यर्मिया 36 - लिम्बुबारुक्के़ल्ले़ साप्लाथःङ्मे़न् माङ्हिम्मो निरुॽ 1 योसियाहःल्ले़ कुस्सा यहोयाकिमे़न् यहुदाओ हाङ् पोःक्खे़बा तङ्बे लिसिओ यहवे दाङ्बे़ल्ले़ कुइङ्घङ्ङिन् यर्मियाओ के़रे़, 2 “साप्लाथङ्माधिक् तारे़ॽ हे़क्क्याङ् के़रे़क् आइङ्घङ्हाॽ इस्राइल, यहुदा नु वेॽ मे़न्छाम् सुवाङ्हाॽरे़ खुन्छिॽ तक्ले़ङ्वाओ साप्ते़ॽ॥ योसियाह हाङ्ङिल्ले़ कुहाङ्युक् ये़म्मोबा इङ्घङ्ङिन् नु आल्लो थारिक्पा के़रे़क् इङ्घङ्हाॽ साप्ते़ॽ॥ 3 यहुदाबा मनाहाॽओ आङ्गाॽ ताःप्मा निङ्वाॽ चोगुङ्बा मे़क्मासिमा पाःन्हाॽ मे़घे़प्सुआङ् याम्मो खे़ङ्हाॽरे़ खुन्छिॽ ताप्फे़ःम्बा याःम्बक्किन् मे़ले़रुने़भग्र आङ्गाॽ खे़ङ्हाॽरे़ खुन्छिॽ फे़न्याःम्बक् नु लायोन् ले़प्मि पिरुङ्सिङ्ॽ॥” 4 खे़ल्ले़चोगुल्ले़ यर्मियाःल्ले़ नेरियाहरे़ कुस्सा बारुक्के़न् उःत्तु, हे़क्क्याङ् यहवे दाङ्बे़ल्ले़ यर्मियान् मे़त्तुबा के़रे़क् पाःन्हाॽ बारुक्के़ल्ले़ लत्छा साप्लाथःङ्मो साप्तु॥ 5 खे़ब्याङ् यर्मियाःल्ले़ बारुक्के़न् मे़त्तु, “आङ्गाॽ पुङ्लाहिम्मो मे़साक्ताङ्ङाङ् याक्का माङ्हिम्मो पेःक्मा मे़सुक्कान्॥ 6 कल्ले़चोगुल्ले़ मनाहाॽ चाने़ःत्तो मे़युङ्बा ये़न्नो खे़ने़ॽ माङ्हिम्मो पेगे़ॽ खम्भ्याङ् आङ्गाॽलाम् खे़ने़ॽ के़घे़प्सुबा साप्लाथःङ्मो साप्ते़आङ्ने़बा यहवे दाङ्बे़ल्ले़ कुइङ्घङ्हाॽ यम्बा इक्लाओ निरे़ॽआङ् मनाहाॽ खे़म्बाङ्घे़से़ॽ॥ यहुदाबा ये़क्यक्हाॽलाम् के़दाबा के़रे़क् मनाहाॽरे़ मे़घे़प्सुर निरे़ पिरे़से़ॽ॥ 7 खे़ङ्हाॽरे़ यहवे दाङ्बान् पेलि मे़भाक्तुआङ् के़रे़क्ले़ खुन्छिॽ ताप्फे़ःम्बा याःम्बक्हाॽ मे़ले़रुइ हाग॥ थेआङ्भे़ल्ले़ यहवे दाङ्बे़ल्ले़ किप्मा के़घुबा कुसिक् पोःक्मे़न् नु साॽरिक् आगिगिबा कुसाक्के़न्निल्ले़ कन् मनाहाॽ यङ्मा से़रुसिआङ् वाॽ॥” 8 माङ्निङ्वाॽपान् के़बाःप्पा यर्मियाःल्ले़ मे़त्तुबा हे़क्केए नेरियाहःल्ले़ कुस्सा बारुक्के़ल्ले़ यहवे दाङ्बे़ल्ले़ कुइङ्घङ्हाॽ माङ्हिम्मो मनाहाॽ निरु पिरुसि॥ 