यर्मिया 35 - लिम्बुयर्मियान् नु रेकाबिहाॽ 1 योसियाहःल्ले़ कुस्सा यहुदाबा हाङ् यहोयाकिमे़ल्ले़ हाङ्युक् चोगुबा ये़म्मो यहवे दाङ्बालाम् यर्मियाओ अक्तङ्बा इङ्घङ् के़रे़, 2 “खे़ने़ॽ रेकाबिहाॽरे़ खुन्छिॽ हिम्सयङ्हाॽओ पेगे़ॽ हे़क्क्याङ् खे़ङ्हाॽ यहवे दाङ्बे़ल्ले़ कुहिम्मो उःत्ते़से़ॽ॥ याक्फाङ्हाॽओबा कुभा लत्छा याक्फाङ्ङो तेॽरे़से़ॽ खे़ब्याङ् खे़ङ्हाॽ कुभा चे़ल्ले़क्सेॽ थि थुङ्मा पिरे़से़ॽ॥” 3 खे़ल्ले़चोगुल्ले़ यर्मियाःल्ले़ कुस्सा याजन्याह नु हबसिन्याहरे़ कुम्मे़न्छाॽ हे़क्क्याङ् के़रे़क् कुन्साॽहाॽ नु कुस्सा—के़रे़क् रेकाबि हिम्सयङ्हाॽओ आङ्गाॽ पेगाङ्॥ 4 आङ्गाॽ खे़ङ्हाॽ माङ्हिम्मो यिग्दल्याहःल्ले़ कुस्सा माङ्निङ्वाॽपान् के़बाःप्पा हानानरे़ कुस्साहाॽरे़ खुन्छिॽ याक्फाङ्ङो तारुङ्सिङ्॥ खे़न् याक्फाङ्ङिन् सुहाङ्युक्पाहाॽरे़ खुन्छिॽ याक्फाङ्ङिल्ले़ कुबेसाङ् सल्लुमले़ कुस्सा लाम्धेत् के़गोबा मासेयाहःल्ले़ कुयाक्फाङ्ङिल्ले़ कुधुङ्धाङ् ने़स्से़॥ 5 खे़न् एगाङ् आङ्गाॽ चे़ल्ले़क्सेॽ थि कुले़ःम् के़याक्पा कुभा खोर्याहाॽ नु लुःम्बाहाॽ रेकाबिहाॽरे़ खुन्छिॽ तगि युक्खुङ् पिरुङ्सिङ् हे़क्क्याङ् खे़ङ्हाॽ मे़त्तुङ्सिङ्, “मिसाक् चे़ल्ले़क्सेॽ थिजि थुङे़म्मे़ॽओ॥” 6 कर खे़ङ्हाॽरे़ नुगप् मे़बिराङ्, “आनिगे चे़ल्ले़क्सेॽ थि मे़धुङ्गुम्बे़न्, थेआङ्भे़ल्ले़ रेकाबे़ल्ले़ कुस्सा आनिगे थाःक्थे़बा योनादाबरे़ अक्तङ्बा इङ्जाङ् पिरिगे़आङ् वाॽ, ‘खिनिॽ नु खिनिॽ सामे़मे़न्छाॽहाॽरे़ आभे़ल्ले़आङ् चे़ल्ले़क्सेॽ थि थुङ्मा मे़नुॽने़न्॥ 7 खे़न्नुःल्ले़ वेॽ खिनिॽ हिम् चोःक्मा मे़नुॽने़न्, याःन्ममा नु चे़ल्ले़क्सेॽ इक्ताप् केःप्मा मे़नुॽने़न्॥ खिनिॽ अक्तङ्बा याःम्बक् आभे़ल्ले़आङ् मे़जोगे़म्मिन्ने़ॽ, कर खिनिॽ के़युङिबा लाजेॽओ यरिक् ये़न् थारिक् वाॽमा के़घोसिर फाॽआङ् सदादिङ् वे़प्मिबा कुइसिक् साःङ्गाहिम्मो युङे़म्मे़ॽ॥’ 8 रेकाबरे़ कुस्सा योनादाबरे़ आनिगे पिरिगे़बा के़रे़क् इङ्जाङ्हाॽ आनिगे इःप्मा नाःप्मा ते़न्दिगे़आङ् वयिगे़॥ आनिगे आबाङे आप्फाल्ले़आङ् चे़ल्ले़क्सेॽ थि मे़धुङुम्बे़न्, आनिगे मेःत्हाॽ नु साएहाॽरे़आङ् मे़न्धुङुन्॥ 9 आनिगे हिम् चोगुम्बे़आङ् खे़प्मो मे़युङिगे़न्, हे़क्क्याङ् आनिगे आबाङे इक्ताप्, चे़ल्ले़क्सेॽ इक्ताप् इग्र पोगुगे़न् कुजा थेआङ् मे़गत्तुम्बे़न्॥ 10 कर साःङ्गाहिम्हाॽओ आनिगे युङिगे़र वयिगे़, हे़क्क्याङ् आनिगे पाधे़बा योनादाबरे़ पिरिगे़बा इङ्जाङ्ङिन् खक्पे़त् इःत्तुम्बे़ नाःत्तुम्बे़आङ् वयिगे़॥ 11 कर बेबिलोनबा हाङ् नबुकदनेसरे़ल्ले़ कन् लाजेन् थङ्ङो फत्तुल्ले़ बेबिलोन नु अराम लाजेॽबा थक्सुबाहाॽनु किसिगे़॥ खे़ब्याङ् आनिगे यरुसले़ःम्मो चत्छिङ्मा तामा निःन्धो चोगुम्बे़॥ खे़ल्ले़चोगुल्ले़ आनिगे कॽयो युङिगे़र वयिगे़॥” 12 खे़न् एगाङ् यहवे दाङ्बे़ल्ले़ कन् कुइङ्घङ्ङिन् यर्मियाओ के़रे़, 13 “मुक्साम्दाङ्बा यहवे दाङ्बा, इस्राइलबा निङ्वाॽफुमाङ्ङिल्ले़ अक्खे पाःत्तुॽ, यहुदा नु यरुसले़ःम्मोबा मनाहाॽरो पेगे़ॽआङ् अक्खे मे़त्ते़से़ॽ, ‘आङ्गाॽ आइङ्जाङ्ङिन् आक्खेलॽरिक् इःप्मा नाःप्मा पोङ् के़लॽबा पाःन्निल्ले़ कुयाःम्बेओ खिनिॽ त्ये़म्मे़ॽआङ् हुॽआसिम्मे़ॽ॥’ 14 रेकाबिहाॽरे़ आइन् थारिक्साङ् चे़ल्ले़क्सेॽ सेजःङ्वा मे़न्धुङुन् थेआङ्भे़ल्ले़ खे़ङ्हाॽरे़ खुन्छिॽ थाःक्थे़बा योनादाबरे़ चे़ल्ले़क्सेॽ सेजःङ्वा मे़धुङे़म्मिन्ने़ॽ मे़त्तुसिआङ् वाॽ॥ कर आङ्गाॽग खिनिॽनुए ये़त्ले़ङ् ये़त्ले़ङ् पाःत्तार वाॽआ हे़क्केसाङ् खिनिॽ आङ्गाॽ आइङ्जाङ्ङिन् इःप्मा नाःप्मा मे़न्दे़न्ने के़वयि॥ 15 ये़त्ले़ङ् ये़त्ले़ङ् आङ्गाॽ खिनिॽओ पाङ्घुङ्सिङ्बा आसे़वारोबा माङ्निङ्वाॽपान् के़बाःप्पाहाॽरे़ अक्खे के़म्मे़त्ति, ‘खिनिॽ फे़न्याःम्बक् चोःक्मालाम् नुःक्खे़म्मे़ॽ, हे़क्क्याङ् कुदोःप्मा याःम्बक् चोःक्मा हेःक्ते़म्मे़ॽ॥ वेॽ साम्माङ्हाॽ माङ्घमासि ले़रे़म्मे़ॽ हे़क्क्याङ् आङ्गाॽ खिनिॽ नु खे़निॽ पाधे़बाहाॽ पिरुङ्सिङ्बा लाजेॽओ खिनिॽ हाङ्हाङ्ङाङ् वाॽमा के़घोसुम्॥’ कर आङ्गाॽ मे़त्निङ्बान् नु आङ्गाॽ आबाःन्निन् के़ङ्घे़प्सुम्मिन्॥ 16 रेकाबरे़ कुस्सा योनादाबरे़ कुमुॽइदाङ्साहाॽरे़ग खुन्छिॽ पाधे़बाहाॽरे़ मे़बिरुसिबा इङ्जाङ्ङिन् खक्पे़त् मे़इःत्तु मे़नाःत्तुआङ् मे़वाॽ॥ कर खिनिॽ आङ्गाॽ आइङ्जाङ्ङिन् इःप्मा नाःप्मा के़न्दे़न्दिन्॥ 17 “खे़ल्ले़चोगुल्ले़ आङ्गाॽ मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुङ्ॽ, ‘थेआङ्भे़ल्ले़ आङ्गाॽ खिनिॽ पाःन्छाःत्निङ्ङिल्ले़ खिनिॽ खे़म्मा के़न्दे़न्दिन् हे़क्क्याङ् खिनिॽ उःत्निङ्ङिल्ले़ नुगप् पिमा के़न्दे़न्दिन्, आङ्गाॽ पाःत्तुङ्बा मे़क्मासिमा के़रे़क् साम्दिङ्हाॽ यहुदा नु यरुसले़ःम्मोबा मनाहाॽ सम्धाङ् तारुङ्ॽ॥’” 18 खे़ब्याङ् यर्मियान् हिसिङ्ङाङ् रेकाबिहाॽ मे़त्तुसि, “कर मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तु, ‘खिनिॽ आप्फेक् पाधे़बा योनादाबरे़ के़बिरिबा कुइङ्जाङ्ङिन् नु के़मे़त्तिबा के़रे़क् निसाम्हाॽ के़दिम्दुम् के़नाःत्तुम्माङ् इःप्मा नाःप्मा के़दे़न्दिआङ् के़वयि॥’ 19 कल्ले़चोगुल्ले़ मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, ‘रेकाबरे़ कुस्सा योनादाबरे़ कुमुॽइदाङ्सालाम्बा लत्छा ये़म्बित्छाधिक्ले़ सदादिङ् आङ्गाॽ आसे़वा याःम्बक् चोःक्मा खोसुरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.