़क्सेॽहाॽ मुरे़क् खारे़क् चोगुआङ् ने़रो, हे़क्क्याङ् पःत्छेल्ले़ कुबुङ्हाॽ थ्यःङ् मे़जोगुआङ् युङ्लो खे़ङ्हाॽरे़ कुबोराक्हाॽ फसुःक्याःप्पा पोःक्खे़र थारिक् हार्दिक् हार्दिक् मे़धिक्तुआङ् युङ्लो॥ 8 मे़न्छ्या वाॽबा ये़म्मो के़सिबा कुये़म्बाःल्ले़ लागि सागि चाङ् के़जाक्सिङ्माआङ् मे़रिङ् के़धक्मा सिसागे़न् मे़न्छ्यान् कुइसिक् खिनिॽ हाबे़म्मे़ॽओ॥ 9 यहवे दाङ्बे़ल्ले़ कुहिम्मो पोगुगे़न् कुजा सिदुङ्जभा नु चे़ल्ले़क्सेॽ थि सिदुङ्जभा तोःम्मा नाॽरे़आङ् वाॽरो॥ यहवे दाङ्बे़ल्ले़ कुदगि माङ्से़वा याःम्बक् के़जोःक्पा खे़न् निङ्वाॽफुसाम्बाहाॽ मे़रिङ् मे़धक्लो॥ 10 इक्ताप्हाॽ मुरे़ःक् खे़रे़ःक् पोःक्खे़आङ् ने़रो, हे़क्क्याङ् लाजेॽ सिङ्बुङ्ङिन् मे़रिङ् थक्काङ् ने़रो॥ पोगुगे़न् कुजाहाॽ थेनाधे चासोःक्ते़आङ् ने़रो, कुबोक् चे़ल्ले़क्सेॽ थिन् सर्गे़ङ् हेरे़बेरो, चैतुन निःङ्गेॽइन्नाङ् वरे़ङ्ले़ङ् चबे़घे़रे़रो॥ 11 याःम्बुरिबासे, खिनिॽ निङ्वाॽ तुक्खे च्ये़म्मे़ॽओ, चे़ल्ले़क्सेॽ इक्ताप् के़लेःप्पासे, मे़रिङ् थक्ते़म्मे़ॽओ॥ मासि नु हःक्सिःल्ले़ लागि निङ्साङ् पुक्मो थ्ये़म्मे़ॽओ, थेआङ्भे़ल्ले़ इक्ताप्पोबा चाःन् थ्यःङ् पोःक्खे़आङ् ने़रो॥ 12 चे़ल्ले़क्सेल्ले़ कुबुङ्ङिन् हेरे़बेआङ् युङ्लो, हे़क्क्याङ् पःत्छेल्ले़ कुबुङ्हाॽ इसुॽरुबेआङ् युङ्लो॥ फुॽले़सेॽ, यारुम्सेॽ नु नाङ्सेल्ले़ कुबुङ्हाॽ, इग्र इक्ताप्पोबा के़रे़क् सिङ्बुङ्हाॽ हेरे़बेआङ् युङ्लो॥ से़क्खासाङ् मे़न्छाम् सुवाङ्ङिल्ले़ कुसःप्मान् होप्लो॥ 13 निङ्वाॽफुसाम्बासे, सगितेत् चाक्खे़म्मे़ॽओ हे़क्क्याङ् खिनिॽ मे़रिङ् थक्ते़म्मे़ॽओ, ले़त्ति तोःम्मादे़न्नो माङ्से़वा के़जोःक्पासे, हाबे़म्मे़ॽओ॥ आङ्गाॽ आनिङ्वाॽफुमाङ्ङिल्ले़ कुसे़वारोबासे, खिनिॽ सगितेत् चाक्खे़म्मे़ॽआङ् नाम्दाःत्छे़म्मे़ॽओ, थेआङ्भे़ल्ले़ खिनिॽ निङ्वाॽफुमाङ्ङिल्ले़ कुहिम्मो पोगुगे़न् कुजा सिदुङ्जभाहाॽ नु चे़ल्ले़क्सेॽ सेजःङ्वा सिदुङ्जभाहाॽ तोःम्मा मे़ले़रुआङ् वाॽरो॥ 14 सेसे तःक्ने़त् युङ्मारे़ लागि उवा चोगे़म्मे़ॽओ, सेसे चुम्लुङ् युङ्से़ मनाहाॽ उःत्ते़म्सिम्मे़ॽओ॥ यहवे दाङ्बा खिनिॽ निङ्वाॽफुमाङ्ङिल्ले़ कुहिम्मो लाजेॽबा के़रे़क् मनाहाॽ नु लाम्लोबाहाॽ सुप्से़म्से़ॽओ हे़क्क्याङ् यहवे दाङ्बे़न् पेलि फाक्ते़म्मे़ॽओ! 15 खे़न् ये़न्निल्ले़ लागिग, नाॽराङ्स्याङ्लो! थेआङ्भे़ल्ले़ यहवे दाङ्बे़ल्ले़ कुये़न्निन् निःत्ताङ् वाॽरो, मुक्साम्दाङ्बे़न् लाम्बा खे़न् खाप्पुथ्यःङ् पोङ्बा कुइसिक् तारो॥ 16 चामा कुजान् थे आनिॽ मिक् तगिए मे़मे़गेन्बि? सःप्मा एःप्मा हे़क्क्याङ् हाङ्हाङ् लॽमा पाःन्निन् निङ्वाॽफुमाङ्ङिल्ले़ कुहिम्मो मे़साक्तुआङ् मे़वाॽने़म्बि? 17 याॽरिःम्बाहाॽ खाम्बाङ्ङोबा खाम्बुक्ना सिगाङ् इसुॽरो, चाधाःङ्हाॽ कुजा मेःन्ने हङ्बे़त् मे़जोगुरो, पोगुगे़न् कुजा याङ्मा थाःङ्हाॽ मे़गे़रो थेआङ्भे़ल्ले़ पोगुगे़न् कुजाहाॽ हेरे़बेरो॥ 18 थक्सालुप्हाॽ आक्खेलॽरिक् मे़याःप्पे! पिप्मा पित् लुप्हाॽ ताक्मे़गन्नाङ् मे़वाॽरो, थेआङ्भे़ल्ले़ खे़ङ्हाॽरे़ लागि चाराम्दे़न् होप्लो मे़ल्लुक् लुप्हाॽरे़आङ् के़साक्पा मे़दुमुआङ् मे़वाॽरो॥ 19 यहवे दाङ्बाए, आङ्गाॽ खे़ने़ॽ पेलि फाक्ने़रो थेआङ्भे़ल्ले़ चाराम्दे़न्हाॽ मिःल्ले़ थ्यःङ् चोगुआङ् ने़रो, हे़क्क्याङ् मिराःक्के़ल्ले़ इक्ताप्पोबा सिङ्बुङ्हाॽ मिदिगे़आङ् युङ्लो॥ 20 ताम्भुङ्ङोबा थक्साहाॽरे़आङ् खे़ने़ॽ पेलि के़म्भाक्लो, थेआङ्भे़ल्ले़ वहःङ्ङोबा च्वाःत्हाॽ हेरे़ चबे़आङ् ने़रो, खम्भ्याङ् ताम्दाम्बा चाराम्दे़न्हाॽ मिःल्ले़ थ्यःङ् चोगुआङ् ने़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.