9 यहोयाकिमे़न् यहुदाबा हाङ् पोःक्खे़बा ङासिगेक्पा तङ्बे फाङ्सिगेक्पा लाओ यरुसले़ःम्मो के़युङ्बा के़रे़क् मनाहाॽ नु यहुदाबा ये़क्यक्हाॽलाम्बा खे़प्मो के़दाबा के़रे़क् मनाहाॽरे़ खुन्छिॽ लागि यहवे दाङ्बे़ल्ले़ कुदगि तःक्ने़त् युङ्मा उवा पोःक्खे़॥ 10 बारुक्के़ल्ले़ यर्मियाःल्ले़ कुबाःन्जाक्हाॽ साप्लाथःङ्मोलाम् के़रे़क् मनाहाॽरे़ मे़घे़प्सुर निरु पिरुसि॥ खुने़ॽ सुहाङ्मिबा सापानरे़ कुस्सा गमर्याहःल्ले़ माङ्हिम्मोबा कुयाक्फाङ् तगि ये़म्सिङ्॥ खे़न् याक्फाङ्ङिन् माङ्हिम्मोबा थोसमा लक्खुम्मो कुसङ् मा लाम्धेःत्तिल्ले़ कुबेसाङ् ने़स्से़॥ 11 सापानरे़ कुम्मे़न्छाॽ गमर्याहःल्ले़ कुस्सा, मिकायाःल्ले़ साप्लाथःङ्मोलाम् यहवे दाङ्बे़ल्ले़ कुइङ्घङ्हाॽ खे़प्सुआङ्, 12 खुने़ॽ यो थासिङ् ये़ हे़क्क्याङ् हाङ्हिम्मोबा सुहाङ्मिबाल्ले़ कुयाक्फाङ्ङो पे॥ खे़प्मो हाङ्हिम्मोबा सुहाङ्मिबा एलिसामा, समायाहरे़ कुस्सा दलायाह, अक्बोररे़ कुस्सा एल्नातान, सापानरे़ कुस्सा गमर्याह, हनन्याहरे़ कुस्सा सिदकियाह नु वेॽ के़रे़क् सुहाङ्युक्पाहाॽ मे़वये़॥ 13 खे़ब्याङ् बारुक्के़ल्ले़ मनाहाॽ निरु पिरुसिबा के़रे़क् इङ्घङ्हाॽ मिकायाःल्ले़ मनाहाॽ मे़त्तुसि, 14 खे़ब्याङ् सुहाङ्युक्पाहाॽ के़रे़क् मे़दङ्सिङ्ङाङ् सपन्याहःल्ले़ कुस्सा, सेलेम्याहःल्ले़ कुम्मे़न्छाॽ, कुसिःल्ले़ कुजक्मे़न्छाॽ, यहुदिःन् कन् इङ्घङ्ङिन् मे़मे़त्तुआङ् बारुक्के़न् इङ्घङ् मे़त्छे़ मे़बाङ्घुमे़देसु, “के़निरुआङ् मनाहाॽ खे़म्मा के़बाङ्घुसिबा साप्लाथःङ्मे़न् फे़त्ते़आङ् फे़रे़ॽ॥” खे़ल्ले़चोगुल्ले़ बारुक्के़न् खे़न् साप्लाथःङ्मे़न् याङ्सिङ्ङाङ् खे़ङ्हाॽरो फे़रे़॥ 15 सुहाङ्युक्पाहाॽरे़ खुने़ॽ मे़मे़त्तु, “युङे़ॽ, हे़क्क्याङ् साप्लाथःङ्मे़न् आनिगे निरे़ आबिरे़ॽ॥” हे़क्क्याङ् मे़मे़त्तुबा हे़क्के बारुक्के़ल्ले़ खे़ङ्हाॽ निरु पिरुसि॥ 16 खुने़ॽ खे़न् निःप्मा सुरु पिरुसिल्ले़ खे़ङ्हाॽरे़ मे़घे़प्सुआङ् मे़गिसे़ हे़क्क्याङ् खुन्छिॽ ओमे़त्छिङ्मा मे़हेःक्सिङ्ङाङ् बारुक्के़न् मे़मे़त्तु, “कन् के़रे़क् पाःन्हाॽ हाङ्ङिन् मे़प्माए पोङ्ॽ॥” 17 खे़ङ्हाॽरे़ खुने़ॽ सेःन्मे़दोसु, “कन् के़रे़क् इङ्घङ्हाॽ खे़ने़ॽ आक्खेलॽरिक् के़घोसु? थे कन् पाःन्हाॽ यर्मियाःल्ले़ए पाःत्तुबाबि?” 