यर्मिया 51 - लिम्बु1 यहवे दाङ्बे़ल्ले़ अक्खे पाःत्तुरो, “आङ्गाॽ बेबिलोन नु बेबिलनियाबा मनाहाॽ के़मे़ङ्बान् खे़ङ्हाॽरे़ खुन्छिॽ तक्ले़ङ्वाओ हुसुङ्लो॥ 2 वेॽ लाजेॽबा मनाहाॽ मे़दारो हे़क्क्याङ् चासिप् हे़क्के मे़ए़प्तुआङ् खे़न् माःङ्घा मे़भे़सु मे़देसुरो॥ खे़ल्ले़ कुदुक्खे चामा ये़न्नो खुने़ॽ कुदक्ले़ङ्वाओ पोःक्मारे़ लागि खे़ङ्हाॽ के़रे़क् पिसाङ्लाम्बा मे़दारो॥ 3 तोङ् के़आप्पाहाॽरे़ लिहाॽ खिङ्मा मे़ङ्घोसुन्लरो इग्र फे़जुम्भे़या याङ्सिङ्मा मे़ङ्घोने़न्लरो॥ खे़ल्ले़ के़दम्बा कुधक्सुबाहाॽआङ् मे़ले़रे़म्सिम्मिन्ने़ॽओ! खे़ल्ले़ कुधक्सुबाहाॽ खक्पे़त् मे़मे़क्लरो॥ 4 बेबिलोनिहाॽरे़ खुन्छिॽ लाजेॽओ खे़ङ्हाॽ मे़जोःन्नाङ् मे़से़रुसिरो, खे़ल्ले़ कुमाराम्हाॽओ मे़ज्ये़प्तु मे़से़रुसिरो॥ 5 थेआङ्भे़ल्ले़ आङ्गाॽ मुक्साम्दाङ्बा यहवे दाङ्बा इस्राइलबा सेसे निङ्वाॽफुमाङ्ङिल्ले़ आदक्ले़ङ्वाओ इस्राइल नु यहुदाःल्ले़ लायो चोगे़छुआङ् वाॽसिसाङ् आङ्गाॽ खे़ङ्हाॽ लाप्मे़म्भुए कत्तुङ्सिङ्लो॥” 6 बेबिलोनलाम् खे़त्तासिम्मे़ॽओ! खिनिॽ आबाङे से़ःप्पासिम्मे़ॽओ! खे़ल्ले़ कुघुम्दिङ्ङो खिनिॽ मे़ध्ये़म्मिन्ने़ॽओ! कङ्ग यहवे दाङ्बे़ल्ले़ कुले़क्वा हुङ्मा ये़म्लो, खे़ल्ले़ खोमा यारुबान् खुने़ॽ नुःक्तु पिरुरो॥ 7 यहवे दाङ्बे़ल्ले़ कुहुक्को बेबिलोने़न् लत्छा साम्म्याङ् खोर्या पोःक्खे़आङ् वाॽरो, लत्छा खोर्याःल्ले़ के़रे़क् इक्सादिङ् खाम्बेःक्मान् मसुआङ् वये़रो॥ बेबिलोने़ल्ले़ कुसेॽजःङ्वाःल्ले़ सुवाङ्हाॽ मयुसिरो, हे़क्क्याङ् कल्ले़ के़रे़क् के़नाङ्बा चोगुसिरो॥ 8 कर चघप् बेबिलोने़न्नाङ् थ्यःङ् पोःक्खे़आङ् ने़रो, खे़ल्ले़ कुलागि खिनिॽ हाबे़म्मे़ॽओ॥ खे़न् सिदाॽपाङ्दाॽ पिरे़म्मे़ॽओ॥ हाग खे़न् आल्लसाङ् वेःप्मा सुक्पिरो॥ 9 आनिगे सुक्तुम्बे़बा हे़क्केःल्ले़ग आनिगे खे़न् फाॽरुम्बे़बा वये़मे़न्लो, कर आल्ल खे़न् थेःल्ले़आङ् से़ःप्मा मे़सुक्तुन्लो॥ खे़न् पेःक्लरो, लाप्फुसे़म्मे़ॽओ॥ आल्ल खे़निॽ आप्फेक् लाजेॽओ नुःक्खे़म्मे़ॽओ॥ थेआङ्भे़ल्ले़ खे़ल्ले़ खोसुबा खुम्दिङ्ङिन् साङ्ग्राम्पेदाङ्ङो थारिक् के़त्लो, कन् साॽरिक् पयम् यम्बा चोक्लो कन् सिःक्मा सुक्मे़दे़त्ने़न्लो॥ 