यर्मिया 52 - लिम्बुयरुसले़म ये़क्यक्किन् मे़गे़ ( २ हाङ् २४:१८–२५:७ ) 1 सिदकियाहःन् यहुदाबा हाङ् पोःक्खे़ल्ले़ खुने़ॽ निबोङ्ङाङ् थिक् तङ्बे के़रे़आङ् वये़, हे़क्क्याङ् खुने़ॽ यरुसले़ःम्मो थिबोङ्ङाङ् थिक् तङ्बे हाङ्युक् चोगु॥ खुने़ॽ कुम्मारे़ कुमिङ् हमुतल वये़, खे़न् लिब्ना के़युङ्बा यर्मियारे़ कुस्सा मे़न्छुमा वये़॥ 2 कर यहोयाकिमरे़ चोगुआङ् वये़बा हे़क्केए यहवे दाङ्बे़ल्ले़ कुमिक्साओ सिदकियाहःल्ले़आङ् फे़न्याःम्बक् चोगु॥ 3 यरुसले़म नु यहुदाबा मनाहाॽरे़ खुन्छिॽ तक्ले़ङ्वाओ यहवे दाङ्बे़ल्ले़ कुसाक्के़न्निल्ले़ चोगुल्ले़, कुनुप्मो खुने़ॽ कुदगिलाम् खे़ङ्हाॽ वेॽ लाजेॽओ मे़लःत्तुन् मे़देसुसिन्ल हे़क्क्याङ् मे़न्दे़म्सुन् मे़न्देॽरुसिन्ल थारिक् कन् पाःन्हाॽ पोःक्खे़॥ सिदकियाहःल्ले़ बेबिलोनबा नबुकदनेसर हाङ्ङिल्ले़ कुदक्ले़ङ्वाओ पिफ्युङ् चोगु॥ 4 खे़ल्ले़चोगुल्ले़ सिदकियाहरे़ हाङ्युक् चोगुबा फाङ्सिगेक्पा तङ्बेओबा थिबोङ् ला के़रे़बा थिबोङ् ये़न्नो बेबिलोनबा हाङ् नबुकदनेसररे़ यरुसले़ःम्मिल्ले़ कुदक्ले़ङ्वाओ के़रे़क् कुधक्सुबाहाॽ फे़त्तुसिआङ् फे़रे़॥ खे़ङ्हाॽरे़ ये़क्यक्किन् किर्गप् मे़गबु हे़क्क्याङ् लुङ्धाक्हाॽ लुःम्मारे़ लागि चन्जम्बादे़न्हाॽ मे़जोगु॥ 5 सिदकियाहरे़ हाङ्युक् चोगुबा थिबोङ्ङाङ् थिक् तङ्बे थे़म्बा ये़क्यक्किन् मे़गबुआङ् ने़स्से़॥ 6 सिदकियाहरे़ हाङ्युक् चोगुबा लिसिगेक्पा लाओबा फाङ्सिगेक्पा ये़न्नो ये़क्यक्को साॽरिक् यम्बा साक् पोगे़आङ् ने़स्से़, हे़क्क्याङ् कुनुप्मो चाहाॽ के़रे़क् मारे़आङ् होःप्ते़॥ 7 खे़ब्याङ् ये़क्यक्कोबा कुयाधिक् लुङ्धाक्हाॽ पुरुःङ् लुःन्दे़बे, हे़क्क्याङ् के़रे़क् थक्सुबाहाॽ मे़घे़त्छिङ् मे़घे़रे़॥ बेबिलोनिहाॽरे़ ये़क्यक्किन् मे़गबुआङ् ने़स्से़आङ्धोए, खे़ङ्हारे़ से़न्दिक् खाधाम्मान् मे़हाङ्घुआङ् वये़॥ खे़ब्याङ् हाङ्ङिल्ले़ कुभुङ्इक् एगाङ् ले़प्माङ्बा नाहाङ् कत्नाहाङ् ने़त्छि लुङ्धाक्हाॽरे़ कुलुम्मोबा ताःक्हन्नोलाम् खे़ङ्हाॽ मे़भिःन्छिङ् मे़बे हे़क्क्याङ् यर्दन ले़प्माङ्बा ने़ने़बादे़न्नो मे़धासिङ् मे़बे॥ 