यर्मिया 7 - लिम्बुयर्मियाःल्ले़ माङ्हिम्मो पाःत्तुबा खाहुन् 1 यहवे दाङ्बालाम् यर्मियाओ अक्तङ्बा इङ्घङ् के़रे़, 2 “खे़ने़ॽ माङ्हिम्मोबा लाम्धेःप्पो ये़बे़ॽ, हे़क्क्याङ् अक्खेलॽरिक् इङ्भन् चोगे़ॽ, यहवे दाङ्बान् सेसे माङ्से़वा मे़प्मारे़ लागि कन् लाम्धेःप्पोलाम्बा के़दाबा यहुदाबा के़रे़क् मनासे, यहवे दाङ्बे़ल्ले़ कुइङ्घङ्ङिन् खे़प्से़म्मे़ॽ॥ 3 मुक्साम्दाङ्बा यहवे दाङ्बा, इस्राइलबा निङ्वाॽफुमाङ्ङिल्ले़ अक्खे के़मे़त्ति, खिनिॽ आबाङे हिङ्मन्नोबा ये़प्ले़क्किन् नु याःम्बक्किन् तोःन्दोन् चोगे़म्मे़ॽ हे़क्क्याङ् आङ्गाॽ खिनिॽ कन् लाजेॽओ युङ्मा फाःक्निङ्॥ 4 ‘कन् यहवे दाङ्बे़ल्ले़ कुहिम्लो, कन् यहवे दाङ्बे़ल्ले़ कुहिम्लो, कन् यहवे दाङ्बे़ल्ले़ कुहिम्लो, आनिगे ताप्थेक् याम्धेक् वयिगे़!’ के़लॽबा इङ्ले़क् पाःन्नो नसान् मे़जोगे़म्मिन्ने़ॽ॥ 5 “खिनिॽ हिङ्मन्बा सुत्ना नु ये़प्ले़क्किन् ले़क्खे़म्मे़ॽ, आल्लो के़जोगुम्ल के़वयिबा याःम्बक्हाॽ चोःक्मा नाॽरे़म्मे़ॽ॥ वेॽहाॽनु कुदोःप्मा खासे़न् याःम्बक् चोगे़म्मे़ॽ॥ 6 लाम्दिःप्पाङ्, ये़त्छाबा ये़त्छामा हे़क्क्याङ् मेमेदुमाहाॽलाम् यरिक् याङ्साकुन्धे थक्मालाम् मे़जोगे़म्मिन्ने़ॽ॥ कन् लाजेॽओ फोत्या मे़ःन्नेबाहाॽरे़ खुन्छिॽ माक्खिॽ मे़से़से़म्मिन्ने़ॽ॥ कुसिङ् मे़न्निःत्तेबा साम्माङ्हाॽओ से़वा चोःक्मा ले़रे़म्मे़ॽ, खे़ङ्हाॽरे़ खिनिॽ के़म्मे़क्खि के़म्से़रिरक्॥ 7 खिनिॽ सुत्नाःन् नु ये़प्ले़क्किन् के़दोःन्दुम्ने़भग्र खिनिॽ पाधे़बाहाॽ आङ्गाॽ सदादिङ्ले़ लागि पिरुङ्सिङ्बा कन् लाजेॽओ खिनिॽ वाॽमा पाङ्निङ्॥ 8 “ओमे़त्ते़म्मे़ॽ, खिनिॽ थेनाधेबा कुसुम् मे़न्दम्मनाबा इङ्ले़क् पाःन्निन् नागे़साॽरुम्॥ 9 खिनिॽ खुःप्मा याःम्बक् के़जोगुम्, मना के़से़रुम्सिम् हे़क्क्याङ् चाराम्मा-पोःप्मा याःम्बक् के़जोगुम्, माङ्के़हे़क्कासिआङ् इङ्ले़क् के़बारि, बाल साम्माङ्ङो सिदुङ्जभा के़दोःन्दुम् हे़क्क्याङ् आबाङे आप्फाल्ले़आङ् कुसिङ् के़न्निःत्तुम्सिम्मिन्बा साम्माङ्हाॽ माङ्से़वा के़मे़त्तुम्सिम्॥ 10 कन् आङ्गाॽ आयाम्गे़सिङ्बा पाःन्हाॽ खिनिॽ के़जोगुम् हे़क्क्याङ् खे़न् एगाङ् आङ्गाॽ आमिङ्ङिन् मिङ्सो इङ्धाङ् पिसे़ मे़जोगुबा माङ्हिम्मो के़द्ये़ॽइ खे़ब्याङ् आङ्गाॽ आदगि के़ये़बिआङ् के़बाःत्तुम्, ‘आनिगे ताप्थेक् याम्धेक्को वयिगे़!’ 