Biblia Todo Logo
Bib sou entènèt

- Piblisite -

यर्मिया 32 - लिम्‍बु


यर्मियाःल्‍ले़ प्‍याङ्‌सिगे़न् इक्‍ताप्‍पिन् इङु

1 सिदकियाहःन् यहुदाबा हाङ् पोःक्‍खे़बा थिबोङ् तङ्‌बेओ इग्र बेबिलोनबा नबुकदनेसर हाङ्‌ङिल्‍ले़ हाङ्‌युक् चोगुबा थिबोङ्‌ङाङ् ये़त्‍छि तङ्‌बेओ यहवे दाङ्‌बे़ल्‍ले़ कुइङ्‌घङ्‌ङिन् यर्मियाओ के़रे़॥

2 खे़न् ये़म्‍मो बेबिलोनबा हाङ्‌ङिल्‍ले़ कुधक्‍सुबाहाॽरे़ यरुसले़ःम्‍मिन् कब्रिङ् मे़गबुर मे़बत्‍छे़ हे़क्‍क्‍याङ् यहुदाबा हाङ्‌हिम्‍मो के़वाॽबा इक्‍के़गोबाहाॽरे़ खुन्‍छिॽ लक्‍खुम्‍मो यर्मियान् साक्‍पा थ्‍ये़आङ् यागे़॥

3 सिदकियाह हाङ्‌ङिल्‍ले़ अक्‍खे पाःत्तुर आङ्‌गाॽ साक्‍ताङ्‌ङाङ् यागाङ्, “खे़ने़ॽ थेआङ् अक्‍तङ्‌बा माङ्‌निङ्‌वाॽपान् के़बाःप्‍पा? ‘कन् ये़क्‌यक्‍किन् बेबिलोनबा हाङ्‌ङिल्‍ले़ कुहुक्‍को पिरुङ्‌ॽ हे़क्‍क्‍याङ् खुने़ॽ कन् ये़क्‌यक्‍किन् तोगुआङ् युक्‍तुॽ फाॽआङ् यहवे दाङ्‌बे़ल्‍ले़ पाःत्तुॽ॥

4 हे़क्‍क्‍याङ् सिदकियाह हाङ्‌ङिन् बेबिलोनबाहाॽरे़ खुन्‍छिॽ हुक्‍कोलाम् फिःन्‍छिङ्‌मा मे़सुक्‍ने़न् कर बेबिलोनबा हाङ्‌ङिल्‍ले़ कुहुक्‍को थाःॽ खे़ब्‍याङ् खुने़ॽनु सोरिक् पोङ्‌ङाङ् नादुम्‍दुम्‍बा ताॽजे़ङ्॥

5 सिदकियाहःन् बेबिलोनओ मे़देॽरुॽ हे़क्‍क्‍याङ् आफाल्‍ले़ थारिक् आङ्‌गाॽ खे़न् कम्‍ब्राङ् मे़मे़त्तुङ्‌ङिन्, खे़म्‍म्‍याक् थारिक् खे़न् खे़प्‍मो वाॽ॥ बेबिलोनबा मनाहाॽनु खे़न् थङ् चोःक्‍साङ् खे़ल्‍ले़ थङ् मे़नाःन्‍दुन्‌ॽ॥ आङ्‌गाॽ यहवे दाङ्‌बे़ल्‍ले़ अक्‍खे पाःत्तुङ्‌ङाङ् वाॽ॥’”

6 यहवे दाङ्‌बे़ल्‍ले़ कुइङ्‌घङ्‌ङिन् आङ्‌गाॽओ के़रे़॥ खुने़ॽ मे़त्ताङ्,

7 “खे़ने़ॽ के़म्‍भङा सल्‍लुमरे़ कुस्‍सा हनमेले़न् ताआङ् पेलि के़म्‍भाक्, ‘खे़ने़ॽ निःत्ताङ्‌बा के़गाॽइ के़बोःक्‍खे़बाल्‍ले़ चोगुल्‍ले़ आङ्‌गाॽ आइक्‍ताप्‍पिन् खे़ने़ॽ इङ्‌मा के़घोसु हे़क्‍क्‍याङ् बेन्‍यामिन्‍ले़ कुलाजेॽओबा अनातोतओ के़ने़बा आइक्‍ताप्‍पिन् इङाङ् पिराङ्‌ङे़ॽ॥’”

