यर्मिया 39 - लिम्बुयरुसले़म ये़क्यक्किन् खाप्पुथ्यःङ् पोङ्ॽ 1 सिदकियाहःन् यहुदाबा हाङ् पोःक्खे़बा फाङ्सिगेक्पा तङ्बे के़रे़बा थिबोङ् लाओ बेबिलोनबा हाङ् नबुकदनेसरे़न् के़रे़क् कुधक्सुबाहाॽ फे़त्तुसिआङ् फे़रे़ हे़क्क्याङ् यरुसले़म ये़क्यक्किन् फत्तुआङ् किर्गप् कबु॥ 2 सिदकियाहःल्ले़ हाङ्युक् चोगुबा ये़म् थिबोङ्ङाङ् थिक् तङ्बे के़रे़बा लिसिगेक्पा लाःल्ले़ फाङ्सिगेक्पा ये़न्नो बेबिलोनिहाॽरे़ ये़क्यक्कोबा लुङ्धाक्हाॽ मे़लुःन्दु॥ 3 बेबिलोनबा हाङ्ङिल्ले़ के़रे़क् कुसुहाङ्युक्पाहाॽ मे़भे़रे़ हे़क्क्याङ् यम्बा ताःक्हन्निल्ले़ कुलुम्मो हाङ्हाङ्ङाङ् मे़युङ्सिङ्॥ खे़ङ्हाॽओ नेर्गल-सरेसर हे़क्क्याङ् सम्गर नेबो, सर्सेकिम नु लत्छा वेॽ नेर्गल-सरेसरे़न् वये़॥ 4 आल्ल यहुदाबा हाङ् सिदकियाहःन् नु के़रे़क् थक्सुबाहाॽरे़ बेबिलोनिहाॽरे़ ये़क्यक्किन् मे़लुःन्दुबा मे़निसुआङ् खे़ङ्हाॽ मे़घे़त्छिङ्॥ खे़ङ्हाॽरे़ से़न्दिक्पा खामाक्मे़न् मे़हाङ्घु खे़ब्याङ् नाःन्धाङ् कत्नाःन्धाङ् लुङ्धाक् के़ये़प्पाल्ले़ कुभिःप्मोबा लाम्धेःप्पालाम् मे़भिःन्छिङ्ङाङ् हाङ्ङिल्ले़ कुभुङ्इक्लाम् मे़बोःक्खे़र से़न्दिक्सा यर्दन ने़ने़बादे़न् ले़प्माङ् मे़धासिङ्॥ 5 कर बेबिलोनबा थक्सुबाहाॽरे़ खे़ङ्हाॽ मे़नाःत्तु मे़देॽरुसि हे़क्क्याङ् यरिहोबा ने़ने़बादे़न्नो सिदकियाहःन् मे़सिॽरुआङ् मे़दे़म्सु॥ खे़ङ्हाॽरे़ खुने़ॽ मे़दे़म्सुआङ् हमात लाजेॽबा रिब्ला मे़प्मनाबा ये़क्यक्को नबुकदनेसर हाङ्ङिल्ले़ओ मे़देॽरु॥ हे़क्क्याङ् खे़प्मो खे़ल्ले़ सिदकियाहःन् खुम्दिङ् पिमा खासे़न् चोगु॥ 6 सिदकियाहःल्ले़ ओमे़त्तुसिआङ् पत्छे़रए खुने़ॽ कुस्साहाॽ बेबिलोनबा हाङ्ङिल्ले़ से़रुसि हे़क्क्याङ् यहुदाबा सुहाङ्युक्पाहाॽआङ् से़रुसि॥ 7 खे़ब्याङ् खे़ङ्हाॽरे़ सिदकियाहःल्ले़ कुमिक्हाॽ लिगक् मे़लःत्तु मे़देसु, खे़ब्याङ् बेबिलोनओ तेॽमारे़ लागि कासा थक्क्रङ्हाॽरे़ इमे़घेःक्खु॥ 8 हाबा खे़न् ये़म्मो, बेबिलोनबाहाॽरे़ यरुसले़मबा हाङ्हिम्मिन् नु मनाहाॽरे़ खुन्छिॽ हिम्हाॽ मिमे़धिक्खु मे़देसु हे़क्क्याङ् ये़क्यक्कोबा लुङ्धाक्हाॽ मे़लुःन्दु मे़देसु॥ 