यर्मिया 50 - लिम्बुबेबिलोनरे़ लागि इङ्घङ् 1 बेबिलोन नु बेबिलोनिहाॽरे़ खुन्छिॽ लाजेःल्ले़ कुयाःम्बेओ यहवे दाङ्बे़ल्ले़ कुइङ्घङ्ङिन् माङ्निङ्वाॽपान् के़बाःप्पा यर्मियाओ के़रे़॥ 2 यहवे दाङ्बे़ल्ले़ अक्खे पाःत्तुरो, “इक्सादिङ् खाम्बेःक्मोबा के़रे़क् सुवाङ्हाॽ खे़ने़ॽ कन् इङ्घङ्ङिन् मे़त्ते़से़ॽओ, हे़क्क्याङ् थे़मा पाःन्निन्नाङ् मे़माॽरे़न्ने़ॽओ॥ बेबिलोने़न् हुक्काप् पोङ्ॽ फाॽआङ् के़रे़क् मनाहाॽ मे़प्मासिरे़ लागि मिक्सेन् पिमा निसान ये़प्से़ॽओ! खे़ल्ले़ कुजइःत्हाॽ नु नावाइत्लाहाॽ कुम्जिक्मा मे़बोङ्लो॥ खे़ल्ले़ कुमाङ् बेल नु मरोदकहाॽ साॽरिक् कुनामे़न्छाॽ मे़बोङ्लो॥ 3 थेआङ्भे़ल्ले़ थाङ्गे़त् लाम्बा लत्छा सुवाङ् थिक्ले़ खुने़ॽ फत्तुरो खे़ब्याङ् खे़प्मो याम्मो हाःत्ताङ् मे़न्युङ्मनाबा मुरे़क् खारे़क् खाप्पुथ्यःङ् पोङ्ल चोगुरो॥ के़रे़क् मनाहाॽ मे़बेःक् मे़घे़त्लो, मे़न्छाम् याप्मि नु थक्साहाॽ मे़घे़त्छिङ् मे़बेःक्लो॥” इस्राइलिहाॽ मे़नुःङ् मे़दाःॽ 4 यहवे दाङ्बे़ल्ले़ अक्खे पाःत्तुरो, “खे़न् के़दाबा ये़न्हाॽओ, इस्राइलबा मनाहाॽ यहुदाबा मनाहाॽनु सोरिक् खुन्छिॽ लाजेॽओ मे़नुःङ् मे़दारो॥ यहवे दाङ्बा खुन्छिॽ निङ्वाॽफुमाङ्ङिन् मे़गोःत्तुर खे़ङ्हाॽ मे़हाःप् मे़जिःङ्ल मे़दारो॥ 5 खे़ङ्हाॽरे़ यरुसले़म पेःक्मा लाम् सेःन्मे़दोसुरो हे़क्क्याङ् याम्मो हिम्मो नुःङ्मा मे़हेःक्लो॥ खे़ङ्हाॽरे़ आप्फाल्ले़आङ् निङ्वाॽ मे़म्मुःम्मनाबा मे़न्नुप्मनाबा माङ्हुप् आङ्गाॽ यहवे दाङ्बे़न्नु मे़जोगुरो॥ 6 “आमनाहाॽ के़माबा मे़ल्लुक् मे़बोःक्खे़आङ् मे़वाॽरो, खे़ङ्हाॽरे़ खुन्छिॽ मे़ल्लुक्कम्बाहाॽरे़ खे़ङ्हाॽ लाम्मे़भोःत्छुसिआङ् मे़वाॽरो हे़क्क्याङ् कोःक्मा फाङ्जङ् थे़गु माङ्वाहाॽओ खे़ङ्हाॽ मे़मये़र मे़हिसु मे़देसुसिआङ् मे़वाॽरो॥ खे़ङ्हाॽरे़ खुन्छिॽ लाम्मिन् मे़मासु मे़देसुरो खे़ब्याङ् आप्फेक् मे़ल्लुक् लुप्पो नुःङ्मा तामारे़ लागि खुन्छिॽ लाम्मिन् निङ्वाॽ इःप्मा मे़न्छुक्तुन्लो॥ 