यर्मिया 9 - लिम्बु1 ए, आध्गेक्किन् च्वाःत्तिल्ले़ वबाक् पोःक्खे़बा हे़क्केःल्ले़ग हे़क्क्याङ् आङ्गाॽ आमिक्हाॽ मिक्वाःल्ले़ वाधाःम् पोःक्खे़बा कुसिङ्ङिल्ले़ग आङ्गाॽ से़न्दिक् ले़न्दिक् मे़से़रुसिबा आमनाहाॽरे़ खुन्छिॽ लागि हाबाङ्बारो॥ 2 ए, मुरे़क् खारे़क् थेआङ् के़होप्पादे़न्नो लत्छा आहिम् ने़स्से़बा हे़क्केःल्ले़ग आङ्गाॽ खे़प्मो पेगाङ्ङाङ् आमनाहाॽलाम्बा माःङ्घाए वयाङ्बारो॥ थेआङ्भे़ल्ले़ कन्हाॽग चाराम्मा याःम्बक् के़जोःक्पासिरो खे़ब्याङ् इङ्ले़क् के़जोःक्पा मनासुम् मे़बोःक्खे़आङ् मे़वाॽरो॥ 3 यहवे दाङ्बे़ल्ले़ अक्खे पाःत्तुरो, “तोङ् के़आप्पा मनाहाॽरे़ तोःङ्ङिन् लिओ मे़भत्छुरो हे़क्केलॽरिक्के खे़ङ्हाॽरे़ इङ्ले़क् पाःप्मारे़ लागि खुन्छिॽ ले़स्सोःप्पान् मे़लाःक्खुरो॥ से़क्खाबा पाःन्निल्ले़ मेःन् कर कुजाःत्थि के़बेःक्पाहाॽ हाङ् मे़जोक्लो॥ आङ्गाॽ आमनाहाॽरे़ चक्मे़ल्लॽए ताप्फे़ःम्बा मे़जोगुर मे़वाॽरो॥ आङ्गाॽ खुन्छिॽ निङ्वाॽफुमाङ्आ पाःप्मा खे़ङ्हाॽ मे़न्दे़न्ने़न्लो॥ 4 के़रे़क् आबाङे खुन्छिॽ चुम्हाॽलाम्बा सिङ्सिङ् मे़लॽररो हे़क्क्याङ् हाःत्ले़आङ् कुम्भुॽ कुन्साॽहाॽ नामे़साॽरुन्छिन्लरो॥ थेआङ्भे़ल्ले़ फुॽनुसाॽहाॽ याकुबे़न् हे़क्के इङ्ले़क् मे़जोक्लो खे़ब्याङ् के़रे़क्ले़ आबाङे तेःङ्जुम्हाॽ चाःत्थि मे़देसु मे़बिरुसिरो॥ 5 खे़ङ्हाॽ के़रे़क्ले़ खुन्छिॽ चुम्हाॽ इङ्मे़ले़क्तुसिरो, आत्तिन्नाङ् से़क्खा मे़म्बाःत्ने़न्लो॥ खे़ङ्हाॽरे़ खुन्छिॽ ले़स्सोःप्पान् इङ्ले़क् पाःप्मा मे़हुॽरुआङ् वाॽरो॥ खे़ङ्हाॽ लायो चोःक्मारे़ मे़नासे़आङ् मे़वाॽरो॥ 6 खे़ङ्हाॽरे़ कुजक्ले़ कुजक् मना तुक्खे मे़जाःत्तुसिरो, लत्छा इङ्ले़क् सम्धाङ् वेॽ इङ्ले़क्किन् मे़योॽरुरो हे़क्क्याङ् आङ्गाॽ कुसिङ् निःप्मा मे़नाॽआ फाॽआङ् यहवे दाङ्बे़ल्ले़ पाःत्तुरो॥ 7 खे़ल्ले़चोगुल्ले़ साम्म्याङ् युप्पा साङ्मनाबा हे़क्के आङ्गाॽ आमनाहाॽ साङ्सुङ्सिङ्लो हे़क्क्याङ् खे़ङ्हाॽ साम्म्याङ् युप्पा साङ्मनाबा हे़क्के साॽरुङ्सिङ्लो॥ आमनाहाॽरे़ ताप्फे़ःम्बा मे़जोगुआङ् मे़वाॽरो॥ खे़ल्ले़चोगुल्ले़ आङ्गाॽ खे़ङ्हाॽनु वेॽ थे चोगुङ्बाबे? 8 खे़ङ्हाॽरे़ खुन्छिॽ ले़स्सोःप्पान् हासम्सम्बा तोङ् हे़क्के लॽरो, खे़ङ्हाॽ आभे़ल्ले़साङ् इङ्ले़क् मे़बाःत्लो॥ मुराःल्ले़ग आबाङे पाङ्भेॽसाबाहाॽनु के़रे़क् कुजा के़नुॽबा पान् मे़बाःत्लो कर निङ्वाःल्ले़ग इजो मे़गे़सुरो॥ 9 थे आङ्गाॽ कन् पाःन्निल्ले़ लागि खे़ङ्हाॽ खुम्दिङ् मे़बिआसिङ्ङिन्बि? थे अक्तङ्बा सुवाङ्ङो आङ्गाॽ थे़त्लङ् मे़हुङ्ङान्बि? आङ्गाॽ यहवे दाङ्बान् पाराङ्ङाङ् वाॽआरो॥” 