Biblia Todo Logo
Bib sou entènèt

- Piblisite -

यर्मिया 38 - लिम्‍बु


च्‍वाःत् याङ्‌घोःप्‍मा वागे़ङ्‌ङो यर्मियान् मे़याक्‍तुबा

1 आल्‍ल मत्तानरे़ कुस्‍सा सपत्‍याह, पसहुररे़ कुस्‍सा गदल्‍याह, सेलेम्‍याहरे़ कुस्‍सा यहुकल नु मल्‍कियाहरे़ कुस्‍सा पसहुररे़ यर्मियाःल्‍ले़ मनाहाॽ मे़त्तुसिर वये़बा पाःन्‍निन् मे़घे़प्‍सु॥ खुने़ॽ अक्‍खे मे़त्तुसिर वये़,

2 “यहवे दाङ्‌बे़ल्‍ले़ अक्‍खे पाःत्तुॽ, ‘आत्तिन्‍हाॽ यरुसले़ःम्‍मो मे़युङ्‌ॽ खे़ङ्‌हाॽ ते़न्‍धङ्, साक्‌वाःन्, इग्र मिङ्‌देल्‍ले़ मे़सिःॽ, कर आत्तिन्‍हाॽ मे़बेःक्‍काङ् बेबिलोनबाहाॽओ मे़घे़ःम्‍सिङ्‌ॽ खे़ङ्‌हाॽ मे़न्‍छिने़न्॥ खे़ङ्‌हाॽरे़ हिङ्‌मन् मे़घोसुॽ॥ खे़ङ्‌हाॽ मे़हिङ्‌ॽ॥’

3 हे़क्‍क्‍याङ् यहवे दाङ्‌बे़ल्‍ले़ अक्‍खेआङ् पाःत्तुॽ, ‘से़क्‍खाए कन् ये़क्‌यक्‍किन् बेबिलोनबा हाङ्‌ङिल्‍ले़ कुधक्‍सुबाहाॽरे़ खुन्‍छिॽ हुक्‍को मे़बिरुसिॽ हे़क्‍क्‍याङ् खे़ङ्‌हाॽरे़ कन् ये़क्‌यक्‍किन् खुन्‍छिॽ हुक्‍को मे़धासुॽ॥’”

4 खे़ल्‍ले़चोगुल्‍ले़ सुहाङ्‌युक्‍पाहाॽ मे़बेआङ् हाङ्‌ङिन् मे़मे़त्तु, “दाङ्‌बे, कन् मनान् से़प्‍माए पोङ्‌ॽ! कन् परिक्‍पा पाःन्‍निल्‍ले़ आनिॽ आले़रुम् आधाम्‍सिम्‍बा थक्‍सुबाहाॽ नु के़रे़क् मनाहाॽरे़ खुन्‍छिॽ सावेःत् यक्‍खु पिरुसिॽ॥ कन् मनाःल्‍ले़ खुन्‍छिॽ नुॽमादामा मेःन् कर खे़ङ्‌हाॽ हान्‍ति चोःक्‍मासि कुनिङ्‌वाॽ वाॽ!”

5 सिदकियाह हाङ्‌ङिन् ते़न्‍दे़आङ् खे़ङ्‌हाॽ मे़त्तुसि, “ल, पोङ्, खे़निॽ सिराॽगे़धाङ्‌बा हे़क्‍केए चोगे़म्‍मे़ॽ॥ आङ्‌गाॽ साक्‍मा मे़सुक्‍निङ्‌ङिन्॥”

