यर्मिया 49 - लिम्बुयहवे दाङ्बे़ल्ले़ अम्मोने़न् खुम्दिङ् पिरु 1 अम्मोनबाहाॽरे़ खुन्छिॽ मे़न्नो कन् इङ्घङ्ङिन् के़रे़आङ् वये़॥ यहवे दाङ्बे़ल्ले़ अक्खे पाःत्तुरो, “थे गादबा लाजेन् लक्खोमारे़ लागि इस्राइलरे़ कुमुॽइदाङ्सा मे़होःप्पि? कन् ये़क्यक्हाॽओ के़युङ्बा मोलेख माङ्ङिन् खे़ङ्हाॽरे़ थेआङ् माङ्से़वा मे़मे़त्तुबाबे? 2 खे़न् के़दाबा ये़न्हाॽओ, अम्मोनिहाॽरे़ खुन्छिॽ हाङ्पाङ् रब्बा ये़क्यक्किल्ले़ कुदक्ले़ङ्वाओ थङ्ङोबा हयङ् किल्लिङ् पोःक्ल चोगुङ्लो॥ चिजि खक्खक् खाप्पुथ्यःङ् के़बोङ्बान् लुम्सिङ्लो, हे़क्क्याङ् कुबेसाङ्बा पाङ्जुम्हाॽ मिदिक्लो॥ खे़ब्याङ् खिनिॽ के़देॽरुम्बा लाजेन् इस्राइलरे़ याम्मो याङ्ना तेॽरुरो,” यहवे दाङ्बे़ल्ले़ पाःत्तुरो॥ 3 “हेस्बोन के़युङ्बासे, खिनिॽ फिःक्ते़म्मे़ॽओ, थेआङ्भे़ल्ले़ एे ये़क्यक्किन् खाप्पुथ्यःङ् पोःक्खे़रो॥ रब्बाबा मनासे, खिनिॽ हाबे़म्मे़ॽओ! खिनिॽ मे़रिङ् थक्मा चाङ्हाॽ चाक्खे़म्मे़ॽओ, लुङ्धाक्हाॽओ ना नु कत्ना लोःक्ते़म्मे़ॽओ, हे़नाङ्भे़ल्ले़ मोलेख माङ्ङिन् कुयक्याबाहाॽ हे़क्क्याङ् कुसुहाङ्गे़म्बाहाॽनु सोरिक् मे़दे़म्सु मे़देॽरुरो॥ 4 चा के़नुॽबा खिनिॽ ने़ने़बादे़न्हाॽओ आङ्दिङ् के़लॽरिरो कर खे़ङ्हाॽ हाराए खाप्पुथ्यःङ् पोङ्लो॥ याङ्साकुन्धेओ, पिफ्युङ् के़जोःक्मा मनाहाॽओ खिनिॽ निङ्वाॽ के़युक्खुम्लो, हे़क्क्याङ् हाःत्ले़आङ् हान्ति चोःक्मा के़न्छुक्तिन् फाॽआङ् के़इःत्तुम्लो॥” 5 मुक्साम्दाङ्बा यहवे दाङ्बे़ल्ले़ अक्खे पाःत्तुरो, “कर ओमे़त्ते़म्मे़ॽ, खिनिॽ लुम्मो आङ्गाॽ किमा यङ्मा तारुङ्लो॥ खिनिॽ हिम्बेसाङ्बाहाॽरे़ आप्फेक् लाजेॽलाम् खिनिॽ के़म्नाःत्ति के़म्देसिरो, हे़क्क्याङ् खे़ङ्हाॽ मे़घे़त्छिङ्ङिल्ले़ खे़न् मे़दे़म्सु मे़देॽरुसिबाहाॽ हाःत्ले़आङ् मे़भुक्खुन् मे़दारुसिन्लो॥ 6 “कर आङ्गाॽ ताःन्दि के़दाबा ये़न्हाॽओ अम्मोनिहाॽरे़ खुन्छिॽ नुॽमादामे़न् याम्मो नुःक्तुङ् पिरुङ्सिङ्लो॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥” यहवे दाङ्बे़ल्ले़ एदोमे़न् खुम्दिङ् पिरु 7 कन् इङ्घङ्ङिन् एदोमरे़ कुयाःम्बेओ के़रे़आङ् वये़॥ मुक्साम्दाङ्बा यहवे दाङ्बे़ल्ले़ अक्खे पाःत्तुरो— “तेमानओ थे सिक्कुम्दिङ् निङ्वाॽ होःप्पि? सिक्कुम्दिङ् निङ्वाॽ सुजा के़बिबा हाःत्ताङ् होःप्पि? 8 खिनिॽ नुःक्खे़म्मे़ॽआङ् खे़त्तासिम्मे़ॽओ! ददानबा मनासे, केःम्बा फुक्कुहाॽओ चिङ्सिङ्ङे़म्मे़ॽओ! थेआङ्भे़ल्ले़ मे़क्मे़न् एदोमओ तारुङ्लो, हे़क्केःल्ले़ खिनिॽआङ् खुम्दिङ् पिनिङ्लो! 9 चे़ल्ले़क्सेॽ के़दुप्पा मनाहाॽरे़ आभे़ल्ले़साङ् याङ्गे़साॽबाहाॽरे़ लागि आजे़ःत्छिक् ले़रे़म् थ्ये़म्मे़ॽओ॥ से़न्दिक् खुःन्द्रिक्पाहाॽ मे़द्ये़साङ् खे़ङ्हाॽरे़ के़रे़क्क मे़न्देॽरुन्बा वये़रो॥ 10 कर आङ्गाॽ एदोमबा लाजेन् मुरे़क् खारे़क् थेआङ् मेःन्ने चोगुङ्लो हे़क्क्याङ् खे़प्मो चिङ्सिङ्मादे़न् आत्तिआङ् मे़ने़ने़न्लो॥ कल्ले़ कुस्सा अङे़ःक्वाहाॽ, कुम्भुॽकुन्साॽहाॽ, हे़क्क्याङ् कुहिम्बेसाङ्बाहाॽ के़रे़क् मे़मे़क्लो, खे़ब्याङ् एदोमे़न् आप्फेक्काङ् मे़याःक्ने़न्लो॥ 11 कर खिनिॽ लुम्मो के़वाॽबा के़याःक्पा ये़त्छाबाहाॽ आङ्गाॽ से़ःप्तुङ्सिङ्लो॥ खिनिॽ मेमेदुमा मेःत्हाॽरे़आङ् कुभाॽरे़ लागि आङ्गाॽ आलाम् ओमे़प्मा मे़सुक्तुरो॥” 12 हे़क्क्याङ् यहवे दाङ्बे़ल्ले़ अक्खे पाःत्तुॽ—“तुक्खे तुम्मा मे़म्बोङ्नाबे़ल्ले़ए तुक्खे तुम्मा पोङ्ने़भग्र, खिनिॽग आक्खे़न् साॽरिक् आल्लसाङ् तुक्खे तुम्मा पोङ्ॽ! खिनिॽ खुम्दिङ् मे़ङ्घोए पेःक्माए के़न्घोसिन्ॽ! खुम्दिङ्ङिल्ले़ खोर्याओलाम्बा खिनिॽ के़धुङुम्लए पोङ्ॽ!” 13 यहवे दाङ्बे़ल्ले़ अक्खे पाःत्तुॽ, “आङ्गाॽ आप्फेक् आमिङ्ङो माङ्हे़क् चोगुङ्ङाङ् वाॽ, खे़न् बोज्राःन् किप्मागे़घुबा निगे़दे़प्पा नु खाप्पुथ्यःङ् के़बोङ्बाआङ् के़लुम्सिङ्बा पोङ्ॽ, कन् कुनामे़न्छाॽ नु माङ्दे साङ्ग्रा मे़प्मा चाहाक् पोङ्ॽ॥ कल्ले़ कुबाङ्जुम्हाॽ नु कुबाङ्भेॽहाॽ सदादिङ् आभे़ल्ले़साङ् मुरे़क् खारे़क् चिजि खक्खक्पा पोङ्लो॥” 14 मे़न्छाम् सुवाङ्हाॽ अक्खे मे़प्मासिरे़ लागि हाङ्लाइङ्बाधिक् मे़बाङ्घुमु के़लॽबा इङ्घङ्धिक् आङ्गाॽ यहवे दाङ्बालाम् खे़प्सुङ्ङाङ् वाॽरो, “एदोमरे़ कुदक्ले़ङ्वाओ खिनिॽ थुक्कासिम्मे़ॽओ, हे़क्क्याङ् थङ् चोःक्मारे़ लागि यारिप् पोःक्खे़म्मे़ॽओ!” 15 यहवे दाङ्बे़ल्ले़ एदोमे़न् अक्खे मे़त्तुरो, “हुक्को के़म्धार फाॽआङ् आङ्गाॽ खे़ने़ॽ मे़न्छाम् सुवाङ्हाॽ लुम्मो थाने़रो॥ खे़ने़ॽ के़रे़क्ले़ कुनामे़न्छाॽ के़म्मे़त्लो॥ 16 किमा यङ्मालाम् इङ्ले़क्को के़ध्ये़रो, के़आङ्दिङ् के़लॽमालाम् वेॽहाॽ के़लिःक्तुसिरो॥ खे़ने़ॽ लुङ्याङ्पेॽ हाङ्यक्को के़युङ्लो हे़क्क्याङ् चन्जन्लुङ् कोःक्मा फाङ्जङ्हाॽ के़युक्तुरो॥ कर खे़ने़ॽ किःत्थहाॽनु सोसोरिक् थे़गु माङ्वाहाॽरे़ कुसम्मो हाप् के़जोगुसाङ्, आङ्गाॽ यो मक्थाःन्ने थाने़रो,” यहवे दाङ्बे़ल्ले़ पाःत्तुआङ् वाॽरो॥ 17 “ए़दोम लाजेन् किप्मा के़घुबा नियारा पोङ्लो॥ खे़प्मोलाम् के़बोङ्बाआङ् के़बेःक्पाहाॽ के़रे़क् मे़गिआङ् चिजिङ् यङ्मा मे़सिरो हे़क्क्याङ् खाप्पुथ्यःङ् के़बोङ्बान् मे़निसुआङ् खुन्छिॽ मुरान् हा मे़मे़त्तुर सक्मा मे़सोःन्छिङ्लो॥ 18 सदोम नु गमोराःन् खाप्पुथ्यःङ् पोःक्खे़बा कुइसिक् हे़क्क्याङ् खे़न् पेसाङ्बा पाङ्जुम्हाॽ खाप्पुथ्यःङ् पोःक्खे़बा कुइसिक् कन् ये़क्यक्किन्नाङ् खाप्पुथ्यःङ् पोङ्लो,” यहवे दाङ्बाल्ले़ अक्खे पाःत्तुरो॥ “खे़प्मो आत्तिन्हाॽआङ् मे़न्वाॽने़न्लो, कप्मो हाःत्छिआङ् मे़न्युङ्ने़न्लो॥ 19 चाराम्मादे़न्नोबा मे़ल्लुक्हाॽ पित्चाक् पित्चाक् पित्तुसिर यर्दनबा तुम्भुङ्लाहाॽओलाम् थे़रिङ्बे़न् लःम्भे़म्बा कुइसिक् आङ्गाॽ ताआरो॥ एदोमे़न् कुलाजेॽलाम् नाःत्तुङ्लो, हे़क्क्याङ् सेगुङ्बा लाम्लोबान् युक्तिङ् चोगुङ्लो॥ थेआङ्भे़ल्ले़ आङ्गाॽ हे़क्तङ्बा हात् वाॽबे? खे़ब्याङ् हाःत्ले़ आङ्गाॽ खे़माॽ साःप्मा सुक्काबे? आत्तिन् युक्साबे़ल्ले़ आनिङ्वान् अप्मा सुक्तुबे?” 20 ए़दोम नु तेमानबा मनाहाॽरे़ खुन्छिॽ तक्ले़ङ्वाओ यहवे दाङ्बे़ल्ले़ कुनिङ्सेःक्किन् खे़प्से़म्मे़ॽओ॥ खे़ङ्हाॽरे़ खुन्छिॽ चुजुक्सा हिन्जाॽबित्छाॽहाॽआङ् मे़ल्लुक् कुइसिक् मे़उःक्खु मे़धे़मु मे़देॽरुसिरो हे़क्क्याङ् खे़ङ्हाॽरे़ खुन्छिॽ हिम्हाॽ खाप्पुथ्यःङ् मे़जोगुरो॥ 21 एदोम्मिन् मे़क्किल्ले़ इक्सादिङ् खाम्बेःक्मान् यङ्लो खे़ल्ले़ कुयङ्मा के़प्मा इक्लान् हे़ःत्ताङ्बा वरःङ् थारिक्के खे़म्दे़त्लो॥ 22 ओमे़त्ते़म्मे़ॽ! किःत्थे़न् हे़क्के निङ्मिन् सुःक्थारो, बोज्राःल्ले़ कुसम्धाङ् कुलाप्पिन् हम्भे़ मे़त्तुरो॥ सागप्मा तुङ्ङिल्ले़ तरुमा मे़न्छुमान् कुइसिक् मुक्के़गुबा थक्सुबाहाॽआङ् खुन्छिॽ सक्मा पुॽरो॥ यहवे दाङ्बे़ल्ले़ दमस्कसे़न् खुम्दिङ् पिरु 23 दमस्कसे़ल्ले़ कुयाःम्बेओ कन् इङ्घङ्ङिन् के़रे़आङ् वये़॥ यहवे दाङ्बे़ल्ले़ अक्खे पाःत्तुरो— “हमात नु अर्पाद ये़क्यक्हाॽ किमा यङ्मे़ल्ले़ तरुसिरो, थेआङ्भे़ल्ले़ खे़ङ्हाॽरे़ आप्फेक् याःम्बेओ खाप्पुथ्यःङ् पोङ्मा इङ्घङ् मे़घे़प्सुआङ् वाॽरो॥ के़नाङ्बा वरःङ्ङिन् कुङ्बा हे़क्के खे़ङ्हाॽरे़ खुन्छिॽ निङ्वान् तुक्खे चारो॥ 24 दमस्कसे़न् मे़न्धुम्मनाबा पोःक्खे़आङ् ने़रो, हे़क्क्याङ् खे़प्मोबा के़रे़क् मनाहाॽ खे़त्छिङ्मारे़ लागि मे़नुःङ्लो॥ सागप्मा तुङ्ङिल्ले़ तरुमा मे़न्छुमान् हे़क्के खे़ङ्हाॽ किमा यङ्मा, ये़त्तुक्खे नु तुक्माल्ले़ ते़म्सुसिआङ् वाॽरो॥ 25 खे़न् कुमिङ् के़इङ्बा, के़सःप्पा ये़क्यक्किन् सदादिङ्ले़ लागि लाप्मे़भुसुरो! 26 खे़प्मोबा थाङ्बे़न् ये़म्बित्छाहाॽ माराम्मो मे़जोन्लो हे़क्क्याङ् खे़ङ्हाॽ मे़सिरो,” मुक्साम्दाङ्बा यहवे दाङ्बे़ल्ले़ पाःत्तुरो॥ 27 “हे़क्क्याङ् दमस्कसबा लुङ्धाक्हाॽओ आङ्गाॽ मि फाःत्त्रा केःत्तुङ्लो खे़ल्ले़ बेन-हददबा हाङ्हिम्हाॽ मिधिक्खुरो॥” केदार नु हासोर ये़क्यक्को खुम्दिङ् 28 बेबिलोनबा नबुकदनेसर हाङ्ङिल्ले़ थङ्ङो फत्तुबा केदार नु हासोरबा हाङ्जुम्हाॽरे़ कुयाःम्बेओ कन् इङ्घङ्ङिन् के़रे़आङ् वये़॥ यहवे दाङ्बे़ल्ले़ अक्खे पाःत्तुरो— “केदाररे़ कुदक्ले़ङ्वाओ तगि पेगे़म्मे़ॽओ! नाङ्गे़न् पिसाङ्लाम् थक्सुबाहाॽ मे़क्खे़म्सिम्मे़ॽओ! 29 खे़ङ्हाॽरे़ खुन्छिॽ थक्सालुप्हाॽ नु खुन्छिॽ साःङ्गाहिम्हाॽ हुक्काप् मे़जोगुरो, हे़क्क्याङ् खे़ङ्हाॽरे़ खुन्छिॽ हिम्मोबा सामाहाॽ नु खुन्छिॽ उमेहाॽ मे़देॽरु मे़बिरुसिरो॥ आत्तिसाङ् अक्खे के़लॽबा तुक्खेवा इक्ला खे़म्दे़त्लो, ‘के़रे़क् पिसाङ् आनिगे यङ्मा मे़से़रिगे़रो!’” 30 यहवे दाङ्बे़ल्ले़ अक्खे पाःत्तुरो, “खिनिॽ हिङ्मारे़ लागि लोःक्ते़म्मे़ॽओ हासोरबा मनासे, केःम्बा हङ्गारिङ्बा लुङ्फुक्कोहाॽओ खिनिॽ चिङ्सिङ्ङे़म्मे़ॽओ, थेआङ्भे़ल्ले़ बेबिलोनबा हाङ् नबुकदनेसरे़ल्ले़ खिनिॽ तक्ले़ङ्वाओ चे़म्भन् चोगुआङ् वाॽरो, हे़क्क्याङ् खिनिॽ मे़ङ्मारे़ लागि मुन्छिङ्ल वाॽरो॥” 