यर्मिया 6 - लिम्बुनिङ्मिहाॽरे़ यरुसले़ःम्मिन् मे़गबु 1 “बेन्यामिन मनासे, ताङ्से़ःप्सिङ्मारे़ लागि खे़त्छिङाम्मे़ॽओ यरुसले़ःम्लाम्बा खिनिॽ लःन्दे़म्मे़ॽआङ् खे़त्तासिम्मे़ॽओ! तकोओ मे़ल्लुक् सादाङ्ङिन् मुःत्ते़म्मे़ॽओ! हे़क्क्याङ् बेथ-हक्केरेम्मो मिन् हाःन्दे़म्मे़ॽओ खे़ब्याङ् मिःक्खुलाम् मिक्सेन् पिमा तङ्गाम् चोगे़म्मे़ॽओ! मे़क्मासिमान् खा तार पत्लो, थाङ्गे़त् पिसाङ्लाम् खाप्पुथ्यःङ् आजोःक्चोःक्पान् युर पत्लो॥” 2 नुमासुक्मा यरुसले़ःम्मिन् सिम्सिम्मा चोक्लो, कर आङ्गाॽ खे़न् खाप्पुथ्यःङ् चोगुङ्लो॥ 3 मे़ल्लुक्कम्बाहाॽ नु खुन्छिॽ यरिक् मे़ल्लुक्हाॽरे़ थे़गुन् सिदे़प् मे़दे़प्तुबा हे़क्के थक्मोबाहाॽ नु खुन्छिॽ थक्सुबाहाॽरे़ ये़क्यक् कब्रिङ् तुराहिम् मे़जोगुरो॥ हे़क्क्याङ् के़रे़क्ले़ खुन्छिॽ थक्सुबाहाॽ मे़ङ्मासि ते़न्हाॽ मे़सेगुरो॥ 4 खे़ङ्हाॽरे़ अक्खे मे़बाःत्तुरो, “यरुसले़ःम्मो थङ् चोःक्मारे़ लागि यारिप् पोःक्खे़म्मे़ॽओ! के़रे़क् यारिप् चोगे़म्मे़ॽ! आनिगे खे़न् ले़न्दिक्सा चिभत् फत्तुम्बे़रो॥ कर चिःत्ते़स्ये़रो! नाम्ध्ये़ चुरे़॥ नाम् लाःप्मा इःत्ते़आङ् वाॽरो॥ 5 खे़ल्ले़चोगुल्ले़ आनिगे हारा से़न्दिक्सा खे़न् फत्तुम्बे़रो॥ ये़क्यक्कोबा यक्हाॽ खाप्पुथ्यःङ् चोगुम्बे़रो॥” 6 मुक्साम्दाङ्बा यहवे दाङ्बे़ल्ले़ खे़न् थक्मोबाहाॽ मे़त्तुसिरो, “यरुसले़ःम्मिन् लुःम्मारे़ लागि सिङ्हाॽ ताङे़म्मे़ॽओ हे़क्क्याङ् लुप्से़म् ने़से़म्मे़ॽओ॥ आङ्गाॽ कन् ये़क्यक्किन् खुम्दिङ् पिरुङ्ङाङ्लक् ले़रुङ्लो थेआङ्भे़ल्ले़ कप्मो मना तुक्खे चाःप्मा निङ्घे़म्मिन् वाॽरो॥ 7 वागे़ङ्ङोलाम्बा सेसेबा च्वाःत्तिन् आम्भा लःन्नाङ् पत्लो, हे़क्केलॽरिक्के यरुसले़ःम्मिल्ले़ ताप्फे़ःम्बा पाःन्निन् लःत्तुआङ् पत्लो॥ खे़प्मो हयङ् ते़न्धङ्हाॽ नु मे़क्मासिमा पोङ्बा खे़म्दे़त्लो, आङ्गाॽ खे़प्मो तुक्मा साक्मा नु याङ्घेक् इसेःङ्लक् निसुङ्लो॥ 8 यरुसले़ःम्मोबा मनासे, कन् ये़त्तुक्खेहाॽ खिनिॽ लागि साम्दिङ् पोङ्लरो॥ मेःन्ने़भग्र आङ्गाॽ खिनिॽ नाॽनिङ्लो, खिनिॽ लाजेन् चिजि खक्खक् चोगुङ्लो हे़क्क्याङ् खे़न् मुरे़क् खारे़क् पोङ्लो॥” इस्राइलरे़ पिफ्युङ् चोगु 9 मुक्साम्दाङ्बा यहवे दाङ्बे़ल्ले़ आङ्गाॽ अक्खे मे़त्ताङ्लो, “के़रे़क् सिङ्सेॽहाॽ चे़ल्ले़क्सेॽ इक्ताप्लाम्बा लत्थिक्काङ् मे़ल्ले़त्ते तुप्मा पोङ्लो हे़क्केलॽरिक्के इस्राइलबा के़हिङ्बाआङ् के़वाॽबाहाॽ मे़मे़क्लो॥ खे़ल्ले़चोगुल्ले़ ये़म् वाॽरए खे़ने़ॽ के़दुमुसिबाहाॽ खक्पे़त् साम्दिङ् पिरे़से़ॽओ॥” 10 आङ्गाॽ नुगप् पिरुङ्, “आङ्गाॽ आबाःन्निन् हाःत्ले़ खे़प्सुबे? आत्तिन्हाॽ मे़त्तुङ्सिङ्ङाङ् साम्दिङ् पिरुङ्सिङ्बाबे? खे़ङ्हाॽ हादिङ् के़धक्पा मे़बोङ्लो खे़ब्याङ् आबाङे खुनिॽ ने़क्खोॽइन् मे़हुॽरुआङ् मे़वाॽरो॥ यहवे दाङ्बे़ल्ले़ के़इङ्घङ्ङिन् खे़ङ्हाॽरे़ खुन्छिॽ लागि के़घबा पान् पोङ्लो हे़क्क्याङ् खे़प्मो खे़ङ्हाॽरे़ निङ्वाॽ तामा पान् थेआङ् मे़ङ्घोसुन्लो॥ 11 यहवे दाङ्बाए, खे़ने़ॽ के़साक्के़न्निल्ले़ आङ्गाॽ मि हे़क्के थुक्कारो, आल्ल आङ्गाॽ खे़न् थम्माआङ् कप्मा मे़सुक्कान्लो॥” हे़क्क्याङ् यहवे दाङ्बे़ल्ले़ आङ्गाॽ अक्खे मे़त्ताङ्लो, “खे़न् आसिक् पोःक्मान् लाम्मो के़वाॽबा हिन्जाॽबित्छाॽहाॽ हे़क्क्याङ् थाङ्बे़न्हाॽ मे़जुम्बादे़न्नो थासे़ॽओ॥ ये़म्बा नु मेःत्हाॽ के़रे़क् मे़दे़म्सु मे़देॽरुसिरो, कुधे़गेक् के़भुप्पा काप्पोबाआङ् मे़ल्ले़रुन्छिन्लो॥ 12 खे़ङ्हाॽरे़ खुन्छिॽ हिम्धाःङ्हाॽ वेॽहाॽरे़ मे़देॽरुरो हे़क्क्याङ् खुन्छिॽ इक्ताप्हाॽ नु मेःत्हाॽआङ् वेॽहाॽरे़ मे़देॽरु मे़बिरुसिरो॥ आङ्गाॽ मुक्साम्साबा आहुक्किन् सन्छुङ्लो हे़क्केःल्ले़ कन् के़रे़क् पाःन्हाॽ लाजेॽओ के़युङ्बा मनाहाॽओ के़त्लो॥ आङ्गाॽ यहवे दाङ्बे़ल्ले़ कन् पाःन्निन् पाःत्तुङ्लो॥ 13 थेआङ्भे़ल्ले़ चुक्पा यम्बा मना के़रे़क्ले़ इङ्ले़क्लाम् याङ्साकुन्धे थक्मा तम्सिङ् मे़जोगुरो, माङ्निङ्वाॽपान् के़बाःप्पाआङ्धो निङ्वाॽफुसाम्बा के़रे़क्ले़ मनाहाॽ मे़घुम्सुसिरो॥ 14 खे़ङ्हाॽरे़ के़गाःम्बा आङ्गाॽ आमनाहाॽ मिसाक्लक् के़गाःम्बा हे़क्के सिदाॽ मे़मे़त्तुसिरो खे़ङ्हाॽरे़ मे़बाःत्तुॽ, ‘सनारुङ्, सनारुङ्, के़रे़क् नुबा वाॽरो,’ कर से़क्खाःल्ले़ग सनारुङ् सुक्खेवा आत्तान्नाङ् होप्लो॥ 15 कन् याम्गे़सिङ्बा याःम्बक्किन् मे़जोगुबाओ खुन्छिॽ नुःम्मा के़बोङ्बा मेःम्बि? कर खे़ङ्हाॽग मिसाक्काङ् नुःम्माए मे़न्नुःन्दे़न्लो॥ नुःम्मा पाःन्निन् थे़माबे फाॽआङ् खे़ङ्हाॽरे़ मे़ल्ले़सुन्लो॥ खे़ल्ले़चोगुल्ले़ वेॽ के़मे़क्पाहाॽनुए खे़ङ्हाॽआङ् मे़मे़क्लो॥ खे़ङ्हाॽ खुम्दिङ् पिरुङ्सिङ्बा ये़म्मो खे़ङ्हाॽ मे़मे़क्लो॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥” इस्राइलरे़ यहवे दाङ्बे़ल्ले़ कुलाम्मिन् मे़नाःत्तुन् 16 यहवे दाङ्बे़ल्ले़ कुमनाहाॽ अक्खे मे़त्तुसिरो, “लिसि लाम् के़दुम्बा लाम्दोओ ये़बे़म्मे़ॽआङ् ओमये़म्मे़ॽओ॥ तगिबा लाम्हाॽ नु के़रे़क्नुःल्ले़ नुबा लाम्मिन् कोःत्ते़म्मे़ॽओ हे़क्क्याङ् खे़न् लाम्मो लाङ्घेगे़म्मे़ॽओ खे़म्ब्याङ् खिनिॽ हिङ्मन्निन् याम्नाःम् पोङ्लो॥” कर खे़ङ्हाॽरे़ मे़मे़त्तु, “आहाॽ, आनिगे हे़क्के मे़जोगुम्बे़न्लो॥” 17 आङ्गाॽ खिनिॽ लागि लाम्गे़गोबाहाॽ सेःक्युक् चोगुङ्सिङ्लो हे़क्क्याङ् खिनिॽ मे़त्निङ्ङाङ् वये़रो, “किप्मा के़घुबा साम्दिङ्ले़ लागि मे़ल्लुक् सादाङ् लाइक्पान् खे़प्से़म्मे़ॽओ” कर खिनिॽ के़बाःत्तुम्, “खे़न्नाङ् आनिगे मे़घे़प्सुम्बे़न्लो॥” 18 खे़ल्ले़चोगुल्ले़ यहवे दाङ्बे़ल्ले़ मे़त्तुसिरो, “यरिक् थिम्मे़न्दङ् सुवाङ्बा मनासे, खे़प्से़म्मे़ॽओ॥ आङ्गाॽ आमनाहाॽ थे मे़बोङ्, खे़न् निङ्वाॽ खोसे़म्मे़ॽओ॥ 19 इक्सादिङ् खाम्बेःक्माए, खे़प्से़ॽओ! कन्हाॽरे़ चोःक्मा मे़गोःत्तुबा के़रे़क् पाःन्हाॽरे़ कुले़क्वा कन् सुवाङ्हाॽओ मे़क्मे़न् तारुङ्लो थेआङ्भे़ल्ले़ कङ्हाॽरे़ आङ्गाॽ आबाःन्जाःक्किन् मे़नाॽरुआङ् मे़वाॽरो हे़क्क्याङ् आसाम्योथिम् इङ्जाङ्ङिन् खे़म्मा मे़न्दे़न्ने मे़वाॽरो॥ 20 सेबा लाजेॽलाम् नु माःङ्घा लाजेॽलाम् कुनाम्गे़नुॽबा सुक्पा हे़क्क्याङ् मारुक्हाॽ थेःल्ले़ लागि आङ्गाॽओ मे़दारुबाइरो? आङ्गाॽ खे़ङ्हाॽरे़ खुन्छिॽ मिधिङ्मनादेमनाबा सिदुङ्जभान् मे़दाःक्कान्लो, खे़ब्याङ् खे़ङ्हाॽरे़ खुन्छिॽ वयागे़न् सिदुङ्जभाःल्ले़आङ् आनिङ्वाॽ मे़दाने़ल्लो॥ 21 खे़ल्ले़चोगुल्ले़ आङ्गाॽ कन् मनाहाॽ मे़दोःक्ल याःन्दुङ्सिङ्लो हे़क्क्याङ् खे़ङ्हाॽ पे़र्जु सोःन्दुङ्सिङ्लो॥ कुम्बा कुस्सा, काॽइ सोॽधोक्, पाङ्भेॽसाबाहाॽ के़रे़क् मे़सिरो॥” थो पिसाङ्लाम्बा हयङ्ते़न्धङ् 22 यहवे दाङ्बे़ल्ले़ अक्खे पाःत्तुरो, “थो पिसाङ्बा लाजेॽलाम्बा थक्सुबाहाॽ मे़युर मे़बत्लो, खे़न् माःङ्घा लाजेॽबा मुक्साम्बा सुवाङ्हाॽ मे़हुसुसिर मे़याक्लो खे़ब्याङ् थङ् चोःक्मारे़ लागि यारिप् मे़बोङ्ल मे़बत्लो॥ 