यर्मिया 8 - लिम्बु1 यहवे दाङ्बे़ल्ले़ पाःत्तुॽ, “खे़न् ये़म्मो यहुदाबा हाङ्हाॽ नु हाङ्युक्पाहाॽरे़ खुन्छिॽ ये़प्पाहाॽ हे़क्क्याङ् निङ्वाॽफुसाम्बाहाॽ नु माङ्निङ्वाॽपान् के़बाःप्पाहाॽरे़ खुन्छिॽ ये़त्हाॽ खे़ब्याङ् यरुसले़ःम्मो के़युङ्बा वेॽ मनाहाॽरे़ खुन्छिॽ ये़प्पाहाॽ निङ्मिहाॽरे़ इपुङ्लाम्बा मे़लःत्तुॽ॥ 2 आङ्गाॽ आमनाहाॽरे़ खुन्छिॽ सिराॽगे़धाङ्बा हे़क्क्याङ् माङ्से़वा मे़मे़त्तुसिबा नाम्, लाबा नु खेःम्सिक्पाहाॽ तगि खे़न् ये़प्पाहाॽ खाम्बाङ्ङो मे़से़सु मे़ने़स्सुॽ॥ सुम्माआङ् लुप्मारे़ कुले़क्वा खे़न् ये़प्पाहाॽ खाम्बाङ्ङो चिधुक् हे़क्के किआङ् ने़रो॥ 3 खे़म्ब्याङ् कन् कुॽइगे़भे़म्बा थाःक्हाॽ आङ्गाॽ नाःत्तुङ्देसुङ्सिङ्बाल्ले़ चोगुल्ले़ हत्छे़ के़से़बाआङ् कुयुङ्बा के़याःक्पा मनाहाॽरे़ग, हिङ्मानुःल्ले़ सिमाए खुन्छिॽ सिराॽथाङ्॥ आङ्गाॽ के़रे़क्नुःल्ले़ यम्बा मुक्साम्दाङ्बा यहवे दाङ्बे़ल्ले़ पाःत्तुङ्ङाङ् वाॽरो॥” लायो नु खुम्दिङ् 4 यहवे दाङ्बे़ल्ले़ पाःत्तुॽ, “आङ्गाॽ आमनाहाॽ खे़ने़ॽ अक्खे मे़त्ते़से़ॽओ, कुभा मनाहाॽ मे़जोःन्, हे़क्केःल्ले़ थे खे़ङ्हाॽ मुत्थ्रिक् मे़म्बोःक्ने़म्बि? कुभा लाम्मे़बोःत्ने़भग्र थे खे़ङ्हाॽ याम्मो मे़न्नुःङ्ने़न् मे़न्दाने़म्बि? 5 कर, कन् मनाहाॽ, थेआङ् आङ्गाॽलाम्बा मे़इःम्सिङ् मे़बेआङ् मे़वाॽबाबे? हे़क्क्याङ् थेआङ् आङ्गाॽओ आप्फाल्ले़आङ् मे़न्नुःङ्ने़न् मे़न्दाने़म्बाबे? खुन्छिॽ आबाङे इङ्ले़क् पाःन्नो मे़घिम्सिङ्ङाङ् मे़बत्लो हे़क्क्याङ् नुःङ्मादामा मे़न्दे़न्ने़ल्लो॥ 6 आङ्गाॽ आने़क्खोन् हङ् मे़त्तुङ्ङाङ् पान् खे़प्सुङ्लो, खे़ङ्हाॽग से़क्खा पान् मे़म्बाःप्ने़न्लो॥ कन्हाॽ लत्छाआङ् आबाङे ताप्फे़ःम्बा लायो चोःक्मालाम् मे़हिन्दे़बा होप्लो, खे़ङ्हाॽओ लत्छा थिक्ले़आङ् ‘आङ्गाॽ ताप्फे़ःम्बा चोगुङ्’ फाॽआङ् मे़इःत्तुबा होप्लो॥ अन्निन् थङ्ङो तगि लोःक्काङ् पेःक्लो खे़न् हे़क्के कन्हाॽ के़रे़क् आबाङे लाम्मो मे़धासिङ् मे़बेबान् मे़बेबाए मे़बोःक्खे़रो॥ 7 लिलिवाःल्ले़आङ् हिम्मो नुःङ्मादामा ये़म् निसुरो॥ साप्पे़त्त्रुःक्मा नु सिजोवा पुहाॽरे़ खे़ब्याङ् काराःङ्वाहाॽरे़आङ् पःम्मा पेःक्मा ये़म् पोङ्बा निङ्वाॽ मे़घोसुरो कर आमनाहाॽरे़ आङ्गाॽ यहवे दाङ्बे़ल्ले़ आधिम्हाॽ कुसिङ् मे़न्निःत्तुन्लो॥ 