यर्मिया 34 - लिम्बुसिदकियाहरे़ कुलागि इङ्घङ् 1 बेबिलोनबा हाङ् नबुकदनेसरे़ल्ले़ कुयुक्को के़वाॽबा के़रे़क् सुवाङ्हाॽ हे़क्क्याङ् थाःक्हाॽरे़ खुन्छिॽ थक्सुबाहाॽ याङ्सिङ्ङाङ् यरुसले़म नु खे़ल्ले़ कुघिरिबा ये़क्यक्हाॽ थङ्ङो फत्तुसिर पत्छे़ हे़क्केःल्ले़ खे़न् ये़म्मो यहवे दाङ्बे़ल्ले़ कुइङ्घङ्ङिन् यर्मियाओ के़रे़॥ 2 कर यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, “आङ्गाॽ यहवे दाङ्बे़ल्ले़ कन् ये़क्यक्किन् बेबिलोनबा हाङ्ङिन् कुहुक्को पिरुङ्ल पत्ता हे़क्क्याङ् खे़ल्ले़ कन् ये़क्यक्किन् मिःल्ले़ खाप्पुथ्यःङ् चोगुॽ॥ 3 खे़ल्ले़ कुहुक्कोलाम्बा खे़ने़ॽ खे़त्छिङ्मा के़ङ्घोसुन्, खे़ल्ले़ के़दे़म्माङ् खुने़ॽ कुहुक्को के़धाःॽ॥ खे़ने़ॽ बेबिलोनबा हाङ्ङिन् के़मिक्किल्ले़ के़निसुॽ खे़ब्याङ् खे़न्नु नादुम्दुम्बा ताॽजे़ङ्मा पोङ्ॽ॥ खे़न् एगाङ् खे़ने़ॽ बेबिलोन के़बेःक्॥ 4 “हे़क्केसाङ् यहुदाबा हाङ् सिदकियाहए, यहवे दाङ्बे़ल्ले़ कन् कुमाङ्हुप्पिन् खे़ने़ॽ खे़प्से़ युक्खे़ॽ॥ खे़ने़ॽ थङ्ङो के़न्छिने़न्॥ 5 खे़ने़ॽ याम्नाःम्मो के़निङ्वाॽ तुक्खे मे़न्जाए के़सिःॽ, हे़क्क्याङ् के़निङ्वाॽसोक्को सुक्पा मे़हाःन्दुआङ् तगिबा खे़ने़ॽ के़धाःक् हाङ्हाॽ मनाहाॽरे़ आक्खेलॽरिक् चेलुप् खःङ्लुप् मे़मे़त्तुसि, हे़क्केलॽरिक्के खे़ङ्हाॽरे़ खे़ने़ॽ चेलुप् खःङ्लुप् के़म्मे़त्॥ खे़ङ्हाॽरे़ खे़ने़ॽ के़लागि मे़रिङ् मे़धक्ल अक्खे मे़बाःत्तुॽ, ‘चिःत्ताङ्स्ये़, आनिगे दाङ्बे़न् मासिङ्लो!’ आङ्गाॽ यहवे दाङ्बे़ल्ले़ कन् पाःत्तुङ्ङाङ् वाॽ॥” 6 खे़ब्याङ् माङ्निङ्वाॽपान् के़बाःप्पा यर्मियाःल्ले़ यहुदाबा हाङ् सिदकियाहःन् यरुसले़म ये़क्यक्को कन् के़रे़क् पाःन्हाॽ मे़त्तु, 7 बेबिलोनबा हाङ्ङिल्ले़ कुधक्सुबाहाॽरे़ यरुसले़म नु यहुदाबा वेॽ ये़क्यक्हाॽओ ते़न्धङ् मे़जोगुर मे़बत्छे़॥ हाबा खे़न् ये़म्मो लाकिस नु आजेकाबा ये़क्यक्हाॽआङ् थङ्ङो मे़भत्तुर मे़बत्छे़, यहुदाओ लुङ्धाक्किल्ले़ फाङ्मनाबा खे़न् ने़त्छि ये़क्यक्हाॽरक् याःक्ते़छिआङ् ने़स्से़रो॥ योग्बा योःग्माहाॽ ताप्फे़ःल्लिक् मे़मे़त्तुसि 8 सिदकियाह हाङ्ङिल्ले़ यरुसले़ःम्मोबा के़रे़क् मनाहाॽरे़ खुन्छिॽ यहुदि योग्बा योःग्माहाॽ से़न्लप् पिमासि माङ्हुप् चोगुआङ् वये़ हाबा खे़न् ये़म्मो यहवे दाङ्बालाम् यर्मियाओ अक्तङ्बा इङ्घङ् के़रे़॥ 