यर्मिया 45 - लिम्बुबारुकरे़ कुलागि निङ्वाॽफुमाङ्ङिल्ले़ माङ्हुप् चोगु 1 योसियाहरे़ कुस्सा यहोयाकिमे़न् यहुदाबा हाङ् पोःक्खे़बा तङ्बे लिसिओ माङ्निङ्वाॽपान् के़बाःप्पा यर्मियाःल्ले़ नेरियाहरे़ कुस्सा बारुके़न् लत्छा इङ्घङ् मे़त्तु, खे़न् एगाङ् यर्मियाःल्ले़ साप्पाङ्घुङ्बा के़रे़क् पाःन्हाॽ बारुके़ल्ले़ लत्छा किप्मनाबा साप्लाथःङ्मो साप्तु॥ खुने़ॽ मे़त्तु, 2 “बारुक्के, यहवे दाङ्बा इस्राइलबा निङ्वाॽफुमाङ्ङिल्ले़ खे़ने़ॽ अक्खे के़मे़त्लो— 3 खे़ने़ॽ अक्खे के़बाःत्तुआङ् वाॽ, ‘तुक्खेःल्ले़ आङ्गाॽ आसक्मा पुॽरे़आङ् वाॽआ! थे आङ्गाॽ तुक्खेःल्ले़ तगिए आयाम् मे़दुगे़न्नाङ् मे़वने़म्बि? हे़क्क्याङ् आल्लो यहवे दाङ्बे़ल्ले़ याम्मो यरिक् योॽराङ् पिराङ्ङाङ् वाॽ! आङ्गाॽ सक्मा पुॽमारे़ नासाङ्ङाङ् वाॽआ खे़ब्याङ् नाःम्सिङ्मादे़न् खोमा मे़सुक्कान्!’ 4 “बारुक्के, यहवे दाङ्बे़ल्ले़ अक्खे पाःत्तुॽ, ‘आङ्गाॽ चोगुङ्बा कन् सुवाङ्ङिन् फे़त्लाःन्दुङ्ॽ॥ आङ्गाॽ लेःत्तुङ्बान् हाॽयाक् आःक्खुङ्देसुङ्ॽ, कङ्ग लाजेॽ के़रे़क् पोङ्ॽ॥ 5 थे खे़ने़ॽ आबाङे के़लागि पयम् यम्बा पाःन्हाॽ के़गोःत्तुर के़वाॽबि? खे़ने़ॽ हे़क्के मे़जोगे़न्ने़ॽ! आङ्गाॽ के़रे़क् मे़न्छाम् याप्मिहाॽरे़ खुनिॽ सम्धाङ् मे़क्मासिमे़न् तारुङ्ॽ, कर खे़ने़ॽग आत्तान् के़बेःक्साङ् थुम्घो कुइसिक् खे़ने़ॽ के़हिङ्ल याःन्ने़ॽ॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.