यर्मिया 42 - लिम्बुयर्मियान् पेलि मे़भाक्तु 1 खे़ब्याङ् के़रे़क् लाम्लोबा थक्सुबाहाॽ, कारेहरे़ कुस्सा योहानाने़न् नु होसयाहरे़ कुस्सा येजन्याह, हे़क्क्याङ् चुक्पाआङ्धो यम्बा थारिक्पा के़रे़क् मनाहाॽ 2 माङ्निङ्वाॽपान् के़बाःप्पा यर्मियाओ मे़द्ये़॥ खे़ङ्हाॽरे़ खुने़ॽ मे़मे़त्तु, “यहवे दाङ्बा आनिॽ निङ्वाॽफुमाङ्ङिन् आनिगे लागि पेलि फाक्ते़ आबिरे़ॽओ॥ खे़ने़ॽ के़निसुर के़वाॽ, तगि आनिगे यरिक् वयिगे़बान् ओमे़प्माल्ले़ आल्लो साॽरिक् सुःल्लिक्लक् नरिगे़आङ् वयिगे़॥ 3 आनिगे आत्ति पेःक्मा पोङ्ॽ हे़क्क्याङ् थे चोःक्मा पोङ्ॽ, यहवे दाङ्बा निङ्वाॽफुमाङ्ङिल्ले़ खे़न् आनिगे ओसेःन्धाक्तिगे़र फाॽआङ् पेलिगे़न् तुवा आजोगे़ आबिरे़ॽ॥” 4 यर्मियाःल्ले़ खे़ङ्हाॽ मे़त्तुसि, “पोङ्ॽ, आङ्गाॽ खिनिॽ के़बाःत्तुम्बा कुइसिक् आङ्गाॽ खिनिॽ यहवे दाङ्बा आनिॽ निङ्वाॽफुमाङ्ङिन् पेलि फाक्तुङ्, हे़क्क्याङ् खुने़ॽ पाःत्तुबा के़रे़क् पाःन्हाॽ आङ्गाॽ खिनिॽ मे़त्निङ्ॽ॥ आङ्गाॽ थे़मा पाःन्निन्नाङ् खिनिॽलाम्बा मे़जिङ्ङान्॥” 5 खे़ब्याङ् खे़ङ्हाॽरे़ यर्मियान् मे़मे़त्तु, “चोगे़म्मे़ॽ फाॽआङ् मे़त्तिगे़बा पाःन्हाॽ आनिगे चोःक्मा मे़दे़न्दिगे़न्ने़भग्र यहवे दाङ्बा आनिॽ निङ्वाॽफुमाङ्ङिन् आनिगे तक्ले़ङ्वाओ से़क्खा नु नसाःन्साबा साखि पोङ्ल॥ 6 आनिगे सिराॽ थाङ्साङ् इग्र सिराॽ मे़धाङ्ने़न्छाङ्, आनिगे पेलि फाक्ते़ आबिरे़ॽ फाॽआङ् पाङ्ङासिगे़बा यहवे दाङ्बा आनिगे निङ्वाॽफुमाङ्ङिल्ले़ कुइङ्जाङ्ङिन् इःत्तुम्बे़ नाःत्तुम्बे़॥ थेआङ्भे़ल्ले़ खुने़ॽ कुङ्जाःङ्ङिन् इःत्तुम्बे़ नाःत्तुम्बे़ने़भग्र के़रे़क् पाःन्हाॽ आनिगे लागि नुबा पोङ्ॽ॥” 7 थिबोङ् ये़न् एगाङ् यहवे दाङ्बे़ल्ले़ कुइङ्घङ्ङिन् यर्मियाओ के़रे़, 8 खे़ल्ले़चोगुल्ले़ खुने़ॽ कारेहःल्ले़ कुस्सा योहानाने़न् हे़क्क्याङ् खुने़ॽनु के़वाॽबा लाम्लोबा थक्सुबाहाॽ खे़ब्याङ् चुक्पा यम्बालाम् के़रे़क् मनाहाॽ उःत्तुसि॥ 9 खुने़ॽ खे़ङ्हाॽ मे़त्तुसि, “यहवे दाङ्बा इस्राइलबा निङ्वाॽफुमाङ्ङो पेलि तोःन्दे़ आबिरे़ॽ फाॽआङ् खिनिॽ याप्मि के़बाङ्घि, हे़क्क्याङ् खुने़ॽ अक्खे पाःत्तुआङ् वाॽ— 10 ‘खिनिॽ हाबा कन् लाजेॽओ युङे़म्मे़ॽ॥ खिनिॽ के़युङिने़भग्र, आङ्गाॽ खिनिॽ थो चोःक्निङ् कर मे़यन्निङ्ङिन् मे़देनिङ्ङिन्ॽ, आङ्गाॽ खिनिॽ लेःत्निङ्ॽ कर हाॽयाक् मे़आःङ्निङ्ङिन्ॽ॥ थेआङ्भे़ल्ले़ खिनिॽ सम्धाङ् आङ्गाॽ तारुङ्बा मे़क्मे़ल्ले़ आङ्गाॽ साॽरिक् आनिङ्वाॽ तुगे़आङ् वाॽ॥’” 11 यहवे दाङ्बे़ल्ले़ अक्खे पाःत्तुॽ, “बेबिलोनबा हाङ्ङिन्नु आल्लआङ्धो खिनिॽ मे़गिसे़म्मिन्ने़ॽ॥ थेआङ्भे़ल्ले़ आङ्गाॽ खिनिॽनु वाॽआआङ् खिनिॽ से़ःप्निङ्ॽ हे़क्क्याङ् खे़ल्ले़ कुमुक्साम्लाम् खिनिॽ ताङ्से़ःप्निङ्ॽ॥ 12 आङ्गाॽ खिनिॽ लुङ्माॽ तुक्निङ्ॽ हे़क्क्याङ् खुने़ॽ के़नुॽबा पोङ्ल चोगुङ्ॽ,” खे़ल्ले़चोगुल्ले़ खिनिॽ कन् लाजेॽओ खुने़ॽ युङ्मा के़भाःक्तिॽ॥ 