यर्मिया 48 - लिम्बुमोआबरे़ कुमे़क्मा इङ्घङ् 1 मोआबरे़ कुयाःम्बेओ कन् इङ्घङ्ङिन् के़रे़आङ् वये़॥ मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुरो, “चिःत्ते़ स्ये़, नेबोबा ये़क्यक्किल्ले़ के़साक्पा तुक्खेन् हाङ्घुआङ् ने़रो, कन् ये़क्यक्किन् हाराए खाप्पुथ्यःङ् पोङ्लो! किर्यातैमबा ये़क्यक्किन् नःम्नःम्बा पोङ्ङाङ् मनाहुक्को थारो, हाङ्यक्किन् नःम्नःम्बा पोङ्ङाङ् लुःन्लो॥ 2 आत्तिन्हाॽरे़आङ् मोआबरे़ कुयाःम्बेओ याम्मो यम्बा मे़हे़न्छिङ्ल मे़म्बाःत्तुन्लो, थेआङ्भे़ल्ले़ खे़न् मे़ङ्मारे़ लागि हेस्बोनओ अक्तङ्बा चे़म्भन् पान् पोङ्ल पत्लो॥ खे़ङ्हाॽरे़ अक्खे मे़बाःत्तुॽ, ‘त्ये़म्मे़ॽओ, खे़न् सुवाङ्ङिन् आनिॽ मे़क्खुम्लो॥’ मदमेनबा ये़क्यक्किन्नाङ् चिजि खक्खक् पोङ्लो, ताभेःल्ले़ खे़प्मो के़दिम्दि के़दारिरो॥ 3 होरोनैमबा मनाहाॽ मे़अःक् मे़भिःक्लो, खे़न् यम्बा मे़क्मा नु सिमा हाःप्माहाॽ खे़प्से़म्मे़ॽओ॥ 4 मोआबे़न् के़रे़क् मे़गे़आङ् ने़रो, खे़प्मोबा हिन्जाॽबित्छाॽहाॽ मे़हाःप्लो॥ 5 खे़प्मोबा वे़प्मिबाहाॽ उःक्काङ् उक् मे़हाःप्लो, लुहितबा थाम्माङ्बान् खे़ङ्हाॽरे़ मे़लिङुरो॥ किमा यङ्मारे़ खे़ङ्हाॽ मे़हाःप्लो, होरोनैम सम्माङ्बो यो मे़धारो॥ 6 खिनिॽ हिङ्मारे़ लागि खे़त्तासिम्मे़ॽओ, मुरे़क् खारे़क् थेआङ् के़होप्पादे़न्नो ते़क्से़क्से़ःक्पा सिङ्बुङ् हे़क्तङ्बा पोःक्खे़म्मे़ॽओ! 7 थेआङ्भे़ल्ले़ खिनिॽ याङ्साकुन्धेओ हे़क्क्याङ् हुक्वा नुॽमो निङ्वाॽ के़युक्खुम्लो, खिनिॽ के़म्दे़म्सिआङ् के़म्देॽरिरो॥ खिनिॽ माङ् कमोसे़न् कुयक्याबा नु कुसुहाङ्युक्पाहाॽ सोरिक्, माःङ्घाबा लाजेॽओ मे़उःक्खु मे़धे़मु मे़देॽरुसिरो॥ 8 के़रे़क् ये़क्यक्हाॽ खाप्पुथ्यःङ् पोङ्लो, खे़ब्याङ् ने़ने़बादे़न्हाॽ इग्र ते़म्बेहाॽआङ् मे़क्लो आत्तिन्हाॽआङ् खे़त्छिङ्मा मे़न्छुक्ने़न्लो, थेआङ्भे़ल्ले़ यहवे दाङ्बे़ल्ले़ पाःत्तुआङ् वाॽरो॥ 9 मोआब लाजेन् युम् चुःत्ते़म्मे़ॽओ, हे़क्केलॽरिक् खे़न् मुरे़क् खारे़क् पोङ्लरो, खे़ल्ले़ कुये़क्यक्हाॽ चिजि खक्खक् पोङ्लो, खे़ङ्हाॽओ आत्तिन्हाॽआङ् मे़न्युङ्ने़न्लो॥ 