यर्मिया 4 - लिम्बुलायोलाम् हिम्मा इङ्घङ् 1 यहवे दाङ्बे़ल्ले़ पाःत्तुॽ, “इस्राइलबा मनासे, खिनिॽ नुःङ्मा तामा निङ्वाॽ के़जोगुम्ने़फग्र आङ्गाॽओ नुःक्खे़म् त्ये़म्मे़ॽओ॥ खिनिॽ खे़न् याम्गे़सिङ्बा नावाइत्लाहाॽ आदगिलाम्बा के़घे़त्तुम् हे़क्क्याङ् आङ्गाॽनु ताःक्पोसाबा के़बोक्खिने़भग्र, 2 खिनिॽ से़क्खाओ, खासे़न्नो हे़क्क्याङ् साम्योबा कुदोःप्मा लाम्मो ‘से़क्खाए यहवे दाङ्बे़न् कुहिङ्वे़त् वाॽबा कुइसिक्’ माङ्गे़हे़क्कासिने़भग्र वेॽ मना सुवाङ्हाॽरे़ खुने़ॽलाम्बा हाङ्वामुॽइ मे़घोसुरो हे़क्क्याङ् खुने़ॽओए खे़ङ्हाॽ मिमिदिङ् मे़जोक्लो॥” 3 यहुदा नु यरुसले़ःम्बा मनाहाॽ यहवे दाङ्बे़ल्ले़ अक्खे मे़त्तुसिरो, “खिनिॽ के़ले़रुम्बा खाम्मिन् थोःक्खे़म्मे़ॽओ हे़क्क्याङ् तिङ्ग्रेक्ला लुम्मो याॽरिःम्बा मे़हेॽराम्मिन्ने़ॽओ॥ 4 यहुदाए हे़क्क्याङ् यरुसले़ःम्मोबा मनासे, यहवे दाङ्बे़न्नु के़जोगुम्बा माङ्हुप्ले़ इबु हर्दो हे़क्मान् याम्मो चोगे़म्मे़ॽओ कर कन् इबुन् के़जोगुम्मिल्ले़ सिक्लुङ्मोलाम्बाए चोगे़म्मे़ॽओ॥ मेःन्ने़भग्र खिनिॽ फे़न्याःम्बक्हाॽरे़ चोगुल्ले़ आङ्गाॽ आसिक् पोःक्मे़न् मि हे़क्के हुरुरुना तिःत्लो हे़क्क्याङ् आत्तिल्ले़आङ् खे़न् से़प्मा मे़सुक्तुन्लो॥” यहुदान् निङ्मिहाॽरे़ मे़भत्तु 5 यहुदाबा नु यरुसले़ःम्मोबा मनाहाॽ अक्खे मे़त्ताम्सिम्मे़ॽओ, “के़रे़क् लाजेॽओ मे़ल्लुक् सादाङ्ङिन् मुःत्ते़म्मे़ॽओ! हे़क्क्याङ् खे़म्दे़त्ल यम्बा इक्लाओ अःक्ते़म्मे़ॽओ! ‘के़रे़क् चुप्सिआङ् लुङ्धाक् मे़से़त्तुबा ये़क्यक्को खे़त्तासिआङ् पेगिरो॥’ 6 सियोन ले़प्माङ् पेःक्मा मिक्सेन् पिआसिम्मे़ॽओ! मे़न्छुए ताङ्से़ःप्सिङ्मारे़ लागि खे़त्छिङ्ङाम्मे़ॽआङ् पेगे़म्मे़ॽओ॥ आङ्गाॽ यहवे दाङ्बे़ल्ले़ मे़क्मासिमान् तारुङ्ल पत्तारो, थाङ्गे़त् पिसाङ्लाम् खाप्पुथ्यःङ् आजोःक्चोःक्पान् युर पत्लो॥” 7 कुघाओलाम्बा लत्छा खिरिङ्बाधिक् लःन्दे़आङ् वाॽरो इक्सादिङ् खाम्बेःक्मोबा मे़न्छाम् याप्मिहाॽ के़मे़ङ्बान् लःन्दे़आङ् वाॽरो॥ यहुदाबा ये़क्यक्हाॽ खाप्पुथ्यःङ् चोःक्से़ खे़न् तार पत्लो॥ खिनिॽ ये़क्यक्हाॽ थुप्पाङ् लुःम्बेःक्लो हे़क्क्याङ् खे़प्मो आत्तिन्हाॽआङ् वाॽमा मे़न्छुक्ने़न्लो॥ 