यर्मिया 33 - लिम्बुनुॽमादामा नु थो पोःक्मा निङ्साङ् 1 इक्के़गोबाहाॽरे़ खुन्छिॽ लक्खुम्मो यर्मियान् पुङ्लाधाबा पोःक्खे़आङ् यागे़ल्ले़ यहवे दाङ्बे़ल्ले़ कुइङ्घङ्ङिन् खुने़ॽओ निरे़ङ् याम्मो के़रे़॥ 2 इक्सादिङ् खाम्बेःक्मान् के़जोःक्पा, हे़क्क्याङ् खे़न् नावागे़न् चइःत् के़ने़बा यहवे दाङ्बान् यर्मियाःन्नु पारे़॥ खुने़ॽ कुमिङ् यहवे दाङ्बारो हे़क्क्याङ् खुने़ॽ यर्मियान् अक्खे मे़त्तु, 3 “आङ्गाॽ उःत्ताङ्ङे़ॽ हे़क्क्याङ् आङ्गाॽ खे़ने़ॽ पाःन्छाःत्ने़॥ खे़ने़ॽ के़ल्ले़सुम्बा निङ्वाॽ के़माबा नु ने़हिरे़ मे़न्धाप्मनाबा कुबे के़याक्पा पाःन्हाॽ आङ्गाॽ खे़ने़ॽ मे़त्ने़ॽ॥ 4 निङ्मिहाॽरे़ किर्गप् मे़गबुआङ् मे़भत्तुबाल्ले़ चोगुल्ले़ यरुसले़ःम्मोबा हिम्हाॽ नु यहुदाबा हाङ्हिम्हाॽ लुःन् फाॽआङ् आङ्गाॽ यहवे दाङ्बा इस्राइलबा निङ्वाॽफुमाङ्ङिल्ले़ पाःत्तुङ्ॽ॥ 5 यरिक्तङ्बा बेबिलोन्बाहाॽनु थङ् मे़धक्ते़ल्ले़ आङ्गाॽ आसिक् पोःक्मा नु साॽरिक् आयाःक्ले़ॽमो आङ्गाॽ से़प्मा कोःत्तुङ्सिङ्बाहाॽरे़ खुन्छिॽ चेहाॽरे़ हिम्हाॽ सधे़क् तिम्॥ कन् ये़क्यक्पा यक्युङ्बाहाॽरे़ खुन्छिॽ फे़न्याःम्बक्किल्ले़ चोगुल्ले़ आङ्गाॽ कन् ये़क्यक्किन् लाप्फुसुङ्ङाङ् ने़ःॽ॥ 6 “कर आङ्गाॽ कन् ये़क्यक्किन् नु कप्मोबा यक्युङ्बाहाॽ वेःन्निङ् हे़क्क्याङ् याम्मो कुयाम् चाङ्जाङ् के़लॽबा चोःक्निङ्ॽ॥ आङ्गाॽ खे़ङ्हाॽ आत्तातान्ने यरिक् सुक्खे चामा सनारुङ् पिरुङ्सिङ् खे़ब्याङ् कम्ब्राङ् मे़त्तुङ्सिङ्ॽ॥ 7 आङ्गाॽ यहुदा नु इस्राइलबा मनाहाॽ मे़दे़म्सु मे़देॽरुसिबालाम् नुःक्तुङ् तारुङ्सिङ्ॽ हे़क्क्याङ् खे़ङ्हाॽ याम्मो तगिबा हे़क्केए चोगुङ्सिङ्ॽ॥ 8 आङ्गाॽ आदक्ले़ङ्वाओ खे़ङ्हाॽरे़ मे़जोगुबा लायोलाम् खे़ङ्हाॽ सुत्थो चोगुङ्सिङ्ॽ हे़क्क्याङ् खे़ङ्हाॽ पान् मे़ङ्घे़म्मनाबा मे़बोःक्खे़आङ् खे़ङ्हाॽरे़ मे़जोगुबा खुन्छिॽ लायोन् नु पिफ्युङ्ङिन् ले़प्मि पिरुङ्सिङ्ॽ॥ 9 खे़ब्याङ् कन् यरुसले़म ये़क्यक्किन् आङ्गाॽ आलागि निङ्वाॽ तामा, मिङ्सोधाःङ्सो पोङ्मा नु ने़बो पप्मारे़ कुबुङ् पोङ्ॽ हे़क्क्याङ् आङ्गाॽ यरुसले़ःम्बा यक्युङ्बाहाॽरे़ खुन्छिॽ लागि चोगुङ्बा नुबा याःम्बक्हाॽ नु खे़न् ये़क्यक्को चोगुङ्बा नुॽमादामा पाःन्हाॽ मे़घे़प्सुआङ् इक्सादिङ् खाम्बेःक्मोबा के़रे़क् मे़न्छाम् सुवाङ्हाॽ पगि मे़गिआङ् थे़गक्कक्ना मे़यङ्॥” 