8 “आमनासे, खिनिॽ आभेलॽरिक् अक्खे पाःप्मा के़सुक्तुम्बाबे? ‘आनिगे़ग सिक्कुम्दिङ् निङ्वाॽसाबा चोगिगे़रो हे़क्क्याङ् यहवे दाङ्बे़ल्ले़ कुसाम्योथिम् इङ्जाङ्ङिन् कत्तुम्बे़रो॥’ से़क्खाबा पाःङ्ग खिनिॽ ओमे़त्ते़म्मे़ॽओ, कुनिङ्वाॽ के़जिःप्पा साम्योथिम्साम्बाहाॽरे़ साम्योइङ्जाङ्ङिन् ताङ्ग्राक्चि वक्रात्चि मे़जोगुआङ् वाॽरो॥ 9 खे़ने़ॽ सिक्कुम्साबा के़मनाहाॽ सिरिङ्ममो मे़ध्ये़आङ् मे़वाॽरो, खे़ङ्हाॽ हाःब् मे़ले़क्ते़आङ् इजोओ मे़ध्ये़आङ् मे़वाॽरो॥ यहवे दाङ्बे़ल्ले़ आबाःन्जाःक्किन् खे़ङ्हाॽरे़ मे़नाॽरुआङ् मे़वाॽरो, आल्ल खे़ङ्हाॽरे़ खुन्छिॽ सिक्कुम्निङ्वान् आक्तङ्बा वाॽइरो? 10 “खे़ल्ले़चोगुल्ले़ खुन्छिॽ मेःत्हाॽ वेॽ मनाहाॽ हुक्सुप्तुङ्सिङ्लो हे़क्क्याङ् खे़ङ्हाॽरे़ खुन्छिॽ प्याङ्सिगे़न् इक्ताप्हाॽ याप्मिहाॽ पिरुङ्सिङ्लो॥ थेआङ्भे़ल्ले़ चुक्पा यम्बा मना के़रे़क्ले़ इङ्ले़क्लाम् याङ्साकुन्धे थक्मा तम्सिङ् मे़जोगुरो, माङ्निङ्वाॽपान् के़बाःप्पाआङ्धो निङ्वाॽफुसाम्बा के़रे़क्ले़ मनाहाॽ मे़घुम्सुसिरो॥ 11 खे़ङ्हाॽरे़ के़गाःम्बा आङ्गाॽ आमनाहाॽ मिसाक्लक् के़गाःम्बा हे़क्के सिदाॽ मे़मे़त्तुसिरो खे़ङ्हाॽरे़ मे़बाःत्तुॽ, ‘सनारुङ्, सनारुङ्, के़रे़क् नुबा वाॽरो,’ कर से़क्खाःल्ले़ग सनारुङ् सुक्खेवा आत्तान्नाङ् होप्लो॥ 12 कन् याम्गे़सिङ्बा याःम्बक्किन् मे़जोगुबाओ खुन्छिॽ नुःम्मा के़बोङ्बा मेःम्बि? कर खे़ङ्हाॽग मिसाक्काङ् नुःम्माए मे़न्नुःन्दे़न्लो॥ नुःम्मा पाःन्निन् थे़माबे फाॽआङ् खे़ङ्हाॽरे़ मे़ल्ले़सुन्लो॥ खे़ल्ले़चोगुल्ले़ वेॽ के़मे़क्पाहाॽनुए खे़ङ्हाॽआङ् मे़मे़क्लो॥ खे़ङ्हाॽ खुम्दिङ् पिरुङ्सिङ्बा ये़म्मो खे़ङ्हाॽ मे़मे़क्लो॥ 13 आङ्गाॽ खुन्छिॽ पोगुगे़न् कुजाहाॽ तेॽरुङ् पिरुङ्सिङ्लो चे़ल्ले़क्सेल्ले़ कुबुङ्ङो चे़ल्ले़क्सेॽ मे़बत्ने़न्लो, हे़क्क्याङ् पःत्छेॽबुङ्ङोआङ् कुजाॽ मे़धोःक्ने़ल्लो॥ खे़ल्ले़ कुभे़क्वाहाॽआङ् इरे़म्बेःक्लो॥ खे़ल्ले़ खे़ङ्हाॽ थेधे पिरुङ्सिङ्ङाङ् वयाङ् खे़न् के़रे़क् खे़ङ्हाॽरे़ खुन्छिॽ हुक्कोलाम्बा नाप्तुङ्सिङ्लो, आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥” 14 निङ्वाॽफुमाङ्ङिल्ले़ कुमनाहाॽरे़ अक्खे मे़बाःत्तुरो, “आनिॽ थेआङ् स्वाःत् आयुङ् आजाबाबे? लु फे़रे़म्मे़ॽओ, आनिॽ लोःक्तिर ताङ्से़ःप्सिङ्मादे़न् के़ने़बा ये़क्यक् ले़प्माङ् पेगिरो हे़क्क्याङ् आनिॽ खे़प्मोए हदॽ स्ये़ॽइरो॥ यहवे दाङ्बा आनिॽ निङ्वाॽफुमाङ्ङिल्ले़ आनिॽ मे़ङ्मारे़ लागि इङ्जाङ् पिरुसिआङ् वाॽरो॥ खुने़ॽ आममबा निङ्ङिन् थुङ्मा आबिरे़आङ् वाॽरो थेआङ्भे़ल्ले़ आनिॽ खुने़ॽ कुदक्ले़ङ्वाओ लायो आजोगुम्माङ् वाॽरो॥ 15 आनिगे़ग सनारुङ् पोङ् के़लॽबा निङ्साङ् चोगुम्बे़आङ् वयिगे़रो कर हे़क्तङ्बा थे़माआङ् मे़बोःक्खे़न्लो, वेःप्मा ये़म् हाङ्घुम्बे़आङ् वयिगे़रो कर हक्चघत् किमा नु किप्मागे़घुबा ये़म् त्ये़रो॥ 16 आनिगे निङ्मिहाॽ दानबा ये़क्यक्को मे़गे़रे़ मे़द्ये़रो, खे़ङ्हाॽरे़ खुन्छिॽ अन्हाॽ हे़ःक्हे़ःक् मे़लॽरे़बा आनिगे खे़प्सुम्बे़रो॥ खे़न् अन्हाॽ इहे़हे़ मे़लॽइल्ले़ काक् लाजेन् लोःक्खुरो॥ खे़ङ्हाॽ आनिगे लाजेॽओ के़वाॽबा के़रे़क् पाःन्हाॽ, आनिगे ये़क्यक् नु खे़प्मोबा के़रे़क् यक्युङ्बाहाॽ मे़ङ्मासिरे़ लागि खे़ङ्हाॽ कप्मो मे़द्ये़आङ् मे़वाॽरो॥” 17 यहवे दाङ्बे़ल्ले़ पाःत्तुॽ, “ओमे़त्ते़म्मे़ॽओ! आङ्गाॽ खिनिॽ लुम्मो असेःक्हाॽ पाङ्घुङ् तासुङ्सिङ्लो, के़आःप्पा कुनिङ् के़याक्पा असेःक्हाॽ, मुःप्मनाबा मुन्धुक्किल्ले़ मे़याङ्घुन्सिन्लो, हे़क्क्याङ् खे़ङ्हाॽरे़ खिनिॽ के़म्अगिरो॥” 18 आङ्गाॽ आमे़रिङ् थक्मे़न् मे़म्बेःक्मनाबा पोःक्खे़आङ् वाॽरो, आसिक्लुङ्मे़न् साॽरिक् स्याङ्पे़न्दाङ् पोःक्खे़आङ् वाॽरो॥ 19 खे़प्से़म्मे़ॽ, आङ्गाॽ आमनाहाॽरे़ के़रे़क् लाजेॽओ तुक्खेःल्ले़ चोगुल्ले़ अक्खेलॽरिक् तुवा मे़जोगुरो “थे यहवे दाङ्बान् आल्ल सियोःन्नो होःप्पि? थे खे़प्मोबा हाङ्ङिन् आल्ल होःप्पाबि?” यहवे दाङ्बे़ल्ले़ अक्तङ्बा नुगप् पिरुसिरो, “थेआङ् नावाइत्लाहाॽ खे़ङ्हाॽरे़ माङ्मे़घयुसिबाबे? खे़ब्याङ् थेआङ् हने़बा कुसिङ् मे़न्निःत्तेबा साम्माङ्हाॽ से़वा मे़मे़त्तुसिबाबे? खे़ङ्हाॽरे़ हे़क्के मे़जोगुआङ् थेआङ् आसिक् मे़भोःक्खुबाबे?” 20 मनाहाॽरे़ अक्खे मे़बाःत्तुरो, “चासुम्मा ये़म्मिन्नाङ् ले़क्ते़बेरो हाङ्वामा ये़म्मिन् ले़क्ते़बेरो, कर आनिॽ से़न्लप् मे़ङ्घोए आवाॽरो॥” 21 आङ्गाॽ आसिक्लुङ्मे़न् ये़त्तुक्खेःल्ले़ ते़त्तुआङ् वाॽरो थेआङ्भे़ल्ले़ आमनाहाॽ थे़युःत् थे़युःत् मे़युःत्तुसिआङ् मे़वाॽरो॥ खे़ब्याङ् आङ्गाॽ साॽरिक् मे़रिङ् थक्कारो॥ आङ्गाॽग चाॽरिक् किमा यङ्माओ थ्याङ्ङाङ् वाॽआरो॥ 22 गिलादओ हे़न्नाङ् सिदाॽपाङ्दाॽ होःप्पि? थे खे़प्मो हाःत्ताङ् सिदाॽसाम्बा होःप्पि? थेआङ् के़गाःम्बा आमनाहाॽ मे़न्वेःत्ते मे़वाॽबाबे? |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.