यर्मिया 44 - लिम्बुनावाइत्ला से़वा के़मे़प्पाहाॽरे़ लागि खासे़न् 1 मिस्र लाजेॽ थोहाङ् ले़प्माङ्बा ये़क्यक् मिग्दोल, तहपनेस नु मेम्फिसबा ये़क्यक्हाॽओ हे़क्क्याङ् लाङ्गे़त् पिसाङ् के़युङ्बा यहुदाबा मनाहाॽरे़ खुन्छिॽ याःम्बेओ यर्मियाओ के़रे़बा इङ्घङ्ङिन् हाबा कन्लो— 2 “मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ—यरुसले़म नु यहुदाबा ये़क्यक्हाॽओ आङ्गाॽ तारुङ्बा मे़क्मासिमे़न् खे़ने़ॽ आबाङे के़मिक्किल्ले़ के़निसु॥ आल्लो खे़न् ये़क्यक्हाॽ खाप्पुथ्यःङ् नु चिजि खक्खक् पोःक्खे़आङ् ने़रो॥ 3 खे़ङ्हाॽरे़ खुन्छिॽ फे़न्याःम्बक्किल्ले़ आङ्गाॽ आसिक् मे़भोःक्खु॥ खे़ङ्हाॽरे़ कुसिङ् मे़न्निःत्तुसिन्बा हे़क्क्याङ् खुन्छिॽ पाधे़बाहाॽरे़आङ् आभे़ल्ले़आङ् कुसिङ् मे़न्निःत्तुसिन्बा वेॽ माङ् साम्माङ्हाॽओ सुक्पा मे़हाःन्दुआङ् से़वा मे़मे़त्तुसि॥ 4 “आङ्गाॽ आसे़वारोबाहाॽ, माङ्निङ्वाॽपान् के़बाःप्पाहाॽ ये़त्ले़ङ् ये़त्ले़ङ् खुन्छिॽ लागि अक्खे मे़त्तुङ्सिङ्ङाङ् पाङ्घुङ्सिङ्, ‘आङ्गाॽ चाॽरिक् चिःत्तुङ्बा किप्मा के़घुबा पाःन्हाॽ खिनिॽ मे़जोगे़म्मिन्ने़ॽ॥’ 5 कर आङ्गाॽ आमनाहाॽरे़ आबाःन्निन् मे़ङ्घे़प्सुन्, इग्र खुन्छिॽ फे़न्याःम्बक्कोलाम् मे़न्नुःक्खे़न्॥ खे़ङ्हाॽरे़ कन् माङ् साम्माङ्हाॽओ चक्मे़ल्लॽए सुक्पा मे़हाःन्दु॥ 6 खे़ल्ले़चोगुल्ले़ आङ्गाॽ आयाःक्ले़ॽमान् मि हे़क्के मिधुङ् मिराःक् पोगे़ हे़क्क्याङ् यहुदाबा ये़क्यक्हाॽओ नु यरुसले़मबा लाम्हाॽओ थ्ये़, हे़क्क्याङ् खे़ङ्हाॽ आइन् थारिक्साङ् चिजि खक्खक् मुरे़क् खारे़क् ने़रो॥ 7 “हे़क्क्याङ् मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ खिनिॽ के़मे़त्तिॽ—खिनिॽ आप्फेक् थेआङ् के़मे़ङ्ङासिबाबे? थेआङ्भे़ल्ले़ ये़म्बित्छाहाॽ, मे़न्छुमाहाॽ, इग्र यहुदालाम् के़युबा हिन्जाॽबित्छाॽ, किग्र खिनिॽ लाप्फिःप्माहाॽओबा अङे़ःक्वाहाॽ आत्तिन्हाॽआङ् के़न्हिङिन्ॽ॥ 8 कन् मिस्र लाजेॽओ खिनिॽ हुक्किल्ले़ के़जोगुम्सिम्बा नावाइत्लाहाॽओ सुक्पा के़हाःन्दुम्माङ् थेआङ् आङ्गाॽ आसिक् के़भोःक्खुम्बाबे? खिनिॽ आबाङेरक् के़मे़ङ्ङासिॽ हे़क्क्याङ् इक्सादिङ् खाम्बेःक्मोबा के़रे़क् मे़न्छाम् सुवाङ्हाॽरे़ लागि साक्मुरा माङ्दे नु किनाःन्दि चाहाक् के़जोःक्कासिॽ॥ 