8 खे़ब्‍याङ् कुदोःप्‍मा ये़म्‍मो यहवे दाङ्‌बे़ल्‍ले़ पाःत्तुबा हे़क्‍के आम्‍भङारे़ कुस्‍सा हनमेले़न् हाङ्‌हिम्‍मो के़वाॽबा इक्‍के़गोबाहाॽरे़ खुन्‍छिॽ लक्‍खुम्‍मो त्‍ये़आङ् मे़त्ताङ्, “बेन्‍यामिन्‍ले़ कुलाजेॽओबा अनातोतओ के़ने़बा आइक्‍ताप्‍पिन् इङे़ॽ॥ खे़न् इक्‍ताप्‍पिन् थे़ॽमा नु कप्‍मा खे़ने़ॽए के़हुक्‍को वाॽ॥” अक्‍खेलॽरिक् से़क्‍खाए यहवे दाङ्‌बान् आङ्‌गाॽनु पारे़बारे़त्‍छ फाॽआङ् निङ्‌वाॽ खोसुङ्॥

9 खे़ल्‍ले़चोगुल्‍ले़ हनमेले़न् लाम्‍बा खे़न् कुइक्‍ताप्‍पिन् आङ्‌गाॽ इङुङ् हे़क्‍क्‍याङ् युप्‍पान् थाङ्‌घुङ्‌ङाङ् खे़ल्‍ले़ कुमे़ल्‍लुङ् हुङुङ्॥ खे़ल्‍ले़ के़रे़क् कुमे़ल्‍लुङ् थिबोङ्‌ङाङ् नुसि सेकेल योरे़॥

10 आङ्‌गाॽ ते़म्‍सक् साप्‍लाओ युक्‍छाप् एःप्‍तुङ्, एःप्‍साप् युक्‍तुङ्, साखिहाॽ एःप्‍साप् युक्‍मा पाङ्‌घुङ्‌सिङ् हे़क्‍क्‍याङ् ते़म्‍दुरिओ युप्‍पान् थाङ्‌घुङ्‌ङाङ् कुमे़ल्‍लुङ् पिरुङ्॥

11 खे़ब्‍याङ् इक्‍ताप् इङ्‌मनाबा ते़म्‍सक् साप्‍लान् आङ्‌गाॽ मे़त्‍छिङ्‌ङाङ् हे़क्‍क्‍याङ् इङ्‌मा सङ्‌मारे़ लागि चोःक्‍मनाबा साप्‍लाहाॽओ एःप्‍साप् युक्‍मनाबा नु एःप्‍साप् मे़न्‌युक्‍केबा लिङ्‌मनाबा ने़प्‍माङ् साप्‍लाहाॽ आङ्‌गाॽ ताःक्‍तुङ्,

12 हे़क्‍क्‍याङ् खे़न् पाःन्‍हाॽ महसेयाहःल्‍ले़ कुम्‍मे़न्‍छाॽ नेरियाहरे़ कुस्‍सा बारुके़न् लक्‍पे़न् पिरुङ्॥ आम्‍भङारे़ कुस्‍सा हनमेले़न् नु साप्‍लाओ युक्‍छाप् के़युक्‍पा साखिहाॽ हे़क्‍क्‍याङ् इक्‍के़गोबाहाॽरे़ खुन्‍छिॽ लक्‍खुम्‍मो के़युङ्‌बा यहुदाबा मनाहाॽरे़ खुन्‍छिॽ तगि आङ्‌गाॽ खे़न् साप्‍लान् लक्‍पे़न् पिमा याःम्‍बक्‍किन् चोगुङ्॥