10 यहवे दाङ्बे़ल्ले़ कुदोःप्मा आलेःत्ते़आङ् वाॽरो॥ त्ये़म्मे़ॽओ, यहवे दाङ्बा आनिॽ निङ्वाॽफुमाङ्ङिल्ले़ आनिॽ लागि चोगुबा के़रे़क् पाःन्हाॽ यरुसले़ःम्मो उवा चोगुम्लो॥ 11 तोःङ्हाॽ याराप्ते़म्मे़ॽ! खोहाॽ फोःक्खे़म्मे़ॽओ! थेआङ्भे़ल्ले़ बेबिलोनरे़ कुदक्ले़ङ्वाओ लाङ्घेःक्मा नु खे़न् मे़ङ्मारे़ लागि यहवे दाङ्बे़ल्ले़ मादिबा हाङ्हाॽ हुसुसिआङ् वाॽरो॥ कुहिम् आसुत्थो के़जोःक्पाहाॽरे़ तक्ले़ङ्वाओ कङ्ग खुने़ॽ कुले़क्वा नुःक्मा ये़म्लो॥ 12 बेबिलोनरे़ कुदक्ले़ङ्वाओ थङ् निसान फोःक्खे़म्मे़ॽओ॥ इक्के़गोबाहाॽ के़धुम्बा चोगे़म्सिम्मे़ॽओ हे़क्क्याङ् इक्के़गोबाहाॽ खे़प्से़म्सिम्मे़ॽओ॥ लत्छा लाःक्युक्मादे़न् चोगे़म्मे़ॽओ, थेआङ्भे़ल्ले़ बेबिलोनरे़ कुदक्ले़वाओ चोःक्मा कोःत्तुबा के़रे़क् पाःन्हाॽ यहवे दाङ्बे़ल्ले़ के़त्तुरो॥ 13 खे़ने़ॽग लत्छा यम्बा ले़ङ्हङ्दे़न्निल्ले़ कुलुम्मो यम्बा वहःङ्ङिल्ले़ कुयाओ के़ने़बा ये़क्यक्ने़रो, कर के़मे़क्मान् त्ये़आङ् वाॽरो॥ के़हिङ्मा खिःन् मे़घक्तुआङ् वाॽरो॥ 14 मुक्साम्दाङ्बा यहवे दाङ्बान् माङ्हे़क्सिङ्ङाङ् वाॽरो, हे़क्क्याङ् खुने़ॽ कुमिङ्ङो माङ्हे़क् चोगुआङ् वाॽरो— “निःङ्घुक्वा पन्ज्याङ्माहाॽरे़ इक्ताप्हाॽ मे़बन्छुबा कुइसिक् कुये़क्यक्हाॽ निङ्मिहाॽरे़ सधे़क् मे़धिम्सुरो, हे़क्क्याङ् खे़ङ्हाॽ थङ् नाःम्मा इक्लाओ खे़ने़ॽ पिसाङ् तियाहा मे़लॽरो॥” निङ्वाॽफुमाङ्ङिल्ले़ कुनारा फोमा से़वासाम्लो 15 यहवे दाङ्बे़ल्ले़ कुमुक्साम्मिल्ले़ इक्सादिङ् खाम्बेःक्मान् चोगुरो, हे़क्क्याङ् कुसिक्कुम् निङ्वाःल्ले़ नावागे़न् चइःत् ने़स्सुरो॥ खुने़ॽ आप्फेक् कुघासिङ्निःप्मो खुने़ॽ ताङ्साङ्बान् खिङ्घुरो॥ 16 खुने़ॽ खे़रे़ङ्घुरुङ् के़लॽबो पाःत्ते़ल्ले़ ताङ्साङ्बे़न् च्वाःत्तिल्ले़ तिम्लो॥ खुने़ॽ इक्सादिङ् खाम्बेःक्मो खाॽमित् पोःक्ल याःन्दुरो॥ खुने़ॽ साःम्भेःन् वहित्तिन्नु सोरिक् पाङ्घुरो, हे़क्क्याङ् साम्मिःत्ते़न् कुयाङ्मादे़न्हाॽओनु ले़रुरो॥ 