यर्मिया 46 - लिम्बुकर्कमिसओ मिस्रिहाॽ हारिमे़द्ये़ 1 वेॽ लाजेॽबा मे़न्छाम् सुवाङ्हाॽरे़ खुन्छिॽ याःम्बेओ यहवे दाङ्बालाम् माङ्निङ्वाॽपान् के़बाःप्पा यर्मियाओ कन् कुइङ्घङ्हाॽ के़रे़॥ 2 बेबिलोनबा हाङ् नबुकदनेसरे़ल्ले़ कर्कमिसबा ते़न्धङ्ङो युफ्रेतिस वहःङ्ङिल्ले़ कुयाओ मिस्रबा हाङ् फारो नेकोन् नु खुने़ॽ कुधक्सुबाहाॽ नाःन्दुसिबा सुये़म्मो यहुदाबा हाङ् योसियाःल्ले़ कुस्सा यहोयाकिमे़ल्ले़ हाङ्युक् चोगुबा लिसिगेक्पा तङ्बेओ कन् इङ्घङ्ङिन् मिस्र लाजेःल्ले़ कुयाःम्बेओ के़रे़आङ् वये़रो॥ 3 “खे़निॽ सिदि मादि खोहाॽ यारिप् चोगे़म्मे़ॽओ, थङ् चोःक्मारे़ लागि तगि पोरे़म्मे़ॽओ! 4 अन्हाॽओ करेलिहाॽ इसिक्खे़म्मे़ॽओ हे़क्क्याङ् अन्हाॽ युक्ते़म्सिम्मे़ॽओ! खिनिॽ ये़प्मादे़न्नो ये़बे़म्मे़ॽओ थे़गेःक्को खुःङ्माहाॽ खुःक्खे़म्मे़ॽओ! खिनिॽ लाःक्हाॽ ये़राप्ते़म्मे़ॽओ! हे़क्क्याङ् खिनिॽ फे़जाभे़युम्हाॽ यारिप् चोगे़म्मे़ॽओ॥ 5 कर आङ्गाॽ थे़माःन् निसुङ्बे? मिस्रबा थक्सुबाहाॽ किमे़ल्ले़ मे़घे़त्छिङ्लो॥ खे़ल्ले़ मे़ङ्गिमनाबा के़धक्पा कुमनाहाॽ एगाङ् सुप्ले़क्थिक्काङ् ओमे़म्मुए मे़घे़त्छिङ्लो॥ खे़ङ्हाॽ के़रे़क् पिसाङ्लाम् पगि मे़गि मे़सिरो,” यहवे दाङ्बे़ल्ले़ कन् पाःत्तुरो॥ 6 “हारा के़लोःक्पाहाॽ खे़त्छिङ्मा मे़न्छुक्ने़न्लो, साॽरिक् के़धुम्बा थक्सुबाहाॽ खे़त्छिङ्मा मे़न्छुक्ने़न्लो, थो युफ्रेतिस वहःङ्ङिल्ले़ कुयाओ खे़ङ्हाॽ मे़दोःक्काङ् ले़रे़म्भे़ना मे़जोन्लो॥ 7 “निल वहःङ्ङिन् कुइसिक् के़गुङ्बाआङ् के़बोबा के़धाङ्बा वहःङ्हाॽओबा च्वाःत्तिन् के़हुःक्पा के़धाङ्बा हे़क्तङ्बान् कन् हाःप्पे? 8 कङ्ग मिस्र लाजेॽबा थक्सुबारो के़रे़क् लाजेन् सधे़क् के़धिम्बा ये़क्यक्हाॽ नु खे़प्मोबा मनाहाॽ के़मे़ङ्बा, इक्सादिङ् खाम्बेःक्मान् के़दे़प्पा वदप्मा हे़क्के लॽरो॥ 9 अन्लाधा नु अन्छे, लोःक्ते़म्मे़ॽओ, मिस्रबा मुक्साम्बा थक्सुबाहाॽ फत्ताम्सिम्मे़ॽओ! तोङ् नु खो याङ्मा कुहुक्वा के़नुॽबा कुस, लिबिया नु लुदबा थक्सुबा चुम्देङ्से त्ये़म्मे़ॽओ! 10 थेआङ्भे़ल्ले़ कङ्ग यहवे दाङ्बे़ल्ले़ कुये़न्लो, मुक्साम्दाङ्बा यहवे दाङ्बे़ल्ले़ कुनिङ्मिहाॽरे़ लागि कुले़क्वा नुःक्मा ये़न्लो॥ ताभेःल्ले़ कुसिक् मे़न्जिम्मे थारिक् ओवा, माक्खिल्ले़ मे़म्मए थारिक्, ताभेःल्ले़ खल्ले़ःङ् ले़ःक्खुसिरो! युफ्रेतिस वहःङ्ङिल्ले़ कुयाओबा थाङ्गे़त् पिसाङ्बा लाजेॽओ यहवे दाङ्बा, मुक्साम्दाङ्बा यहवे दाङ्बे़ल्ले़ आइन् वयागे़न् सिदुङ्जभा यारिप् चोगुर याक्लो॥ 11 “सिसागे़न् मे़न्छ्या मिस्र लाजेॽए, गिलादओ थो सिदाॽ युःत्छे़ पेगे़ॽओ, कर खे़ने़ॽ यरिक् सिदाॽपाङ्दाॽ के़मे़त्छिङ्साङ् खे़ल्ले़ खे़ने़ॽ के़न्वेःत्ने़न्लो॥ 12 मे़न्छाम् सुवाङ्हाॽरे़ खे़ने़ॽ के़नाधामान् मे़घे़प्सुआङ् वाॽरो॥ खे़ने़ॽ के़यङ्मा के़प्मा हाःप्मा फिःक्मे़ल्ले़ इक्सादिङ् खाम्बेःक्मान् थिम्सुरो॥ खे़ने़ॽ साॽरिक् के़धुम्बा के़धक्सुबाहाॽ थिक्नु थिक् मे़लोःक्लो खे़म्ब्याङ् खे़ङ्हाॽ सोसोरिक् मे़जोन्लो॥” 13 बेबिलोनबा हाङ् नबुकदनेसररे़ मिस्र लाजेन् फप्मारे़ लागि निङ्सेक् चोगुबा पाःन्निल्ले़ कुयाःम्बेओ यहवे दाङ्बे़न्लाम् माङ्निङ्वाॽपान् के़बाःप्पा यर्मियोओ कन् इङ्घङ्ङिन् के़रे़रो॥ 14 “मिस्र लाजेॽओ खे़ने़ॽ अःक्ते़ॽओ! मिग्दोल, मेम्फिस नु तहपन्हेस ये़क्यक्हाॽओ खे़ने़ॽ अक्खे मे़त्ते़से़ॽओ! ते़न्धङ् चोःक्मारे़ लागि ये़म्मासिम्मे़ॽओ, थेआङ्भे़ल्ले़ ताभेःल्ले़ खिर्लि के़वाॽबाहाॽ के़रे़क् ले़ःक्खुसिरो॥ 15 खिनिॽ थक्सुबाहाॽ थेआङ् मे़जोःन्दे़बे? खे़ङ्हाॽ तक्पे़त् ये़प्मा मे़न्छुक्ने़न्लो, थेआङ्भे़ल्ले़ आङ्गाॽ यहवे दाङ्बे़ल्ले़ खे़ङ्हाॽ हिप्तुङ् सोःन्दुङ्सिङ्लो॥ 16 खे़ङ्हाॽ मे़दोःक्काङ् कुसे़त् कुसे़त् मे़जोन्लो हे़क्क्याङ् खे़ङ्हाॽ अक्खे मे़मे़त्छिङ्लो, ‘त्ये़म्मे़ॽ, आनिॽ साआवाःन्छिङ्बा लाजेॽओ आनिॽ मनाहाॽओ नुःक्खि पेगिरो॥ निङ्मिहाॽरे़ खुन्छिॽ ताभेलाम् आनिॽ खे़त्तासिरो!’ 17 खे़प्मो खे़ङ्हाॽरे़ अक्खे मे़बाःत्तुरो, ‘मिस्रबा फारो हाङ्ङिङ्ग कुम्ब्रा के़इःप्पारो खे़ल्ले़ कुसुये़म्मिन् मे़घोसुन्लो॥’” 18 मुक्साम्दाङ्बा यहवे दाङ्बा मिङ् के़वाःप्पा हाङ्ङिल्ले़ अक्खे पाःत्तुरो, “आङ्गाॽ कुहिङ्वे़त् वाॽआबा हे़क्के कोःक्माहाॽओ तबोर हे़क्तङ्बा थिक् युरो, वरःङ्ङिल्ले़ कुयाओबा कर्मेल थे़गुन् हे़क्के तारो! 19 खिनिॽ मिस्रबा यक्युङ्बारे, खिनिॽ सुक्वाहाॽ कक्चोगे़म्मे़ॽओ! ते़म्मा तेॽमा यारिप् पोःक्खे़म्मे़ॽओ! थेआङ्भे़ल्ले़ लत्छा मनाआङ् मे़न्युङ्ङे, मेम्फिसबा ये़क्यक्किन् खाप्पुथ्यःङ् पोङ्लो॥ 20 मिस्रःन् वरे़ङ्ले़ङ्मा नुमा पिप्मा हे़क्के लॽरो, कर थाङ्गे़त्लाम् खिःन्द्वाधिक् युर पत्लो॥ 