23 खे़ङ्हाॽरे़ आबाङे खुन्छिॽ लाःक् नु लिन् हुक्को मे़गत्तुरो खे़ङ्हाॽ कुॽइगे़भे़म्बा नु कुलुङ्माॽ स्याःत् मे़ल्लॽमनाबा मे़जोक्लो॥ खे़ङ्हाॽरे़ग अन्हाॽ मे़युक्तुसिआङ् मे़दारो हे़क्केःल्ले़ खे़ङ्हाॽरे़ खुन्छिॽ लाङ्बुक्किन् वरःङ्ङिन् सःक्पा हे़क्के लॽरो॥ नुमासुक्मा यरुसले़ःम्मिन्नु थक्से़ खे़ङ्हाॽ मे़दार मे़बत्लो॥” 24 यरुसले़ःम्बा मनाहाॽरे़ मे़बाःत्तु, “आनिगे कन् पाःन्निल्ले़ इङ्घङ्ङिन् खे़प्सुम्बे़रो हे़क्क्याङ् आनिगे सावेःत् यङे़आङ् लाङ्हुक्ले़ मे़दक्तिगे़न्लो॥ सागप्मा तुङ्ङिल्ले़ तरुमा मे़न्छुमान् हे़क्के आनिगे लॽरिगे़रो खे़म्ब्याङ् ये़त्तुक्खेओ थ्ये़ॽइगे़आङ् वयिगे़रो॥ 25 इक्ताप् ले़प्माङ् मे़बेगे़म्मिन्ने़ॽओ, लाम्मोआङ् लाङ्मे़घेगे़म्मिन्ने़ॽओ॥ निङ्मिहाॽरे़ खुन्छिॽ हुक्को फे़जा फे़युम् मे़गत्तुरो, के़रे़क् पिसाङ् किमा यङ्मा वाॽरो॥” 26 आमनासे, सगितेत् चाक्खाम्मे़ॽआङ् खाप्पुओ सॽआसिम्मे़ॽओ॥ लत्थिक्पा साःल्ले़ कुलागि मे़रिङ् के़धक्पा हे़क्के साॽरिक् मे़रिङ् थक्ते़म्मे़ॽओ थेआङ्भे़ल्ले़ खे़ने़ॽ के़मे़ङ्मे़ङ्बे़ल्ले़ हक्चघत् खा के़भत्लो॥ 27 यहवे दाङ्बे़ल्ले़ पाःत्तुॽ, “यर्मियाए, साम्म्याङ् युप्पा साॽमनाबा हे़क्के आङ्गाॽ आमनाहाॽ साॽरे़से़ॽओ हे़क्क्याङ् खे़ङ्हाॽ आक्तङ्बा मे़जोक्, खे़ने़ॽ निङ्वाॽ खोसे़ॽओ॥ 28 खे़ङ्हाॽ हादिङ् के़धक्पा नु पिफ्युङ्बा मनासिरो, हे़क्क्याङ् खे़ङ्हाॽ कासा नु फे़न्जेॽ हे़क्के के़साःक्पा मे़जोक्लो॥ खे़ङ्हाॽ खक्पे़त् कुनिङ्वाॽ के़जिःप्पा मे़बोःक्खे़आङ् मे़वाॽरो खे़म्ब्याङ् वेॽहाॽ चे़ॽया इङ्दो मे़मे़त्तुसिरो॥ 29 फे़न्धक्ते़न्निन् साॽरिक् मिःल्ले़ मक्तुरो कर युप्पाहिःन् मे़योःन्ने़न्लो॥ आमनाहाॽ साङ्मासि याःम्बक्किन् हने़रक् पोङ्ल वाॽरो थेआङ्भे़ल्ले़ ताक्के़भे़ॽबाहाॽ मे़ङ्घे़त्तुन् मे़न्देसुसिन्लो॥ 30 खे़ङ्हाॽ ताप्फे़ःम्बा युप्पा मे़मे़त्तुसिरो थेआङ्भे़ल्ले़ आङ्गाॽ यहवे दाङ्बे़ल्ले़ खे़ङ्हाॽ नाॽरुङ्सिङ्ङाङ् वाॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.