8 कर बेबिलोनबा थक्सुबाहाॽरे़ सिदकियाह हाङ्ङिन् मे़नाःत्तु मे़देॽरुआङ् यरिहोबा ते़म्बेॽओ खुने़ॽ मे़दे़म्सु॥ थेआङ्भे़ल्ले़ के़रे़क् कुधक्सुबाहाॽरे़ खुने़ॽ मे़ले़रुआङ् फुत्छिङ्ज्याङ् मे़से़रे़ मे़बेआङ् मे़वये़॥ 9 खे़ङ्हाॽरे़ खुने़ॽ हमात लाजेॽबा रिब्लाओ बेबिलोनबा हाङ्ङिल्लो मे़देॽरु॥ बेबिलोनबा हाङ्ङिल्ले़ खे़प्मोए सिदकियाहःन् खासे़न् लोःम्मा उवा चोगु॥ 10 रिब्लाओ सिदकिहःल्ले़ कुमिक्ले़ निसुरए खुने़ॽ कुस्साहाॽ बेबिलोनबा हाङ्ङिल्ले़ से़रुसि, हे़क्क्याङ् यहुदाबा वेॽ के़रे़क् सुहाङ्गे़म्बाहाॽआङ् खे़ल्ले़ से़रुसि॥ 11 खे़ब्याङ् सिदकियाहरे़ कुमिक्हाॽ लिगक् लःत्तुदेसु पिरु, कासा थक्क्रङ्ङिल्ले़ इघेःक्खुआङ् बेबिलोनओ तिःक्तुदेॽरु॥ सिदकियाहःन् कुसिमा ये़न् थारिक् बेबिलोनबा पुङ्लाहिम्मोए यागे़रो॥ माङ्हिम्मिन् मे़गे़बा ( २ हाङ् २५:८-१७ ) 12 नबुकदनेसर हाङ्ङिल्ले़ हाङ्युक् चोगुबा ङासिगेक्पा लाःल्ले़ थिबोङ् ये़न्नो बेबिलोनबा हाङ्ङिल्ले़ कुसुहाङ्गे़म्बा थक्मोबा नबुजरदान कम्ब्राङ्बान् यरुसले़मओ के़रे़भे़रे़॥ 13 खुने़ॽ यहवे दाङ्बे़ल्ले़ कुहिम्मो नु हाङ्हिम्मो हे़क्क्याङ् यरुसले़ःम्बा के़रे़क् हिम्हाॽओ मिभाःत्त्रा केःत्तु॥ के़रे़क् यम्बयम्बा के़ये़क्पा हिम्हाॽ खुने़ॽ मिधिक्खुदेसु॥ 14 खे़ब्याङ् यरुसले़मबा काक् पिसाङ्बा लुङ्धाक्हाॽ बेबिलोनबा थक्सुबाहाॽरे़ मे़लुःन्दुल्ले़ खुने़ॽ खे़ङ्हाॽ के़रे़क् लाम्लोमासि याःम्बक् चोगुआङ् वये़॥ 15 खे़ब्याङ् कम्ब्राङ्बा थक्मोबा नबुजरदाने़ल्ले़ ये़क्यक्को कुभा के़वाॽबा के़याःक्पा नु के़रे़क्नुःल्ले़ याङ्गे़साॽबा, खुन्छिॽ साक्थिम् के़ले़प्पाआङ् बेबिलोनबा हाङ्ङिन् ले़प्माङ् के़बप्पा मनाहाॽ नु वेॽ कुहुक्चो के़नुॽबा चोबेगुहाॽ ते़म्सुदेॽरुसि॥ 16 कर नबुजरदानरे़ कुभा साॽरिक् याङ्गे़साॽबा मनाहाॽ चे़ल्ले़क्सेॽ इक्ताप्हाॽ नु इक्ताप्हाॽओ याःम्बक् चोःक्मारे़ लागि यहुदाओए वाॽमा याःक्मा फाःक्तुसि॥ 17 बेबिलोनिहाॽरे़ यहवे दाङ्बे़ल्ले़ कुहिम् तगि के़ये़प्पा कासा सित्लाङ्हाॽ, च्वाःत् उःङ्मा कासा लाधाहाॽ नु वाहप्सिङ्मा साॽरिक् यम्बा च्वाःत् याङ्मा कासा फसिन् फयःप्फयःप् मे़यःप्सु, हे़क्क्याङ् खे़ङ्हाॽरे़ के़रे़क् कासाहाॽ बेबिलोनओ मे़गुयु मे़देॽरु॥ 