17 के़रे़क् मे़न्छाम् याप्मिहाॽ अदङ् मे़जोक्लो हे़क्क्याङ् सिक्कुम्दिङ् निङ्वाॽ मे़ङ्गत्तुन्लो! साम्म्याङ् युप्पा के़धक्पाहाॽ खुन्छिॽ मे़जोगुसिबा नावाइत्लाहाॽलाम् कुनामे़न्छाॽ मे़बोङ्लो, मे़जोगुबा याःम्बक्हाॽ इङ्ले़क्के चोक्लो॥ कन् नावाइत्लाहाॽओ सक्मा इग्र मुक्साम् मे़याक्ने़न्लो॥ 18 नावाइत्लाहाॽग थेनाधेबा मे़जोक्लो, खे़ङ्हाॽ एःप्मा के़युबा इङ्ले़क्के मे़जोक्लो! खासे़न् पोङ्मा ये़न्निन् निःप्मा ये़न्नो खे़ङ्हाॽ के़रे़क् खाप्पुथ्यःङ् मे़बोङ्लो॥ 19 निङ्वाॽफुमाङ्ङिङ्ग याकुबरे़ कुलक्लो खुने़ॽग कन् नावाइत्लाहाॽ हे़क्तङ्बा मेःन्लो! थेआङ्भे़ल्ले़ खुने़ॽए आबाङे कुलक् के़घोबा मनाहाॽनु सोसोरिक् के़रे़क् पाःन्हाॽरे़न् नावागे़न् चइःत्दाङ्बारो॥ खुने़ॽ कुमिङ्ग मुक्साम्दाङ्बा यहवे दाङ्बारो॥ यहवे दाङ्बे़ल्ले़ कुधवा 20 यहवे दाङ्बे़ल्ले़ अक्खे पाःत्तुरो, “खे़ने़ॽग आधङ् चोःक्मा थवाने़रो, आङ्गाॽ खे़ने़ॽलाम् सुवाङ्हाॽ चिधक् चिधक् थगुङ्सिङ्लो हे़क्क्याङ् यरिक् हाङ्जुम्हाॽ मे़क्खुङ्सिङ्लो॥ 21 आङ्गाॽ खे़ने़ॽलाम् अन्हाॽ नु अन् के़युक्पाहाॽ, हे़क्क्याङ् अन्लाधा नु अन्लाधा के़लोङ्बाहाॽ चिधक् चिधक् थगुङ्सिङ्लो॥ 22 आङ्गाॽ खे़ने़ॽलाम् ये़म्बित्छाहाॽ नु मे़न्छुमाहाॽ, काप्पोबा काम्मुमा मनाहाॽ नु हिन्जाॽबित्छाॽहाॽ, थाङ्बे़न् मनाहाॽ नु मे़न्छ्याहाॽ चिधक् चिधक् थगुङ्सिङ्लो॥ 23 खे़ने़ॽलाम् मे़ल्लुक्कम्बाहाॽ नु मे़ल्लुक् लुप्हाॽ, याःन्गे़मबा के़जाबाहाॽ नु से़गम्बा कुगाप्हाॽ, सुहाङ्युक्पाहाॽ नु सुहाङ्गे़म्बाहाॽ चिधक् चिधक् थगुङ्सिङ्लो॥ 24 “यरुसले़ःम्मो खे़ङ्हाॽरे़ आङ्गाॽ आमनाहाॽ मे़मे़त्तुसिबा के़रे़क् मे़न्वाॽमना पाःन्हाॽरे़ लागि आङ्गाॽ बेबिलोन नु बेबिलोनियाबा मनाहाॽओ आङ्गाॽ कुले़क्वा नुःक्तुङ्लो॥ 25 “इक्सादिङ् खाम्बेःक्मान् के़मे़ङ्बा मुक्साम्बा नाङ्जङ्लुङ्ङे़, ओमे़त्ते़ॽओ! आङ्गाॽ खे़ने़ॽ के़निङ्मिआ,” यहवे दाङ्बे़ल्ले़ पाःत्तुरो॥ “चन्जम्बादे़न्हाॽलाम् यो हिप्मा थामारे़ लागि आङ्गाॽ के़दक्ले़ङ्वाओ आहुक्किल्ले़ साःम्ने़रो॥ आङ्गाॽ मे़ङ्ने़सुःत्ने़आङ्, खे़ने़ॽ थे़माआङ् के़म्बोङ्ने़न्लो कर मिगे़दिक्पाआङ् के़लुम्सिङ्बा कुम्जिक् के़बोङ्लो॥ 