9 खे़ब्याङ् के़घे़त्छिङ्बा के़बेःक्पाआङ् बेबिलोनिहाॽरे़ओ के़नुःङ्बा के़दाबाहाॽ नु ये़क्यक्को पक्मे़ध्ये़ मे़याःक्ते़बा मनाहाॽ थक्कम्ब्राङ् के़मे़प्पा थक्मोबा नबुजरदाने़ल्ले़ ते़म्सुसिआङ् बेबिलोनओ तेॽरुसि॥ 10 कर कुधेआङ् के़होप्पा याङ्गे़साॽबा मनाहाॽ नबुजरदाने़ल्ले़ यहुदा लाजेॽओ ले़रुधसि, हे़क्क्याङ् खे़ङ्हाॽ खुने़ॽ चे़ल्ले़क्सेॽ इक्ताप्हाॽ नु इक्ताप्हाॽ पिरुधसिरो॥ यर्मियान् यहुदा लाजेॽओ याःक् 11 कर बेबिलोनबा नबुकदनेसर हाङ्ङिल्ले़ कुधक् कम्ब्राङ् के़मे़प्पा थक्मोबा नबुजरदाने़न् यर्मियान् कोःप्मा पाङ्घु॥ 12 खुने़ॽ अक्खे मे़त्तुसि, “ओमे़त्ते़म्मे़ॽ, खुने़ॽ नुरिक्काङ् मे़ङ्गाःन्ने कम्ब्राङ् मे़त्ते़म्मे़ॽ, हे़क्क्याङ् खुने़ॽ पाःत्तुबा के़रे़क् पाःन्हाॽ तङ्गाम् चोगे़म् पिरे़म्मे़ॽ॥” 13 खे़ल्ले़चोगुल्ले़ थक्कम्ब्राङ् के़मे़प्पा थक्मोबा नबुजरदाने़न्, मा सुहाङ्युक्पा नबुसजबान, हाङ्ङिल्ले़ कुसुजासाबा तुम् सुहाङ्युक्पा नेर्गल-सरेसरे़न् नु बेबिलोनबा हाङ्ङिल्ले़ वेॽ के़रे़क् कुसुहाङ्युक्पाहाॽ 14 यर्मियान् इक्के़गोबाहाॽरे़ खुन्छिॽ लक्खुम्मोलाम् लाःक्कात् लःप्मारे़ लागि पाङ्घुसि॥ हे़क्क्याङ् खुने़ॽ हिम्मो ताःप्मारे़ लागि अहिकामे़ल्ले़ कुस्सा, सापाने़ल्ले़ कुम्मे़न्छाॽ गदल्याहन् ओमे़प्मा याःम्बक् मे़बिरु॥ अक्खेलॽरिक् यर्मियान् आबाङे कुमनाहाॽनु सोरिक् वये़॥ 15 यर्मियान् इक्के़गोबाहाॽरे़ खुन्छिॽ लक्खुम्मो यागे़ल्ले़ यहवे दाङ्बे़ल्ले़ कुइङ्घङ्ङिन् खुने़ॽओ के़रे़आङ् वये़, 16 “खे़ने़ॽ पेगे़ॽआङ् इथोपियाबा एबेद-मेलेके़न् मे़त्ते़ॽ, ‘मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ—आङ्गाॽ कन् ये़क्यक्किन् यङ्मा से़रुङ्ङाङ् वाॽआबा के़रे़क् पाःन्हाॽ आङ्गाॽ चोगुङ्ॽ॥ आङ्गाॽ नुॽमादामा मेःन्, मे़क्मासिमे़न् पाङ्घुङ्ॽ॥ कल्ले़ कुमे़क्मा सिमे़न् खे़ने़ॽ के़निसुॽ, 17 कर खे़ने़ॽ साॽरिक् के़गिरुसिबा खे़न् मनाहाॽलाम् आङ्गाॽ से़ःप्ने़॥ 18 थेआङ्भे़ल्ले़ खे़ने़ॽ के़निङ्वान् आङ्गाॽओ के़युक्खु, आङ्गाॽ हाङ्से़म् कुइसिक् खे़ने़ॽ के़हिङ्ल याःन्ने़॥ आङ्गाॽ खे़ने़ॽ ताङ्से़ःप्ने़ हे़क्क्याङ् ताप्थेक् याम्धेक् कत्ने़॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.