13 आङ्‌गाॽ बारुके़न् खे़न् के़रे़क्‍ले़ खुन्‍छिॽ तगि अक्‍खे मे़त्तुङ्,

14 “कर मुक्‍साम्‍दाङ्‌बा यहवे दाङ्‌बा इस्राइलबा निङ्‌वाॽफुमाङ्‌ङिल्‍ले़ अक्‍खे पाःत्तुॽ, ‘एःप्‍साप् युक्‍मनाबा ते़म्‍सक् साप्‍लान् नु लिङ्‌मनाबा ने़प्‍माङ् साप्‍लाहाॽ तेॽरे़ॽआङ् लत्‍छा खाम् खप्‍प्‍याओ केःत्ते़ युक्‍खे़ॽ हे़क्‍केलॽरिक् खे़न् यरिक् तङ्‌बे थारिक् थरुर॥’

15 थेआङ्‌भे़ल्‍ले़ मुक्‍साम्‍दाङ्‌बा यहवे दाङ्‌बा इस्राइलबा निङ्‌वाॽफुमाङ्‌ङिल्‍ले़ पाःत्तुॽ, ‘थिक्‌यान् नियान् एगाङ् कन् लाजेॽओ हिम्‍हाॽ, इक्‍ताप्‍हाॽ नु चे़ल्‍ले़क्‍सेॽ इक्‍ताप्‍हाॽ सङ्‌मा इङ्‌मा याःम्‍बक् याम्‍मो पोङ्‌ॽ॥’”


यर्मियाःल्‍ले़ चोगुबा पेलिगे़न् तुवा

16 “खे़न् प्‍याङ्‌सिगे़न् इक्‍ताप्‍पिन् इङ्‌मनाबा ते़म्‍सक् साप्‍लान् नेरियाहःल्‍ले़ कुस्‍सा बारुके़न् पिरुङ्‌ङाङ् आङ्‌गाॽ अक्‍खेलॽरिक् पेलिगे़न् तुवा चोगुङ्,

17 “मुक्‍साम्‍दाङ्‌बा यहवे दाङ्‌बाए, खे़ने़ॽ पयम् यम्‍बा के़मुक्‍साम्‍मिन् नु के़धुम्‍मिल्‍ले़ साङ्‌ग्राम्‍पेदाङ् हे़क्‍क्‍याङ् इक्‍सादिङ् खाम्‍बेःक्‍मान् नावागे़न् चइःत् के़ने़स्‍सु॥ खे़ने़ॽ के़लागि थे़मा पाःन्‍नाङ् के़साक्‍पा होप्॥

18 खे़ने़ॽ हे़न्‍छिङ् हे़न्‍छिङ्‌नुःल्‍ले़आङ् यरिक् मनाहाॽ चक्‍मे़ल्‍लॽए लुङ्‌माॽ के़दुक्‍तुसि कर पाधे़बाहाॽरे़ खुन्‍छिॽ लायोल्‍ले़ कुले़क्‌वा मनाहाॽ खुम्‍दिङ्‌ङाङ् के़बिरुसि॥ खे़ने़ॽ पयम् यम्‍बा नु मुक्‍साम्‍बा निङ्‌वाॽफुमाङ्‌ने़, खे़ने़ॽ मुक्‍साम्‍दाङ्‌बा यहवे दाङ्‌बाने़॥

19 खे़ने़ॽ सिक्‍कुम्‍दिङ् निङ्‌वाॽरे़ निलाम्‍हाॽ इत्‍छाप् के़जोगु हे़क्‍क्‍याङ् मुक्‍साम्‍बा याःम्‍बक्‍हाॽ के़जोगुॽ॥ मनाहाॽरे़ मे़जोगुबा के़रे़क् पाःन्‍हाॽ खे़ने़ॽ के़निसु खे़ब्‍याङ् खे़ङ्‌हाॽरे़ खुन्‍छिॽ याःम्‍बक् कुइसिक् खे़ङ्‌हाॽ थुम्‍घो के़बिरुसिॽ॥