26 खे़ने़ॽ सदादिङ्ले़ लागि चिजि खक्खक् के़बोङ्लो॥ खे़ने़ॽओ के़याक्पा लुङ्हाॽआङ् हिम् चोःक्मारे़ लागि आभे़ल्ले़आङ् ओगप् मे़बोङ्ने़न्लो॥ खे़ने़ॽ वरे़ङ्ले़ङ् के़म्दुःक् के़म्देरो,” यहवे दाङ्बे़ल्ले़ अक्खे पाःत्तुरो॥ 27 “मे़न्छाम् सुवाङ्हाॽओ मिक्सेन् निसान फोःक्खे़म्मे़ॽओ॥ थङ् इक्लान् मुक्खे़म्मे़ॽओ! बेबिलोनरे़ कुदक्ले़ङ्वाओ खे़ङ्हाॽ के़रे़क् मुरा मे़त्ते़म्सिम्मे़ॽओ! खे़ल्ले़ कुदक्ले़ङ्वाओ थक्मारे़ लागि खे़ङ्हाॽ यारिप् चोगे़म्सिम्मे़ॽओ! आरारातबा, मिन्निबा नु असकनजबा थक्सुबाहाॽ खिनिॽ फे़त्ते़म्सिम्मे़ॽओ॥ लत्छा थक्मोबा थिक् युक्तिङ् चोगे़म्मे़ॽओ, निःङ्खुःक्वाःल्ले़ कुबन्ज्याङ्माहाॽ हे़क्के आत्तातान्ने यरिक् अन्हाॽ तारे़म्सिम्मे़ॽओ! 28 मादिबा हाङ्हाॽरे़ हे़क्क्याङ् खे़ङ्हाॽरे़ खुन्छिॽ के़रे़क् सुहाङ्युक्पाहाॽ नु सुहाङ्गे़म्बाहाॽरे़ लाम्मे़लोसुसिबा, मे़न्छाम् सुवाङ्हाॽरे़ खुन्छिॽ थक्सुबाहाॽ, खे़ङ्हाॽरे़ युक् मे़जोगुबा के़रे़क् लाजेॽहाॽओ खे़ल्ले़ कुदक्ले़ङ्वाओ तारे़म्सिम्मे़ॽओ॥ 29 “इक्सादिङ् खाम्बेःक्मे़न् थुरुप्लुप्ना यङ्लो हे़क्क्याङ् कुदुक्मो खइक् खइक् इक्सिङ्लो, थेआङ्भे़ल्ले़ बेबिलोने़न् मे़ल्ले़ङ्सिङ्ङे ये़प्ल हे़क्क्याङ् खे़प्मो हाःत्ताङ् मे़न्युङ्ने़ल्ल फाॽआङ् कुदक्ले़ङ्वाओ यहवे दाङ्बे़ल्ले़ के़रे़क् पाःन्हाॽ निङ्सेक् चोगुआङ् वाॽरो॥ 30 खे़ल्ले़ मुक्कुम्बा कुधक्सुबाहाॽ याम्मो थङ् मे़न्जोःक्ने़न्लो॥ खे़ङ्हाॽ थक्सुबा यक्हाॽओ मे़युङ् मे़गन्लो, खे़ङ्हाॽरे़ खुन्छिॽ आःन्छिङ्मान् मये़बेरो॥ खे़ङ्हाॽ मे़न्छुमा हे़क्तङ्मा मे़बोःक्खे़आङ् मे़वाॽरो॥ लाजेॽ के़लिबाहाॽरे़ हिम्हाॽ मिमे़धिक्खुआङ् ने़रो हे़क्क्याङ् ये़क्यक्कोबा पयम् लाम्धेःप्पाहाॽ मे़लुःन्दुरो॥ 31 कुये़क्यक्किन् हुक्काप् मे़जोगु लॽरिक् हाङ्ङिन् मे़प्मारे़ लागि इङ्घङ् के़साबाहाॽ पजात् मे़जात्ल लत्छा के़लोःक्पालाम् वेॽओ इङ्घङ्ङिन् मे़से़सुरो॥ 32 के़रे़क् खे़त्छिङ्मा लाम्हाॽ मे़साक्तुआङ् ने़रो॥ वजिम्बेॽहाॽओ मि मे़गेःत्तुआङ् ने़रो, हे़क्क्याङ् थक्सुबाहाॽ साॽरिक् मे़गि मे़यङ्लो॥” 