21 मिस्र लाजेःल्ले़ नाम्याक् पिरुसिबा कुधक्सुबाहाॽ चाप्मे़ॽ के़मे़ॽबा पित्सात्हाॽ हे़क्के मे़लॽरो॥ खे़ङ्हाॽआङ् हिल्लिक् मे़नुःङ्ङाङ् मे़लोःक्लो, थेआङ्भे़ल्ले़ कङ्ग मिस्र लाजेःल्ले़ लागि पयम् यम्बा मे़क्मासिमा ये़न्लो, साॽरिक् यम्बा खुम्दिङ्ले़ ये़म्लो॥ 22 असेःक्किन् सःन्छिङ् पेःक्पा कुइसिक् मिस्रिहाॽ स्वाःत्ताङ् मे़घे़त्छिङ् मे़बेःक्लो॥ तःन्दिॽ के़देॽबाआङ् सिङ्बुङ् के़आःप्पाहाॽ हे़क्के लाजेॽ के़नाप्पा थक्सुबाहाॽ मे़लात् मे़दारो॥” 23 यहवे दाङ्बे़ल्ले़ अक्खे पाःत्तुरो, “सिङ्हाॽ ले़ःङ्मनाबा कुइसिक् खे़ङ्हाॽरे़ खे़न् लाजेॽबा मनाहाॽ मे़ले़ःक्खुसिरो, थेआङ्भे़ल्ले़ खे़ङ्हाॽ निःङ्घुक्वानुःल्ले़ यरिक् मे़वाॽरो॥ 24 मिस्र लाजेन् नःम्नःम्बा पोङ्लो, थो नु के़युबा मनाहाॽरे़ खुनिॽ हुक्को थारो॥” 25 मुक्साम्दाङ्बा यहवे दाङ्बा, इस्राइलबा निङ्वाॽफुमाङ्ङिल्ले़ अक्खे पाःत्तुॽ, “आङ्गाॽ थेबेसबा आमोन साम्माङ्ङिन्, फारोन्, मिस्रःन् हे़क्क्याङ् खे़ल्ले़ कुसाम्माङ्हाॽ नु कुहाङ्हाॽ, हे़क्क्याङ् फारोन् नागे़साॽबाहाॽआङ् के़रे़क् खुम्दिङ् पिरुङ्सिङ्ॽ॥ 26 आङ्गाॽ खे़ङ्हाॽ खुन्छिॽ से़प्मा निङ्वाॽ के़जोःक्पा, बेबिलोनबा हाङ् नबुकदनेसर नु खे़ल्ले़ कुधक्सुबाहाॽ हुक्सुप्तुङ्सिङ्ॽ॥ कर खे़न् एगाङ् कुले़क्वा थङ् पोङ्ङिल्ले़ थङ्लाम् लाजेन् याम्मो नुःङ्ॽ॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥” 27 “कर आसे़वारोबा, याकुबे, मे़गिसे़न्ने़ॽओ, इस्राइलए, निङ्साङ्ङो मे़ध्ये़न्ने़ॽओ॥ थेआङ्भे़ल्ले़ माःङ्घाबा लाजेॽलाम् आङ्गाॽ याम्मो हिम्मो ताःत्ने़रो, हे़क्क्याङ् के़स्साहाॽ मे़दे़म्सु मे़देॽरुसिबालाम् याम्मो मे़नुःङ्लो॥ इस्राइले़न् सनारुङ् नु नुॽमा तामाओ नुःङ्लो, खे़ब्याङ् खे़ङ्हाॽ आत्तिल्ले़आङ् यङ्मा मे़से़रुसिन्लो॥” 28 यहवे दाङ्बे़ल्ले़ अक्खे पाःत्तुरो, “आसे़वारोबा याकुबे, खे़ने़ॽ मे़गिसे़न्ने़ॽओ, थेआङ्भे़ल्ले़ आङ्गाॽ खे़ने़ॽनु वाॽआरो॥ आङ्गाॽ खे़ने़ॽ लःत्ने़देने़आङ् के़वाॽबा सुवाङ्हाॽ आङ्गाॽ फुत्लुम् थ्यःङ् तेसुङ्सिङ्लो, कर खे़ने़ॽग फुत्लुम् थ्यःङ् मे़देने़न्लो॥ आङ्गाॽ खे़ने़ॽ हे़न्थिम् याक्ने़रो, कर के़लाॽबा हे़न्थिम् याक्ने़रो, खे़ने़ॽ खुम्दिङ् मे़म्बिए मे़ले़त्ने़न्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.