10 कोःक्मा थे़गुहाॽरे़ लागि मे़रिङ् थक्कारो हे़क्क्याङ् पित् चाराम्मादे़न्निल्ले़ लागि आङ्गाॽ हाःप्पारो थेआङ्भे़ल्ले़ खे़न् हेरे़ चबे़आङ् ने़रो खे़ब्याङ् हाःत्ताङ् खे़न् ते़न्नोलाम्बा मे़बोङ्ने़न्नाङ् मे़बेःक्ने़न्लो॥ खे़प्मो पित् मे़माःङ्बा इक्लाआङ् खे़म्मे़दे़त्ने़ल्लो, थक्सा पुसाहाॽआङ् मे़घे़त्छिङ् मे़बेआङ् मे़वाॽरो॥ 11 यहवे दाङ्बे़ल्ले़ पाःत्तुॽ, “आङ्गाॽ यरुसले़ःम्मिन् खाप्पुथ्यःङ् चोगुङ्लो हे़क्क्याङ् किधिःप्पाहाॽ वाॽमारे़ लागि लुङ्हाॽ लुप्सुङ्लो, यहुदाबा ये़क्यक्हाॽ लुःन्दुङ्ङाङ् मना मेःन्नेबा चोगुङ्लो, खे़ब्याङ् खे़प्मो आत्तिन्नाङ् मे़वाॽने़न्लो॥” 12 कन् कुसिङ् निःप्मा के़सुक्पा चाःप्पा सिक्कुम्साबा मना हात् वाॽबे? निङ्वाॽफुमाङ्ङिल्ले़ हात् हुॽरुआङ् वाॽआङ् कन् पाःन्निल्ले़ कुयाःम्बेओ इङ्भन् चोःक्मा नु वेॽहाॽ हुॽमा सुक्तुसिबे? थेआङ् कन् लाजेन् खाप्पुथ्यःङ् पोःक्खे़आङ् आत्तिन्नाङ् लाम्दिक् चोःक्मा मे़न्छुक्मनाबा मुरे़ःक् खारे़क्पा ये़ःङ्घादे़न् हे़क्तङ्बा पोःक्खे़बाबे? 13 यहवे दाङ्बे़ल्ले़ पाःत्तुॽ, “आमनाहाॽरे़ आङ्गाॽ पिरुङ्सिङ्बा निसाम्मिन् मे़ले़रु हे़क्क्याङ् आइङ्जाङ्ङिन् मे़भेःन्दुआङ् आङ्गाॽ पाःत्तुङ्बा पाःन्निन् मे़न्जोगुम्बाल्ले़ चोगुल्ले़ अक्खे पोःक्खे़॥ 14 खे़ल्ले़ कुले़क्वाओ खे़ङ्हाॽ हादिङ् के़धक्पा मे़बोःक्खे़ खे़ब्याङ् खे़ङ्हाॽरे़ खुन्छिॽ पाधे़बाहाॽरे़ मे़हुॽरुसिबा कुइसिक् बाल साम्माङ्ङिन् मे़दिम्दुआङ् मे़वाॽ॥ 15 खे़ल्ले़चोगुल्ले़ आङ्गाॽ मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुङ्ॽ, खे़न् खे़प्से़म्मे़ॽ॥ आङ्गाॽ आमनाहाॽ चामारे़ लागि साक्खिःक् के़घिःक्पा कुजा नु थुङ्मारे़लागि निङ् के़याक्पा च्वाःत् पिरुङ्सिङ्ॽ॥ 16 खे़ङ्हाॽ नु खे़ङ्हाॽरे़ खुन्छिॽ पाधे़बाहाॽरे़ कुसिङ् मे़न्निःत्तुसिम्बा सुवाङ्हाॽरे़ खुन्छिॽ लुम्मो आङ्गाॽ खे़ङ्हाॽ फुत्लुम् से़सुङ्सिङ्ॽ, हे़क्क्याङ् खे़ङ्हाॽ के़रे़क् युम्रे़क् मे़म्मे़क्के थारिक् खे़ङ्हाॽरे़ खुन्छिॽ तक्ले़ङ्वाओ निङ्मिहाॽ पाङ्घुङ्सिङ्लो॥” कुभाॽरे़ लागि यरुसले़ःम्बा मनाहाॽरे़ पेलि मे़भाक्तु 17 मुक्साम्दाङ्बा यहवे दाङ्बे़ल्ले़ अक्खे पाःत्तुरो, “थे़मा पोङ्ल पत्, निङ्वाॽ इःत्ते़म्मे़ॽओ॥ मे़रिङ् साम्लो साम्गे़मे़प्मा मे़न्छुमाहाॽ मे़रिङ् थक्से़ उःत्ते़म्सिम्मे़ॽओ॥” 