10 “यहवे दाङ्बे़ल्ले़ कुयाःम्बक् मे़न्जोःक्मनाबा के़ले़म्बाहाॽ माङ्दे मे़धाररो, माक्खिॽ मे़न्छे़मनाबा ताभे के़जिङ्बाहाॽ साङ्ग्रारे़ ते़त्तुसिररो! 11 “मोआबे़न् के़रे़क्नुःल्ले़ तगिबा कुसाप्मुःन्धुम्मो खे़न् सनारुङ्ङो चिजि ये़म्ये़म् वाॽरो, खे़न् आप्फाल्ले़आङ् वेॽ लाजेॽ मे़न्देॽए वाॽरो॥ मे़ल्लिङ्ङे युङ्मनाबा सेजःङ्वा हे़क्के लॽरो॥ खप्प्याओनु वेॽ खप्प्याओ मे़ल्लिङ्ङे युङ्लो खे़न् आल्ल कुजागे़नुॽबा नु कुनाम्गे़नुॽबा चोक्लो॥” 12 यहवे दाङ्बे़ल्ले़ अक्खे पाःत्तुरो, “कर ये़म्मिन् हाराए तार पत्लो आङ्गाॽ मनाहाॽ पाङ्घुङ्सिङ्लो खे़ङ्हाॽरे़ खे़न् कुःन्दाओलाम् मे़लिङ्घुरो हे़क्क्याङ् खे़ङ्हाॽरे़ लाःक्कात् मे़हुक्खुरो, खे़ब्याङ् खे़ङ्हाॽरे़ कुःन्दाःन् मे़यःप्सु मे़देसुरो॥ 13 इस्राइलबा मनाहाॽ बेथेलओ खुन्छिॽ साम्म्याङ् पित्सात्तिन्नु मे़नुःन्दे़रो, खे़न् हे़क्के मोआबे़न् निन्धासेःक्ओ कुनावाइत्ला कमोसे़न्नु सिरिङ्ममो थारो॥ 14 “खिनिॽ अक्खेलॽरिक् यम्बा के़हे़न्नासिरो, ‘आनिगे़ग थङ् के़नाःम्बासिगे़रो, थङ्ङो के़आःप्पा मनादिगे़रो॥’ 15 कर आल्ल मोआबे़न् नु कुये़क्यक्हाॽ मे़मे़क्खुरो॥ खे़ल्ले़ साॽरिक् इङ्घुसिबा थाङ्बे़न् कुमनाहाॽ मे़से़रुसिरो,” मुक्साम्दाङ्बा यहवे दाङ्बा हाङ्ङिल्ले़ पाःत्तुरो॥ 16 “मोआबरे़ कुमे़क्मे़न् निःत्ताङ्ङे त्ये़आङ् वाॽरो, खे़ल्ले़ खाप्पुथ्यःङ् कुमे़क्मा सिमे़न् तार पत्लो॥ 17 मोआबरे़ कुघिरि के़युङ्बासे, खुने़ॽ कुमिङ्सो कुधाःङ्सो के़घे़म्बा के़निबासे, खे़ल्ले़ कुलागि हाबाम्मे़ॽ फिःक्ते़म्मे़ॽओ! ‘खे़ल्ले़ के़मुक्पा कुयुक्किन् मये़रो, कुहाङ्वा कुमाङ्वा नु कुमुक्साम्मिन् आल्ल होप्लो!’ 18 “खिनिॽ दिबोनबा मनासे, खिनिॽ मिमिदिङ्ङोनु यो थासिङ् ये़म्मे़ॽओ हे़क्क्याङ् खाम्भुत्छ्रुम्बो युङे़म्मे़ॽओ, थेआङ्भे़ल्ले़ आत्तिन्हाॽरे़ मोआबे़न् खाप्पुथ्यःङ् मे़जोगुॽ, खे़ङ्हाॽरे़ए दिबोने़न्नाङ् फुत्लुम् थ्यःङ् मे़जोगुरो॥ खे़ङ्हाॽरे़ खिनिॽ चङ्हिम्हाॽ मे़लुःन्दु मे़देसुरो॥ 19 अरोएरबा मनासे, लाम्मिल्ले़ कुबेसाङ् ये़बे़म्मे़ॽओ हे़क्क्याङ् खिनिॽ ओमे़त्ते़म्मे़ॽओ॥ मोआबलाम् के़घे़त्छिङ्बाहाॽ कम्भलॽरिक् फे़ःक्ते़म्सिमे़ॽओ, ‘खे़प्मो हे़न् पोःक्से़आङ् ने़गहौ?’ 20 हे़क्क्याङ् खे़ङ्हाॽरे़ अक्खे के़म्मे़त्तिरो, ‘मोआबे़न् थ्यःङ् कुनामे़न्छाॽ पोःक्खे़आङ् ने़रो, हाबे़म्मे़ॽआङ् मे़रिङ् थक्ते़म्मे़ॽओ! अर्नोन वहःङ्ङिल्ले़ कुयाओ अक्खे पाःत्ते़म्मे़ॽओ, मोआबे़न् खाप्पुथ्यःङ् पोःक्खे़आङ् ने़रो!’ 21 होलोन, यहसाह नु मेपातओ ते़ल्लक्कोबा पाङ्जुम्हाॽओ खासे़न्निन् त्ये़आङ् वाॽरो, 22 दिबोन, नेबो नु बेथ-दिब्लतैमओ, 23 किर्या-तैम, बेथ-गमुयल नु बेथ-मोनओ, 24 किर्योत नु बोज्राओ, माःङ्घा नु निःत्ताङ्बा मोआबबा के़रे़क् ये़क्यक्हाॽओ खासे़न्निन् थ्ये़आङ् वाॽरो॥ 25 “मोआबरे़ कुमुक्साम्मिन् नुबे़रो खे़ल्ले़ कुहुक्किन् ए़गे़आङ् वाॽरो,” यहवे दाङ्बे़ल्ले़ पाःत्तुआङ् वाॽरो॥ 26 “खे़न् होॽदोन् होॽदोन् लॽररो हे़क्क्याङ् थिःल्ले़ के़मबा हे़क्के चोःन्लरो, थेआङ्भे़ल्ले़ यहवे दाङ्बे़ल्ले़ कुदक्ले़ङ्वाओ खे़ल्ले़ पिफ्युङ् चोगुआङ् वाॽरो॥ मोआबे़न् आबाङे कुबे़ॽमाःत्तो होःत्छिङ्लो खे़ङ्ग के़रे़क् मनाहाॽरे़ खुन्छिॽ येःप्मा चाहाक् पोङ्लो॥ 27 इस्राइलबा मनाहाॽ थे कुनामे़न्छाॽ मे़प्मा चाहाक् के़न्जोगुसिन्बि? खे़ने़ॽ खे़ङ्हाॽ ताप्फे़ःल्लिक् मे़मे़त्तुसिबा कुसिङ् खे़ङ्हाॽ खुःन्द्रिक्पाहाॽरे़ खुन्छिॽ लुम्मो मे़दे़म्सुसिबि?” 28 “खिनिॽ मोआबबा मनासे, खिनिॽ ये़क्यक्हाॽओलाम् खे़त्तासिम्मे़ॽओ लुङ् लुङ्फुक्कोहाॽओ खिनिॽ युङे़म्मे़ॽओ! याक्पेॽफिःप्मो हाप् के़जोःक्पा पुत्तुःक्केन् कुसिङ् खिनिॽ याम्नारा थेःक्थेःक् चिङ्ङासिम्मे़ॽओ॥ 29 मोआबरे़ कुआङ्दिङ्ङिन् के़रे़क् खे़प्सुम्बे़आङ् वाॽरो! थेआङ्भे़ल्ले़ खे़न् साॽरिक् यम्बा ले़ङ्सिङ्लो॥ कुहे़न्छिङ्मा निङ्वान् नु यम्बा कुले़ङ्सिङ्मान् ए़ःत्ले़ॽ ए़ःत्ले़ॽ कुलॽमान् आनिगे निसुम्बे़रो॥” 30 यहवे दाङ्बे़ल्ले़ अक्खे पाःत्तुरो, “खे़ल्ले़ कुसाक्साक् लॽमे़न् आङ्गाॽ निसुङ्लो, कर खे़ल्ले़ कुहे़न्छिङ्माङ्ग खुने़ॽ चोगुबा थेनाधेबा कुयाःम्बक्हाॽ हे़क्तङ्बा चोक्लो॥ 