7 खे़ङ्हाॽ के़दुम्बा के़रे़क्ले़ खे़ङ्हाॽ मे़लरुसिरो॥ खे़ङ्हाॽरे़ खुन्छिॽ निङ्मिहाॽरे़ अक्खे मे़बाःत्तुरो, ‘आनिगे खे़ङ्हाॽ फत्तुम्सिम्बे़बाओ हे़न्नाङ् फे़न् याःम्बक् चोगुम्बे़बा होप्लो, थेआङ्भे़ल्ले़ खे़ङ्हाॽरे़ से़क्खाबा खुन्छिॽ नाःम्सिङ्मादे़न्, यहवे दाङ्बे़ल्ले़ कुदक्ले़ङ्वाओ, हे़क्क्याङ् खुन्छिॽ थाःक्थे़बाहाॽरे़ खुन्छिॽ निङ्साङ्ङिल्ले़ तक्ले़ङ्वाओ खे़ङ्हाॽरे़ लायो मे़जोगुआङ् वाॽरो॥’ 8 “कर आल्ल, बेबिलोनलाम् खे़त्तासिम्मे़ॽओ! बेबिलोनिहाॽरे़ खुन्छिॽ लाजेन् ले़रे़म्मे़ॽओ! थक्सा लुप्पो लाम्लोबा कुम्बाबा मे़ःन्दाहाॽ कुइसिक्, आमनाहाॽ खुन्छिॽ हिम्मो याम्मो लाम्लोसे़म्सिम्मे़ॽओ॥ 9 थेआङ्भे़ल्ले़ थाङ्गे़त् ले़प्माङ्लाम् यम्बा सुवाङ्बा थक्सुबाहाॽ फोःक्खुङ्सिङ्ल पत्तारो॥ बेबिलोने़न् फप्मारे़ लागि थक्सुबाहाॽओ खे़ङ्हाॽ मे़भुङ्सिङ्लो॥ हे़क्क्याङ् खे़न् लाजेन् हुक्को मे़धासुरो॥ निङ्मिहाॽरे़ खुन्छिॽ तोःङ्हाॽ कुदोःप्मा पेःक्लो, खे़ङ्हाॽरे़ मे़सोःक्तुबान् मे़न्याङ्ङे मे़न्आबुन्लो! 10 मे़नाप्तुसिबा पाःन्हाॽरे़ खुन्छिॽ निङ् मे़ले़ॽरुन्ल थारिक् के़भप्पाहाॽरे़ बेबिलोनियाहाॽ मे़नाप्तुसिरो॥ आङ्गाॽ यहवे दाङ्बे़ल्ले़ कन् पाःत्तुङ्ङाङ् वाॽरो॥” बेबिलोने़न् मे़क् 11 “सेगुङ्सिङ्बा आमनाहाॽ के़नाप्तुम्सिम्लो, खिनिॽ के़सःत्तिॽ हे़क्क्याङ् ये़ये़ के़लॽरिरो॥ ने़ने़बादे़न् पित् चाराम्दे़न्नो पित्सात्तिन् हे़क्के खिनिॽ पित्चाक् पित्चाक् के़बिन्दिरो हे़क्क्याङ् कुम्बाबा अन्निन् हे़क्के इहे़हे़ के़लॽरिरो॥ 12 कर खिनिॽ आबाङे लाजेःङ्ग सिरिङ्ममा नु नाधामो थारो॥ खिनिॽग मुरे़क् खारे़क् थेआङ् के़होप्पा, च्वाःत् के़होप्पा नु चिजि खक्खक्पा लाजेॽबा के़रे़क्नुःल्ले़ चुःक्पा सुवाङ् के़बोक्खिरो॥ 13 “यहवे दाङ्बान् कुसाक्के़न् पोगे़बाल्ले़ चोगुल्ले़, बेबिलोने़न् मुरे़क् खारे़क्पा थेनाधेबा लाजेॽ पोङ्लो॥ खे़प्मोलाम् के़बोङ्बाआङ् के़बेःक्पा खे़ङ्हाॽ के़रे़क् चिजिङ् यङ्मा मे़सिरो हे़क्क्याङ् खाप्पुथ्यःङ् पोःक्खे़बान् मे़निसुआङ् खे़ङ्हाॽरे़ खुन्छिॽ मुरान् हा मे़मे़त्तुरो॥ 14 “ओवा, खिनिॽ के़रे़क् पिसाङ्बा सुवाङ्से, बेबिलोने़न् फप्मारे़ लागि मुन्नासिम्मे़ॽओ॥ खिनिॽ तोङ् लि के़आप्पाहाॽरे़ खे़न् मे़आबुररो, तोःङ्हाॽ लत्छाआङ् मे़न्नन्छुन्लरो॥ थेआङ्भे़ल्ले़ यहवे दाङ्बे़ल्ले़ कुदक्ले़ङ्वाओ खे़ल्ले़ लायो लासोत् चोगुआङ् वाॽरो॥ 15 के़रे़क् पिसाङ्लाम् खे़ल्ले़ कुदक्ले़ङ्वाओ थङ् चोःक्मा इक्लान् लःत्ते़म्मे़ॽओ! ओमे़त्ते़म्मे़ॽ! खुने़ॽ खिनिॽ हुक्को हुक्सुप्सिङ्लो! खे़ल्ले़ कुलुङ्धाक्हाॽ लुःन्दे़आङ् ने़रो॥ कङ्ग यहवे दाङ्बे़ल्ले़ कुले़क्वा नुःक्तुबारो, खे़ल्ले़चोगुल्ले़ खिनिॽ खे़ल्ले़ कुले़क्वा नुःक्ते़म्मे़ॽओ॥ खे़ल्ले़ वेॽहाॽ मे़त्तुसिबा हे़क्केए खिनिॽ खे़न् ताप्फे़ःल्लिक् मे़त्ते़म्मे़ॽओ! 16 कुजा के़हेॽबाहाॽ के़रे़क् बेबिलोनलाम् फे़त्ते़म्सिम्मे़ॽओ, कुजा के़सुम्बाहाॽ के़रे़क् पाङ्घे़म्देसे़म्सिम्मे़ॽओ॥ निङ्मिःल्ले़ कुदाभेःल्ले़ चोगुल्ले़ के़रे़क् मे़घे़त्छिङ् मे़बेःक्लो हे़क्क्याङ् खुन्छिॽ आप्फेक् लाजेॽहाॽओ खे़ङ्हाॽ याम्मो मे़नुःङ् मे़बेःक्लो॥” निङ्वाॽफुमाङ्ङिल्ले़ कुमनाहाॽरे़ खुन्छिॽ निङ्साङ् 17 “इस्राइलिहाॽग खिरिङ्बाहाॽरे़ मे़से़सुसिआङ् के़वाॽबा मे़ल्लुक्हाॽ हे़क्तङ्बा मे़जोक्लो॥ तगि खे़ङ्हाॽ अस्सुरबा हाङ्ङिल्ले़ चसिरो॥ याङ्सि बेबिलोनबा हाङ् नबुकदनेसररे़ खे़ङ्हाॽरे़ खुन्छिॽ ये़प्पाहाॽ यःप्सु पिरुसिरो॥” 18 खे़ल्ले़चोगुल्ले़, मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुरो, “आङ्गाॽ अस्सुरबा हाङ्ङिन् खुम्दिङ् पिरुङ्बा हे़क्के आल्ल आङ्गाॽ बेबिलोनबा हाङ्ङिन् नु खुने़ॽ कुलाजेःन्नाङ् खुम्दिङ् पिरुङ्लो॥ 19 कर्मेल नु बासानबा चाराम्मादे़न्हाॽओ कुजा चामारे़ लागि याम्मो थिक्ले़ङ् खुने़ॽ कुसिक् एःप्मारे़ लागि हे़क्क्याङ् एफ्राइम नु गिलादबा कोःक्मा फाङ्जङ्ङो, आङ्गाॽ इस्राइले़न् खुने़ॽ आप्फेक् कुलाजेॽओ आङ्गाॽ याम्मो नुःक्तुङ् तारुङ्लो॥” 