यर्मिया 40 - लिम्बुयर्मियान् गदल्याहःन्नु युङ् 1 थक्कम्ब्राङ् के़मे़प्पा थक्मोबा नबुजरदाने़ल्ले़ यर्मियान् रामालाम् ले़रुआङ् एगाङ् यहवे दाङ्बे़ल्ले़ कुइङ्घङ्ङिन् यर्मियाओ के़रे़॥ खुने़ॽ यरुसले़म हे़क्क्याङ् यहुदालाम् थक्क्रङ्ङिल्ले़ मे़घेःक्खुसिआङ् बेबिलोन मे़दे़म्सु मे़देॽरुसिर मे़बत्छे़बा मनाहाॽनु सोरिक् यर्मियान् तुमु॥ 2 थक्कम्ब्राङ् के़मे़प्पा थक्मोबाल्ले़ यर्मियान् उःत्तुआङ् मे़त्तु, “यहवे दाङ्बा खे़ने़ॽ के़निङ्वाॽफुमाङ्ङिल्ले़ कन् लाजेॽओ मे़क्मासिमे़न् तारुआङ् वाॽ, 3 खुने़ॽ पाःत्तुबा हे़क्केए खे़न् चोगुआङ् वाॽ॥ थेआङ्भे़ल्ले़ कन् मनाहाॽरे़ यहवे दाङ्बे़ल्ले़ कुदक्ले़ङ्वाओ लायो मे़जोगुआङ् वाॽ हे़क्क्याङ् खुने़ॽ कुइङ्जाङ्ङिन् मे़न्इःत्तुन् मे़न्नाःत्तुन्॥ खे़ल्ले़चोगुल्ले़ कन् पोःक्खे़बारो॥ 4 कर आङ्गाॽ खे़ने़ॽ के़म्घेःक्खे़आङ् के़बप्पा थक्क्रङ्हाॽ फे़न्दुङ् पिने़आङ् खे़ने़ॽ पेःक्मा फाःक्ने़॥ खे़ने़ॽ आङ्गाॽनु बेबिलोन पेःक्मा निङ्वाॽ के़जोगुने़भग्र, आङ्गाॽनु पेःक्मा के़सुक्, आङ्गाॽ खे़ने़ॽ नुरिक् कम्ब्राङ् मे़त्ने़ॽ॥ कर आङ्गाॽनु पेःक्मा निङ्वाॽ के़न्जोगुन्ने़भग्र, खे़ने़ॽ कप्मो युङ्मा वाॽमा के़सुक्॥ काक् लाजेन् खे़ने़ॽ के़दगि ने़रो, खे़ने़ॽ आत्तान् पेःक्मा के़सिराॽधाङ्, खे़प्मो पेगे़ॽ॥ 5 खे़ने़ॽ युङ्मा याःक्मा निःन्धो के़जोगुने़भग्र, अहिकामे़ल्ले़ कुस्सा, सापाने़ल्ले़ कुम्मे़न्छाॽ गदल्याहओ नुःक्खे़ पेगे़ॽ॥ खुने़ॽ बेबिलोनबा हाङ्ङिल्ले़ यहुदाबा हाङ्युक्पा युक्तिङ् चोगुआङ् वाॽ॥ खुने़ॽ युक् चोगुसिबा मनाहाॽनु खे़ने़ॽ खे़प्मो वये़ॽ॥ कर खे़ने़ॽ थे़मा निङ्वाॽ के़जोगुॽ, आत्तान् पेःक्मा निङ्वाॽ के़जोगु, खे़प्मो पेःक्मा के़सुक्॥” खे़ब्याङ् थक्कम्ब्राङ् के़मे़प्पा थक्मोबा नबुजरदाने़ल्ले़ कुभा कुजाजि नु याङ् पिरुआङ् पेर याःन्दु॥ 6 खे़ल्ले़चोगुल्ले़ यर्मियान् मिस्पाबा अहिकामरे़ कुस्सा गदल्याहरो नुःक्खे़ पे हे़क्क्याङ् लाजेॽओ पक्मे़ध्ये़ मे़याःक्ते़बा कुभा मनाहाॽनु खुने़ॽ वये़रो॥ यहुदाबा तुम् हाङ्युक्पा गदल्याह ( २ हाङ् २५:२२-२४ ) 7 बेबिलोनबा हाङ्ङिल्ले़ अहिकामरे़ कुस्सा गदल्याहन् बेबिलोनओ मे़न्दे़म्सुन् मे़न्देॽरुसिन्बा लाजेॽबा के़रे़क्नुःल्ले़ याङ्गे़साॽबा यक्युङ्बाहाॽरे़ खुन्छिॽ हाङ्युक्पा चोगुआङ् वाॽ फाॽआङ् यहुदाबा लाम्लोबा थक्सुबाहाॽ नु पाङ्भेॽहाॽओबा थक्सुबाहाॽरे़ मे़घे़प्सु॥ 8 खे़ल्ले़चोगुल्ले़ खे़ङ्हाॽ गदल्याहरे़ कुदुम्से़ मिस्पा मे़बे॥ कन् के़बेःक्पाहाॽ—नतन्याहःल्ले़ कुस्सा इस्माएले़न्, कारेहरे़ ने़प्फु कुस्सा योहानाने़न् नु जोनाथाने़न्, तन्हुमेतरे़ कुस्सा सरायाहःन्, नतोपाति एफैरे़ कुस्साहाॽ, माकातिरे़ कुस्सा याजन्याहःन् नु कन्हाॽ के़रे़क्ले़ खुन्छिॽ मनाहाॽ मे़वये़॥ 