11 थे खिनिॽ आङ्गाॽ आहिम्मिन् फाःन्दाहाॽरे़ खुन्छिॽ चिङ्सिङ्मादे़न् फाॽआङ् के़इःत्तुम्बि? खिनिॽ थे के़जोगुम्ल के़वयि, आङ्गाॽ खे़न् निसुङ्ॽ, आङ्गाॽ यहवे दाङ्बे़ल्ले़ कन् पाःत्तुङ्ॽ॥ 12 “आङ्गाॽ आमिङ्ङिन् मिङ्सो इङ्धाङ् पिसे़ के़रे़क्नुःल्ले़ तगि सेगुङ्बादे़न् सिलोओ पेगे़म्मे़ॽआङ् ओमे़त्ते़म्मे़ॽ हे़क्क्याङ् निङ्वाॽ खोसे़म्मे़ॽ, आबाङे आमना इस्राइलरे़ कुलायोल्ले़ चोगुल्ले़ आङ्गाॽ खे़न् ते़न्निन् थे चोगुङ्॥ 13 खिनिॽ कन् के़रे़क् लायो के़जोगुम्माङ् के़वयि हे़क्क्याङ् आङ्गाॽ खिनिॽ ए़त्ले़ङ् मे़त्निङ्, हे़क्केसाङ् खिनिॽ आङ्गाॽ आबाःन्निन् के़ङ्घे़प्सुम्मिन्॥ आङ्गाॽ उःत्निङ्ङिल्ले़ खिनिॽ नुगप् याप्मि के़म्बिरिन्॥ 14 खे़ल्ले़चोगुल्ले़ आमिङ्ङिन् मिङ्सो इङ्धाङ् पिसे़ मे़जोगुबा कन् आहिम्मो खिनिॽ निङ्वाॽ के़युक्खुम्, आङ्गाॽ सिलोओ चोगुङ्बा हे़क्के कन् ते़न्नोआङ् चोगुङ्॥ आङ्गाॽ खिनिॽ नु खिनिॽ पाधे़बाहाॽ पिरुङ्सिङ्बा कन् ते़न्निन् सिलोःन् कुइसिक् मे़क्खुङ्ॽ॥ 15 खिनिॽ काॽइ सोॽधोःक्हाॽ, इस्राइलबा मनाहाॽ नाःत्तुङ्सिङ्बा हे़क्के आङ्गाॽ आमिक्साओलाम्बा खिनिॽ लाःक्कात् नाःत्निङ् लःत्निङ्ॽ॥” यहुदाबा मनाहाॽरे़ इङ्जाङ् मे़न्इःत्तुन् मे़न्नाःत्तुन् 16 यहवे दाङ्बे़ल्ले़ पाःत्तु, “यर्मियाए, कन् मनाहाॽरे़ खुन्छिॽ लागि तुवा मे़जोगे़न्ने़ॽ॥ कन्हाॽरे़ खुन्छिॽ लागि मे़रिङ् मे़धक्ते़न्ने़ॽ, आङ्गाॽ तुवा मे़जोगाङ्ङिन्ने़ॽ, आङ्गाॽ पेलि मे़भाक्ताङ्ङिन्ने़ॽ थेआङ्भे़ल्ले़ आङ्गाॽ के़बेलिन् मे़घे़प्सुङ्ङिन्॥ 17 खे़ङ्हाॽरे़ यहुदाबा ये़क्यक्हाॽ नु यरुसले़मबा माराम्हाॽओ थेधे मे़जोगुर मे़बत् थे खे़ने़ॽ के़न्निसुम्बि? 18 साङ्ग्राम्पेदाङ्बा हाङ्मा मे़प्मनामा साम्माङ्ङिन् खरे़ःङ् ले़ःङ्मा पिमारे़ लागि कुस्साहाॽरे़ सिङ् मे़सुप्सु, पाहाॽरे़ मिन् मे़हाःन्दु हे़क्क्याङ् माहाॽरे़ फेॽरुम्मिन् मे़सॽरु॥ खे़ङ्हाॽरे़ आङ्गाॽ आसिक् फोङ्मारे़ लागि वेॽ साम्माङ्हाॽओ सेजःङ्वा सिदुङ्जभा मे़दोन्दु॥ 19 कर थे खे़ङ्हाॽरे़ से़क्खाए आङ्गाॽ आसिक् मे़भोःक्खुर मे़बप्पि? मेःन्, खे़ङ्हाॽ आबाङे मे़घाःन्छिङ्ल मे़वाॽ हे़क्क्याङ् आबाङे सिरिङ्ममो मे़धार मे़बत्॥ 