20 यहवे दाङ्बे़ल्ले़ अक्खे पाःत्तुरो, “खे़न् ये़न्हाॽओ इस्राइलओ इग्र यहुदाओ लायो लासोत् थे़माआङ् खोमे़दे़त्ने़न्लो, थेआङ्भे़ल्ले़ ताङ्घुङ्सिङ्बा के़दाङ्बा के़याःक्पाहाॽ आङ्गाॽ ले़प्मि पिरुङ्सिङ्लो॥” निङ्वाॽफुमाङ्ङिल्ले़ बेबिलोने़न् खुम्दिङ् पिरु 21 “मरातैमबा मनाहाॽरे़ खुन्छिॽ तक्ले़ङ्वाओ नु पकोदबा मनाहाॽरे़ खुन्छिॽ तक्ले़ङ्वाओ, आङ्गाॽ आधक्सुबासे, खिनिॽ थो पेगे़म्मे़ॽओ॥ आङ्गाॽ खिनिॽ इङ्जाङ् पिनिङ्बा कुइसिक्, खे़ङ्हाॽ नाःत्ते़म्सिम्मे़ॽ, से़रे़म्सिम्मे़ॽओ, खे़म्ब्याङ् खे़ङ्हाॽ खक्पे़त् मे़क्खे़म्सिम्मे़ॽओ,” यहवे दाङ्बे़ल्ले़ पाःत्तुरो॥ 22 “मे़क्मासिमा पयम् यम्बा इक्ला नु थङ्ङोबा हयङ् किल्लिङ्ङिन् लाजेॽओ खे़म्दे़त्लरो॥ 23 के़रे़क् इक्सादिङ् खाम्बेःक्मोबा के़रे़क्नुःल्ले़ मुक्साम्साबा थवा बेबिलोने़न्, हे़रे़आङ् कुम्जिक्मा पोःक्खे़आङ् ने़रो॥ मे़न्छाम् सुवाङ्हाॽरे़ खुन्छिॽ लुम्मो बेबिलोने़न् मुरे़क् खारे़क् चिजि खक्खक् पोङ्लो! 24 बेबिलोने, खे़ने़ॽ खे़प्से़ॽओ, आङ्गाॽ खे़ने़ॽ के़लागि चे़न् के़सुङ्ङाङ् ने़रो॥ खे़ने़ॽ के़म्दे़म्से़आङ् वाॽरो, थेआङ्भे़ल्ले़ यहवे दाङ्बे़ल्ले़ कुदक्ले़ङ्वाओ खे़ने़ॽ ते़न्धङ् के़जोगे़आङ् वाॽरो॥ 25 यहवे दाङ्बे़ल्ले़ कुभे़युम्हाॽ फिःक्खुआङ् वाॽरो, हे़क्क्याङ् खुने़ॽ साॽरिक् कुसिक् पोःक्मो खे़न् फे़जाफे़युम्हाॽ लःत्तुआङ् वाॽरो॥ बेबिलोनिहाॽरे़ खुन्छिॽ लाजेॽओ मुक्साम्दाङ्बा यहवे दाङ्बे़ल्ले़ याःम्बक् चोःक्मा कत्तुरो॥ 26 ओवा, माःङ्घा माःङ्घाबा लाजेॽहाॽलाम् खे़ल्ले़ कुदक्ले़ङ्वाओ त्ये़म्मे़ॽओ॥ खे़ल्ले़ कुजा युङ्मा थाःङ्हाॽ यसे़म् पिरे़म्मे़ॽओ॥ खे़ल्ले़ कुहिम्हाॽ नु कुलुङ्धाक्हाॽ उःक्पे़त् लुम्सिङ्ङाङ् ने़र लुःन्दे़म्देसे़म्मे़ॽओ॥ खे़न् युम्रे़क् मे़क्खे़म्मे़ॽओ, खे़ब्याङ् कुधे़माधिक्काङ् मे़ले़रे़म्मिन्ने़ॽओ! 27 खे़ल्ले़ कुम्बाबा कुबित्हाॽआङ् मे़क्खे़म्सिम्मे़ॽओ खे़ङ्हाॽआङ् खुन्छिॽ लागि किप्मा के़घुबा चोक्लो! खे़ङ्हाॽ के़रे़क् से़राम्सिम्मे़ॽओ! खे़ङ्हाॽग मे़जिःत्ते़ मे़स्ये़रो! थेआङ्भे़ल्ले़ बेबिलोनरे़ कुये़न्निन् निःप्मा ये़म् त्ये़आङ् वाॽरो॥ 28 खुने़ॽ कुहिम् के़लुःम्बाहाॽरे़ खुन्छिॽ तक्ले़ङ्वाओ यहवे दाङ्बा आनिॽ निङ्वाॽफुमाङ्ङिल्ले़ आक्खेलॽरिक् खे़ङ्हाॽ कुले़क्वा नुःक्तु पिरुसिआङ् वाॽ, खे़ङ्हाॽरे़ यरुसले़ःम्मो मे़बाःत्तुबा कुइसिक् बेबिलोनलाम् के़घे़त्छिङ्बा मनाहाॽ खे़प्से़म्सिम्मे़ॽओ॥ 29 “तोङ् लि के़याङ्बाहाॽ बेबिलोन मे़दार फाॽआङ् खिनिॽ इङ्घङ् हाक्ते़म्सिम्मे़ॽओ॥ ये़क्यक्किन् कब्रिङ् किर्गप् कबे़म्मे़ॽओ हे़क्केलॽरिक् आत्तिन्नाङ् खे़त्छिङ्मा मे़न्छुक्ने़न्लरो॥ खे़ल्ले़ वेॽहाॽ मे़त्तुसिआङ् वये़बा हे़क्केए खिनिॽआङ् खे़न् ताप्फे़ःल्लिक् मे़त्ते़म्मे़ॽओ, थेआङ्भे़ल्ले़ खे़ल्ले़ इस्राइलबा सेसे निङ्वाॽफुमाङ्, यहवे दाङ्बे़ल्ले़ कुदक्ले़ङ्वाओ आसुत्थो चोगुआङ् वाॽरो॥ 30 खे़ल्ले़ थाङ्बे़न् कुमनाहाॽ माराम्हाॽओ मे़जोन्लो, खे़न् ये़न्नो खे़ल्ले़ कुधक्सुबाहाॽ मे़से़रुसिरो,” यहवे दाङ्बे़ल्ले़ पाःत्तुरो॥ 31 मुक्साम्दाङ्बा यहवे दाङ्बे़ल्ले़ अक्खे पाःत्तुरो, “ओमे़त्ते़म्मे़ॽ, आङ्दिङ् के़लॽबा मनासे, आङ्गाॽ खिनिॽ निङ्मिआरो, आङ्गाॽ खिनिॽ खुम्दिङ् पिमा ये़न्निन् निःप्मा ये़म् त्ये़आङ् वाॽरो॥ 32 आङ्दिङ् के़लॽबा लाजेॽए, खे़ने़ॽ के़दोःक्काङ् के़जोःन्लो हे़क्क्याङ् खे़ने़ॽ आत्तिल्ले़आङ् के़म्भोःङ्ने़न्लो॥ थेआङ्भे़ल्ले़ बेबिलोनबा के़ये़क्यक्हाॽओ आङ्गाॽ मिभाःत्त्रा केःत्तुङ्लो खे़ल्ले़ खे़ङ्हाॽ खिर्लिबा के़रे़क् पाःन्हाॽ मिधिक्खुरो॥” 33 मुक्साम्दाङ्बा यहवे दाङ्बे़ल्ले़ अक्खे पाःत्तुरो, “इस्राइल नु यहुदाबा मनाहाॽ पिर्बेःम्बा मे़जाःत्तुसिआङ् मे़वाॽरो॥ खे़ङ्हाॽ हुक्को के़धाबाहाॽरे़ खुन्छिॽ मे़दे़म्सुसिरो हे़क्क्याङ् खे़ङ्हाॽ पेःक्मा मे़म्भाःक्तुसिन्लो॥ 34 कर खे़ङ्हाॽ के़धे़ॽबान् के़धुम्बा चोक्लो॥ खुने़ॽ कुमिङ् मुक्साम्दाङ्बा यहवे दाङ्बारो॥ खुने़ॽ खे़ङ्हाॽ थेःक्तु नाङुसिरो हे़क्क्याङ् खे़ङ्हाॽ इस्राइलओ याम्मो खुने़ॽ नाःम्सिङ्मा पिरुसिरो॥ कर बेबिलोनबा मनाहाॽरे़ लागि नाःम्सिङ्मा होप्लो!” 35 यहवे दाङ्बे़ल्ले़ अक्खे पाःत्तुरो, “आमे़ङ्मे़ङ्बा ताभेःल्ले़ बेबिलोनिहाॽ च्ये़प्तुसिरो, कल्ले़ बेबिलोनबा मनाहाॽ च्ये़प्तुसिरो कुसुहाङ्युक्पाहाॽ नु सिक्कुम्निबा कुमनाहाॽआङ् च्ये़प्तुसिरो॥ 36 सिक्कुम्साबा कुसुजासाबाहाॽ ताभेःल्ले़ च्ये़प्तुसिरो, हे़क्क्याङ् खे़ङ्हाॽ अदङ् मे़बोङ्लो॥ खे़ल्ले़ के़धुम्बा कुधक्सुबाहाॽ ताभेःल्ले़ च्ये़प्तुसिरो, खे़ब्याङ् खे़ङ्हाॽ किमा यङ्मे़ल्ले़ ते़म्सुसिरो॥ 37 ताभेःल्ले़ कुअन्हाॽ च्ये़प्तुसिरो हे़क्क्याङ् कुअन्लाधाहाॽ नु वेॽ लाजेॽहाॽ लाम्बाबा कुन्जुम्हाॽ च्ये़प्तुसिरो, खम्भ्याङ् खे़ङ्हाॽ के़रे़क् मे़न्छुमा हे़क्तङ्मा मे़बोङ्लो॥ ताभेःल्ले़ खे़ल्ले़ कुयाङ् के़युङ्बाहाॽ च्ये़प्तुसिरो, हे़क्क्याङ् खे़ङ्हाॽ के़रे़क् मे़नाप्तुसिरो॥ 38 खे़ल्ले़ कुज्वाःत्हाॽ साङ्याक्मे़ल्ले़ तरुरो, कन् सर्गे़ङ् हेआङ् चप्ल याःन्दुरो॥ हे़क्क्याङ् थेआङ्बे? थेआङ्भे़ल्ले़ के़रे़क् लाजेन् नावाइत्लाहाॽरे़ तिम्से़आङ् ने़रो॥ खे़ब्याङ् मनाहाॽ खे़ङ्हाॽनु मे़नाङ्ल थारिक् लुङ्माॽहिःम्मो मे़ध्ये़आङ् मे़वाॽरो॥ 39 “हाराए बेबिलोने़न् ताम्भुङ् कोःत्चोहाॽ नु मुरे़क् खारे़क् ते़न्नोबा थक्साहाॽरे़ मे़युक्तुरो॥ कन् फक्थिःम्बाहाॽरे़ खुन्छिॽ याङ्धोःक्दे़न् पोङ्लो॥ खे़प्मो याम्मो मनाहाॽ मे़न्युङ्ने़न्लो, कन् आभे़ल्ले़साङ् चिजि खक्खक् पोङ्लो॥” 40 यहवे दाङ्बे़ल्ले़ अक्खे पाःत्तुरो, “सदोम, गमोराःन् नु कुबेसाङ्बा ये़क्यक्हाॽ आङ्गाॽ खाप्पुथ्यःङ् चोगुङ्बा कुइसिक्, आङ्गाॽ कन् खाप्पुथ्यःङ् चोगुङ्लो, खे़प्मो आत्तिन्हाॽआङ् मे़न्वाॽने़न्लो, कप्मो आत्तिन्हाॽआङ् मे़न्युङ्ने़न्लो॥ 