9 बेबिलोनबाहाॽरे़ खिनिॽ हान्ति के़मे़न्जोगिन् फाॽआङ् गदल्याहरे़ माङ्हे़क्सिङ्ङाङ् खे़ङ्हाॽ मे़त्तुसि॥ खुने़ॽ माङ्हुप् चोगुआङ् मे़त्तुसि, “खे़ङ्हाॽरे़ खुन्छिॽ से़वा याःम्बक् चोःक्मा खिनिॽ मे़गिसे़म्मिन्ने़ॽ॥ कन् लाजेॽओ युङे़म्मे़ॽआङ् बेबिलोनबा हाङ्ङिल्ले़ कुसे़वा याःम्बक् चोगे़म्मे़ॽ हे़क्क्याङ् के़रे़क् पाःन्नो खिनिॽ नुॽमा तामा पोङ्ॽ॥ 10 आङ्गाॽ आलागिग, आनिॽ तुम्से़ के़भे़म्बा बेबिलोनबा मनाहाॽरे़ खुन्छिॽ तगि खिनिॽ इङ्साबा पोङ्से़ मिस्पाए युङ्ङा॥ खिनिॽ के़युङिबा लाजेॽओबा खिनिॽ आप्फेक् के़सेगुम्बा पाङ्जुम्हाॽओ युङे़म्मे़ॽ॥ चे़ल्ले़क्सेन् तुबे़म्मे़ॽआङ् थि युसे़म्मे़ॽ हे़क्क्याङ् हाङ्वामा ये़म्मो के़धोःक्पा सिङ्सेॽ लुङ्सेॽहाॽ तुबे़म्मे़ॽ हे़क्क्याङ् चैतुने़ल्ले़ कुजाॽइन् तुबे़म्मे़ॽआङ् निःङ्गेॽ एःप्से़म्मे़ॽआङ् चिक्खे़म् युक्खे़म्मे़ॽ॥” 11 आल्ल मोआबबा, अम्मोन, ए़दोम नु वेॽ निःत्ताङ्बा लाजेॽहाॽओ के़वाॽबा यहुदाबा मनाहाॽरे़ बेबिलोनबा हाङ्ङिल्ले़ कुभा मनाहाॽ यहुदाओ ले़रुधसिआङ् गदल्याहन् खे़ङ्हाॽरे़ खुन्छिॽ तुम् हाङ्युक्पा चोगुआङ् वाॽ फाॽआङ् खे़ङ्हाॽरे़ मे़घे़प्सु, 12 खे़ब्याङ् यहुदाबा मनाहाॽ मे़घे़त्छिङ् मे़बेआङ् मे़युङ्ङे़बा ते़न्हाॽ मे़ले़रुआङ् खे़ङ्हाॽ यहुदाओ नुःङ्मा तामा मे़हेःक्ते़॥ खे़ङ्हाॽ गदल्याहःन्नु तुम्मारे़ लागि मिस्पाए मे़वये़ मे़लारे़ खे़ब्याङ् यहुदियाबा लाजेॽ ले़प्माङ् यरिक् के़दुम्बा चे़ल्ले़क्सेॽ सिङ्सेॽ नु वेॽ सिङ्सेॽहाॽ सुम्से़ मे़बेरो॥ 13 कन् एगाङ् खिमो, कारेहरे़ कुस्सा योहानाने़न् नु पाङ्भेॽ पाङ्भेॽबा वेॽ थक्सुबा लाम्लोबाहाॽ मिस्पाबा गदल्याहरो मे़द्ये़॥ 14 खे़ङ्हाॽरे़ खुने़ॽ मे़मे़त्तु, “अम्मोनबा हाङ् बालिसे़ल्ले़ नतन्याहरे़ कुस्सा इस्माएल्ले़न् के़से़त्छे़ पाङ्घुआङ् वाॽ फाॽआङ् थे खे़ने़ॽ निङ्वाॽ मे़ङ्घोए के़वाॽबि?” कर गदल्याहरे़ खे़ङ्हाॽरे़ खुन्छिॽ पाःन्निन् कुनामे़साॽरुन्॥ 15 याङ्सि योहानानरे़ गदल्याहन् स्वाःत्ताङ् तुमुआङ् मे़त्तु, “आङ्गाॽ आप्फेक् पेःक्काआङ् नतन्याहरे़ कुस्सा इस्माएल्ले़न् हाःत्ले़आङ् मे़न्निए से़रुङ्ॽ॥ थेआङ् खुने़ॽ ताआङ् खे़ने़ॽ के़से़त्ल याःम्माबे? हे़क्के पोङ्ङिल्ले़ग खे़ने़ॽ के़गब्रिङ् पिसाङ् के़दाबाआङ् के़वाॽबा यहुदा मनाहाॽ याम्मो फुत्छिङ्ज्याङ् मे़से़ मे़बेःक् हे़क्क्याङ् यहुदाओ के़दाङ्बा के़याःक्पा के़रे़क् मनाहाॽ मे़मे़क्॥” 16 कर गदल्याहःल्ले़ योहानाने़न् मे़त्तु, “आङ्गाॽ खे़ने़ॽ हे़क्के चोःक्मा थे़माआङ् मे़बाङ्ने़न्, थेआङ्भे़ल्ले़ इस्माएलरे़ कुयाःम्बेओ खे़ने़ॽ इङ्ले़क् के़बाःत्तुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.