8 खे़ल्ले़चोगुल्ले़ सगितेत् चाक्खे़म्मे़ॽओ, हाबे़म्मे़ॽ हे़क्क्याङ् मे़रिङ् थक्ते़म्मे़ॽओ यहवे दाङ्बे़ल्ले़ किप्मागे़घुबा कुयाःक्ले़ॽमान् आनिॽलाम्बा मे़म्बेःक्के वाॽरो॥ 9 यहवे दाङ्बे़ल्ले़ पाःत्तु, “खे़न् ये़न्नो हाङ्हाॽ हे़क्क्याङ् हाङ्याःम्बक् के़जोःक्पाहाॽ आःन्छिङ्मा मे़न्छुक्ने़न्लो, निङ्वाॽफुसाम्बाहाॽ खुन्छिॽ साम्मिक्ले़ ले़रुसिरो खे़ब्याङ् माङ्निङ्वाॽपान् के़बाःप्पाहाॽ खुन्छिॽ निङ्वाॽ माआङ् यङ्मा मे़सिरो॥” 10 हे़क्क्याङ् आङ्गाॽ मे़त्तुङ्, “यहवे दाङ्बाए, खे़ने़ॽ यरुसले़ःम्बा मनाहाॽ के़रे़क् इङ्गे़ले़क्तुसिरे़त्छ! खे़ङ्हाॽ सनारुङ् के़घोसुम् के़मे़त्तुसिआङ् के़वये़रो कर खे़ङ्हाॽरे़ खुन्छिॽ निगिःङ्मो ताभेन् चुक्ते़आङ् पत्लो॥” 11 खे़न् ये़म्मो यरुसले़ःम्मो के़युङ्बाहाॽरे़ अक्तङ्बा मे़घे़प्सुरो, “आओॽओॽबा सुरित् थिक् आमनाहाॽओ तारो खे़ङ्ग एःक्सादे़न्नोबा मुरे़क् खारे़क्पा कोःक्माओलाम् हुःक्तारो॥ खे़न् याॽसिप्लक् के़भे़बा के़देॽबा चुक्सा सुरित् मेःन्लो, 12 कर आइङ्जाङ्लाम् के़हुःक्पा के़दाबा खे़न् सुरिःत्तिन् किप्मा के़घुबा चोक्लो॥ आमनाहाॽ खे़न् खुम्दिङ्ङिल्ले़ इङ्जाङ्ङिन् आङ्गाॽ आबाङे पिरुङ्सिङ्ल पत्तारो॥” यहुदान् निङ्मिहाॽरे़ मे़गबु 13 ओमे़त्ते़म्मे़ॽ, खिनिॽ निङ्मिन् खाॽमिःप्पान् हे़क्के तार पत्लो॥ खे़ल्ले़ कुधङ्ङोबा अन्लाहाॽ किप्मा के़घुबा सुरित् केजङ् कुइसिक् मे़दारो हे़क्क्याङ् खे़ल्ले़ कुअन्हाॽ मुयाहाॽनुःल्ले़आङ् मे़जात्लो॥ चिःत्ते़स्ये़रो, आनिगे़ग सुधाम् पोःक्खिगे़! आनिगे हदॽ मे़गिगे़रो! 14 यरुसले़ःम्मे, ताप्फे़ःम्बा पाःन्हाॽ खे़ने़ॽ सिक्लुङ्मोलाम्बाए वाहप्ते़ॽआङ् लाप्फुसे़ॽओ हे़क्क्याङ् खे़ने़ॽ ताङ्गे़से़ःप्सिङ्लो॥ आभे़ल्ले़ थारिक् खे़ने़ॽ के़सिक्लुङ्मो ताप्फे़ःम्बा निङ्वाॽ के़गत्तुबाबे? 15 दान ये़क्यक्लाम् लत्छा इक्लाधिक्ले़ उवा चोगुर पत्लो एफ्राइमबा कोःक्मा फाङ्जङ्लाम्बा मनाहाॽरे़ मे़क्मासिमा इङ्घङ् मे़से़सुर मे़वाॽरो॥ 16 “मे़न्छाम् सुवाङ्हाॽ मे़त्ते़म्सिम्मे़ॽओ, यरुसले़म के़युङ्बाहाॽ कन् इङ्घङ्ङिन् पिरे़म्सिम्मे़ॽओ ये़क्यक् के़भप्पा थक्सुबाहाॽ माःङ्घा लाजेॽलाम् मे़दार मे़बत्लो॥ यहुदाबा ये़क्यक्हाॽरे़ कुदक्ले़ङ्वाओ थङ्ले़ इक्ला मे़अःक्लो॥ 17 इक्ताप् के़गोबा मनाहाॽ हे़क्के खे़ङ्हाॽरे़ ये़क्यक्किन् मे़गबुरो थेआङ्भे़ल्ले़ खे़ल्ले़ आदक्ले़ङ्वाओ पिफ्युङ् मे़जोगुआङ् वाॽरो” यहवे दाङ्बे़ल्ले़ कन् पाःत्तुआङ् वाॽरो॥ 18 “यहुदाए, खे़ने़ॽ के़सुत्नाःन् नु खे़ने़ॽ के़याःम्बक्किल्ले़ कन् पाःन्निन् खे़ने़ॽ आबाङे के़सम्धाङ् के़दारुरो॥ खे़ने़ॽ के़लायोल्ले़ कन् कुजागे़भे़म्बा पाःन्निन् तारुबारो, खे़ल्ले़ खे़ने़ॽ के़ने़रे़त्तिन् थुबुॽरो॥” आबाङे कुमनाहाॽरे़ लागि यर्मियान् मे़रिङ् थक् 19 ये़त्तुक्खे, आङ्गाॽ कन् ये़त्तुक्खेन् नासिथःप्मा मे़सुक्कान्लो! आने़रे़त्तिन्! आङ्गाॽ आने़रे़त्तिन् साॽरिक् लुप्लुप् लॽर पत्लो! आङ्गाॽ स्वाःत्ताङ् युङ्मा मे़सुक्कान्लो, आङ्गाॽ थुत्तुरिःप्पाल्ले़ कुइक्लान् नु थङ्ङिल्ले़ हयङ् किल्लिङ्ङिन् खे़प्सुङ्लो॥ 20 लत्थिक् मे़क्मासिमा एगाङ् वेॽ मे़क्मासिमान् तारो, के़रे़क् लाजेःन्ने चिजि खक्खक् पोङ्लो॥ हक्चघत् आनिगे साःङ्गाहिम्हाॽ खाप्पुथ्यःङ् पोङ्लो खे़ङ्हाॽरे़ खुन्छिॽ फोःन्दाहाॽ ते़ःङ्ङाङ् कुज्योःङ् पोङ्लो॥ 21 आप्फाल्ले़ थारिक् ते़न्धङ् निसान ओमे़प्मा पोङ्बाबे? हे़क्क्याङ् मे़ल्लुक् सादाङ्हाॽ लाइक्पा खे़म्मा पोङ्बाबे? 22 यहवे दाङ्बे़ल्ले़ अक्खे पाःत्तुरो, “आङ्गाॽ आमनाहाॽ अदङ् मे़जोक्लो खे़ङ्हाॽरे़ आङ्गाॽ कुसिङ् मे़न्निःत्तान्लो॥ खे़ङ्हाॽ ने़हिनिङ्वाॽ मेःन्नेबा अङे़ःक्वाहाॽ हे़क्के मे़लॽरो, खे़ङ्हाॽरे़ खुन्छिॽ खासिङ्निःप्मा साम्मिन्ने होप्लो॥ खे़ङ्हाॽ ताक्के़भे़ॽबा याःम्बक् चोःक्मा के़ले़बा मे़जोक्लो, कर खे़ङ्हाॽरे़ नुबा याःम्बक् चोःक्मा मे़ल्ले़सुन्लो॥” यर्मियाःल्ले़ मे़क्मासिमा सुप्फोन् निसु 23 आङ्गाॽ इक्सादिङ् खाम्बेःक्मान् ओमे़त्तुङ्लो, खे़न् मुहःङ्लिङ् खे़हःङ्लिङ् नु मुसुन्ने खे़स्सुन्ने ने़स्से़रो, आङ्गाॽ तरःङ्दिङ् ताङ्साङ्बे़न् ओमे़त्तुङ्लो, खे़प्मो चबे़ःत्छिक्काङ् खाओःप्मान् होःप्ते़रो॥ 24 आङ्गाॽ कोःक्मा फाङ्जङ्हाॽ ओमे़त्तुङ्, खे़ङ्हाॽ मे़यक्खे़र मे़युङे़रो हे़क्क्याङ् थे़गु माङ्वाहाॽ याङ्ना कत्ना मे़घङ्सिङ्ल मे़युङे़रो॥ 