यर्मिया 5 - लिम्बुयरुसले़ःम्बा मनाहाॽरे़ खुन्छिॽ लायो 1 यहवे दाङ्बे़ल्ले़ अक्खे पाःत्तुरो, “यरुसले़ःम्बा माराम्माहाॽओ थो नु यो पेगे़ॽओ, हे़क्क्याङ् के़रे़क् पिसाङ् ओमये़ॽआङ् निङ्वाॽ इःत्ते़ॽओ॥ कोःत्ते़ॽर लाम्दोहाॽओ ओमये़ॽओ, कुदोःप्मा याःम्बक् के़जोःक्पा नु से़क्खान् के़हङ्बा लत्छा कोःत्ते़ॽओ हे़क्तङ्बा मनाधिक् खे़ने़ॽ के़घोसुने़भग्र आङ्गाॽ खे़न् ये़क्यक्किन् ले़प्मि पिरुङ्लो॥ 2 खे़ङ्हाॽरे़ अक्खे मे़बाःत्तुरो ‘से़क्खाए यहवे दाङ्बे़न् कुहिङ्वे़त् वाॽबा कुइसिक्’ हे़क्केसाङ् खे़ङ्हाॽरे़ इङ्ले़क्पा माङ्हे़क् मे़जोगुरो॥” 3 यहवे दाङ्बाए खे़ने़ॽ से़क्खान् के़गोःत्तुरो॥ खे़ने़ॽ खे़ङ्हाॽ के़हिप्तुसिरो, कर खे़ङ्हाॽरे़ निङ्वाॽए मे़म्बिरुन्लो खे़ने़ॽ पे़दःक् थाम् के़मे़त्तुसि कर खे़ङ्हाॽ हुॽसिङ्मा मे़न्दे़न्दे़न्लो॥ खे़ङ्हाॽ हादिङ् के़धक्पा मे़बोःक्खे़रो हे़क्क्याङ् आबाङे लायोहाॽलाम् मे़न्नुःक्खे़न्लो॥ 4 हे़क्क्याङ् आङ्गाॽ निङ्वाॽ इःत्तुङ्लो, “खासिङ् मे़न्निःप्मनाबा नु कुनिङ्वाॽ के़बाःक्पा मे़जोःक्ले़त्छ खे़ङ्हाॽलाम्बा निङ्वाॽफुमाङ्ङिल्ले़ थे़मा पाःन्हाॽ खोमा निङ्वाॽ के़जोगुरो हे़क्क्याङ् यहवे दाङ्बे़ल्ले़ खे़ङ्हाॽरे़ थे मे़जोगुर के़लॽबा निङ्वाॽ के़जोगु फाॽआङ् खुन्छिॽ कुसिङ् मे़न्निःत्तुन्लो॥ 5 खे़ल्ले़चोगुल्ले़ आङ्गाॽ लाम्लोबाहाॽरो पेःक्काआङ् खे़ङ्हाॽनु ताॽजे़ङ्ङारो॥ से़क्खासाङ् खे़ङ्हाॽलाम्बा निङ्वाॽफुमाङ्ङिल्ले़ कुभा पाःन्हाॽ चोःक्मा निङ्वाॽ के़जोगुरो खे़न् पाःन्हाॽ खे़ङ्हाॽरे़ निङ्वाॽ मे़घोसुररो॥ यहवे दाङ्बे़ल्ले़ निङ्वाॽ के़जोगुबा काक् पाःन्हाॽ कुसिङ् मे़निःत्तुरो॥” कर के़रे़क्ले़ यहवे दाङ्बे़ल्ले़ के़युक्किन् ते़न्दिङ् चोःक्मा मे़न्दे़न्दे़न्लो हे़क्क्याङ् खे़ने़ॽ के़इङ्जाङ्ङिन् इःप्मा नाःप्मा मे़नाॽरुरो॥ 6 खे़ल्ले़चोगुल्ले़ ताम्भुङ्ङोबा खिरिङ्बाहाॽरे़ खे़ङ्हाॽ मे़से़रुसिरो, मुरे़क् खारे़क्पोबा पराबाहाॽरे़ खे़ङ्हाॽ मे़धे़ःक्खु मे़से़रुसिरो हे़क्क्याङ् थे़रिङ्बाहाॽ खुन्छिॽ ये़क्यक् हे़ङ्गात्ति ताक्मे़गन्लो॥ कुभा लाःक्कात् मे़बेःक्ने़भग्र खे़ङ्हाॽ कुज्रिङ् कुज्रिङ् मे़बोङ्लो थेआङ्भे़ल्ले़ खे़ङ्हाॽरे़ निःत्मे़न्दे़त्ते यरिक् लायो मे़जोगुआङ् वाॽरो हे़क्क्याङ् खे़ङ्हाॽरे़ निङ्वाॽफुमाङ्ङिन् ए़त्ले़ङ् के़म्नाॽरे़आङ् वाॽरो॥ 