33 मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुरो— “बेबिलोने़न् खा चिराक् चिराक् लाःक्मारे़ लागि, चाधाम्मादे़न्नो के़ने़बा मासि हे़क्तङ्बा चोक्लो॥ आल्ल सप्फाधिक् एगाङ्ले़ खे़न् चासुम्मान् हेःक्सिङ्लो॥” 34 “बेबिलोनबा हाङ् नबुकदनेसररे़ चदेसिगे़आङ् वाॽरो हे़क्क्याङ् आनिगे चिधक् चिधक् थगिगे़आङ् आनिगे थुम्मिन् लःत्तुदेसुआङ् वाॽरो॥ यम्बा आजाजाबे़ल्ले़ हे़क्के खुने़ॽ लरिगे़देसिगे़आङ् वाॽरो खे़ब्याङ् खुने़ॽ कुसाप्पोःक्किन् आनिगे याङ्साकुन्धेःल्ले़ थिम्सुआङ् वाॽरो॥ आनिगे आबाङे लाजेॽलाम् खुने़ॽ लाःक्कात् लाप्फुसिगे़आङ् वयिगे़रो,” 35 सियोनबा मनाहाॽरे़ अक्खे मे़बाःत्तुरो॥ “आनिगे तुक्खे चे़इगे़र याःन्दिगे़बा कुइसिक् बेबिलोने़न् तुक्खे चार याःन्दे़म्मे़ॽओ॥ आनिगे माक्खिॽ वायुसुबाल्ले़ कुले़क्वाओ बेबिलोनबा मनाहाॽरे़ मे़हुङुर याःन्दे़म्से़ॽ,” यरुसले़मरे़ पाःत्तुरो॥ यहवे दाङ्बे़ल्ले़ इस्राइले़न् फाॽरु 36 यहवे दाङ्बे़ल्ले़ यरुसले़ःम्मिन् अक्खे मे़त्तुरो, “खिनिॽ तुःन्देॽ ओगे़मे़प्पा खासे़न्लोःम्बा पोङ्ङारो, हे़क्क्याङ् आङ्गाॽ खिनिॽलाम् कुले़क्वा नुःक्तुङ्लो॥ खे़ल्ले़ कुवाबुन्दाक्वाहाॽनु सोसोरिक् खे़ल्ले़ कुवहःङ्ङिन् चप्प्रे़क् चप्ल याःन्दुङ्लो, 37 हे़क्क्याङ् बेबिलोने़न् स्याल याङ्दःक्हाॽ वाॽमादे़न् खाप्पुथ्यःङ् के़बोङ्बान् के़लुम्सिङ्बाआङ् के़ने़बा पोङ्लो॥ खे़प्मो ताम्भुङ् थक्साहाॽ याङ्मे़धोःक्लो॥ खे़न् आत्तिन्हाॽआङ् मे़न्युङ्मनाबादे़न्, यङ्मा आसिसिबा नु आप्तिक् चाहाक् पोङ्लो॥ 38 के़धुम्बा खिरिङ्बाहाॽ कुइसिक् खे़ल्ले़ कुमनाहाॽ सोरिक् हागाःक् हागाःक् मे़लॽरो॥ खिरिङ्बाल्ले़ कुस्साहाॽ हे़क्के खे़ङ्हाॽ ङ्यार्र ङ्यार्र मे़लॽरो॥ 39 हे़क्क्याङ् खे़ङ्हाॽ खुन्छिॽ के़रे़क् सेॽजःङ्वाःन्नु खुन्छिॽ साॽरिक् सिक्पोःक्काङ् मे़ने़ःल्ले़, आङ्गाॽ वेॽ परिक्पा साभःङ्जा थिक् खे़ङ्हाॽरे़ खुन्छिॽ लागि यारिप् चोगुङ्लो॥ आङ्गाॽ खे़ङ्हाॽ मे़जोःन्नाङ् मे़इम्ल थारिक् मसुङ्सिङ्लो खे़ब्याङ् खे़ङ्हाॽ आप्फाल्ले़आङ् मे़न्छोने़न्लो,” यहवे दाङ्बे़ल्ले़ पाःत्तुआङ् वाॽरो॥ 