18 खे़ङ्हाॽरे़ खाप्पु याङ्मा खप्प्याहाॽ, खर्चुहाॽ, सेमि हाःम्माहाॽ, वाहप्सिङ्मा खप्प्याहाॽ, सामा पुमाहाॽ नु माङ्हिम्मो सिदुङ्जभा चोःक्मे़ल्ले़ याङ्मनाबा के़रे़क् कासा सामापुमाहाॽआङ् मे़देॽरु॥ 19 थक्मोबा कम्ब्राङ्बा नबुजरदानरे़ चुजुक्सा छे़ःङ्ग्याहाॽ, सुक्पा हाःम्मा साङ्ते़रे़ःङ्हाॽ, वाहप्सिङ्मा फसिहाॽ, खप्प्याहाॽ, सेमियुङ्दे़न्हाॽ, सामापुमाहाॽ, वदुम्बक्वा सिदुङ्जभाहाॽ तोःम्मारे़ लागि याङ्मनाबा छे़ःङ्ग्याहाॽ, साम्म्याङ् इसेःङ्बा नु युप्पालाम् थक्मनाबा के़रे़क् चिगक्वाहाॽआङ् तेॽरु॥ 20 ने़त्छि सित्लाङ्हाॽलाम् के़लिःप्पा कासा कुधाङ्मा, कुसिगाङ् थिबोङ्ङाङ् ने़त्छि कासा से़गम्बाहाॽनु सोरिक्पा साॽरिक् यम्बा च्वाःत् याङ्मा कासा फसिन्, हे़क्क्याङ् च्वाःत् उःङ्मा लाधाहाॽआङ् थाङ्मारे़ लागि साॽरिक् पयम् यम्बा चोगे़॥ यहवे दाङ्बे़ल्ले़ कुहिम्मिल्ले़ लागि सोलोमनरे़ कुये़म्मो कन् चिगक्वाहाॽ मे़जोगुआङ् वये़॥ 21 सित्लाङ्हाॽरे़ कुलिङ्गे़न् ये़त्छि मितर यारिक् केःम्बा चोगे़ हे़क्क्याङ् कब्रिङ्बा कुलःप्लाःन् ५:३ मितर योरे़॥ खे़ङ्हाॽ कुहोःन्द्रा के़बप्पा आइचि सुम्सि यारिक् के़धुङ्बा चोगे़॥ 22 के़रे़क् सित्लाङ्हाॽरे़ कुसम्धाङ्बा कासा मे़ःथहाॽ २:२ मितर केःम्बा मे़गाम्सुआङ् पत्छे़, हे़क्क्याङ् खे़ल्ले़ कब्रिङ् पिसाङ् कासाःल्ले़न् फुॽले़सेॽ के़भसिङ्बा कुभुङ् मे़लक्तुआङ् पत्छे़॥ 23 कुया कुयाओ फाङ्बोङ्ङाङ् तुक्सि फुॽले़सेॽ पत्छे़, हे़क्क्याङ् के़रे़क् पिसाङ् के़भसिङ्बाल्ले़ कुसम्धाङ् के़रे़क्ले़ किप् थिक् पत्छे़॥ 24 कम्ब्राङ्बा थक्मोबा नबुजरदाने़ल्ले़, खुने़ॽनु सोसोरिक् तुम् निङ्वाॽफुसाम्बा सरायाहःन्, ताक्फा निसिगेक्पा निङ्वाॽफुसाम्बा सपन्याहःन् नु सुम्सि कुधे़गेक् लाम्धेत् के़गोबाहाॽ पुङ्लाधाबा हे़क्तङ्बा चोगुदेॽरुसि॥ 