यर्मिया 41 - लिम्बुगदल्याहन् मे़से़रु ( २ हाङ् २५:२५-२६ ) 1 कर निसिगेक्पा लाओ एलिसामारे़ कुम्मे़न्छाॽ, नतन्याहःल्ले़ कुस्सा इस्माएले़न्, खे़न् हाङ्सयङ्बा मना नु हाङ्ङिल्ले़ तुम् कुसुहाङ्युक्पाहाॽओ लत्छा वये़, खे़ल्ले़ थिबोङ् मनाहाॽ याङ्सिङ्ङाङ् गदल्याहःल्ले़ कुदे़म्से़ मिस्पा पे॥ खे़ङ्हाॽ सोरिक् चाजानु मे़युङे़ल्ले़ 2 इस्माएले़न् हे़क्क्याङ् खुने़ॽनु के़दाबा थिबोङ् मनाहाॽरे़ थिक्ले़ङ्ले़ ताभेन् तरप् मे़भिःक्खुआङ् पित्चाक् मे़बिन्दे़ हे़क्क्याङ् बेबिलोनबा हाङ्ङिल्ले़ हाङ्युक्पा चोगुबा गदल्याहन् खे़ङ्हाॽरे़ मे़से़रु॥ 3 इस्माएलरे़ गदल्याहःन्नु मिस्पाओ के़वाॽबा यहुदाबा मनाहाॽ हे़क्क्याङ् खे़प्मो के़वाॽबा बेबिलोनबा थक्सुबाहाॽआङ् से़रुसि॥ 4 कुदाःन्दिक्मा, गदल्याहन् मे़से़रुबा पाःन्निन् कुभारे़ निङ्वाॽ खोमानुःल्ले़ तगिए, 5 सकेम, सिलो नु सामरियालाम्बा ये़प्पोङ् मनाहाॽ यहवे दाङ्बे़ल्ले़ कुहिम्मो माङ्से़वा चोःक्मा फाॽआङ् मे़धाङे़र मे़बत्छे़ल्ले़ खे़ङ्हाॽरे़ खुन्छिॽ मुधोॽहाॽ मे़नःक्खुआङ् पत्छे़, के़दे़ःङ्बा चाङ् मे़जाक्खुआङ् मे़वये़ हे़क्क्याङ् खुन्छिॽ थक्को साॽरिक् काःन्दे़आङ् पत्छे़ खे़ब्याङ् खे़ङ्हाॽरे़ पोगुगे़न् कुजा सिदुङ्जभाहाॽ नु सुक्पाहाॽ मे़दारुआङ् वये़॥ 6 नतन्याहःल्ले़ कुस्सा इस्माएले़न् हाबे़र मिस्पालाम् खे़ङ्हाॽरे़ खुन्छिॽ तुम्से़ पे॥ खे़ङ्हाॽरे़ खुन्छिॽ पेसाङ् के़रे़आङ् खे़ल्ले़ मे़त्तुसि, “फे़रे़म्मे़ॽआङ् गदल्याहन् तुमे़म्मे़ॽ!” 7 कर खे़ङ्हाॽ ये़क्यक्को मे़लासे़नुमे़ःन्ने इस्माएले़न् नु कुमनाहाॽरे़ खे़न् मनाहाॽ मे़से़रुसिआङ् खे़ङ्हाॽरे़ खुन्छिॽ चेहाॽ च्वाःत् मे़न्याक्मनाबा च्वाःत् याङ्घोःप्मा वाबाक्को लाप्मे़भुसु मे़याक्तुसि॥ 8 कर खे़ङ्हाॽओबा थिबोङ् मनाहाॽरे़ इस्माएले़न् मे़मे़त्तु, “आनिगे याप्मि मे़से़रे़न्ने़ॽ! आनिगे मासि, हःक्सि, पे़ःङ्वालिःत्छेॽ निःङ्गेॽ नु सक्वाघु इक्ताप्पो चिक्खुम्बे़आङ् वाॽ॥” खे़ल्ले़चोगुल्ले़ खुने़ॽ खे़ङ्हाॽ ले़रुदेसुसि हे़क्क्याङ् वेॽहाॽनु खे़ङ्हाॽ मे़से़रुसिन्॥ 9 इस्माएलरे़ से़रुसिबा मनाहाॽरे़ खुन्छिॽ चेहाॽ गदल्याहरे़ कुधक्के़न्नु सोरिक् च्वाःत् मे़न्याक्मनाबा च्वाःत् याङ्घोःप्मा वाबाक्को लाप्फुसु याक्तुसिआङ् मे़यागे़॥ आसा हाङ्ङिल्ले़ मिस्पान् हाङ्यक् चोगुल्ले़ खुने़ॽ इस्राइलबा हाङ् बासानलाम् से़ःप्सिङ्मारे़ लागि खे़न् च्वाःत् मे़न्याक्मनाबा वाबाक्किन् तमा पाङ्घुसिआङ् ने़स्से़॥ नतन्याहरे़ कुस्सा इस्माएलरे़ खे़न् च्वाःत् मे़न्याक्मनाबा वाबाक्किन् मनाहाॽरे़ खुन्छिॽ चेधक्हाॽरे़ थिम्सु॥ 10 खे़ब्याङ् थक्मोबा नबुजरदाने़ल्ले़ गदल्याहन् कम्ब्राङ् मे़प्मा पाङ्घुबा मिस्पाओ के़वाॽबा के़याःक्पा के़रे़क् मनाहाॽ, हाङ्ङिल्ले़ कुस्सा मे़न्छुमाहाॽ नु वेॽ मनाहाॽ इस्माएलरे़ ते़म्सु तेॽरुसि॥ अम्मोन लाजेॽ ले़प्माङ् खुने़ॽ खे़ङ्हाॽ नुःक्मा तेॽमा हेःक्तुसि॥ 11 कर कारेहरे़ कुस्सा योहानाने़न् नु खुने़ॽनु के़वाॽबा थक्सुबा सुहाङ्युक्पाहाॽरे़ इस्माएलरे़ चोगुबा फे़न्याःम्बक्किन् मे़घे़प्सुआङ्, 12 खे़ङ्हाॽरे़ खुन्छिॽ के़रे़क् मनाहाॽ मे़देॽरुसि हे़क्क्याङ् खे़ङ्हाॽरे़ खुने़ॽ लाम्घक्मारे़ लागि मे़धेःक्तु॥ गिबोनबा यम्बा वरक्किल्ले़ कुबेसाङ् खे़ङ्हाॽरे़ खुने़ॽ मे़दे़म्सु॥ 13 आल्ल इस्माइलरे़ ते़म्सु तेॽरुसिबा मनाहाॽरे़ योहानाने़न् हे़क्क्याङ् खुने़ॽनु के़वाॽबा वेॽ लाम्लोबा थक्सुबाहाॽ मे़निसुसिआङ् खे़ङ्हाॽ मे़सःत्ते़र मे़अःक्ते़॥ 14 हे़क्क्याङ् इस्माएलरे़ मिस्पालाम् ते़म्सु तेॽरुसिबाहाॽ के़रे़क् मे़घे़त्छिङ् खे़ब्याङ् योहानाने़न् फाॽमा मे़हेःक्तु॥ 15 हाबा खे़न् ये़म्मो, इस्माएले़न् नु ये़त्छि कुमनाहाॽ योहानाने़ल्ले़ कुहुक्कोलाम्बा मे़भिःन्छिङ्ङाङ् अम्मोनिहाॽरे़ खुन्छिॽ लाजेॽओ मे़घे़त्छिङ् मे़बे॥ 16 खे़ब्याङ् गदल्याहन् मे़से़रुआङ् एगाङ् मिस्पालाम् इस्माएलरे़ ते़म्सु तेॽरुसिबा थक्सुबाहाॽ, मे़न्छुमाहाॽ, हिन्जाॽबित्छाॽहाॽ नु खासे़न्हिम्मोबा सुहाङ्युक्पाहाॽ कारेहरे़ कुस्सा योहानाने़न् नु वेॽ लाम्लोबा थक्सुबाहाॽरे़ गिबोनओ मे़से़ःप्तुसिबा के़रे़क् मे़देॽरुसिआङ् मे़बे॥ 17 खे़ङ्हाॽ बेबिलोनलाम् खे़त्छिङ्मारे़ लागि मिस्र लाजेॽ पेःक्मा निङ्वाॽ मे़जोगुआङ् बेथले़हे़मओबा गेरुथ-किम्हामओ याङ्मे़धोःक्ते़॥ 18 बेबिलोनबा हाङ्ङिल्ले़ हाङ्युक्पा चोगुबा गदल्याहन् इस्माएलरे़ से़रु के़लॽबा पाःन्निन् बेबिलोनिहाॽरे़ मे़घे़प्सुल्ले़ खे़ङ्हाॽरे़ थे़मा मे़जोगु फाॽआङ् खे़ङ्हाॽ मे़गिसे़आङ् मे़वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.