18 खे़ल्ले़चोगुल्ले़ बारुक्के़ल्ले़ मे़त्तुसि, “कन् पाःन्हाॽ यर्मियाःल्ले़ पाःत्तुबारो हे़क्क्याङ् आङ्गाॽ कन् साप्लाथःङ्मो के़रे़क् पाःन्छेःक्वाहाॽ साप्तुङ्बारो॥” 19 सुहाङ्युक्पाहाॽरे़ बारुक्के़न् मे़मे़त्तु, “खे़ने़ॽ नु यर्मियान् ने़प्माङ् के़जिङ्ने़सिर पोङ्ॽ॥ खे़न्छिॽ के़वाॽसिबादे़न्निन् आत्तिन्नाङ् मे़मे़त्ते़से़न्ने़ॽ॥” 20 सुहाङ्युक्पाहाॽरे़ साप्लाथङ्मान् से़ःप्मा कप्मारे़ लागि हाङ्हिम्मोबा सुहाङ्मिबा एलिसामारे़ कुयाक्फाङ्ङो मे़ने़स्सु हे़क्क्याङ् खे़ङ्हाॽ मे़बेआङ् पोःक्खे़बा के़रे़क् पाःन्हाॽ हाङ्ङिन् मे़जे़क्तुरो॥ हाङ्ङिल्ले़ साप्लाथःङ्मे़न् हाःन्दुदेसु 21 हाङ्ङिल्ले़ खे़न् साप्लाथःङ्मे़न् ताःप्मारे़ लागि यहुदिःन् पाङ्घुदेसु॥ हे़क्क्याङ् यहुदिःन् पेआङ् एलिसामारे़ कुयाक्फाङ्ङोलाम् खे़न् फे़त्तु हे़क्क्याङ् हाङ्ङिन् नु खुने़ॽ कुगे़रे़क् पिसाङ् के़ये़प्पा सुहाङ्युक्पाहाॽ निरु पिरुसि॥ 22 खे़न् फाङ्सिगेक्पा चुङ्वाःम्मा ला वये़, कल्ले़चोगुल्ले़ हाङ्ङिन् चुङ्सिःक्मा ये़म्मो कुयुङ्मा हाङ्हिम्मो मिघ्राःङ्ग्रोःक् तगि मिजाॽनु युङे़॥ 23 यहुदिःल्ले़ सुम्सि लिसि कुदिःक्लक् निरु सुरुर पत्छे़, हे़क्केःल्ले़ हाङ्ङिल्ले़ चुक्सा फे़जाधिक् याङ्सिङ् हे़क्क्याङ् खे़न् निरुसुरुबा साप्लाथङ्मा लक्किन् हे़गुआङ् मिओ लाप्फुसु केःत्तु॥ के़रे़क् साप्लाथङ्मान् मिओ खाप्पुथ्यःङ् मे़म्बोङ्ङे थारिक् खे़ल्ले़ हे़क्केए चोगुआङ् पत्छे़॥ 24 कर खे़प्मो साप्ते़आङ् के़बप्पा पाःन्निन् मे़घे़प्सुआङ् हाङ्ङिन् नु खे़न् सुहाङ्युक्पाहाॽ किमाआङ् मे़ङ्गिसे़न् खुन्छिॽ निङ्वाॽआङ् मे़न्लोरे़न्॥ 25 एल्नातान, दलायाह नु गमर्याहःल्ले़ साप्कित्तिन् मे़हाःन्दे़न्ने़ॽ फाॽआङ् हाङ्ङिन् पेलि मे़भाक्तुआङ् मे़बत्छे़साङ् खुने़ॽ खे़ङ्हाॽ खे़म्घे़म्माङ् मे़लाप्तुसिन्॥ 26 खे़न् एगाङ् हाङ्ङिल्ले़ कुस्सा यरहमेल हाङ्साःन्, अज्रिएलरे़ कुस्सा सरायाहन् नु अबदिएलरे़ कुस्सा सेलेम्याहःन् सुहाङ्मिबा बारुक्के़न् नु माङ्निङ्वाॽपान् के़बाःप्पा यर्मियान् ते़म्मा इङ्जाङ् पिरुसि॥ कर यहवे दाङ्बे़ल्ले़ खुन्छिॽ चिक्खुसिआङ् वये़सिरो॥ यर्मियाःल्ले़ बारुक्के़न् वेॽ साप्कित् साप्मा पाङ्घु 27 यर्मियाःल्ले़ बारुक्के़न् मे़त्तुआङ् साप्मा पाङ्घुबा साप्लाथःङ्मे़न् यहोयाकिम हाङ्ङिल्ले़ फुत्लुम् हाःन्दुदेसुआङ् एगाङ् यहवे दाङ्बे़ल्ले़ कुइघङ्ङिन् यर्मियाओ याम्मो के़रे़॥ खुने़ॽ पाःत्तु, 28 “वेॽ साप्लाथङ्माधिक् याङ्सिङ्ङे़ॽ हे़क्क्याङ् यहोयाकिम हाङ्ङिल्ले़ हाःन्दुदेसुबा तगि साप्ते़बा के़रे़क् पाःन्हाॽ याम्मो साप्ते़ॽ॥ 29 खे़ब्याङ् खे़ने़ॽ यहुदाबा हाङ् यहोयाकिमे़न् अक्खे मे़त्ते़ॽ, ‘यहवे दाङ्बे़ल्ले़ अक्खे पाःत्तुॽ, खे़ने़ॽ खे़न् साप्लाथःङ्मे़न् के़हाःन्दु के़देसु, हे़क्क्याङ् के़बाःत्तु, “बेबिलोनबा हाङ्ङिन् फे़न्नाङ् कन् लाजेन् खाप्पुथ्यःङ् चोगुॽ, हे़क्क्याङ् खे़ल्ले़ थक्साहाॽ नु मनाहाॽ से़रुसिॽ फाॽआङ् खे़ने़ॽ थेआङ् खे़प्मो के़साप्तु?” 30 आल्ल यहुदाबा हाङ् यहोयाकिमे़ल्ले़ कुयाःम्बेओ यहवे दाङ्बे़ल्ले़ अक्खे पाःत्तुॽ, दाउद हाङ्ङिल्ले़ कुहाङ्युक्नाओ खे़ल्ले़ युङ्मा लक् मे़घोसुन्॥ खे़ल्ले़ कुजे थक्किन् लाःक्कात् लाप्पुङ् पेःक्काङ् मे़ल्लुप्पे काङ्बे़त्—ले़न्दिक् नाम्गे़सेःक्पो निधाःप्पाङ् ने़रो हे़क्क्याङ् से़न्दिक् सेःक्वाओ सुक्पा थक्काङ् ने़गन्॥ 31 आङ्गाॽ खे़न् नु कुमुॽइदाङ्साहाॽ हे़क्क्याङ् कुसुहाङ्युक्पाहाॽ खुन्छिॽ फे़न्याःम्बक्किल्ले़ कुले़क्वा खुम्दिङ् पिरुङ्सिङ्ॽ॥ यहुदा नु यरुसले़ःम्बा मनाहाॽओ थासुङ्ॽ फाॽआङ् माङ्हे़क् चोगुङ्बा के़रे़क् मे़क्मासिमे़न् खे़ङ्हाॽओ थासुङ्ॽ, थेआङ्भे़ल्ले़ आङ्गाॽ पिरुङ्सिङ्बा साम्दिङ्हाॽ खे़ङ्हाॽरे़ मे़ङ्घे़प्सुन्लो॥’” 32 खे़ल्ले़चोगुल्ले़ यर्मियाःल्ले़ वेॽ साप्लाथङ्मा थिक् तारु हे़क्क्याङ् नेरियाहःल्ले़ कुस्सा कुसुहाङ्मिबा बारुक्के़न् मे़त्तुर साप्मा पाङ्घु॥ खे़ब्याङ् यहुदाबा हाङ् यहोयाकिमे़ल्ले़ हाःन्दुदेसुबा साप्लाथःङ्मो पत्छे़बा के़रे़क् पाःन्हाॽ बारुक्के़ल्ले़ साप्तु॥ वेॽ यरिक् पाःन्हाॽग कन् ये़म्मोरक् खुने़ॽ योॽरुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.