18 मनाहाॽरे़ अक्खे मे़बाःत्तु, “आल्ल हारा चोगे़म्मे़ॽओ, आनिगे मिक्कोलाम् मिक्वा मे़न्धाए थारिक् हाःप्मारे़ मिक्हाॽ मे़न्हम्मे थारिक् आनिगे लागि मे़रिङ् साम्लोधिक् साम्मे़त्छे़ खे़ङ्हाॽ उःत्ते़म्सिम्मे़ॽओ॥” 19 सियोःन्नो के़युङ्बाहाॽ मे़हाःप्पा इक्लान् खे़म्दे़त्ल पत्लो, “आल्लग आनिॽ खाप्पुथ्यःङ् आबोःक्खे़रो! आनिॽ से़क्खाए चाःत्थि इङ्धाङ् पेरो! आनिॽ आबाङे लाजेन् ले़प्माए पोङ्लो, आनिॽ हिम्हाॽ लुःन्दे़ थुबे़आङ् ने़रो॥” 20 आङ्गाॽ अक्खे मे़त्तुङ्सिङ्लो, “मे़न्छुमासे, यहवे दाङ्बे़ल्ले़ कुइङ्घङ्ङिन् खे़प्से़म्मे़ॽओ हे़क्क्याङ् खुने़ॽ पाःत्तुबा पाःन्हाॽ सिङ्सिङ्ङाङ् खे़प्से़म्मे़ॽओ॥ खिनिॽ मे़न्छुमा साहाॽ मे़रिङ् थक्मा हुॽरे़म्सिम्मे़ॽओ खे़म्ब्याङ् खे़ने़ॽ के़न्देःङ् के़न्जुम्हाॽ निङ्वाॽ तुक्खे चामाओ साम्लोमा हुॽरे़म्सिम्मे़ॽओ॥ 21 लाम्लाम्मो साहाॽ से़रुसिर, पाङ्जुम्मोबा लाम्दोहाॽओ थाङ्बे़न्हाॽ सोःन्दुसिर आनिगे पेधाःप्लाम्बा सिमे़न् हिम्मो लासे़रो, आनिॽ यक्हाॽओआङ् लासे़रो॥” 22 यहवे दाङ्बे़ल्ले़ आङ्गाॽ अक्खे पाःप्मा पाङ्ङारो, “इक्ताप्पो पिॽहि लुम्मनाबा हे़क्के, पोगुगे़न् कुजान् सुम्माआङ् इक्ताप्पो ले़प्मना थामनाबा हे़क्के, खे़न् पोगुगे़न् कुजान् आत्तिल्ले़आङ् याम्मो मे़सुप्सुम्बा हे़क्के मना के़सिबाहाॽरे़ खुन्छिॽ चेहाॽ लुम्सिङ्ङाङ् के़रे़क् पिसाङ् से़रे़आङ् ने़रो॥” 23 यहवे दाङ्बे़ल्ले़ अक्खे पाःत्तुरो, “चाःप्पा मनाहाॽ आबाङे सिक्कुम्निङ्वाॽओ आङ्दिङ् मे़ल्लॽने़न्लरो, के़धुम्बा मनान् के़धुम्बा चोःक्का फाॽआङ् यम्बा मे़हे़न्छिङ्ङिन्लरो, याङ्साकुन्धेसाबान् आबाङे कुयाङ्साकुन्धेओ आङ्दिङ् मे़लॽने़न्लरो॥ 24 कर आङ्दिङ् के़लॽबे़ल्ले़ अक्खे चोगुररो, ‘चक्मे़ल्लॽए मनाहाॽ लुङ्माॽ के़दुक्पा, कुदोःप्मा खासे़न् के़लोःम्बा, हे़क्क्याङ् इक्सादिङ् खाम्बेःक्मो साम्योबा आङ्गाॽ यहवे दाङ्बान् खे़ल्ले़ कुसिङ् निःत्ताररो॥’ हाबा कन् पाःन्हाॽओ आङ्गाॽ आनिङ्वाॽ तारो, आङ्गाॽ यहवे दाङ्बान् पाराङ्ङाङ् वाॽआरो॥” 25 यहवे दाङ्बाल्ले़ पाःत्तुॽ, “ओमे़त्ते़ॽ, खे़न् ये़म्मिन् तार पत्, हे़क्केःल्ले़ नासिगे़न् थक्लाओरक् हर्दो के़हे़क्पा कर कन् मिक्सेःन् के़बिबा माङ्हुप्पिन् मे़न्इःप्मना मे़न्नाःप्मनाबा, 26 मिस्र लाजेॽ, यहुदा, ए़दोम, अम्मोन, मोआबिहाॽ हे़क्क्याङ् ने़सिःम्बोबा थे़गेःक्इ ताङ्ब् ताङ्बा के़घक्पा मुरे़क् खारे़क्पा ये़ःङ्दे़न्नो के़युङ्बाहाॽ के़रे़क् आङ्गाॽ खुम्दिङ् पिरुङ्सिङ्ॽ॥ कन् सुवाङ्हाॽ नु इस्राइलिहाॽरे़न्नाङ् सिक्लुङ्मो हर्दो हे़क्मा याःम्बक् मे़म्बोङ्ङे वाॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.