6 खे़ल्‍ले़चोगुल्‍ले़ सुहाङ्‌युक्‍पाहाॽरे़ यर्मियान् खुने़ॽ युङे़बा याक्‍फाङ्‌ङोलाम् मे़देॽरु हे़क्‍क्‍याङ् इक्‍के़गोबाहाॽरे़ खुन्‍छिॽ लक्‍खुम्‍मोबा लत्‍छा च्‍वाःत् याङ्‌घोःप्‍मा लुम्‍बात् वाबाक्‍को थाक्‍पाःल्‍ले़ मे़घेःक्‍खुआङ् मु मे़धासु॥ खे़न् हाङ्‌हिम्‍सयङ्‌बा लत्‍छा पासिङ्‌पादाङ् मल्‍कियाहरे़ कुज्‍वाःत् याङ्‌घोःप्‍मा लुम्‍बात् ने़स्‍से़॥ खे़न् च्‍वाःत् याङ्‌घोःप्‍मा लुःम्‍बाःत् वाबाक्‍को च्‍याःत् मे़यागे़न्, कर मु चिम्‍लिम् चिम्‍लिङ् के़लॽबा ले़क्‌वा खाम् यागे़ हे़क्‍क्‍याङ् यर्मियान् खे़न् चिम्‍लिम् चिम्‍लिङ् के़लॽबा ले़क्‌वा खाम्‍मो हुमे़॥

7 कर हाङ्‌हिम्‍मो याःम्‍बक् के़जोःक्‍पा लत्‍छा कुसि सुहाङ्‌युक्‍पा एबेद-मेलेके़ल्‍ले़ यर्मियान् च्‍वाःत् याङ्‌घोःप्‍मा लुम्‍बाःत्तो लाप्‍मे़भुसुबा पाःन्‍निन् खे़प्‍सु॥ खे़न् ये़म्‍मो हाङ्‌ङिन् बेन्‍यामिन लाम्‍धेःप्‍पो खासे़न् लोःन्‍नु युङे़॥

8 खे़ल्‍ले़चोगुल्‍ले़ एबेद-मेलेके़न् हाङ्‌हिम्‍मो लोःक्‍ते़ पेआङ् हाङ्‌ङिन् पाःन्‍छाःत्तु॥

9 खुने़ॽ मे़त्तु, “आदाङ्‌बा हाङ्‌ङे, कन् मनाहाॽरे़ माङ्‌निङ्‌वाॽपान् के़बाःप्‍पा यर्मियान् च्‍वाःत् याङ्‌घोःप्‍मा वाबाक्‍को मे़याक्‍तुआङ् साॽरिक् ताप्‍फे़ःम्‍बा याःम्‍बक् मे़जोगुआङ् वाॽ॥ खे़न् साक्‍मे़न्‍जा हारा सिरो, थेआङ्‌भे़ल्‍ले़ ये़क्‌यक्‍को खरे़ःङ्‌हाॽ के़रे़क् मारे़आङ् होप्॥”

10 खे़ब्‍याङ् हाङ्‌ङिल्‍ले़ कुसि एबेद-मेलेक्‍किन् ए़म्‍भ मे़त्तु, “कप्‍मोनु सुम्‍बोङ् आमनाहाॽ तेॽरे़से़ॽआङ् सिमानुःल्‍ले़ तगि माङ्‌निङ्‌वाॽपान् के़बाःप्‍पा यर्मियान् च्‍वाःत् याङ्‌घोःप्‍मा लुम्‍बात् वाबाक्‍कोलाम् लाःक्‍कात् उःक्‍खे़म् लःत्ते़म्‍मे़ॽ॥”

11 खे़ल्‍ले़चोगुल्‍ले़ एबेद-मेलेके़ल्‍ले़ खे़न् मनाहाॽ तेॽरुसिआङ् खुने़ॽ हाङ्‌हिम्‍मोबा चाधाःङ् सिगाङ्‌बा लत्‍छा याक्‍फाङ्‌ङो लासे़, हे़क्‍क्‍याङ् कुभा कुद्रे़क् नु के़दे़ःङ्‌बा चाङ्‌हाॽ खे़प्‍मो खोसुआङ् खे़न् चाङ्‌हाॽ इदाःक्‍किल्‍ले़ इभुत्तु खे़ब्‍याङ् खे़न् च्‍वाःत् याङ्‌घोःप्‍मा लुम्‍बात् वाबाक्‍को यर्मियाःल्‍ले़ कुलागि मु थासुपिरु॥