9 थे खिनिॽ सुधे़बा ताक्थे़बाहाॽरे़ खुन्छिॽ लायोहाॽ, यहुदाबा हाङ्हाॽ नु हाङ्माहाॽरे़ खुन्छिॽ लायोहाॽ, हे़क्क्याङ् खिनिॽ नु खिनिॽ मेःत्हाॽरे़ यहुदा नु यरुसले़ःम्मो के़जोगुम्बा लायोहाॽ निङ्वाॽ के़भेःत्छुम्बि? 10 आल्लो कन् ये़म्मोआङ् नःम्नःम् मे़ल्लॽए के़वयिॽ इग्र मिङ्सो इङ्धाङ् ओसेःन्धाङ् मे़न्जोःक्के के़वयिॽ॥ आङ्गाॽ खिनिॽ तगि खिनिॽ सुधे़बा ताक्थे़बाहाॽ पिरुङ्सिङ्बा पान् नु थिम्हाॽ इःप्मा नाःप्मारे़ लागि आत्तिल्ले़आङ् निङ्वाॽ मे़म्बिए वाॽ॥ 11 “खे़ल्ले़चोगुल्ले़ मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, आङ्गाॽ खिनिॽ के़रे़क् मे़ङ्मानिङ् निःन्धो चोगुङ्ङाङ् वाॽ॥ 12 मिस्रओ पेःक्माआङ् युङ्मा निङ्वाॽ निःन्धो के़जोःक्पा खे़न् यहुदाओ पक्मे़ध्ये़ मे़याःक्ते़बा मनाहाॽ आङ्गाॽ तेॽरुङ्सिङ्ङाङ् युम्रे़क् मे़क्खुङ्सिङ्ॽ॥ कन् मिस्र लाजेॽओ के़धाबाहाॽ के़रे़क् साक्वान् नु थङ्ङो मे़सिरो॥ खे़ङ्हाॽ चुक्पाआङ्धो यम्बा थारिक्पा के़रे़क् मे़सिरो॥ खे़ङ्हाॽ आप्तिक्साबा, किप्मागे़घुबा, माङ्दे साङ्ग्रा नु किनाःन्दि मे़बिरुसिबा मे़बोङ्ॽ॥ 13 आङ्गाॽ खे़ङ्हाॽ यरुसले़ःम्मो ते़न्धङ्, साक्वान् नु तुक्मा लाःक्मा मिङ्देल्ले़ खुम्दिङ् पिरुङ्ङाङ् वयाङ्बा हे़क्केए मिस्र लाजेॽओ खुम्दिङ् पिरुङ्सिङ्ॽ॥ 14 कुभा ये़म् एगाङ् यहुदाओ नुःङ्मा थाङ्मा निङ्वाॽ के़इःप्पा खे़न् पक्मे़ध्ये़ मे़याःक्ते़बा मिस्र लाजेॽओ के़घे़त्छिङ्बा के़बेःक्पा आत्तिन्हाॽआङ् मे़न्हिङ्ने़न्॥ खे़न् पक्मे़ध्ये़ मे़याःक्ते़बाहाॽ आबाङे लाजेॽओ नुःङ्मा निङ्वाॽ मे़इःत्तुसाङ् हे़क्के के़इःप्पाग साॽरिक् सुःल्लिक्लक् मे़नुःङ् मे़धाङ्ॽ॥” 15 खे़ब्याङ् खे़न् यरिक् सङ्जुम्भोहाॽओ के़जुम्बा के़रे़क् ये़म्बित्छाहाॽरे़ खुन्छिॽ मेःत्हाॽरे़ साम्माङ्हाॽओ सुक्पा मे़हाःन्दुबा निङ्वाॽ मे़घोसुआङ् वये़, हे़क्क्याङ् खे़प्मो के़जुम्मा के़रे़क् मे़न्छुमाहाॽ थाङ्गे़त् ले़प्माङ्बा मिस्र लाजेॽ नु लाङ्गे़त् पिसाङ्बा मिस्र लाजेॽ के़वाॽबा यरिक् इस्राइलि मनासुम्हाॽ मे़द्ये़आङ् यर्मियान् मे़मे़त्तु, 16 “यहवे दाङ्बालाम् के़बाःत्तुबा के़इङ्घङ्हाॽ आनिगे मे़घे़प्सुम्बे़न्ॽ! 17 आनिगे चोःक्मा सिराॽ के़धाङ्बा च्यासाङ् चोगुम्बे़ॽ॥ आनिगे नु आनिगे पाधे़बा, हाङ्हाॽ हे़क्क्याङ् लाम्लोबाहाॽरे़ यहुदाबा ये़क्यक्हाॽ नु यरुसले़ःम्मोबा लाम्लाम्मो आभे़ल्ले़साङ् सिदुङ्जभा मे़दोन्दुआङ् वये़, खे़न् कुइसिक् आनिगे सिराॽथाङ्धाङ् साङ्ग्राम्पेदाङ्मा हाङ्माओ सुक्पा हाःन्दुम्बे़ हे़क्क्याङ् सेजःङ्वा सिदुङ्जभाहाॽ हुक्खुम्बे़॥ थेआङ्भे़ल्ले़ खे़न् ये़म्मो आनिगे वे़त्ते़सरे़ कुजा कत्तुम्बे़, आनिगे नुॽमा तामा पोःक्खे़आङ् वये़ हे़क्क्याङ् आनिगे ये़त्तुक्खे तुमुम्बे़बा होःप्ते़॥ 18 कर साङ्ग्राम्पेदाङ्मा हाङ्माओ आनिगे सुक्पा हाःम्मा, सेजःङ्वा सिदुङ्जभा तोःम्मा नु से़वा मे़प्मा ले़रुम्बे़आङ्धो आनिगे यम्बा तुक्खेलाक्खेओ थ्ये़ॽइगे़आङ् वयिगे़ खे़ब्याङ् ते़न्धङ् नु साक्वाःन्लाम् स्ये़ॽइगे़र वयिगे़॥” 19 आल्लसाङ् मे़न्छुमाहाॽरे़ मे़योॽरुर मे़बाःत्तुॽ, “आनिगे ये़म्बाहाॽरे़ निङ्वाॽ मे़ङ्घोए नु मे़म्भाॽए साङ्ग्राम्पेदाङ्मा हाङ्माओ आनिगे सुक्पा हाःन्दुम्बे़ हे़क्क्याङ् सेजःङ्वा सिदुङ्जभाहाॽ हुक्खुम्बे़, खे़ब्याङ् खुने़ॽ कुइत्तो माङ्सोःक् चोगुम्बे़ फाॽआङ् खे़ने़ॽ के़इःत्तुबि? से़क्खाःल्ले़ मेःन्!” 20 खे़ब्याङ् ये़म्बित्छाॽहाॽ नु मे़न्छुमाहाॽ के़रे़क्ले़ मे़मे़त्तुबा कुइसिक् यर्मियाःल्ले़ खे़ङ्हाॽ के़रे़क् मे़त्तुसि, 21 “खिनिॽ, खिनिॽ थाःक्हाॽरे़, खिनिॽ हाङ्हाॽ नु खिनिॽ सुहाङ्युक्पाहाॽरे़ हे़क्क्याङ् यहुदाबा ये़क्यक्हाॽओ नु यरुसले़मबा लाम्लाम्मो के़रे़क् मनाहाॽरे़ नावाइत्हाॽओ सुक्पा मे़हाःन्दुबान् यहवे दाङ्बे़ल्ले़ निङ्वाॽ मे़घोसुन् लॽरिक् खिनिॽ के़इःत्तुम्बि? 22 खिनिॽ के़जोगुम्बा याम्गे़सिङ्बा पाःन्हाॽ यहवे दाङ्बे़ल्ले़ नासि मे़धःत्तुम्बाल्ले़ चोगुल्ले़ खुने़ॽ खिनिॽ लाजेन् आल्लो माङ्दे साङ्ग्रा मे़मे़त्तुबा, मना मे़न्युङ्मनाबा चिजि खक्खक् मुरे़क् खारे़क्पा पोःक्खे़आङ् ने़रो॥ 23 यहवे दाङ्बे़ल्ले़ कुदक्ले़ङ्वाओ खिनिॽ लायो के़जोगुम्बा नु नावाइत्लाहाॽओ सुक्पा के़हाःन्दुम्बाल्ले़ चोगुल्ले़ कन् के़रे़क् किप्मा के़घुबा पाःन्हाॽ पोःक्खे़बारो॥ खुने़ॽ कुइङ्जाङ्हाॽ इःप्मा नाःप्मा के़न्दे़न्दिन् हे़क्क्याङ् खुने़ॽ कुइङ्जाङ्हाॽ, कुधिम्हाॽ नु कुभाङ्हाॽ मे़न्इःत्ते मे़न्नाःत्ते के़वयिॽ॥” 