10 “यहवे दाङ्बे़ल्ले़ अक्खे पाःत्तुॽ, खिनिॽ के़बाःत्तुम्माङ् वाॽ, ‘कन् ते़न्निन् मुरे़क् खारे़क्पा ये़ःङ्घादे़न् पोःक्खे़आङ् ने़ःॽ, कॽयो लत्छा मना इग्र लत्छा थक्सा थिक्काङ् याङ्मे़धोःक्ने़न्॥’ यहुदाबा ये़क्यक्हाॽ नु यरुसले़ःम्मोबा लाम्हाॽ चिजि खक्खक् पोःक्खे़आङ् ने़ःॽ हे़क्क्याङ् कुभा मना इग्र थक्साहाॽ खे़प्मो याङ्मे़न्धोःक्ने़न्छाङ् कन् ते़न्नो खिनिॽ याम्मो 11 सःप्मा एःप्मा नु निङ्वाॽ तामा इक्ला हे़क्क्याङ् ते़न्धाम् मेःक्खिम्मोबा चामुक् थिमुक्ले़ हयङ् किल्लिङ् के़घे़प्सुम्ॽ॥ मनाहाॽरे़ आङ्गाॽ आहिम्मो नुगे़न् तोःम्मा सिदुङ्जभाहाॽ मे़दारुआङ् मे़दाःल्ले़ खे़ङ्हाॽ साम्मे़लोबा साम्लोन् खिनिॽ के़घे़प्सुम्लो, “‘मुक्साम्दाङ्बा यहवे दाङ्बान् नुगे़न् पिरे़म्मे़ॽओ थेआङ्भे़ल्ले़ खुने़ॽ के़नुॽबा चोक्लो हे़क्क्याङ् खुने़ॽ सदादिङ् लुङ्माॽ तुक्तुसिरो॥’” “आङ्गाॽ कन् लाजेॽओबा नुॽमादामे़न् तगिबा हे़क्के चोगुङ् पिरुङ्सिङ्ॽ॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽ॥” 12 “मुक्साम्दाङ्बा यहवे दाङ्बे़ल्ले़ अक्खे पाःत्तुॽ, हाःत्ताङ् मना के़होप्पा इग्र थक्सा याङ्मे़धोःक्ने़म्बा कन् मुरे़क् खारे़क्पा ये़ःङ्घादे़न् हे़क्तङ्बा कन् लाजेॽओ मे़ल्लुक्कम्बाहाॽरे़ लागि याम्मो थिक्ले़ङ् मे़ल्लुक् मे़ःन्दा चाराम्माम्दे़न्हाॽ पोङ्ॽ॥ 13 कोःक्मा फाङ्जङ् थे़गु माङ्वा लाजेॽबा ये़क्यक्हाॽओ, उःक्चम्जम्बादे़न्नो, यहुदा लाङ्गे़त् ले़प्माङ्बा लक्को, बेन्यामिन ते़ङ्गप्पो, यरुसले़म के़रे़क् पिसाङ्बा पाङ्भेॽओ हे़क्क्याङ् चुक्सा पाङ्भेॽहाॽओ नु यहुदाबा ये़क्यक्हाॽओ पिक्कम्बाहाॽरे़ आबाङे खुन्छिॽ मे़ल्लुक् मे़ःन्दाहाॽ मे़निरुसिॽ॥ आङ्गाॽ यहवे दाङ्बे़ल्ले़ कन् पाःत्तुङ्ङाङ् वाॽ॥” 14 यहवे दाङ्बे़ल्ले़ पाःत्तुॽ, “खे़न् ये़म्मिन् तार पत्, आङ्गाॽ इस्राइल हे़क्क्याङ् यहुदाबा मनाहाॽनु चोगुङ्बा माङ्हुप्पिन् के़त्तुङ्ॽ॥ 15 “खे़न् ये़म्मो दाउद हाङ्ङिल्ले़ कुधिन्दाङ् सायोबोराहाॽलाम् साम्योबा कुबोराक् थिक् लःन्ल याःन्दुङ्लो॥ खे़न् हाङ्ङिल्ले़ के़रे़क् लाजेॽओ नुबा नु कुदोःप्मा खासे़न् लोःम्मा याःम्बक् चोगुरो॥ 16 खे़न् ये़न्हाॽओ यहुदा नु इस्राइलबा मनाहाॽ ताङ्मे़से़ःप्लो हे़क्क्याङ् खे़ङ्हाॽ ताप्थेक् याम्धेक्को मे़युङ्लो॥ यरुसले़म ये़क्यक्किल्ले़ कुमिङ् ‘यहवे दाङ्बान् आनिगे साम्योबारो॥’ 17 “थेआङ्भे़ल्ले़ यहवे दाङ्बे़ल्ले़ अक्खे पाःत्तुॽ, ‘दाउद हाङ्ङिल्ले़ लत्छा कुमुॽइदाङ्साधिक् सदादिङ् इस्राइलबा हाङ् पोङ्ॽ॥ 