7 यहवे दाङ्बान् पाःन्सेःन्दोरो, “थेआङ् आङ्गाॽ खिनिॽ ले़प्मि पिनिङ्बाबे? खिनिॽ साहाॽरे़ आङ्गाॽ लाप्मे़भुसाङ्ङाङ् वाॽरो हे़क्क्याङ् खे़ङ्हाॽ इङ्ले़क्पा माङ्हाॽओ माङ्मे़हे़क्सिङ्ङाङ् वाॽरो॥ खे़ङ्हाॽ मे़ङ्घाए थारिक् चाःत्तुङ्सिङ्लो, कर खे़ङ्हाॽरे़ याम्बोःप्मा याःम्बक् मे़जोगुआङ् मे़वये़रो हे़क्क्याङ् खे़ङ्हाॽ ये़म्बा हङ्जेना के़त्निमान्नु यरिक् ये़म् मे़देसुरो॥ 8 खे़ङ्हाॽ साॽरिक् चालुप्मनाबा नु लाम्सिङ्माल्ले़ कुमिःप्माल्ले़ तरुसिबा अन्हाॽ हे़क्के मे़लॽरो, के़रे़क् आबाङे खुन्छिॽ हिम्बेसाङ्बाहाॽरे़ खुन्छिॽ मेःत्हाॽनु इम्मा सिराॽथाङे़आङ् वाॽरो, 9 थे अक्तङ्बा लायोरे़ लागि आङ्गाॽ खे़ङ्हाॽ खुम्दिङ् मे़बिरुङ्सिङ्ङिन्बि? हे़क्क्याङ् थे आङ्गाॽ कन् सुवाङ्हाॽ सम्धाङ् कुले़क्वा मे़हुङ्ङान्बि? 10 आङ्गाॽ आमनाहाॽरे़ खुनिॽ चे़ल्ले़क्सेॽ इक्ताप्हाॽ मे़ङ्से़ आङ्गाॽ निङ्मिहाॽ पाङ्घुङ्सिङ्लो कर खक्पे़क्क मे़ङ्मा मे़बाङ्ङासिङ्ङिन्लो॥ आङ्गाॽ खे़ङ्हाॽ चे़ल्ले़क्सेॽ पोराःक्हाॽ लिघे़ॽ लिघे़ॽ ले़न्दे़म्मे़ॽ मे़त्तुङ्सिङ्लो थेआङ्भे़ल्ले़ खे़ङ्हाॽ आङ्गाॽ आमना मेःन्छिरो॥ 11 इस्राइल नु यहुदाबा मनाहाॽरे़ आङ्गाॽ के़रे़क् परिक्ले़ इङ्ले़क्को मे़धासाङ्ङाङ् मे़वाॽरो॥ आङ्गाॽ यहवे दाङ्बे़ल्ले़ कन् पाःत्तुङ्ङाङ् वाॽरो॥” यहवे दाङ्बे़ल्ले़ इस्राइले़न् नाॽरु 12 यहवे दाङ्बान् खुने़ॽ कुमनाहाॽरे़ मे़नाॽरुआङ् वाॽरो, खे़ङ्हाॽरे़ अक्खे मे़बाःत्तुआङ् वाॽरो, “खुने़ॽ से़क्खाःल्ले़ थेआङ् मे़जोगुन्लो॥ आनिगे़ओ तुक्खे लाक्खे मे़दाने़न्लो आभे़ल्ले़आङ् थङ् इग्र साक् मे़दाने़न्लो॥ 13 माङ्निङ्वाॽपान् के़बाःप्पाहाॽरे़ मे़न्वाॽमनाबा पान् मे़बाःत्तुरो खे़ङ्हाॽनु यहवे दाङ्बे़ल्ले़ कुइङ्घङ्ङिन् होप्लो॥ खे़ङ्हाॽरे़ मे़बाःत्तुबा पाःन्निन् खुन्छिॽ सम्धाङ्ङे चुक्लरो॥” 14 खे़ल्ले़चोगुल्ले़ मुक्साम्दाङ्बा निङ्वाॽफुमाङ् यहवे दाङ्बे़ल्ले़ आङ्गाॽ मे़त्ताङ्लो— “यर्मियाए, कन् मनाहाॽरे़ अक्तङ्बा पान् के़म्मे़त्ते़रो खे़ल्ले़चोगुल्ले़ खे़ने़ॽ के़म्ब्राओ आङ्गाॽ आबाःन्हाॽ मि हे़क्तङ्बा चोगुङ्लो हे़क्क्याङ् कन् मनाहाॽग सिङ् कुइसिक् चोगुङ्सिङ्लो हे़क्क्याङ् खे़न् मिःल्ले़ खे़ङ्हाॽ खाप्पुथ्यःङ् चोगुसिरो॥ 