9 के़रे़क्ले़ आबाङे आबाङे खुन्छिॽ यहुदि योग्बा योःग्माहाॽ से़न्लप् पिमासि के़बोङ्बा वये़॥ हाःत्ले़आङ् आबाङे यहुदाबा फुॽनुसाॽ ने़ॽनुसाॽहाॽ योक् चोःक्मासि मे़न्नुॽमनाबा वये़॥ 10 कल्ले़चोगुल्ले़ कन् माङ्हुप्पो के़रे़क् मनाहाॽ हे़क्क्याङ् खुन्छिॽ लाम्लोबाहाॽ आबाङे आबाङे खुन्छिॽ योग्बा योःग्माहाॽ से़न्लप् पिमासि नु खे़ङ्हाॽ याम्मो योक् चोःक्मासि मेःन् के़लॽबा पाःन्नो मे़दे़न्दे़ खे़ब्याङ् खे़ङ्हाॽ चोःक्युम्भो मे़बिरुसि॥ 11 कर ताःन्दि खे़ङ्हाॽरे़ खुन्छिॽ निङ्वाॽ मे़ले़क्खु॥ हे़क्क्याङ् चोःक्युम्भो मे़बिरुसिबा योग्बा योःग्माहाॽ मे़नुःक्तु मे़दारुसि खे़ब्याङ् खे़ङ्हाॽ याम्मो साक्के़ल्ले़क् योग्बा योःग्मा मे़बोःक्खे़आङ् मे़वये़र मे़याःन्दुसि॥ 12 खे़ब्याङ् यहवे दाङ्बा इस्राइलबा निङ्वाॽफुमाङ्ङिल्ले़ अक्तङ्बा कुइङ्घङ्ङिन् यर्मियाओ के़रे़, 13 “यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, आङ्गाॽ खिनिॽ थाःक्हाॽ योक् पोङ्मालाम् चोःक्युम्भो पिरुङ्सिङ्ङाङ् मिस्रलाम् लःत्तुङ् फे़त्तुङ्सिङ्ङिल्ले़ आङ्गाॽ खे़ङ्हाॽनु कन् माङ्हुप्पिन् चोगुङ्ङाङ् वयाङ्॥ आङ्गाॽ खे़ङ्हाॽ अक्खे मे़त्तुङ्सिङ्, 14 ‘खे़ङ्हाॽरे़ खे़निॽ हुक्को मे़सङ्घुसिबा खे़निॽ हिब्रु फुॽनुसाॽहाॽ तङ्बे नुसि के़प्पा ये़म्मो चोःक्युम्भो पिमासि पोङ्ॽ॥ तङ्बे तुक्सि थारिक् खिनिॽ याःम्बक् मे़जोगु मे़सुरु के़म्बिरिआङ् खे़ङ्हाॽ ले़प्मासिए पोङ्ॽ॥’ कर खिनिॽ पाधे़बाहाॽरे़ आङ्गाॽ आबाःन्निन् निङ्वाॽ मे़म्बिरुन् हे़क्क्याङ् आङ्गाॽ पाःत्तुङ्बा हे़क्के मे़न्जोगुन्॥ 15 कुभा ये़न् तगिरक् खिनिॽ निङ्वाॽलोरे़आङ् के़हिन्दि हे़क्क्याङ् आङ्गाॽ आनिङ्वाॽ के़दाबा याःम्बक् के़जोगुम्॥ खिनिॽ के़रे़क् आबाङे इस्राइलबा योग्बा योःग्माहाॽ चोःक्युम्भो पिमासि के़दे़म्बा के़बोःक्खि खे़ब्याङ् आदगि आङ्गाॽ आमिङ्ङिन् मिङ्सो इङ्धाङ् मे़बिरुबा माङ्हिम्मो खिनिॽ लत्छा माङ्हुप् के़जोगुम्॥ 16 कर खिनिॽ याम्मो खिनिॽ निङ्वाॽ के़ले़क्खुम् हे़क्क्याङ् आङ्गाॽ आमिङ् के़देसुम्॥ खिनिॽ के़रे़क्ले़ आबाङे निङ्वाॽ कुइसिक् चोःक्युम्भो के़बिरुम्सिम्माङ् मे़वये़बा योग्बा योःग्माहाॽ के़नुःक्तुम् के़दारुम्सिम् खे़ब्याङ् याम्मो साक्के़ल्ले़क् योग्बा योःग्मा के़जोगुम्सिम्॥ 