24 खे़ब्याङ् यर्मियाःल्ले़ खे़ङ्हाॽ के़रे़क् नु मे़न्छुमाहाॽआङ् मे़त्तुसि, “मिस्र लाजेॽओ के़युङ्बा खिनिॽ यहुदाबा यक्युङ्बा के़रे़क्ले़ यहवे दाङ्बे़ल्ले़ कन् कुइङ्घङ्ङिन् खे़प्से़म्मे़ॽ॥” 25 मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ पाःत्तुॽ, “खिनिॽ नु खिनिॽ मेःत्हाॽरे़ के़बाःत्तुम्माङ् वाॽ, ‘साङ्ग्राम्पेदाङ्मा हाङ्माओ सुक्पा हाःम्मा नु सेजःङ्वा सिदुङ्जभाहाॽ हुङ्मा आनिगे चोगुम्बे़बा माङ्हुप्पिन् चोगुम्बे़,’ हे़क्क्याङ् खिनिॽ के़बाःत्तुम्बान् खिनिॽ याःम्बक्लाम् ओसेःन्धाङ् के़जोगुम्॥ कल्ले़चोगुल्ले़ खिनिॽ खे़न् हाङ्माओ के़जोगुम्बा माङ्हुप्हाॽ नु माङ्हे़क्हाॽ तगि चोगे़म् तेॽरे़म्मे़ॽ! 26 “कर आल्लो मिस्र लाजेॽओ के़युङ्बा यहुदिसे, यहवे दाङ्बे़ल्ले़ कन् कुइङ्घङ्ङिन् खिनिॽ के़रे़क्ले़ खे़प्से़म्मे़ॽ—यहवे दाङ्बे़ल्ले़ पाःत्तुॽ, ‘आङ्गाॽ पयम् यम्बा आमिङ्ङो माङ्हे़क् चोगुङ्ङाङ् वाॽ, आल्लआङ्धो मिस्र लाजेॽओ के़युङ्बा आत्तिन् यहुदिहाॽरे़आङ् आङ्गाॽ आमिङ् मे़ल्लोःक्खुन्ॽ॥ खिनिॽ आत्तिन्हाॽरे़आङ् आङ्गाॽ आमिङ्ङिन् के़म्बाःत्तुम्मिन्ॽ इग्र कन् माङ्हे़क्किन् ओगप् के़न्जोगुम्मिन्, “हिङ्मन्दाङ्बा मुक्साम्दाङ्बा यहवे दाङ्बा निङ्वाॽफुमाङ्ङिन् साखि युक्खुङ्ॽ॥” 27 थेआङ्भे़ल्ले़ खिनिॽओ नुॽमा तामा मेःन् कर मे़क्मासिमे़न् ताःप्मारे़ लागि खिनिॽ अदक्तक् ओमे़त्निङ्ॽ॥ खिनिॽ यहुदालाम् के़युबाआङ् मिस्र लाजेॽओ के़युङ्बाहाॽ के़रे़क् हदॽ मे़न्छिए थारिक् थङ्ङो नु साक्वाःन्नो तुक्खे के़ज्ये़ॽइ॥ 28 चबे़ःत्छिक्लक् सिमे़न्लाम्बा के़दाङिआङ् मिस्र लाजेॽलाम् यहुदाओ के़नुःक्खिॽ॥ खे़ब्याङ् खे़न् के़रे़क् मिस्र लाजेॽ के़युबाहाॽरे़ आङ्गाॽ आबाःन्ने़न् से़क्खाबि इ खे़ङ्हाॽरे़ खुन्छिॽ पाःन्ने़न् से़क्खाबि फाॽआङ् निङ्वाॽ मे़घोसुॽ॥’ 29 “हे़क्क्याङ् यहवे दाङ्बे़ल्ले़ पाःत्तुॽ, ‘खिनिॽ यङ्मा से़त्निङ्बा के़रे़क् पाःन्हाॽ खिनिॽओ के़त् हे़क्क्याङ् कॽयो खिनिॽ खुम्दिङ् पिनिङ्ॽ॥ आङ्गाॽ कन् पाःन्निन् चोगुङ्ङाङ् ओसेःन्धाक्निङ्ॽ॥’ 30 यहवे दाङ्बे़ल्ले़ अक्खे पाःत्तुॽ, ‘आङ्गाॽ यहुदाबा हाङ् सिदकियाहःन् बेबिलोनबा नबुकदनेसर हाङ्ङो हिसुङ्बा कुइसिक् मिस्रबा फारो होप्राःन्नाङ् खुने़ॽ से़प्मा के़गोःप्पा कुनिङ्मिहाॽरे़ए खुन्छिॽ हुक्को हिसुङ्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.