12 एबेद-मेलेक्‍किल्‍ले़ मु यर्मियान् इम्‍भोःन्‍दु, “इदाःक्‍किल्‍ले़ के़न्‌याॽने़न्‍ल फाॽआङ् कन् कुद्रे़क् चाङ्‌हाॽ के़लाप्‍फिःप्‍मा सिगाङ् थे़क्‍ते़ॽ॥” खे़ब्‍याङ् यर्मियान् यारिप् पोःक्‍खे़ल्‍ले़,

13 खे़ङ्‌हाॽरे़ खुने़ॽ लाःक्‍कात् मे़उःक्‍खु मे़लःत्तु॥ खे़ल्‍ले़चोगुल्‍ले़ यर्मियान् तगि यागे़बा हाङ्‌हिम्‍मोबा इक्‍के़गोबाहाॽरे़ खुन्‍छिॽ लक्‍खुम्‍मोबा पुङ्‌लाहिम्‍मो नुःक्‍खे़रो॥


सिदकियाहःल्‍ले़ यर्मियान् सुजा नाःक्‍तु

14 थिक्‌ये़न् सिदकियाह हाङ्‌ङिल्‍ले़ यर्मियाःल्‍ले़ कुउःत्‍छे़ पाङ्‌घुसि हे़क्‍क्‍याङ् यहवे दाङ्‌बे़ल्‍ले़ कुहिम्‍मोबा सुम्‍सिगेक्‍पा यम्‍बा लाम्‍धेःप्‍पो ताःप्‍मा पाङ्‌घुसि॥ हाङ्‌ङिल्‍ले़ मे़त्तु, “आङ्‌गाॽ खे़ने़ॽ कुभा पान् सेःन्‍दोमा आनिङ्‌वाॽ वाॽ, हे़क्‍क्‍याङ् से़क्‍खाबा पाःन्‍निन् माॽमा निङ्‌वाॽ मे़जोगे़न्‍ने़ॽ॥”

15 यर्मियाःल्‍ले़ सिदकियान् मे़त्तु, “आङ्‌गाॽ खे़ने़ॽ से़क्‍खा पान् मे़त्‍ने़ल्‍ले़ खे़ने़ॽ के़से़त्ता हे़क्‍क्‍याङ् आङ्‌गाॽ कुभा सुजापान् मे़त्‍ने़साङ् खे़ने़ॽ खे़म्‍माआङ् के़ङ्‌घे़प्‍सुन्‌ॽ॥”

16 सिदकियाह हाङ्‌ङिल्‍ले़ स्‍वाःत्ताङ् अक्‍खे पाःत्तुर यर्मियाःन्‍नु माङ्‌हे़क् चोगु, “आनिॽ साःङ्‌गो सक्‍मा आबिबिबा, से़क्‍खाए कुहिङ्‌वे़त् के़वाॽबा यहवे दाङ्‌बे़न् कुइसिक्, आङ्‌गाॽ खे़ने़ॽ मे़से़त्‍ने़न् हे़क्‍क्‍याङ् खे़ने़ॽ से़प्‍मा के़गोःप्‍पा मनाहाॽरे़ खुन्‍छिॽ हुक्‍कोआङ् खे़ने़ॽ मे़धाने़न्॥”

17 खे़ब्‍याङ् यर्मियाःल्‍ले़ सिदकियाहःन् मे़त्तु, “मुक्‍साम्‍दाङ्‌बा यहवे दाङ्‌बा इस्राइलबा निङ्‌वाॽफुमाङ्‌ङिल्‍ले़ अक्‍के पाःत्तुॽ, ‘खे़ने़ॽ बेबिलोनबा सुहाङ्‌युक्‍पाहाॽरे़ खुन्‍छिॽ हुक्‍को के़घे़ःम्‍सिङ्‌ने़भग्र खे़ने़ॽ नु के़हिम्‍सयङ्‌हाॽ के़हिङिॽ, कन् ये़क्‌यक्‍किन् मिदिक्‍काङ् खाप्‍पुथ्‍यःङ् मे़बोङ्‌ने़न्॥

