यर्मिया 43 - लिम्बुयर्मियान् मिस्र मे़देॽरु 1 आल्ल यहवे दाङ्बा खे़ङ्हाॽरे़ खुन्छिॽ निङ्वाॽफुमाङ्ङिल्ले़ यर्मियान् मे़त्तुबा कन् इङ्घङ्ङिन् मनाहाॽ मे़प्मा सुरुसि, 2 खे़ब्याङ् होसयाहरे़ कुस्सा अजर्याहन् नु कारेहरे़ कुस्सा योहानाने़न् हे़क्क्याङ् वेॽ के़रे़क् आङ्दिङ् के़लॽबा मनाहाॽरे़ यर्मियान् अक्खे मे़मे़त्तु, “खे़ने़ॽ इङ्ले़क् पान् के़बाःत्तुर के़बत्! यहवे दाङ्बा आनिगे निङ्वाॽफुमाङ्ङिल्ले़ मिस्र लाजेॽओ आनिगे पेःक्मा मे़भाःक्तिगे़न्बा होप्! 3 कर नेरियाहरे़ कुस्सा बारुक्के़ल्ले़ खे़ने़ॽ कन् पाःप्मा के़बाङ्घे़आङ् वाॽ, थेआङ्भे़ल्ले़ खुने़ॽ आनिगे कप्मोए युङिगे़आङ् बेबिलोनबाहाॽरे़ मे़स्ये़रिगे़र इग्र बेबिलोनओ आम्दे़म् आम्देॽर के़लॽबा खुने़ॽ निङ्वाॽ इःत्तुॽ॥” 4 कल्ले़चोगुल्ले़ योहानाने़न् नु वेॽ लाम्लोबा थक्सुबाहाॽरे़ हे़क्क्याङ् के़रे़क् मनाहाॽरे़ यहुदा लाजेॽओ युङे़म्मे़ॽ के़लॽबा यहवे दाङ्बे़ल्ले़ कुइङ्जाङ्ङिन् इःप्मा नाःप्मा मे़न्दे़न्दे़न्॥ 5 मे़ले़रु मे़धबा निःत्ताङ्बा लाजेॽहाॽलाम् के़घे़त्छिङ्बाआङ् के़नुःङ्बा के़दाबा के़रे़क् यहुदाबा मनाहाॽ योहानाने़न् नु वेॽ लाम्लोबाहाॽ मे़देॽरुसिआङ् मे़बे॥ 6 खे़न् मना सुम्हाॽओ हाङ् कम्ब्राङ् के़मे़प्पा थक्मोबा नबुजरदाने़ल्ले़ सापानरे़ कुम्मे़न्छाॽ, अहिकामरे़ कुस्सा गदल्याहओ ले़रुधसिबा ये़म्बित्छाहाॽ, मे़न्छुमाहाॽ हे़क्क्याङ् हिन्जाॽबित्छाॽहाॽ नु हाङ्ङिल्ले़ कुस्सा मे़न्छुमाहाॽ मे़वये़॥ माङ्निङ्वाॽपान् के़बाःप्पा यर्मियान् नु नेरियाहरे़ कुस्सा बारुक्के़न्नाङ् वये़त्छि॥ 7 मनाहाॽरे़ यहवे दाङ्बे़ल्ले़ कुबाःन्जाक्किन् इःप्मा नाःप्मा मे़न्दे़न्दे़न् हे़क्क्याङ् मिस्र लाजेॽ मे़बे, तहपनेस ये़क्यक् थारिक्के मे़गे़रे़॥ 8 खे़ब्याङ् तहपनेस ये़क्यक्को यहवे दाङ्बे़ल्ले़ वेॽ कुइङ्घङ्धिक् यर्मियाओ के़रे़॥ खुने़ॽ पाःत्तु, 9 “यहुदाबा मनाहाॽरे़ ओमे़मे़त्तुआङ् मे़बत्तिल्ले़, कुभा यम्बयम्बा लुङ्हाॽ याङ्सिङ्ङे़ॽ हे़क्क्याङ् कन् तहपन्हेसओ के़युङ्बा हाङ्हिम्मो लाःप्मा लाम्मो लुङ् मे़भे़सुआङ् के़ने़बादे़न्नो खे़न् लुङ्हाॽ लुप्ते़ॽ॥ 10 खे़ब्याङ् यहुदाबा मनाहाॽ अक्खे मे़त्ते़से़ॽ, ‘मुक्साम्दाङ्बा यहवे दाङ्बा इस्राइलिहाॽरे़ खुन्छिॽ निङ्वाॽफुमाङ्ङिल्ले़ अक्खे पाःत्तुॽ—आङ्गाॽ आसे़वारोबा बेबिलोनबा हाङ् नबुकदनेसरे़न् कन् मिस्र लाजेॽओ से़क्खाए तारुङ्ॽ॥ आङ्गाॽ चिक्खुङ्ङाङ् के़ने़बा कन् लुङ्हाॽ सम्धाङ् खुने़ॽ कुहाङ्युक्नान् युक्खुङ्ॽ॥ खुने़ॽ खे़ल्ले़ कुसम्धाङ् कुहाङ् नाम्धेःक्मान् खिङ्घुॽ॥ 11 हे़क्क्याङ् खुने़ॽ फे़न्नाङ् मिस्र लाजेन् खाप्पुथ्यःङ् चोगुॽ॥ मिङ्देॽलाम् आत्तिन् सिमा के़बोङ्बा वाॽ, खे़न् मिङ्देल्ले़ सिःॽ, आत्तिन् ते़म्मा तेॽमा के़बोङ्बा वाॽ, खे़न् मे़दे़म्सु मे़देॽरु, हे़क्क्याङ् थङ्ङो आत्तिन् सिमा के़बोङ्बा वाॽ, खे़न् थङ्ङो सिःॽ॥ 12 खे़ल्ले़ मिस्रबा माङ्साम्माङ्हाॽरे़ खुन्छिॽ माङ्हिम्हाॽओ फुत्लुम् मि याक्तु पिरुसि, खुने़ॽ माङ्हिम्हाॽ मिधिक्खुदेसुॽ खे़ब्याङ् नावाइत्लाहाॽ चिगक्वा मे़नाप्तुसिबा हे़क्के तेॽरुसिआङ् पेक्॥ मे़ल्लुक् कम्बाल्ले़ कुजाङ्ङो सिप्तक्पाहाॽ वरे़ङ्ले़ङ् सेगुसिबा हे़क्के खुने़ॽ मिस्र लाजेन् वरे़ङ्ले़ङ् चोगुॽ॥ हे़क्क्याङ् खे़न् लत्छाआङ् मे़ङ्गाःन्ने नुःङ् पेःक्लो॥ 13 खुने़ॽ मिस्रबा नाम् माङ्हिम्मो के़ये़प्पा सेसे सित्लाङ्हाॽ यःप्सुॽ, हे़क्क्याङ् मिस्रबा माङ्साम्माङ्हाॽ मे़युङ्बा माङ्हिम्हाॽ मिःल्ले़ खाप्पुथ्यःङ् चोगुरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.