17 “कल्ले़चोगुल्ले़ आङ्गाॽ यहवे दाङ्बे़ल्ले़ अक्खे पाःत्तुङ्ॽ, खिनिॽ आङ्गाॽ आइङ्जाङ्ङिन् के़न्इःत्तुम्मिन् के़न्नाःत्तुम्मिन्, हे़क्क्याङ् खिनिॽ इस्राइलबा फुॽनुसाॽहाॽ चोःक्युम्भो के़म्बिरुम्सिम्मे़न्॥ नुॽ, आल्ल आङ्गाॽ खिनिॽ थङ्, साक्वान् नु मिङ्देॽलाम्बा मे़क्मासिमा के़बोङ्बा चोःक्युम्भो पिनिङ्ॽ॥ आङ्गाॽ खिनिॽनु थे़मा चोगुङ्ॽ, खे़न् मे़निसुआङ् इक्सादिङ् खाम्बेःक्मोबा के़रे़क् मे़न्छाम् सुवाङ्हाॽ यङ्मा मे़सि॥ 18-19 यहुदा नु यरुसले़ःम्बा सुहाङ्युक्पाहाॽ हे़क्क्याङ् हाङ्हिम्मोबा सुहाङ्युक्पाहाॽ नु निङ्वाॽफुसाम्बाहाॽ खे़ब्याङ् लाम्लोबाहाॽरे़ लत्छा से़गम्बा कुम्बाबा थक्साधिक् ने़त्छि कुघे़ल्ले़क् मे़जोगु हे़क्क्याङ् खे़ल्ले़ कुलुम्मोलाम् लाङ्मे़घेगे़आङ् आङ्गाॽनु लत्छा माङ्हुप् मे़जोगु, कर खे़ङ्हाॽरे़ खे़न् माङ्हुप्पिन् मे़भेःन्दु हे़क्क्याङ् खे़न् तङ्मनाबा पाःन्हाॽ मे़न्इःत्तुन् मे़न्नाःत्तुन्॥ खे़ल्ले़चोगुल्ले़ खे़ङ्हाॽरे़ से़गम्बा कुम्बाबा थक्सान् थे़मा मे़जोगुआङ् मे़वये़, आङ्गाॽ खे़ङ्हाॽ हे़क्तङ्बाए चोगुङ्सिङ्ॽ॥ 20 खे़ङ्हाॽ से़प्मासि निङ्वाॽ के़जोःक्पा निङ्मिहाॽरे़ खुन्छिॽ हुक्को आङ्गाॽ खे़ङ्हाॽ हुक्सुप्तुङ्सिङ् हे़क्क्याङ् खे़ङ्हाॽरे़ खुन्छिॽ कुसिवे़त् थक्हाॽ पुहाॽ नु ताम्भुङ् थक्साहाॽरे़ लागि चामा कुजा पोङ्ॽ॥ 21 “यहुदाबा हाङ् सिदकियाहःन् नु खे़ल्ले़ कुसुहाङ्युक्पाहाॽआङ् आङ्गाॽ खे़न् खुन्छिॽ से़प्मा निङ्वाॽ के़जोःक्पा निङ्मिहाॽरे़ खुन्छिॽ हुक्को थासुङ्सिङ्ॽ॥ आङ्गाॽ खे़ङ्हाॽ बेबिलोनबा हाङ्ङिल्ले़ कुधक्सुबाहाॽरे़ खुन्छिॽ हुक्को थासुङ्सिङ्ॽ, खे़न् थक्सुबाहाॽरे़ खिनिॽ आल्लो फप्मा के़म्ले़रिआङ् मे़वाॽ॥ 22 आङ्गाॽ इङ्जाङ् पिरुङ्सिङ् हे़क्क्याङ् खे़ङ्हाॽ कन् ये़क्यक्को मे़नुःङ् मे़दाःॽ॥ खे़ङ्हाॽरे़ कन् ये़क्यक्किन् थङ्ङो मे़भत्तुॽ, खे़ब्याङ् कन् ये़क्यक्किन् मे़दोगुआङ् मे़युक्तु हे़क्क्याङ् फुल्लुम् थ्यःङ् मि मे़याक्तुॽ॥ आङ्गाॽ यहुदाबा ये़क्यक्हाॽ मुरे़क् खारे़क्पा ये़ःङ्घादे़न् हे़क्के आत्तिन्हाॽआङ् युङ्मा मे़ङ्घोने़न्ल मना मेःन्नेबा चोगुङ्॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.