18 हे़क्क्याङ् आङ्गाॽ आसे़वा के़जोःक्पा नु मिधिङ्मनादेमनाबा सिदुङ्जभा, पोगुगे़न् कुजा सिदुङ्जभा हे़क्क्याङ् वेॽ ले़त्तिहाॽ तोःम्मारे़ लागि ले़बिरे़ कुधाःक्लाम्बा निङ्वाॽफुसाम्बा मे़बोङ्ॽ॥’” 19 यहवे दाङ्बे़ल्ले़ कुइङ्घङ्ङिन् यर्मियोओ के़रे़, 20 “यहवे दाङ्बे़ल्ले़ अक्खे पाःत्तुॽ—‘ले़न्दिक् हे़क्क्याङ् से़न्दिक्के़न्नुबा आङ्गाॽ चोगुङ्बा माङ्हुप्पिन् फेःम्मा के़सुक्तुम्ने़भग्र, खे़ब्याङ् निःन्धो के़बोङ्बा ये़म्मो खे़न् ले़न्दिक् नु से़न्दिक् मे़बोङ्ने़न्ने़भग्र, 21 आङ्गाॽ आसे़वारोबा दाउद हाङ्ङिन्नु चोगुङ्बा माङ्हुप्पिन् नु आङ्गाॽ आदगि माङ्से़वा के़जोःक्पा निङ्वाॽफुसाम्बा ले़बि सुवाङ्हाॽलाम् चोगुङ्बा माङ्हुप्पिन्नाङ् फेःम्मा सुक्ते़त्, खे़ब्याङ् दाउदरे़ कुहाङ्युक्नाओ हाङ्युक् चोःक्मारे़ लागि आल्लआङ्धो खे़ल्ले़ कुमुॽइदाङ्सा मे़म्बोङ्ने़न्॥ 22 आङ्गाॽ आसे़वारोबा दाउद हाङ्ङिल्ले़ कुमुॽइदाङ्साहाॽ नु आङ्गाॽ आदगि माङ्से़वा के़जोःक्पा ले़बिहाॽरे़ खुन्छिॽ खानिःत्तिन् ताङ्साक्पोबा खेःम्सिक्पाहाॽ इग्र वरःङ्ङिल्ले़ कुयाओ के़ने़बा ये़ःङ्घाःल्ले़ कुजेःक्हाॽ निःप्मा सुक्मे़न्दे़प्मनाबा हे़क्के यरिक् फोसुङ्सिङ्ॽ॥’” 23 यहवे दाङ्बे़ल्ले़ कुइङ्घङ्ङिन् यर्मियाओ के़रे़, 24 “आङ्गाॽ सेगुङ्सिङ्बा ने़त्छि हिम्सयङ् इस्राइल नु यहुदान् आङ्गाॽए लाप्फुसुङ्सिङ्ङाङ् वाॽ फाॽआङ् आक्खेलॽरिक् मनाहाॽरे़ मे़बाःत्तुर मे़बत्, खे़न् थे खे़निॽ के़घे़प्सुम्बि? खे़ल्ले़चोगुल्ले़ खे़ङ्हाॽरे़ आङ्गाॽ आमनाहाॽ मे़जिःत्तुसिर ओमे़मे़त्तुसिॽ हे़क्क्याङ् खे़ङ्हाॽ लत्थिक् सुवाङ्सि फाॽआङ् मे़न्इःत्तुसिन्॥ 25 कर यहवे दाङ्बे़ल्ले़ अक्खे पाःत्तुॽ, ‘ले़न्दिक् हे़क्क्याङ् से़न्दिक्के़न्नुबा आङ्गाॽ चोगुङ्बा माङ्हुप्पिन् फेःम्मा के़सुक्तुम्ने़भग्र, खे़ब्याङ् निःन्धो के़बोङ्बा ये़म्मो खे़न् ले़न्दिक् नु से़न्दिक् मे़बोङ्ने़न्ने़भग्र, 26 आङ्गाॽ याकुब नु आसे़वारोबा दाउदरे़ कुमुॽइदाङ्साहाॽ नाॽरुङ्सिङ्ॽ, खे़ब्याङ् दाउदरे़ कुमुॽइदाङ्साहाॽओ लत्छाआङ् अब्राहाम, इसहाक हे़क्क्याङ् याकुबरे़ कुमुॽइदाङ्साहाॽ सम्धाङ् हाङ्युक् चोःक्मारे़ लागि मे़सेगुङ्ङिन्॥ थेआङ्भे़ल्ले़ आङ्गाॽ खे़ङ्हाॽ याम्मो खुन्छिॽ लाजेॽओ नुःक्तुङ् तारुङ्सिङ्ॽ हे़क्क्याङ् खे़ङ्हाॽ लुङ्माॽ तुक्तुङ्सिङ्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.