यर्मिया 47 - लिम्बुपलिस्तिहाॽरे़ खुन्छिॽ मे़न्नो यहवे दाङ्बे़ल्ले़ कुइङ्घङ् 1 मिस्रबा थक्सुबाहाॽरे़ गाजान् हुक्काप् चोःक्मानुःल्ले़ तगि गाजाबा पलिस्तिहाॽरे़ खुन्छिॽ याःम्बेओ यहवे दाङ्बे़ल्ले़ माङ्निङ्वाॽपान् के़बाःप्पा यर्मियान् मे़त्तुबा इङ्घङ्ङिन् आम्भा कन्लो॥ 2 यहवे दाङ्बे़ल्ले़ अक्खे पाःत्तुरो, “लाजेन् च्वाःत्तिल्ले़ सधे़क् तिम्मारे़ लागि थाङ्गे़त् लाम्बानु च्वाःत्तिन् कुङ् युर पत्लो॥ खे़ल्ले़ लाजेन् नु खे़प्मो के़वाॽबा के़रे़क् पाःन्हाॽ, ये़क्यक्हाॽ हे़क्क्याङ् मनाहाॽ मे़क्खुसिरो॥ मनाहाॽ मे़गि मे़यङ्ङाङ् मे़भिःक्लो, हे़क्क्याङ् लाजेॽओ के़वाॽबा के़रे़क् मे़रिङ् मे़धक्लो॥ 3 खे़प्से़ॽ, अन्लाङ्बुक्हाॽ थुरुप् थुरुप् लॽरो, हे़क्क्याङ् अन्लाधाहाॽ कुदुङ्दुङ् मे़लोःक्किल्ले़ काप्लोःक्हाॽ खन्द्रङ् खन्द्रङ् लाइक्लो॥ किमारे़ साम्मिक् के़माबा पाहाॽ के़नाङ्बा हे़क्के मे़लोःक्लो, याङ्साॽरुसिबा साहाॽ एगाङ् सुप्ले़क्काङ् ओमे़म्मे़त्तुसिन्लो॥ 4 “तुरोस नु सिदोन लाम्बाबा थक्सुबा चुम्दे़ङ्हाॽनु सोसोरिक् पलिस्तिहाॽरे़ खुन्छिॽ मे़क्मा ये़म्मिन् त्ये़आङ् वाॽरो॥ ओवा, यहवे दाङ्बे़ल्ले़ पलिस्तिहाॽ, क्रेत वागप्खेःङ्लाम् के़दाबाआङ् के़युङ्बा के़दाङ्बा के़याःक्पाहाॽ मे़ङ्मा इःत्तुसिआङ् वाॽरो॥ 5 गाजाबा मनाहाॽ नःम्नःम्बा मे़जोगुसिरो, अस्कलोने़न् चिजि ये़म्ये़म् पोङ्लो॥ खे़प्मोबा मनाहाॽरे़ खुन्छिॽ थे़गेक्पान् लिगोॽ मे़नःक्खुरो, खाम्दोःक्लुम् वरःङ्ङिल्ले़ कुयालाम् के़दाङ्बाहाॽ, आप्फाल्ले़ थारिक् के़हाबिआङ् मे़रिङ् के़धक्तिबे? 6 “खिनिॽ के़बाःत्तुम्ॽ, ‘आल्ल, यहवे दाङ्बे़ल्ले़ कुदाभेए, खे़ने़ॽ आप्फाल्ले़ याम्मो के़नाःम्सिङ्बे? खे़ने़ॽ आबाङे के़सुःप्पो नुःक्खे़ पेगे़ॽओ नाःम्सिङ्ङे़ॽ हे़क्क्याङ् स्वाःत् यागे़ॽओ॥’ 7 “कर खे़ल्ले़ आक्खेलॽरिक् नाःम्सिङ्मा सुक्तुबे? आङ्गाॽ यहवे दाङ्बे़ल्ले़ खे़न् याःम्बक् पिरुङ्ङाङ् वाॽरो, अस्कलोने़न् सॽमा नु वरःङ्ङिल्ले़ कुयाओ के़वाॽबा मनाहाॽ फप्मासिरे़ लागि खे़न् इङ्जाङ् पिरुङ्ङाङ् वाॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.