31 खे़ल्ले़चोगुल्ले़ आल्ल मोआबरे़ कुलागि मे़रिङ् थक्कारो ओवा, मोआबरे़ कुलागि हाःप्पारो॥ किर-हरेसेतबा मनाहाॽरे़ खुन्छिॽ लागि आङ्गाॽ आयोम् पुॽरे़आङ् वाॽरो॥ 32 “सिब्माबा मनासे, चे़क्ले़क्सेॽ इक्ताप्हाॽओ खिनिॽ याङ्साकुन्धेसाबा के़जोगिरो, याजेरबा मनाहाॽरे़ लागि हाबाङ्बान्नुःल्ले़आङ् यरिक् आङ्गाॽ खिनिॽ लागि हाःप्पारो॥ खिनिॽ चे़ल्ले़क्सेल्ले़ कुदाप्पाहाॽ थिक्ले़ङ् युम्लाःक्खाङ् वरःङ् थारिक् माःङ्घा के़रे़रो, कर के़मे़ङ्बाहाॽरे़ खिनिॽ मुरे़क् खारे़क् के़म्जोगिरो! खे़ङ्हाॽरे़ खिनिॽ चे़ल्ले़क्सेॽहाॽ नु हाङ्वामो के़धोःक्पा सिङ्सेॽहाॽ मे़दुबुआङ् ने़रो॥ 33 मोआबबा चागे़नुॽबादे़न्हाॽलाम् सःप्मा नु ये़ये़ लॽमे़न् मये़रो॥ चे़ल्ले़क्सेॽ एःम्मादे़न्हाॽलाम् कुवा मे़लःन्ने़न्लो॥ हाःत्ले़आङ् खे़न् अःक्ल सःत्ल मे़लाःक्तुन्लो ओवा, खे़प्मो के़अःक्पा इक्ला वाॽरो, कर सःप्मा इक्लाग मेःन्लो॥ 34 “खे़न्नुःल्ले़ग, खे़ङ्हाॽ मे़गि मे़यङ्बा हाःप्मे़न् हेस्बोनलाम् एलाल नु अहाज थारिक्, सोअरलाम् के़रे़क् हेरोनैम हे़क्क्याङ् एग्लत-सलिसिया थारिक्के नुरिक्काङ् खे़म्दे़त्॥ आल्लो निम्रिमबा च्वाःत्हाॽआङ् चबे़आङ् ने़रो॥” 35 यहवे दाङ्बे़ल्ले़ अक्खे पाःत्तुॽ, “आङ्गाॽ मोआबे़न् खाप्पुथ्यःङ् पोङ्ल चोगुङ्ॽ, थेआङ्भे़ल्ले़ मनाहाॽरे़ साम्माङ् युक्नादे़न्हाॽओ वयागे़न् सिदुङ्जभा मे़दोन्दु हे़क्क्याङ् खे़ङ्हाॽरे़ खुन्छिॽ साम्माङ्हाॽओ सुक्पा मे़हाःन्दुॽ॥ 36 मोआबरे़ कुलागि नु किर-हरेसेतरे़ कुलागि आङ्गाॽ आसिक्लुङ्मे़न् मुफ्रामा हे़क्के मे़रिङ् थक्॥ थेआङ्भे़ल्ले़ खे़ङ्हाॽरे़ खुन्छिॽ के़रे़क् याङ्साकुन्धेहाॽ मे़गे़आङ् वाॽ॥ 37 मनाहाॽ मे़रिङ् मे़धक्काङ् खुन्छिॽ थे़गेक्पाहाॽ नु मुधोॽहाॽ मे़नःक्खुआङ् वाॽ॥ खे़ङ्हाॽरे़ खुन्छिॽ हुक्किन् मे़जे़रु हे़क्क्याङ् सगितेत् तमनाबा चाङ्हाॽ मे़जाक्खुआङ् मे़वाॽ॥ 38 मोआबबा के़रे़क् हिम्हाॽओ नु के़रे़क् लाम्हाॽओआङ् हाःम्लाक्वा हे़क्क्याङ् निङ्वाॽ तुक्खे चामा पोःक्खे़आङ् वाॽ॥ थेआङ्भे़ल्ले़ आङ्गाॽ मोआबे़न् चाहा मे़न्जोःक्मनाबा फुजिक् कुइसिक् फयॽ यःप्सुङ्ङाङ् ने़रो॥ 