31 यहवे दाङ्बे़ल्ले़ अक्खे पाःत्तुरो, “खिनिॽ थो पेगे़म्मे़ॽओ हे़क्क्याङ् खे़न् कुनिङ्वाॽ याःन्दिक् के़दाबा सुवाङ्हाॽ थङ्ङो फत्ते़म्सिमे़ॽओ खे़प्मोबा मनाहाॽ लुङ्धाक् इग्र लाम्धेत् मेःन्ने मुरे़क् खारे़क् थेआङ् के़होप्पादे़न्नो खे़ङ्हाॽ एःक् मे़युङ्लो॥ 32 खे़ङ्हाॽरे़ खुन्छिॽ उमेहाॽ नु वेॽ थक्साहाॽ के़रे़क् खिनिॽइन् मे़बोङ्लो॥ कन् माःङ्घा माःङ्घा के़युङ्बा मनाहाॽ आङ्गाॽ साम्मिःत् केजङ्ङो से़सुङ्सिङ्लो॥ के़रे़क् पिसाङ्लाम् खे़ङ्हाॽरे़ खुन्छिॽ लुम्मो आङ्गाॽ तुक्खे लाक्खे तारुङ्लो,” यहवे दाङ्बे़ल्ले़ पाःत्तुआङ् वाॽरो॥ 33 “हासोरे़न् स्यालाहाॽरे़ खुन्छिॽ वाॽमादे़न् पोङ्लो हे़क्क्याङ् कन् आभे़ल्ले़साङ् चिजि खक्खक् पोङ्लो॥ खे़प्मो आत्तिन्हाॽआङ् मे़न्वाॽने़न्लो, कप्मो आत्तिन्हाॽआङ् मे़न्युङ्ने़न्लो॥” यहवे दाङ्बे़ल्ले़ एलामे़न् खुम्दिङ् पिरु 34 यहुदाबा हाङ् सिदकियाहःल्ले़ हाङ्युक् चोःक्मा हेःक्तुबा ये़म्मो एलामरे़ कुयाःम्बेओ यहवे दाङ्बालाम् माङ्निङ्वाॽपान् के़बाःप्पा यर्मियाओ कन् इङ्घङ्ङिन् के़रे़॥ 35 मुक्साम्दाङ्बा यहवे दाङ्बे़ल्ले़ अक्खे पाःत्तुरो— “एलामबा तोङ् लि के़आप्पाहाॽ मे़क्खुङ्सिङ्लो खे़प्मोबा साॽरिक् के़धुम्बा थक्सुबाहाॽ मे़क्खुङ्सिङ्लो॥ 36 के़रे़क् पिसाङ्लाम् सुरित् केजङ् हुबा हे़क्के आङ्गाॽ निङ्मिहाॽ तारुङ्सिङ्लो हे़क्क्याङ् एलामबा मनाहाॽ से़सुङ्देसुङ्सिङ्लो॥ इक्सादिङ् खाम्बेःक्मोबा लाजेॽहाॽओ खे़ङ्हाॽ मे़दे़म्सु मे़देॽरुसिरो॥ 37 खे़न् फुत्लुम् थ्यःङ् तेमारे़ लागि आङ्गाॽ एलामरे़ कुनिङ्मिहाॽनु सोरिक् पेःक्कारो॥ साॽरिक् आयाःक्ले़ॽमो एलामबा मनाहाॽओ आङ्गाॽ यम्बा मे़क्मासिमे़न् तारुङ्लो,” यहवे दाङ्बे़ल्ले़ पाःत्तुआङ् वाॽरो॥ “खे़ङ्हाॽ खक्पे़त् मे़म्मे़ङ्सिङ्ङे थारिक् खे़ङ्हाॽ खुन्छिॽ निङ्मिहाॽरे़ ताभेनु मे़नाःत्तुसिरो॥” 38 यहवे दाङ्बे़ल्ले़ अक्खे पाःत्तुरो, “आङ्गाॽ आहाङ् युक्नान् एलामओ युक्खुङ्लो, हे़क्क्याङ् हाङ्हाॽ नु सुहाङ्गे़म्बाहाॽ मे़क्खुङ्सिङ्लो॥ 39 कर ताःन्दि के़दाबा ये़न्हाॽओ एलामे़न् याम्मो नुॽदार चोगुङ्लो॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.