40 “थुःम्बाहाॽ नु मे़ःन्दाहाॽ सिदुङ्जभा चोःक्मनासिबा हे़क्के, मे़ल्लुक्साःत्हाॽ से़प्मनासिबा हे़क्के आङ्गाॽ खे़ङ्हाॽ यो युरुङ्सिङ्लो॥ 41 “काक् इक्सादिङ् खाम्बेःक्माल्ले़ कुनारा फोसुबा पयम् यम्बा बेबिलोन, बेबिलोने़न् आक्ख्याङ् हुक्काप् मे़जोगुबे! आल्ल मे़न्छाम् सुवाङ्हाॽरे़ खुन्छिॽ लुम्मो खे़न् लत्छा किप्मागे़घुबा नियारा पोःक्खे़आङ् ने़रो॥ 42 वरःङ्ङिन् बेबिलोने़ल्ले़ कुसम्मो पोरे़थाङे़आङ् ने़रो, के़हुःक्पा वाभे़ल्ले़ङ्हाॽरे़ खे़न् ते़प्तुरो॥ 43 खे़प्मोबा ये़क्यक्हाॽ आल्लो मे़गे़आङ् ने़रो, हाःत्ताङ् लाङ्मे़ङ्घेःक्मनाबा इग्र च्वाःत् के़होप्पा मुरे़क् खारे़क्पा लाजेॽ पोःक्खे़आङ् ने़रो॥ 44 हे़क्क्याङ् बेबिलोनबा बेल माङ्ङिन् खुम्दिङ् पिरुङ्लो खे़ब्याङ् खे़ल्ले़ चबा के़रे़क् पे़सुर याःन्दुङ्लो॥ आल्लआङ्धो मे़न्छाम् सुवाङ्हाॽ मे़न्दाने़न्लो हे़क्क्याङ् खे़न् से़वा मे़म्मे़त्तुन्लो॥ बेबिलोनबा लुङ्धाक्हाॽ लुःन्दे़आङ् ने़रो! मे़दे़म्सु मे़देॽरुसिबाहाॽरे़ लागि इङ्घङ् 45 आङ्गाॽ आमनासे, खे़प्मोलाम् लःन्दे़म्मे़ॽओ, बेबिलोनलाम् खिनिॽ खे़त्तासिम्मे़ॽओ॥ खिनिॽ आबाङे से़ःप्पासिम्मे़ॽओे! यहवे दाङ्बे़ल्ले़ साॽरिक् कुसिक् पोःक्मोलाम् पिन्दे़म्मे़ॽओ॥ 46 कर खिनिॽ यङ्मा मे़स्ये़म्मिन्ने़ॽओ, थक्सुबाहाॽ निःत्ताङ् मे़गे़रे़ के़लॽबा थिक्सिगेक्पा हयङ् किल्लिङ्बा इङ्घङ्ङिन् के़घे़प्सुम्मिल्ले़ मे़गिसे़म्मिन्ने़ॽओ॥ थेआङ्भे़ल्ले़ हयङ् किल्लिङ्बा इङ्घङ्हाॽ तङ्बेधक्मा तारो॥ लाम्लोबाहाॽ थिक्किन् वेॽइल्ले़ कुदक्ले़ङ्वाओ ते़न्धङ् मे़जोःक्किल्ले़ खेमा थक्मा से़त्छिङ्मारे़ लाजेन् पःङ्लो॥ 47 थेआङ्भे़ल्ले़ कन् पयम् यम्बा बेबिलोन ये़क्यक्किन् नु खे़ल्ले़ के़रे़क् कुनावाइत्लाहाॽ खुम्दिङ् पिमा ये़म्मिन् से़क्खाए तार पत्लो॥ खे़ल्ले़ काक् कुलाजेन् सिरिङ्ममो थारो, हे़क्क्याङ् के़सिबा कुमनाहाॽ माराम्हाॽओ मे़ने़रो॥ 48 खे़ब्याङ् साङ्ग्राम्पेदाङ् नु इक्सादिङ् खाम्बेःक्मो के़वाॽबा के़रे़क् पाःन्हाॽ मे़सःत्लो, थेआङ्भे़ल्ले़ थाङ्गे़त् पिसाङ्लाम् बेबिलोने़न् के़मे़ङ्बा थक्सुबाहाॽ मे़युरो,” यहवे दाङ्बे़ल्ले़ पाःत्तुरो॥ 