41 “ओमे़त्ते़म्मे़ॽ! थाङ्गे़त् ले़प्माङ्लाम् साॽरिक् यरिक् थक्सुबाहाॽ मे़युर मे़बत्लो, माःङ्घा माःङ्घाबा लाजेॽहाॽलाम् के़दक्ले़ङ्वाओ यरिक् हाङ्हाॽ नु यरिक् सुवाङ्हाॽ मे़बोःक्ल मे़बत्लो॥ 42 खे़ङ्हाॽरे़ लिहाॽ नु लाःक्हाॽ फे़जुम्भे़या मे़गत्तुरो॥ खे़ङ्हाॽ के़आःम्बा कुॽइगे़भे़म्बा मे़जोक्लो हे़क्क्याङ् खुन्छिॽ लुङ्माॽ स्याःत् मे़लॽने़न्लो॥ खे़ङ्हाॽरे़ अन्हाॽ मे़युक्तुसिआङ् तगि मे़भे़न्लो, हे़क्केःल्ले़ वरःङ्ङिन् सःक्पा हे़क्के लॽरो॥ खे़ङ्हाॽ थङ् के़जोःक्पा परिक्ले़ मे़भे़न्लो, खे़ने़ॽ बेबिलोने़न् मे़ङ्मा फाॽआङ् मे़मुन्छिङ्लो॥ 43 निङ्मिःल्ले़ कुयाःम्बेओबा इङ्घङ्ङिन् बेबिलोनबा हाङ्ङिल्ले़ खे़प्सुआङ् वाॽरो, हे़क्क्याङ् खुने़ॽ किमा यङ्मारे़ कुसाॽइ यगे़रो॥ सावाःन्दुङ्ङिल्ले़ तरुमा मे़न्छुमान् हे़क्के यङ्मासिमा तुक्खेःल्ले़ खुने़ॽ ते़म्सुआङ् वाॽरो॥ 44 “चाराम्मादे़न्नोबा मे़ल्लुक्हाॽ पित्चाक् पित्चाक् पित्तुसिर यर्दनबा तुम्भुङ्लाहाॽओलाम् खिरिङ्बान् लःम्भे़म्बा कुइसिक् आङ्गाॽ ताआरो॥ बेबिलोने़न् कुलाजेॽलाम् नाःत्तुङ्लो, हे़क्क्याङ् सेगुङ्बा लाम्लोबान् युक्तिङ् चोगुङ्लो॥ थेआङ्भे़ल्ले़ आङ्गाॽ हे़क्तङ्बा हात् वाॽबे? खे़ब्याङ् हाःत्ले़ आङ्गाॽ खे़माॽ साःप्मा सुक्काबे? आत्तिन् युक्साबे़ल्ले़ आनिङ्वान् अप्मा सुक्तुबे? 45 “बेबिलोनरे़ कुदक्ले़ङ्वाओ नु बेबिलोनिहाॽरे़ खुन्छिॽ लाजेःल्ले़ तक्ले़ङ्वाओ यहवे दाङ्बे़ल्ले़ कुनिङ्सेःक्किन् खे़प्से़म्मे़ॽओ॥ चुजुक्सा हिन्जाॽबित्छाॽहाॽआङ् मे़ल्लुक् कुइसिक् मे़उःक्खु मे़धे़मुसिरो, खे़ब्याङ् खे़ङ्हाॽरे़ खुन्छिॽ हिम्हाॽ मे़मे़क्खुरो॥ 46 अक्तङ्बा अःक्मा इक्लाःल्ले़ योॽबान् यङ्लो, बेबिलोने़न् मे़देॽरुआङ् वाॽरो! हे़क्क्याङ् कल्ले़ कुगिमा कुयङ्मा इक्लान् इक्सादिङ् खाम्बेःक्मो के़रे़क् खे़म्दे़त्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.