25 हे़क्क्याङ् ये़क्यक्को आल्लसाङ् के़वाॽबाहाॽ लुम्मोलाम्, यहुदि थक्सुबाहाॽ ओगे़मे़प्पा सुहाङ्गे़म्बा थिक्, हाङ्ङिल्ले़ नुसि कुसुजासाबाहाॽ, थक्सुबा पोङ्मारे़ लागि के़हुॽबा थक्मोबाल्ले़ मा कुसुहाङ्मिबान् नु वेॽ तुक्पोङ् यक्युङ्बाहाॽ खुने़ॽ तेॽरुसिआङ् पे॥ 26 थक्कम्ब्राङ् के़मे़प्पा थक्मोबा नबुजरदाने़ल्ले़, खे़ङ्हाॽ के़रे़क् रिब्ला बेबिलोनबा हाङ्ङिल्लो तेॽरुसि॥ 27 हे़क्क्याङ् खे़प्मो हमात लाजेॽबा रिब्लाओ बेबिलोनबा हाङ्ङिल्ले़ खे़ङ्हाॽ से़प्मा पाङ्घुसि॥ अक्खेलॽरिक् यहुदाबा मनाहाॽ खुन्छिॽ आबाङे लाजेॽलाम् ते़म्मा तेॽमासिरे़ लागि मे़बाङ्घुसि॥ 28 नबुकदनेसरे़ल्ले़ ते़म्सु तेॽरुसिबा मना खानिःत्तिन् हाबा कन्हाॽरो— नुसिगेक्पा तङ्बेओ, ३,०२३ यहुदाबा मनाहाॽ, 29 नबुकदनेसरे़ल्ले़ हाङ्युक् चोगुबा थिबोङ्ङाङ् ये़त्छिगेक्पा तङ्बेओ यरुसले़मलाम् खुने़ॽ आरसाङ् यरिक् ८३२ मनाहाॽ ते़म्सुदेॽरुसि॥ 30 नबुकदनेसरे़ल्ले़ हाङ्युक् चोगुबा निबोङ्ङाङ् सुम्सिगेक्पा तङ्बेओ खुने़ॽ कम्ब्राङ्बा थक्मोबा नबुजरदाने़न् पाङ्घु फे़न्छु, खे़ल्ले़ आरसाङ् यरिक् ७४५ यहुदाबा मनाहाॽ ते़म्सुदेॽरुसि॥ मे़दे़म्सु मे़देॽरुसिबाहाॽ के़रे़क्ले़ ४,६०० मे़वये़रो॥ हाङ् हिम्सयङ्ले़ लागि इस्राइलरे़ कुनिङ्साङ् 31 यहुदाबा हाङ् यहोयाकिने़न् मे़दे़म्सु मे़देॽरुबा सुम्बोङ्ङाङ् नुसिगेक्पा तङ्बेओ, एबिल-मरोदके़न् बेबिलोनबा हाङ् पोःक्खे़॥ खे़ल्ले़ यहोयाकिने़न् कुलुङ्माॽ स्याःत् लॽरे़ हे़क्क्याङ् खे़न् तङ्बेबा थिबोङ्ङाङ् ने़त्छिगेक्पा लाःल्ले़ निबोङ्ङाङ् ङासिगेक्पा ये़न्नो खुने़ॽ पुङ्लाहिम्मोलाम् ले़रु॥ 32 खे़ल्ले़ यहोयाकिने़न् नुरिक् पाःन्छाःत्तु हे़क्क्याङ् बेबिलोनओ मे़दे़म्सु मे़देॽरुसिबा वेॽ हाङ्हाॽनुःल्ले़ खुने़ॽ थोधोक्पा ताक्फा पिरु॥ 33 खुने़ॽ यहोयाकिनरे़ पुङ्लाहिम्मो चाक्खुबा चाङ्ङिन् ले़क्मारे़ लागि कुसङ् चाङ्हाॽ पिरु हे़क्क्याङ् कुहिङ्हिङ् थारिक् हाङ्ङिल्ले़ कुदगि युङ्माआङ् कुजा चामा फाःक्तु॥ 34 हे़क्केलॽरिक् बेबिलोनबा हाङ्ङिल्ले़ खुने़ॽ थिक्याःन्धक् कुजा चामारे़ लागि कुयुङ्युङ् थारिक् कुभाॽयाङ् पिरु॥ कन् खुने़ॽ कुसिमा ये़न् थारिक् चक्मे़लॽरे़न्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.