49 “बेबिलोने़ल्ले़ इस्राइलबा मनाहाॽ नु काक् इक्सादिङ् खाम्बेःक्मोबा मनाहाॽ स्ये़रुसिरो, हे़क्केलॽरिक्के खे़ल्ले़ कुमनाहाॽ से़प्मासिए पोङ्लो॥ 50 ताभेलाम् के़घे़त्छिबासे़, लाःक्कात् लःन्दे़म्मे़ॽओ! मे़ये़बे़म्मिन्ने़ॽ, हे़क्क्याङ् ओमे़मयिन्ने़ॽओ, खिनिॽ के़सुक्तुम्मिल्ले़ खे़त्तासिम्मे़ॽओ! माःङ्घाबा लाजेॽओ खिनिॽ के़वयिसाङ्, यहवे दाङ्बान् निङ्वाॽ इःत्ते़म्मे़ॽओ, हे़क्क्याङ् यरुसले़ःम्मो के़ने़बा खिनिॽ पाङ्भेॽइन् निङ्वाॽ लिङ्घे़म्मे़ॽओ॥” 51 मनाहाॽरे़ मे़बाःत्तुॽ, “आनिगे सिरिङ्ममो थ्ये़ॽइगे़रो॥ आनिगे मे़जे़क्खिगे़ हे़क्क्याङ् कुनामे़न्छाॽ मे़मे़त्तिगे़रो थेआङ्भे़ल्ले़ यहवे दाङ्बे़ल्ले़ कुहिम्मिन् वेॽ लाजेॽबा मनाहाॽरे़ आसुत्थो मे़जोगुआङ् युङ्लो॥” 52 यहवे दाङ्बे़ल्ले़ पाःत्तुॽ, “पोङ्लो, कर बेबिलोनबा नावाइत्लाहाॽ मे़क्खुङ्सिङ्ङिल्ले़ ये़म्मिन् तारो॥ के़गाःम्बा कुमनाहाॽ मे़याःप्पान् लाजेॽओ के़रे़क् खे़म्दे़त्लो॥ 53 बेबिलोने़न् साङ्ग्राम्पेदाङ् यारिक् थाःङ्धाःङ् के़त्छाङ् हे़क्क्याङ् कुयक्हाॽ साॽरिक् के़धुम्बा चोगुसाङ्, खे़न् नाप्मारे़ लागि आल्लसाङ् निङ्मिहाॽ पाङ्घुङ्सिङ्लो॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो!” बेबिलोनओ वेॽ मे़क्मासिमा 54 “खे़प्से़म्मे़ॽ! बेबिलोनिहाॽरे़ खुन्छिॽ लाजेॽओलाम् पयम् यम्बा मे़क्मासिमा इक्लान्, बेबिलोनरे़ कुहाःप्मा कुजिःङ्मान् खे़प्से़म्मे़ॽओ॥ 55 थेआङ्भे़ल्ले़ यहवे दाङ्बे़ल्ले़ बेबिलोने़न् मे़क्खुर पत्लो॥ खुने़ॽ खे़ल्ले़ यम्बा कुइक्लान् चिजि ये़म्ये़म् चोगुरो॥ के़रे़क् ये़क्यक्को थङ् के़बोङ्बा इक्लान्, वाभे़ल्ले़ङ् हे़क्तङ्बा निङ्मिहाॽरे़ फुत्लुम् थ्यःङ् मे़जोगुरो॥ 56 के़मे़ङ्बा निङ्मिहाॽ बेबिलोनरे़ कुदक्ले़ङ्वाओ मे़दारो, के़धुम्बा कुधक्सुबाहाॽ मे़दे़म्सुसिरो, हे़क्क्याङ् खुन्छिॽ फे़जुम्भे़या खजुम्घयाहाॽ खे़ङ्हाॽरे़ खुन्छिॽ हुक्कोए मे़ए़क्खु मे़बिरुसिरो॥ थेआङ्भे़ल्ले़ यहवे दाङ्बा निङ्वाॽफुमाङ्ङिन् साम्योबा खुम्दिङ् के़बिबारो, कुले़क्वाग आभे़ल्ले़साङ् के़रे़क् के़नुःक्पा चोक्लो॥ 57 आङ्गाॽ खे़ल्ले़ कुधक्सुबाहाॽ नु कुहाङ्युक्पाहाॽ, कुसुहाङ्युक्पाहाॽनु सोसोरिक् सिक्कुम्साबा कुमनाहाॽ, मसुङ्सिङ्लो॥ खे़ङ्हाॽ मुरुक् खारुक् मिक्युमो मे़धारो हे़क्क्याङ् आप्फाल्ले़आङ् मे़न्छोने़न्लो!” मुक्साम्दाङ्बा यहवे दाङ्बा, हाङ्ङिल्ले़ पाःत्तुरो॥ 58 मुक्साम्दाङ्बा यहवे दाङ्बे़ल्ले़ अक्खे पाःत्तुरो, “बेबिलोनबा के़धुङ्बा लुङ्धाक्हाॽ खाम्बाङ्ङो कुदङ्बा ने़ने़ मे़दङ्घुरो, हे़क्क्याङ् खे़ल्ले़ आत्तातान्ने यम्बा कुलाम्धेःप्पाहाॽ मिमे़धिक्खुरो॥ यरिक् लाजेॽहाॽलाम् हिम् के़जोःक्पाहाॽरे़ मे़जोगुबा खुन्छिॽ याःम्बक्किन् हने़रक् पोङ्लो, थेआङ्भे़ल्ले़ खे़ङ्हाॽरे़ खुन्छिॽ याःम्बक्किन् मिःल्ले़ खाप्पुथ्यःङ् चोगुरो!” बेबिलोनओ यर्मियाःल्ले़ इङ्घङ् हाङु 59 मासेयाहरे़ कुम्मे़न्छाॽ, नेरियाहरे़ कुस्सा सुहाङ्गे़म्बा सरायाहन् यहुदाबा हाङ् सिदकियाहःन्नु बेबिलोन पेःल्ले़ माङ्निङ्वाॽपान् के़बाःप्पा यर्मियाःल्ले़ कन् इङ्घङ्ङिन् खुने़ॽ मे़त्तु॥ सिदकियाहःल्ले़ हाङ्युक् चोगुबा लिसिगेक्पा तङ्बेओ कन् पोःक्खे़आङ् वये़॥ 60 बेबिलोनओ हाराए तामा इःत्ते़आङ् वये़बा कप्मो साप्ते़आङ् के़बप्पा के़रे़क् मे़क्मासिमा किप्मा के़घुबा पाःन्हाॽ यर्मियाःल्ले़ लत्छा साप्लाथःङ्ङो साप्तुङ्आङ् वये़॥ 61 खुने़ॽ सरायाहन् मे़त्तु, “खे़ने़ॽ बेबिलोन के़रे़ॽआङ् कप्मो साप्ते़आङ् के़बप्पा के़रे़क् पाःन्हाॽ यम्बा इक्लाओ निरे़ॽ॥ 62 खे़ब्याङ् मे़त्ते़से़ॽ, ‘यहवे दाङ्बाए, खे़ने़ॽ के़बाःत्तुआङ् वाॽ, खे़ने़ॽ बेबिलोने़न् के़मे़क्खुॽ खे़ल्ले़चोगुल्ले़ कॽयो मनाहाॽआङ् मे़न्याःक्ने़न्, थक्साहाॽआङ् मे़न्याःक्ने़न्॥ खे़न् सदादिङ् थेआङ् मेःन्ने कुघाले़म् ने़गन्॥’ 63 खे़ने़ॽ साप्लाथःङ्मे़न् के़निरु के़सुरुआङ् लत्छा लुङ्धिक् कॽयो इघेःक्खे़ॽ हे़क्क्याङ् युफ्रेतिस वहःङ्ङो लाप्फुसे़ याक्ते़ॽ॥ 64 खे़ब्याङ् मे़त्ते़से़ॽ, ‘आङ्गाॽ खे़ल्ले़ कुसम्धाङ् तारुङ्बा मे़क्मा सिमे़ल्ले़ चोगुल्ले़ आम्भा कम्भलॽरिक्के आभे़ल्ले़आङ् पोःक्मा मे़न्छुक्के थारिक् बेबिलोने़न् नु कुमनाहाॽ मे़निःम् मे़लात्॥’” यर्मियाःल्ले़ कुइङ्घङ्हाॽ आम्भा कप्मोए नुप्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.