20 “खे़ल्ले़चोगुल्ले़ आङ्गाॽ मुक्साम्दाङ्बा यहवे दाङ्बे़ल्ले़ आसिक्के़न् कन् माङ्हिम्मो थासुङ्ॽ, मना, थक्सा, सिङ्बुङ्हाॽ नु इक्ताप्पोबा पोगुगे़न् कुजा सम्धाङ् थासुङ्ॽ॥ आङ्गाॽ आसिक्के़न् के़दिःप्पा मि हे़क्के तिःत्ल वाॽ, खे़न् हाःत्ले़आङ् वरङ्मा से़प्मा मे़सुक्तुन्॥ 21 “आङ्गाॽ यहवे दाङ्बा मुक्साम्दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुङ्, ‘आमनासे, कुभा सिदुङ्जभाहाॽ खिनिॽ ले़त्ति तोःम्मादे़न्नो थ्यःङ् मिधिङ्मा तेमा पोङ्ॽ हे़क्क्याङ् वेॽ सिदुङ्जभाहाॽ कुभा खिनिॽ चामा के़सुक्तुम्ॽ॥ परुमाल्ले़ खे़न् के़रे़क् खिनिॽए चे़म्देसे़म्मे़ॽ॥ 22 खिनिॽ पाधे़बाहाॽ मिस्रलाम् लःत्तुङ्सिङ्ङाङ् फे़त्तुङ्सिङ्ङिल्ले़ मिधिङ्मनादेमनाबा सिदुङ्जभा इग्र वेॽ सिदुङ्जभाहाॽरे़ कुयाःम्बेओ खे़ङ्हाॽ थेआङ् इङ्जाङ् मे़बिरुङ्सिङ्ङिन्॥ 23 कर आङ्गाॽ खिनिॽ अक्खे मे़त्निङ्ङाङ् वयाङ्, आङ्गाॽ आबाःन्निन् इःप्मा नाःप्मा ते़न्दे़म्मे़ॽ हे़क्क्याङ् आङ्गाॽ आइङ्जाङ् कुइसिक् खिनिॽ हिङ्मन् कत्ते़म्मे़ॽ॥ हे़क्केने़भग्र खिनिॽ नुॽमादामा पोङ्ॽ, आङ्गाॽ खिनिॽ निङ्वाॽफुमाङ् पोङ्ङा हे़क्क्याङ् खिनिॽ आमना के़बोःक्खिॽ॥ 24 कर खे़ङ्हाॽ आङ्गाॽ आबाःन्निन् खे़म्मा मे़न्दे़न्दे़न्, खे़प्मो थे़माआङ् निङ्वाॽ मे़म्बिरुन्॥ खे़ल्ले़ कुले़क्वा खे़ङ्हाॽ इङ्जाङ् इःप्मा नाःप्मा मे़न्दे़म्मनाबा नु ताप्फे़ःम्बा सिक्लुङ्माल्ले़ निङ्वाॽ इःत्तुबा कुइसिक् याःम्बक् मे़जोगुर मे़वये़॥ हे़क्केलॽरिक् खे़ङ्हाॽ आरसाङ् कुॽइगे़भे़म्बा मे़बोःक्खे़र मे़बे॥ 25 खिनिॽ थाःक्थे़बा सुधे़बाहाॽ मिस्रलाम् मे़लःन्दे़ मे़धाङे़बा ये़न्नाङ्धो आइन् थारिक् ए़त्ले़ङ् आङ्गाॽ आसे़वारोबा नु माङ्निङ्वाॽपान् के़बाःप्पा आमनाहाॽ खिनिॽओ पाङ्घुङ्सिङ्ङाङ् वाॽ॥ 26 कर आत्तिन्हाॽरे़आङ् आबाःन्निन् खे़म्मा मे़न्दे़न्दे़न्, खे़प्मो निङ्वाॽए मे़म्बिरुन्॥ खे़ल्ले़ कुले़क्वाओ खिनिॽ थाःक्थे़बाहाॽनुःल्ले़आङ् पाःन्मे़ङ्घे़म्मनाबा नु कुॽइगे़भे़म्बा के़बोःक्खि॥’ 27 “खे़ल्ले़चोगुल्ले़ यर्मियाए, कन् के़रे़क् पाःन्हाॽ खे़ने़ॽ आमनाहाॽ के़मे़त्तुसिसाङ् के़बाःन्निन् खे़म्मा खे़ङ्हाॽ मे़न्दे़न्ने़न्, खे़ने़ॽ खे़ङ्हाॽ के़उःत्तुसिल्ले़ खे़ङ्हाॽरे़ नुगप्पे के़मे़म्बिने़न्॥ 