18 कर खे़ने़ॽ हुक्‍सुप्‍सिङ्‌मा के़न्‍दे़न्‍ने़न्‍ने़भग्र, खे़ने़ॽ खे़त्‍छिङ्‌मा के़ङ्‌घोने़न्! कन् ये़क्‌यक्‍किन् बेबिलोनबाहाॽरे़ खुन्‍छिॽ हुक्‍को चुक् हे़क्‍क्‍याङ् खे़ङ्‌हाॽरे़ कन् ये़क्‌यक्‍किन् मिःल्‍ले़ मिमे़धिक्‍खुआङ् मुरे़क् खारे़क् खाप्‍पुथ्‍यःङ् मे़जोगुॽ॥’”

19 हाङ्‌ङिल्‍ले़ पाःत्तु, “कर आङ्‌गाॽ हुक्‍सुप्‍सिङ्‌मा किआ सिआ, थेआङ्‌भे़ल्‍ले़ खुन्‍छिॽ ले़प्‍माङ् के़लाःप्‍पा यहुदाबा मनाहाॽ बेबिलोनिहाॽरे़ हुक्‍मे़सुप्‍पाबिला॥ खे़ब्‍याङ् खे़ङ्‌हाॽरे़ थे़मा मे़मे़त्ता खे़न् हाःत्‍ले़ निसुबे!”

20 यर्मियाःल्‍ले़ मे़त्तु, “यहवे दाङ्‌बे़ल्‍ले़ कुइङ्‌जाङ्‌ङिन् खे़ने़ॽ इःप्‍मा नाःप्‍मा के़सेगुने़भग्र खे़ङ्‌हाॽरे़ खे़ने़ॽ हुक्‍के़म्‍मे़न्‍छुप्‍ने़न्॥ खे़ने़ॽ थेआङ् के़ल्‍लॽने़न्, हे़क्‍क्‍याङ् पाःन्‍हाॽ नुबा पोङ्‌ल पेक्॥

21 कर खे़ने़ॽ हुक्‍सुप्‍सिङ्‌मा के़न्‍दे़न्‍ने़न्‍ने़भग्र, यहवे दाङ्‌बे़ल्‍ले़ कन् पाःन्‍हाॽ अक्‍खेलॽरिक् आङ्‌गाॽ ओसेःन्‍धाक्‍ताङ्‌ङाङ् वाॽ,

22 खे़ने़ॽ के़हाङ्‌हिम्‍मो पक्‍मे़ध्‍ये़बा के़रे़क् मे़न्‍छुमाहाॽ बेबिलोनबा थक्‍सुबा सुहाङ्‌युक्‍पाहाॽरो मे़देॽरुसि॥ खे़ब्‍याङ् खे़न् मे़न्‍छुमाहाॽरे़ के़म्‍गेॽर अक्‍खे मे़बाःत्तुरो, “‘खे़ने़ॽग नुबा चुम्‍देङ्‌हाॽ के़गत्तुसिरो! खे़ङ्‌हाॽरे़ खे़ने़ॽ इङ् के़म्‍ले़क्‍ते़आङ् लाम्‍गे़म्‍भोःत्ते़रो॥ आल्‍ल खे़ने़ॽ के़लाङ्‌हाॽ खाम्‍ले़क्‌वाओ हुमे़ल्‍ले़ खे़ङ्‌हाॽरे़ खे़ने़ॽ के़दॽयान् फे़म्‍मो लाप्‍के़म्‍भुसे़रो!’

