यर्मिया 37 - लिम्बुसिदकियाहःल्ले़ यर्मियान् पेलि फाक्तु 1 यहोयाकिमे़ल्ले़ कुस्सा यहोयाकिने़ल्ले़ कुले़क्वाओ योसियाहरे़ कुस्सा सिदकियाहःन् यहुदाबा हाङ् पोःक्खे़॥ खुने़ॽ बेबिलोनबा हाङ् नबुकदनेसरे़ल्ले़ हाङ् चोगु॥ 2 कर यहवे दाङ्बे़ल्ले़ यर्मियान् लाम्बा पिरुसिबा इङ्घङ्ङिन् सिदकियाह हाङ्ङिल्ले़, खे़ल्ले़ कुहाङ् याःम्बक् के़जोःक्पाहाॽरे़ हे़क्क्याङ् लाजेॽओ के़दाङ्बा के़याःक्पा मनाहाॽरे़ खे़म्घे़म्मे मे़ल्लाप्तुन्॥ 3 हे़क्केसाङ् सिदकियाह हाङ्ङिल्ले़ सेलेम्याहःल्ले़ कुस्सा यहुकले़न् नु मासेयाहःल्ले़ कुस्सा निङ्वाॽफुसाम्बा सपन्याहःन् अक्खे मे़त्तुसिआङ् यर्मियाओ पाङ्घुदेसुसि, “यहवे दाङ्बा आनिगे निङ्वाॽफुमाङ्ङिन् आनिगे लागि पेलि फाक्ते़ आबिरे़ॽ॥” 4 खे़न् ये़म्मो थारिक् यर्मियान् पुङ्लाहिम्मो साक्पा मे़न्धाए वये़ खे़ल्ले़चोगुल्ले़ खुने़ॽ मनाहाॽरे़ खुन्छिॽ लुम्मो पेःक्मा तामा सुक्ते़र वये़॥ 5 कन् ये़म्मो मिस्रबा हाङ् फारो होप्राःल्ले़ कुधक्सुबाहाॽ मिस्रलाम् मे़धाङे़ मे़गे़रे़॥ बेबिलोनबा थक्सुबाहाॽरे़ कन् पाःन्निन् मे़घे़प्सुआङ् यरुसले़ःम्मिन् मे़गबुआङ् मे़ने़स्से़बादे़न् लाम्बा खे़ङ्हाॽ एगाङ् मे़नुःक्खे़ मे़बे॥ 6 खे़ब्याङ् यहवे दाङ्बे़ल्ले़ कुइङ्घङ्ङिन् माङ्निङ्वाॽपान् के़बाःप्पा यर्मियाओ के़रे़, 7 “यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, थे़मा पोङ्मा चोक् खे़न् पाःन्निन् आङ्गाॽ सेःन्दोमारे़ लागि यहुदाबा हाङ्ङिल्ले़ खे़ने़ॽ के़बाङ्घे़॥ खुने़ॽ अक्खे मे़त्ते़ॽ, ‘फारोल्ले़ कुधक्सुबाहाॽ खे़ने़ॽ के़भाॽसे़ मे़धाङे़र मे़बत्छे़साङ् खे़ङ्हाॽ मिस्र नुःङ्मा पेःक्मा मे़जोक्॥ 8 खे़ब्याङ् बेबिलोनबा मनाहाॽ मे़नुःङ् मे़भे़न्नाङ् कन् ये़क्यक्किन् मे़भत्तुॽ हे़क्क्याङ् हुक्काप् मे़जोगुआङ् खाप्पुथ्यःङ् फाःत्त्रा मे़गेःत्तुॽ॥’ 9 “यहवे दाङ्बे़ल्ले़ अक्खे पाःत्तुॽ, बेबिलोनिहाॽ नुबा पाःन्निल्ले़ लागि मे़नुःक्खे़ मे़बेबा फाॽआङ् निङ्वाॽ मे़इःत्ते़म्मिन्ने़ॽआङ् अदङ् मे़बोःक्खे़म्मिन्ने़ॽ॥ खे़ङ्हाॽ नुबा पाःन्निन्ले़ लागि मे़नुःक्खे़ मे़बेबा मेःन्लो! 10 खे़निॽ बेबिलोनबा थक्सुबाहाॽ के़रे़क् युम्रे़क् के़मे़क्खुम्सिम् हे़क्क्याङ् थङ्ङो के़गाःम्बाहाॽ साःङ्गाहिम्मो पक्के़धाम्सिम्साङ् खे़न् के़गाःम्बा मनाहाॽ याम्मो होॽदोन् होॽदोन् मे़लॽर मे़बोःक्काङ् कन् ये़क्यक्किन् मिमे़धिक्खुआङ् मुरे़क् खारे़क् मे़जोगुरो॥” यर्मियान् साक्पा थ्ये़बा 11 फारोल्ले़ कुधक्सुबाहाॽ तगि मे़बोरे़र मे़धाङ्ङे़बाल्ले़ चोगुल्ले़ बेबिलोनबा थक्सुबाहाॽ यरुसले़ःम्लाम् एगाङ् मे़घे़त्छिङ् मे़बेःल्ले़, 12 यर्मियान् कुमनाहाॽरे़ खुन्छिॽ लुम्मो कुघोमा लक् लासे़ यरुसले़ःम्मिन् ले़रुआङ् बेन्यामिन ते़ङ्गप् ले़प्माङ् पेर पत्छे़॥ 