20 यरिक् तङ्‌बे तगि खे़ने़ॽ मिस्रओ निङ्‌वाॽ के़माबा नु ने़हिनिङ्‌वाॽरे़ मे़न्‍धाप्‍मनाबा याःम्‍बक्‍हाॽ के़जोगु॥ आइन् थारिक् खे़ने़ॽ इस्राइल नु वेॽ के़रे़क् हाङ्‌जुम्‍लुम्‍मो निङ्‌वाॽ के़माबा याःम्‍बक्‍हाॽ के़जोगुर के़वाॽ हे़क्‍क्‍याङ् आल्‍ल खे़ने़ॽ के़रे़क् ते़न्‍नो कुसिङ् के़म्‍निःत्॥

21 “निङ्‌वाॽ के़माबा नु ने़हिनिङ्‌वाॽरे़ मे़न्‍धाप्‍मनाबा याःम्‍बक्‍लाम् आनिगे निङ्‌मिहाॽ किमा यङ्‌माओ के़धासुसिर खे़ने़ॽ के़मना इस्राइलबा मनाहाॽ आबाङे के़मुक्‍साम् नु के़धुम्‍मिल्‍ले़ मिस्रलाम् के़लःत्तुसिआङ् के़धाक्‍तुसि॥

22 खे़ने़ॽ खे़ङ्‌हाॽरे़ खुन्‍छिॽ पाधे़बाहाॽ पिने़निङ् फाॽआङ् माङ्‌हुप् के़जोगुबा कुइसिक् कन् पित्‍नु नु सक्‌वाघु के़गुङ्‌बा लाजेन् खे़ङ्‌हाॽ के़बिरुसि॥

23 खे़ङ्‌हाॽ कन् लाजेॽओ मे़द्‌ये़आङ् खे़ङ्‌हाॽरे़ कन् लाजेन् खुन्‍छिॽ युक्‍को मे़जोगु, कर खे़ने़ॽ के़इङ्‌जाङ्‌ङिन् खे़ङ्‌हाॽ इःप्‍मा नाःप्‍मा मे़न्‍दे़न्‍दे़न् खे़ब्‍याङ् याम्‍मो खे़ने़ॽ के़निसाम्‍मिन् हे़क्‍के खे़ङ्‌हाॽरे़ खुन्‍छिॽ थाःक् मे़न्‍धासुन्॥ खे़ने़ॽ इङ्‌जाङ् के़बिरुसिबा लत्‍छा पाःन्‍धिक्‍काङ् खे़ङ्‌हाॽरे़ मे़न्‍जोगुन्॥ खे़ल्‍ले़चोगुल्‍ले़ कन् के़रे़क् मे़क्‍मासिमे़न् खे़ने़ॽ खे़ङ्‌हाॽरे़ खुन्‍छिॽ सम्‍धाङ् के़दारु॥

24 “ओमे़त्ते़ॽ, ये़क्‌यक्‍किन् युक्‍मारे़ लागि बेबिलोनिहाॽरे़ खे़न् के़रे़क् पिसाङ् कप्‍मारे़ लागि चन्‍छिङ्‌मादे़न्‍हाॽ मे़जोगुआङ् वाॽ हे़क्‍क्‍याङ् खे़ॽयो थङ् मे़जोःक्‍ल मे़वाॽ॥ ते़न्‍धङ्, साक्‌वान् नु मिङ्‌देल्‍ले़ चोगुल्‍ले़ ये़क्‌यक्‍किन् खे़ङ्‌हाॽरे़ खुन्‍छिॽ हुक्‍को थाःॽ॥ खे़ने़ॽ के़बाःत्तुबा के़रे़क् पाःन्‍हाॽ के़त्‍ल पप्‍पा खे़ने़ॽ के़निसुर के़वाॽ॥

25 हे़क्‍केसाङ् मुक्‍साम्‍दाङ्‌बा यहवे दाङ्‌बाए, कन् ये़क्‌यक्‍किन् बेबिलोनबाहाॽरे़ खुन्‍छिॽ हुक्‍को थामा ये़म्‍मोए खे़ने़ॽ आङ्‌गाॽ के़निबा साखिहाॽरे़ खुन्‍छिॽ तगि खे़न् इक्‍ताप्‍पिन् युप्‍पाःल्‍ले़ इङ्‌मा इङ्‌जाङ् के़बिराङ्‌लो॥”