39 आक्खेलॽरिक् कन् कुम्जिक्मा पोःक्खे़! मे़रिङ्ङिन् खे़प्से़म्मे़ॽ! मोआबे़न् सिरिङ्ममो थ्ये़बान् ओमे़त्ते़म्मे़ॽ! कुबेसाङ्बा के़रे़क्ले़ लागि खाप्पुथ्यःङ् के़बोङ्बा कुबि नु कुनामे़न्छाॽ मे़प्मा चाहाक् पोःक्खे़आङ् ने़रो॥” 40 यहवे दाङ्बे़ल्ले़ अक्खे पाःत्तुरो— “ओमे़त्ते़ॽ! मुयान् कुइसिक् कुनिङ्मिःल्ले़ फत्तुरो, मोआबरे़ कुसम्धाङ् कुलाप्पिन् हप्फे़ फे़सुरो॥ 41 कल्ले़ कुये़क्यक्हाॽ हुक्काप् मे़जोगुरो, हे़क्क्याङ् हाङ्यक्हाॽ निङ्मि हुक्को थारो॥ सावाःन्दुङ्ङिल्ले़ तरुमा मे़न्छुमान् हे़क्के के़धुम्बा थक्सुबाहाॽआङ् साम्मिक्ले़ ले़रुसिरो॥ 42 मोआबे़न् याम्मो सुवाङ् मे़बोङ्ने़न्लो, थेआङ्भे़ल्ले़ खे़न् यहवे दाङ्बान्नु आङ्दिङ् लॽरे़रो॥ 43 “मोआबे, किमा यङ्मा नु इदाःक्हाॽ हे़क्क्याङ् चे़न्हाॽ खे़ने़ॽ के़लक्को थारो,” यहवे दाङ्बे़ल्ले़ पाःत्तुआङ् वाॽरो॥ 44 “किमा यङ्माओ आत्तिन्हाॽ मे़घे़त्छिङ्ॽ खे़ङ्हाॽ चे़न्नो मे़धारो हे़क्क्याङ् आत्तिन्हाॽ चे़न्नोलाम् मे़भिःन्छिङ्ॽ खे़ङ्हाॽ इस्रुप्पा इजोओ मे़धारो॥ खिनिॽ पेःक्मा के़ङ्घोसिन्बान् आङ्गाॽ ओमे़त्तुङ्लो थेआङ्भे़ल्ले़ खिनिॽ खासे़न् चोःक्मा ये़म्मिन् त्ये़आङ् वाॽरो,” यहवे दाङ्बे़ल्ले़ पाःत्तुआङ् वाॽरो॥ 45 “मनाहाॽ हेस्बोन थारिक्के मे़घे़त्छिङ्लो कर तगि पेःक्मा मे़न्छुक्ने़ल्लो॥ थेआङ्भे़ल्ले़ सिहोन हाङ्ङिल्ले़ उःन्छोःन्बा कुहिम् हेस्बोनलाम् पिफ्युङ्बा मनाहाॽ नु लाजेन् खाप्पुथ्यःङ् चोःक्मारे़ लागि मिधुङ् मिराःक् पोःक्लो॥ 46 “चिःत्ते़स्ये़रो, मोआबे, खे़ङ्हाॽ खे़ने़ॽ के़लागि मे़हाःप्लो! कमोस माङ्ङिल्ले़ कुमनाहाॽ मे़मे़गे़आङ् वाॽरो! खे़ने़ॽ के़स्सा ये़म्बित्छाहाॽ नु मे़न्छुमाहाॽ माःङ्घा मे़दे़म्सु मे़देॽरुसिआङ् मे़वाॽरो॥ 47 कर के़दाबा ये़न्हाॽओ आङ्गाॽ मोआबरे़ कुनुॽमा कुदामाहाॽ याम्मो नुःक्तुङ् पिरुङ्लो॥ आङ्गाॽ, यहवे दाङ्बे़ल्ले़ पाःत्तुङ्ङाङ् वाॽरो!” मोआबरे़ कुयाःम्बेओ यर्मियाःल्ले़ पाःत्तुबा कुनुप्मा माङ्निङ्वाॽपान्निन् हाबा कन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.