25 आङ्गाॽ ओमे़त्तुङ् हे़क्क्याङ् खे़प्मो आत्तिन् मनाहाॽआङ् मे़होःप्ते़रो, ताङ्साक्पोबा पुहाॽआङ् मे़बे़रे़ मे़जुरे़आङ् मे़वये़रो॥ 26 आङ्गाॽ ओमे़त्तुङ् हे़क्क्याङ् चागे़नुॽबा नुबा खाम्मिन् मुरे़क् खारे़क्पा ये़ःङ्घादे़न् पोःक्खे़रो, ये़क्यक्हाॽ खाप्पुथ्यःङ् मे़बोःक्खे़रो, यहवे दाङ्बे़ल्ले़ साॽरिक् कुयाक् ले़ॽरे़बाल्ले़ चोगुल्ले़ मे़मे़गे़रो॥ 27 यहवे दाङ्बे़ल्ले़ अक्खे पाःत्तुआङ् वाॽरो, “आङ्गाॽ कन् लाजेन् के़रे़क् चिजि खक्खक् चोगुङ्लो कर खे़न् खक्पे़क्क मे़मे़ङ्ङान्लो॥ 28 कल्ले़चोगुल्ले़ इक्सादिङ् खाम्बेःक्मान् मे़रिङ् थक्लो हे़क्क्याङ् थो ताङ्साक्पान् खामाक्तुरो॥ आङ्गाॽ कन् पाःन्निन् निङ्वाॽ निःन्धो चोगुङ्ङाङ् वाॽरो हे़क्क्याङ् आङ्गाॽ आनिङ्वान् मे़ले़ङ्ङान्लो॥” 29 अन् के़युक्पा नु तोङ् के़आप्पाहाॽरे़ खुन्छिॽ इक्लान् मे़घे़प्सुरो हे़क्क्याङ् ये़क्यक्कोबाहाॽ अक्ले़क् मे़घे़त्छिङ् मे़बेःक्लो॥ कुभा ताम्भुङ् याक्ला ले़प्माङ् मे़बिन् मे़घे़त्लो, वेॽहाॽरे़ सियाक्पेॽ थे़याक्पेॽ लुङ् सम्धाङ् मे़लिङुरो, ये़क्यक्हाॽ के़रे़क् चिजि खक्खक् पोङ्लो, याम्मो खे़प्मो आत्तिन्हाॽआङ् मे़न्वाॽने़न्लो॥ 30 यरुसले़ःम्मे खे़ने़ॽ खाप्पुथ्यःङ् के़बोङ्लो! थेआङ्ने़ खे़ने़ॽ हे़ःत्ताङ्बा चाङ् के़जाक्खुबे? थेआङ् खे़ने़ॽ साम्म्याङ् वाःत्तिहाॽ के़वारुबे? मिक्को थेआङ् माक्सुःन्दान् के़जाःन्दुबाबे? खे़ने़ॽ आबाङे हने़रक् के़जोःक्सिङ्लो॥ खे़ने़ॽ नागे़नुॽबाहाॽरे़ खे़ने़ॽ के़म्नाॽरे़आङ् वाॽरो हे़क्क्याङ् खे़ने़ॽ से़प्मा निङ्वाॽ मे़जोगुरो॥ 31 सागप्मा तुङ्ङिल्ले़ तरुमा सावामान् याःप्पा हे़क्तङ्बा इक्लाधिक् खे़प्सुङ्लो के़रे़क्नुःल्ले़ तगि अङे़ःक्वा सागे़गप्मा मे़न्छुमान् फिःक्पा हे़क्के खे़प्सुङ्लो॥ हे़ङ्गे़ःक्काङ् हे़ङ्गे़क् लॽर सक्मा सोःन्छिङ्लो हे़क्क्याङ् कुहुक्किन् सन्छुरो खे़ब्याङ् नुमासुक्मा यरुसले़ःम्मिल्ले़ अक्खे पाःत्तुर फिःक्लो “चिःत्ते़स्ये़रो, आङ्गाॽ आसक्मा पुॽरे़आङ् वाॽरो! खे़ङ्हाॽ आङ्गाॽ आसे़त्छे़ मे़दार मे़बत्लो!” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.