यरुसले़म ये़क्‌यक्‍किल्‍ले़ कुमे़क्‍मा माङ्‌निङ्‌वाॽपान्

26 खे़ब्‍याङ् यहवे दाङ्‌बे़ल्‍ले़ कुइङ्‌घङ्‌ङिन् यर्मिओ के़रे़,

27 “आङ्‌गाॽ यहवे दाङ्‌बान् के़रे़क् मे़न्‍छाम् याप्‍मिहाॽरे़ खुन्‍छिॽ निङ्‌वाॽफुमाङ्‌आ॥ थे आङ्‌गाॽ आलागि कुभा पान् के़साक्‍पा वाॽबि?

28 खे़ल्‍ले़चोगुल्‍ले़, यहवे दाङ्‌बे़ल्‍ले़ अक्‍खे पाःत्तुॽ, आङ्‌गाॽ कन् ये़क्‌यक्‍किन् बेबिलोनबा हाङ् नबुकदनेसर नु खे़ल्‍ले़ कुधक्‍सुबाहाॽरे़ खुन्‍छिॽ हुक्‍को थासुङ्‌ॽ॥ कन् लाजेन् खे़ङ्‌हाॽरे़ मे़दोगुआङ् मे़युक्‍तुॽ॥

29 हे़क्‍क्‍याङ् बेबिलोन्‍बाहाॽ लुङ्‌धाक् लाःक्‍कात् कब्रिङ् मे़ये़प्, खे़ङ्‌हाॽ मे़लाःत्ताङ् कन् ये़क्‌यक्‍किन् खा मि फुल्‍लुम् मे़याक्‍तुॽ॥ मनाहाॽरे़ खुन्‍छिॽ हिम्‍मोबा आःम्‍भोॽओ बाल साम्‍माङ्‌हाॽओ ससिङ् सुक्‍पा मे़हाःन्‍दु हे़क्‍क्‍याङ् वेॽ साम्‍माङ्‌हाॽओ सेजःङ्‌वा सिदुङ्‌जभा मे़दोन्‍दुआङ् आङ्‌गाॽ आसिक् मे़भोक्‍खुआङ् वये़॥ खे़ल्‍ले़चोगुल्‍ले़ खे़न् हिम्‍हाॽआङ् कन् ये़क्‌यक्‍किन्‍नु सोरिक् बेबिलोनबा थक्‍सुबाहाॽरे़ मिमे़धिक्‍खुआङ् खाप्‍पुथ्‍यःङ् मे़जोगु॥

30 इस्राइल नु यहुदाबा मनाहाॽरे़ आबाङे खुन्‍छिॽ साप्‍मुःन्‍धुम्‍मिन् कुहेःक्‍सिङ्‌माआङ्‌धोए आङ्‌गाॽ आनिङ्‌वाॽ मे़न्‍दामनाबा मे़जोगाङ्‌ङाङ् वाॽ हे़क्‍क्‍याङ् आबाङे खुन्‍छिॽ याःम्‍बक्‍लाम्‍बा आङ्‌गाॽ आसिक् मे़भोक्‍खुआङ् वाॽ॥

31 कन् ये़क्‌यक्‍किन् चुक्‍मा हेःक्‍ते़बा ये़न्‍नाङ्‌धोए आल्‍लो थारिक् कप्‍मो के़युङ्‌बाहाॽरे़ आङ्‌गाॽ आसिक् मे़भोक्‍खुआङ् वाॽ हे़क्‍क्‍याङ् आङ्‌गाॽ साॽरिक् आसाक्‍के़न् मे़भोक्‍खुआङ् वाॽ॥ आङ्‌गाॽ कन् ये़क्‌यक्‍किन् मे़ङ्‌मा निःन्‍धो चोगुङ्‌ङाङ् वाॽ॥