15 इस्राइलबा मे़न्छाम् याप्मिसे, आङ्गाॽ यहवे दाङ्बे़ल्ले़ माःङ्घालाम्बा लत्छा सुवाङ्धिक् खिनिॽनु थक्से़ फे़त्तुङ्ल पत्तारो॥ खे़ङ्ग लत्छा के़धुम्बा उन्छेःन्बा सुवाङ्लो॥ खे़ङ्हाॽरे़ खुन्छिॽ पाःन्दाङ्ङिन् के़ल्ले़सुम्मिन्लो खे़ङ्हाॽ मे़बाःप्पान् कुसिङ् के़न्निःत्तुम्मिल्लो॥ 16 खे़ङ्हाॽरे़ खुन्छिॽ तोङ् के़आप्पा थक्सुबाहाॽग मुक्के़गुबा थङ्गे़जोःक्पा मे़जोक्लो हे़क्क्याङ् खे़ङ्हाॽरे़ लुङ्माॽ मे़न्दुक्के मे़से़रुसिरो॥ 17 खे़ङ्हाॽरे़ खिनिॽ पोगुगे़न् कुजा नु चामा कुजाहाॽ मे़जमे़देसुरो खिनिॽ मे़न्छुमा ये़म्बित्छासाहाॽ मे़ज मे़देसुसिरो॥ खिनिॽ मे़ल्लुक् मे़ःन्दा नु पित्थक्साहाॽ मे़ज मे़देसुसिरो हे़क्क्याङ् खिनिॽ चे़ल्ले़क्सेॽइन् नु पःत्छेॽबुङ्माहाॽ मे़जमे़देसुरो॥ आधेःक्ल फाॽआङ् निङ्वाॽ के़इःत्तुम्बा लुङ्धाक्किल्ले़ मे़भाङुबा ये़क्यक्हाॽ मे़लुःन्दुरो॥” 18 यहवे दाङ्बे़ल्ले़ पाःत्तुॽ, “हे़क्केसाङ् खे़न् ये़न्नो आङ्गाॽ आमनाहाॽ खक्पे़त् मे़मे़ङ्ङासिङ्ङिन्॥ 19 हे़क्क्याङ् मनाहाॽरे़ निङ्वाॽफुमाङ्ङिल्ले़ थेआङ् आनिगे़नु अक्तङ्बा चोगु फाॽआङ् खे़ने़ॽ सेःन्के़म्लाप्, खे़ने़ॽ खे़ङ्हाॽ अक्खे मे़त्ते़से़ॽ, आक्खेलॽरिक् खिनिॽ यहवे दाङ्बान् के़नाॽरुम्माङ् आबाङे लाजेॽओ वेॽ साम्माङ्हाॽ से़वा के़मे़त्तुम्सिम्, हे़क्केलॽरिक्के खिनिॽआङ् वेॽ लाजेॽओ वेॽ लाजेॽबा याप्मिहाॽ से़वा के़मे़त्तुम्सिम्लो॥” निङ्वाॽफुमाङ्ङिल्ले़ कुमनाहाॽ साम्दिङ् पिरुसि 20 यहवे दाङ्बे़ल्ले़ पाःत्तुॽ, “याकुबरे़ कुमुॽइदाङ्साहाॽ अक्खे मे़त्ते़से़ॽओ, यहुदाबा मनाहाॽ कन् पाःन्निन् खे़म्मा पाङ्घे़से़ॽओ— 21 अदङ् नु खासिङ् मे़न्निःप्मनाबा मनासे, नुरिक्काङ् खे़प्से़म्मे़ॽओ, खे़निॽ मिक्क पत् कर निमा के़न्छुक्तुम्मिन्लो, ने़भाक्क पत् कर खे़म्मा के़न्छुक्तुम्मिन्लो॥ 22 आङ्गाॽ यहवे दाङ्बाआ, खिनिॽ आङ्गाॽनु किमा मे़बोङ्ने़न्बि? आङ्गाॽ आदगि थेआङ् थे़गक्कक्ना के़न्यक्खिन्बे? आङ्गाॽ वरःङ्ङिल्ले़ लागि ये़ःङ्घाःन् इःन्दो ने़स्सुङ् पिरुङ्ङाङ् ने़रो॥ खे़न् वरःङ्ङिल्ले़ काःक्मा मे़न्छुक्मना लत्छा तधप् मे़ल्लॽमनाबा कुधेःक्मा पोःक्खे़आङ् ने़रो॥ वरःङ्ङोबा वाभे़ल्ले़ङ्हाॽ पोःक्पिलारो कर खे़न् इःन्दोन् काःक्मा मे़सुक्तुन्लो॥ खे़न् वाभे़ल्ले़ङ्हाॽ यम्बा सःक्पिलारो कर खे़न् हमाआङ् काःक्मा मे़सुक्तुन्लो॥ 23 कर खिनिॽग साॽरिक् हादिङ् के़धक्पा नु पिप्फ्युङ्बा के़बोःक्खिआङ् के़वयिरो॥ खे़निॽ आङ्गाॽ याप्मि के़नाॽरिरो खे़ब्याङ् वेॽ लाम् ले़प्माङ् के़बेगिआङ् के़वयिरो॥ 24 आङ्गाॽ खिनिॽ चुङ्वाःम्मोबा वहित् थासुङ् पिनिङ्लो हे़क्क्याङ् फुङ्वाःम्मोबा वहित् पाङ्घुङ् युसुङ्लो हे़क्क्याङ् तङ्बे थक्मा पोगुगे़न् कुजा सुम्मा ये़म् तारुङ्लो, हे़क्केसाङ् खिनिॽ आप्फाल्ले़आङ् आङ्गाॽ मिङ्सो इङ्धाङ् पिमा निङ्वाॽ के़न्जोगुम्मिन्लो॥ 25 खिनिॽ फे़न्याःम्बक्किल्ले़ चोगुल्ले़ कन् नुबा पाःन्हाॽ मे़दाने़न्लो॥ खिनिॽ लायोल्ले़ कन् नुबा पाःन्हाॽलाम् लाःत्लाःत् के़जोगिरो॥ 26 “आङ्गाॽ आमनाहाॽरे़ खुनिॽ लुम्मो ताक्के़भे़ॽबा मनाहाॽ मे़वाॽरो, खे़न् कुॽइगे़भे़म्बाहाॽरे़ग पु इगे़युक्पा हे़क्के मनाहाॽ मे़सुगुसिर मे़युङ्लो कर खे़ङ्हाॽरे़ मनाहाॽ ते़म्मासिरे़ लागि चे़न्हाॽ मे़दाःक्तुआङ् ने़रो॥ 27 सावागे़म्बाल्ले़ पुहाॽ चःङ्ग्रङ्ङो थासुसिरो, हे़क्केलॽरिक्के खे़ङ्हाॽरे़ खुःप्मनाबा चिगक्वाहाॽरे़ खुनिॽ हिम्हाॽ मे़धिम्सुआङ् वाॽरो॥ खे़ल्ले़चोगुल्ले़ खे़ङ्हाॽ आरसाङ् याङ्साकुन्धेसाबा हे़क्क्याङ् के़धुम्बा मे़बोःक्खे़आङ् मे़वाॽरो॥ 28 खे़ङ्हाॽरे़ साॽरिक् मे़जआङ् मे़ॽरुसिआङ् मे़वाॽरो॥ खे़ङ्हाॽरे़ खुन्छिॽ फे़न्याःम्बक्हाॽरे़ कुनुप्मा होप्लो॥ खे़ङ्हाॽरे़ ये़त्छाबाहाॽरे़ खुन्छिॽ खोमा लक्किन् मे़नाप्तुसिरो, याङ्गे़साॽबाहाॽ कुदोःप्मा खासे़न् मे़न्लोःन्दुन् मे़म्बिरुसिन्लो॥ 29 थे अक्तङ्बा लायोरे़ लागि आङ्गाॽ खे़ङ्हाॽ खुम्दिङ् मे़बिरुङ्सिङ्ङिन्बि? हे़क्क्याङ् थे आङ्गाॽ कन् सुवाङ्हाॽओ कुले़क्वा मे़हुङ्ङान्बि? 30 कन् लाजेॽओ किप्मागे़घुबा पोःक्खे़रो हे़क्क्याङ् ताप्फे़ःम्बा याःम्बक् पोःक्खे़आङ् वाॽरो॥ 31 माङ्निङ्वाॽपान् के़बाःप्पाहाॽरे़ इङ्ले़क् माङ्निङ्वाॽपान् मे़बाःत्तुरो, निङ्वाॽफुसाम्बाहाॽरे़ आबाङे खुन्छिॽ निङ्वाॽ पाःत्पाःत् युक् मे़जोगुर मे़वाॽरो हे़क्क्याङ् आङ्गाॽ आमनाहाॽरे़ग हे़क्तङ्बाए खुन्छिॽ सिराॽथाङ्लो॥ कर आमनासे कुनुप्मोग खिनिॽ थे के़जोगुम्मिरो?” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.