13 “कर यहवे दाङ्बा आनिॽ निङ्वाॽफुमाङ्ङिल्ले़ कुइङ्जाङ्ङिन् इःप्मा नाःप्मा के़न्दे़न्दिन्, हे़क्क्याङ् ‘आनिगे कॽयो मे़युङिगे़न्, 14 परुमाल्ले़ मिस्र लाजेॽ आनिगे पेगिगे़आङ् युङिगे़रो, खे़प्मो थङ्, थङ् पोङ्मा इक्ला नु सिक्लाःक्मालाम् लाःत्लाःत् पोःक्खिगे़,’ के़लॽरिने़भग्र, 15 खे़ब्याङ्ग यहुदाओ के़दाङ्बा के़याःक्पाहाॽरे़ मुक्साम्दाङ्बा यहवे दाङ्बे़ल्ले़ कुइङ्घङ्ङिन् खे़प्से़म्मे़ॽ॥ साङ्ग्राम्पेदाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, ‘मिस्र लाजेॽओ पेःक्माआङ् खे़प्मो युङ्मा खिनिॽ निङ्वाॽ निःन्धो के़जोगुम्माङ् वाॽने़भग्र, 16 खिनिॽ साॽरिक् के़गिरुम्बा थङ् नु साक्लाम्बा लाःत्लात् पोङ्मा के़न्छुक्तिन्ॽ, खे़ब्याङ् खिनिॽ खे़प्मोए के़स्ये़ॽइ॥ 17 मिस्र लाजेॽओए पेःक्माआङ् युङ्मा हादिङ् के़धक्पा खिनिॽ के़रे़क् हे़क्तङ्बा ताप्फे़ःम्बा पाःन्निल्ले़ के़हाङ्घिर वाॽ॥ ओःक्, थङ्, साक्वान् नु तुक्मा लाःक्मालाम् खिनिॽ के़स्ये़इॽ॥ आङ्गाॽ खे़प्मो तारुङ्बा मे़क्मा सिमालाम् खिनिॽ आत्तिन्हाॽआङ् के़न्दाङिन्ॽ॥’” 18 “मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, ‘आक्खेलॽरिक् आङ्गाॽ आसिक् पोःक्मे़न् नु साॽरिक् आयाःक्ले़ॽमान् यरुसले़ःम्बा मनाहाॽरे़ खुन्छिॽ सम्धाङ् थ्ये़आङ् वये़, हे़क्केलॽरिक्के खिनिॽ मिस्र लाजेॽओ के़लासिल्ले़ खे़न् आङ्गाॽ साॽरिक् आसिक् पोःक्मे़न् नु आयाःक्ले़ॽमान् खिनिॽ सम्धाङ् थारो॥ मे़क्मासिमा, किप्मागे़घुबा, माङ्दे साङ्ग्रा नु चे़क्या इङ्दो पाःन्निल्ले़ आप्तिक् चाहाक् के़बोःक्खिॽ॥ हे़क्क्याङ् खिनिॽ आबाङे लाजेन् खिनिॽ याम्मो आभे़ल्ले़आङ् के़न्निसुम्मिन्ॽ॥’ 19 “यहुदाओ पक्के़धाबा के़याःक्पासे, खे़प्से़म्मे़ॽ॥ यहवे दाङ्बे़ल्ले़ खिनिॽ अक्खे के़मे़त्तिआङ् वाॽ, ‘मिस्र लाजेॽ मे़बेगे़म्मिन्ने़ॽ!’ आङ्गाॽ आइन् खिनिॽ साम्दिङ् पिनिङ्बा पाःन्निन् निङ्वाॽ मे़भेःत्छे़म्मिन्ने़ॽ॥ 20 थेआङ्भे़ल्ले़ यहवे दाङ्बा आनिॽ निङ्वाॽफुमाङ्ङिन् पेलि फाक्ते़ आबिरे़ॽ फाॽआङ् आङ्गाॽ याप्मि के़बाङ्घिल्ले़ खिनिॽ नसाःन्साबा कुदोःप्मा के़म्बोःक्खिन्॥ खिनिॽ अक्खे के़बाःत्तुम्, ‘यहवे दाङ्बा आनिॽ निङ्वाॽफुमाङ्ङिल्ले़ थे़मा पाःत्तुॽ आमे़त्ते़बा, हे़क्क्याङ् आनिगे खे़न् चोगुम्बे़रो!’ 21 हे़क्क्याङ् आइन् खुने़ॽ पाःत्तुबा पाःन्निन् सरक् मे़त्निङ्ङाङ् वाॽ, कर खिनिॽ उन्छोन् के़न्इःत्तुम् के़न्नाःत्तुम्मिन्नाङ् के़वयिबानुःल्ले़ नुरिक् आल्लो यहवे दाङ्बा खिनिॽ निङ्वाॽफुमाङ्ङिल्ले़ कुइङ्जाङ्ङिन् के़न्इःत्तुम्मिन् के़न्नाःत्तुम्मिन्ॽ॥ 22 कल्ले़चोगुल्ले़ खिनिॽ पेःक्मारे़ लागि हादिङ् के़धक्तिबा मिस्र लाजेॽओ थङ्, साक्वान् नु मिङ्देल्ले़ हदॽ के़स्ये़ॽइबा पाःन्नो निङ्वाॽ निःन्धो पोःक्खे़म्मे़ॽओ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.