28 खे़ने़ॽ कन् सुवाङ्बा मनाहाॽ मे़त्ते़से़ॽ, ‘खिनिॽ यहवे दाङ्बा निङ्वाॽफुमाङ्ङिल्ले़ कुइङ्जाङ्ङिन् इःप्मा नाःप्मा के़न्दे़न्दिन् इग्र खिनिॽ के़दुमुम्बा खुम्दिङ्लाम् कुभा निसाम् के़ङ्घोसुम्मिन्॥ से़क्खा पाःन्निङ्ग मे़गे़, खे़ल्ले़ कुयाःम्बेओ आत्तिन्हाॽरे़आङ् कुबाःन्धिक्काङ् मे़न्दारुन्॥’” हिन्नोमबा ने़ने़बादे़न्नो पोःक्खे़बा लायो 29 “यरुसले़ःम्मो के़युङ्बासे आल्ल आबाङे थे़गेःक्इःन् खक्ते़म्मे़ॽआङ् लाप्फुसे़म्मे़ॽओ॥ मे़रिङ् थक्ते़म्मे़ॽर थेआङ् के़होप्पा मुरे़क् खारे़क्पा कोःक्मा फाङ्जङ् सम्मो हाबे़म्मे़ॽओ थेआङ्भे़ल्ले़ आङ्गाॽ यहवे दाङ्बान् आसिक् पोगे़आङ् वाॽरो हे़क्क्याङ् आङ्गाॽ आमनाहाॽ लाप्फुसुङ्सिङ्ङाङ् वाॽरो॥ 30 “यहवे दाङ्बे़ल्ले़ अक्खे पाःत्तुॽ, ‘यहुदाओ के़युङ्बाहाॽरे़ आमिक्साओ ताप्फे़ःम्बा याःम्बक् मे़जोगुआङ् मे़वाॽ॥ आङ्गाॽ चिःत्तुङ्सिङ्बा नावाइत्लाहाॽ खे़ङ्हाॽरे़ आमिङ्ङिन् मिङ्सो इङ्धाङ् पिमा के़बोङ्बा आहिम्मो मे़युक्खुसिआङ् युङ् हे़क्क्याङ् माङ्हिम्मिन् आसुत्थो मे़जोगुआङ् ने़ःॽ॥ 31 खे़ङ्हाॽरे़ हिन्नोमबा ने़ने़बादे़न्नो आबाङे साएहाॽ मिधिङ्मनादेमनाबा सिदुङ्जभा चोःक्मारे़ लागि तोपेत मे़प्मनाबा ले़त्ति तोःम्मादे़न्हाॽ मे़जोगुआङ् ने़ःॽ॥ आङ्गाॽ खे़न् चोःक्मा इङ्जाङ् पिरुङ्सिङ्बा मेःन्, हे़क्तङ्बा पाःन्ग आङ्गाॽ इःत्तुङ्बाआङ् होःप्ताङ्॥ 32 खे़ल्ले़चोगुल्ले़ आङ्गाॽ यहवे दाङ्बे़ल्ले़ मे़त्निङ् सिङ्सिङ् लॽरे़म्मे़ॽ अक्तङ्बा ये़म् तार पत्, हे़क्क्याङ् खे़न् तोपेत इग्र हिन्नोमबा ने़ने़बादे़न् मे़म्मे़त्तुन् कर मनासे़प्मा ने़ने़बादे़न् फाॽआङ् कुमिङ् पोङ्ॽ॥ खे़प्मो मनाहाॽरे़ चेहाॽ लुप्मादे़न् खोमे़न्दे़त्ते थारिक् चेहाॽ मे़लुप्तुसिॽ॥ 33 पुसाहाॽ नु ताम्भुङ् थक्साहाॽरे़ खे़न् चेहाॽ मे़जसिरो हे़क्क्याङ् खे़ङ्हाॽ यङ्मा के़से़प्पाआङ् के़नाःप्पा के़देबा हाःत्ताङ् मे़वाॽने़न्॥ 34 यहुदाबा ये़क्यक्हाॽओ हे़क्क्याङ् यरुसले़ःम्बा माराम्हाॽओ आङ्गाॽ ये़ये़लॽमा नु सःप्मा इक्लान् खे़ब्याङ् ते़न्धाम् मेःक्खिम्बा साभःङ्जाःल्ले़ हयङ् किल्लिङ्ङिन्नाङ् माबेःक्ल चोगुङ्ॽ थेआङ्भे़ल्ले़ लाजेन् चिजि खक्खक् पोङ्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.