23 “खे़ने़ॽ के़रे़क् के़मेःत्‍हाॽ नु के़स्‍साहाॽ बेबिलोनबा मनाहाॽरो मे़देॽरुसिॽ, हे़क्‍क्‍याङ् खे़ने़ॽ खे़त्‍छिङ्‌मा के़न्‍छुक्‍ने़न्॥ बेबिलोनबा हाङ्‌ङिल्‍ले़ खे़ने़ॽ के़दे़म्‌ॽ, खे़ब्‍याङ् कन् ये़क्‌यक्‍किन् खाप्‍पुथ्‍यःङ् मुरे़क् खारे़क् चोगुॽ॥”

24 खे़ब्‍याङ् सिदकियाहःल्‍ले़ यर्मियान् मे़त्तु, “खे़ने़ॽ कन् पाःन्‍निन् के़जे़क्‍ताङ् फाॽआङ् हाःत्ताङ् मे़मे़त्ते़से़न्‍ने़ॽ, मेःन्‍ने़भग्र खे़ने़ॽ के़सिरो!

25 आङ्‌गाॽ खे़ने़ॽनु ताॽजे़क्‍खाङ्‌बान् सुहाङ्‌युक्‍पाहाॽरे़ मे़घे़प्‍सु, हे़क्‍क्‍याङ् खे़ङ्‌हाॽरे़ अक्‍खे पाःप्‍मा मे़सुक्‍तुॽ, ‘हाङ्‌ङिन् नु खे़ने़ॽ थे़मा पाःन्‍निल्‍ले़ कुयाःम्‍बेओ ताॽके़जे़क्‍खे़क्‍छि आनिगे ओमे़त्ते़ॽ॥ याप्‍मि के़म्‍मे़त्‍ने़न्‍ने़भग्र, खे़ने़ॽ से़त्तासिगे़॥’

26 अक्‍खे पोङ्‌ने़भग्र, खे़ने़ॽ खे़ङ्‌हाॽ मे़त्ते़से़ॽ, ‘जोनाथानरे़ कुलुम्‍बाःत्तो आङ्‌गाॽ याम्‍मो मे़बाङ्‌घाङ्‌ङिन्‍ने़ॽ थेआङ्‌भे़ल्‍ले़ खे़प्‍मोग आङ्‌गाॽ सिआ फाॽआङ् हाङ्‌ङिन् इगेःक्‍काङ् इगेःक् पेलि फाक्‍तुङ्॥’”

27 हाङ्‌ङिल्‍ले़ कुसुहाङ्‌युक्‍पाहाॽ मे़द्‌ये़आङ् यर्मियान् पान् सेःन्‍मे़दोसुबा नु हाङ्‌ङिल्‍ले़ खुने़ॽ थेआङ् उःत्तु के़लॽबा ये़म्‍मिन् यरिक् तगि होःप्‍ते़ के़लॽबा पान् निःन्‍धो वाॽ॥ कर यर्मियाःल्‍ले़ हाङ्‌ङिल्‍ले़ कुसुजा पाःन्‍हाॽ खे़प्‍सु, हे़क्‍क्‍याङ् खे़ङ्‌हाॽरे़ से़क्‍खाबा पाःन्‍निन् निङ्‌वाॽ मे़ङ्‌घोए मे़बे॥ हाङ्‌ङिन् नु यर्मियान् ताॽजे़क्‍खे़सिबा आत्तिन्‍हाॽरे़आङ् मे़ङ्‌घे़प्‍सुन्॥

28 हे़क्‍क्‍याङ् यरुसले़ःम्‍मिन् निङ्‌मिहाॽरे़ खुन्‍छिॽ हुक्‍को थ्‍ये़बा ये़न् थारिक् यर्मियान् इक्‍के़गोबाहाॽरे़ खुन्‍छिॽ लक्‍खुम्‍मो पुङ्‌लाधाबा पोःक्‍खे़आङ् यागे़रो॥

© 2009, 2023, Wycliffe Bible Translators, Inc. All rights reserved.

Wycliffe Bible Translators, Inc.
Swiv nou:



Piblisite