13 कर बेन्यामिन मा लाम्धेःप्पो के़रे़ल्ले़ खे़प्मो के़ये़प्पा लाम्धेत् के़गोबाल्ले़ खुने़ॽ ते़म्सुआङ् सेःन्दोसु, “खे़ने़ॽ के़घे़त्छिङ्ङाङ् बेबिलोनिहाॽ ले़प्माङ् के़बेःक्ल के़बत्॥” खे़न् लाम्धेत् के़गोबा यर्मिया के़दे़म्बे़न् हनन्याहरे़ कुम्मे़न्छाॽ नु सेलेम्याहरे़ कुस्सा यिरियाहःन् वये़॥ 14 यर्मियाःल्ले़ अत्तुर मे़त्तु, “खे़न् पाःन्निन् से़क्खा मेःन्! आङ्गाॽ अक्तङ्बा पान् चोःक्मा थे़माआङ् आनिङ्वाॽ होप्॥” कर यिरियाहःल्ले़ खुने़ॽ कुबाःन्निन् मे़घे़प्सुन् हे़क्क्याङ् खे़ल्ले़ यर्मियान् ते़म्सुआङ् सुहाङ्युक्पाहाॽरो तेॽरु॥ 15 खे़ङ्हाॽ यर्मियाःन्नु खुन्छिॽ साॽरिक् याःक्ले़ॽरे़ हे़क्क्याङ् खुने़ॽ मे़हिप्तुआङ् सुहाङ्मिबा जोनाथनरे़ कुहिम्मो मे़साक्तु मे़युक्खु॥ जोनाथनरे़ कुहिम्मिन् मना साक्मा पुङ्लाहिम् मे़जोगुआङ् ने़स्से़॥ 16 यर्मियान् लत्छा खाम्बाङ् सिगाङ्बा मना साक्मा याक्फाङ्ङो यरिक् ये़न् थारिक् मे़साक्तु मे़युक्खु॥ 17 ताःन्दि सिदकियाह हाङ्ङिल्ले़ खुने़ॽ कुउःत्छे़ मना पाङ्घुसि हे़क्क्याङ् हाङ्हिम्मो तेॽरुआङ् हाङ्हिम्मोबा हाःत्ताङ् के़होप्पादे़न्नो खुने़ॽ पान् सेःन्दोसु, “थे यहवे दाङ्बालाम् कुभा इङ्घङ्हाॽ खे़ने़ॽ पाःप्मा के़गत्तुबि?” यर्मियाःल्ले़ मे़त्तु, “ओरो, आङ्गाॽ पाःप्मा कत्तुङ्ॽ! बेबिलोनबा हाङ्ङिल्ले़ खे़ने़ॽ के़दे़म्ॽ॥” 18 खे़ब्याङ् यर्मियाःल्ले़ हाङ्ङिन् सेःन्लाप्तु, “आङ्गाॽ थे़मा याःम्बक् फेःन्दुङ्ङाङ् वाॽ? आङ्गाॽ अक्खेलॽरिक् पुङ्लाहिम्मो साक्मारे़ लागि खे़ने़ॽ के़दक्ले़ङ्वाओ, खे़ने़ॽ के़सुहाङ्युक्पाहाॽरे़ खुन्छिॽ तक्ले़ङ्वाओ इग्र के़मनाहाॽरे़ खुन्छिॽ तक्ले़ङ्वाओ थे़मा चोगुङ्ङाङ् वाॽ? 19 खे़ने़ॽ नु खे़ने़ॽ के़लाजेन् बेबिलोनबा हाङ्ङिल्ले़ थङ्ङो मे़भत्तुन् के़बाःप्पा खे़ने़ॽ के़माङ्निङ्वाॽपान् के़बाःप्पाहाॽ आल्लो आत्ति मे़वाॽ? 20 आदाङ्बा हाङ्ङे, खे़प्से़ॽ, आङ्गाॽ पेलि फाक्ने़॥ आङ्गाॽ जोनाथनरे़ कुहिम्मोबा मना साक्मा लुम्बात् याक्फाङ्ङो मे़नुःक्ताङ्ङिन्ने़ॽ, थेआङ्भे़ल्ले़ आङ्गाॽ खे़प्मो सिआरो॥” 21 खे़ल्ले़चोगुल्ले़ सिदकियाह हाङ्ङिल्ले़ यर्मियान् लुम्बात् याक्फाङ्ङो नुःक्मादे़मा मे़बाङ्घुसिन्॥ परुमाल्ले़ खुने़ॽ माङ्हिम्मोबा इक्के़गोबाहाॽरे़ खुन्छिॽ लक्खुम्मो साक्मा युङ्मा इङ्जाङ् पिरुसि॥ यर्मियान् खे़प्मोए युङ्माआङ् ये़क्यक्को के़रे़क् खरे़ःङ्हाॽ मे़म्माःत्ते थारिक् खुने़ॽ थिक्याःन्धक् खारक् ले़ःङ्मनाबा खरे़ःङ् मे़बिरुर फाॽआङ्ङाङ् हाङ्ङिल्ले़ इङ्जाङ् पिरुसि॥ कम्भलॽरिक् हाङ्हिम् लक्खुम्मोबा पुङ्लाहिम्मो यर्मियान् मे़साक्तु मे़युक्खुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.