32 “इस्राइल नु यहुदाबा मनाहाॽ, खे़ङ्‌हाॽरे़ खुन्‍छिॽ हाङ्‌हाॽ, लाम्‍लोबाहाॽ, निङ्‌वाॽफुसाम्‍बाहाॽ हे़क्‍क्‍याङ् माङ्‌निङ्‌वाॽपान् के़बाःप्‍पा के़रे़क्‍ले़ काक् फे़न्‌याःम्‍बक्‍हाॽ मे़जोगुआङ् आङ्‌गाॽ आसिक् मे़भोक्‍खुआङ् वाॽ॥

33 खे़ङ्‌हाॽरे़ आङ्‌गाॽ ले़प्‍माङ् खुन्‍छिॽ एःक्‍थाःक्‍मे़न् मे़हिसुआङ् आङ्‌गाॽओ नुःङ्‌मादामा मे़न्‍दे़न्‍ने़न्॥ खे़ङ्‌हाॽ ए़त्‍ले़ङ् निसाम् हुॽरुङ्‌सिङ्‌साङ् खे़ङ्‌हाॽरे़ खे़न् मे़ङ्‌घे़प्‍सुन् हे़क्‍क्‍याङ् खे़म्‍मा मे़न्‍दे़न्‍दे़न्॥

34 आङ्‌गाॽ आमिङ्‌ङिन् मिङ्‌सो इङ्‌धाङ् पिमारे़ लागि चोःक्‍मनाबा माङ्‌हिम्‍मोआङ् खे़ङ्‌हाॽरे़ खुन्‍छिॽ याम्‍गे़सिङ्‌बा नावाइत्‍लाहाॽ मे़युक्‍खुसि हे़क्‍क्‍याङ् अक्‍खेलॽरिक् माङ्‌हिम्‍मिन् आसुत्‍थो मे़जोगु॥

35 खे़ङ्‌हाॽरे़ आबाङे खुन्‍छिॽ साहाॽ मोलोख साम्‍माङ्‌ङिल्‍ले़ कुदगि वयागे़न् सिदुङ्‌जभा तोःम्‍मासि फाॽआङ् बेन-हिन्‍नोमबा ने़ने़बादे़न्‍नो बाल साम्‍माङ्‌ङिल्‍ले़ कुलागि से़वा चोःक्‍मादे़न्‍हाॽ मे़जोगुआङ् युङ्॥ खे़ङ्‌हाॽ खे़न् चोःक्‍मा इङ्‌जाङ् मे़बिरुङ्‌सिङ्‌ङिन्॥ खे़ङ्‌हाॽरे़ हे़क्‍तङ्‌बा ताप्‍फे़ःम्‍बा याःम्‍बक् मे़जोगु हे़क्‍क्‍याङ् यहुदाबा मनाहाॽ लायो चोःक्‍मा मे़बाङ्‌घुसि के़लॽबा पाःन्‍निन् आङ्‌गाॽ आनिङ्‌वाॽओ आभे़ल्‍ले़आङ् त्‍ये़बा होःप्‍ते़रो॥”


निङ्‌साङ् चोःक्‍मनाबा माङ्‌हुप्

36 यहवे दाङ्‌बा इस्राइबा निङ्‌वाॽफुमाङ्‌ङिल्‍ले़ यर्मियान् अक्‍खे मे़त्तुॽ, “यर्मियाए, ते़न्‍धङ्, साक्‌वान् नु मिङ्‌देल्‍ले़ चोगुल्‍ले़ कन् ये़क्‌यक्‍किन् बेबिलोनबा हाङ्‌ङिल्‍ले़ कुहुक्‍को थाःॽ फाॽआङ् मनाहाॽरे़ मे़बाःत्तुर मे़वाॽ॥ आल्‍ल आङ्‌गाॽ कन्‍नुःल्‍ले़आङ् यरिक् पाःप्‍मा के़बोङ्‌बा पान् वाॽ, खे़न् खे़प्‍से़ॽ॥

37 आङ्‌गाॽ आसिक् पोःक्‍मो नु साॽरिक् आसाक्‍के़न् पोःक्‍मो के़रे़क् पिसाङ् मनाहाॽ से़सुङ्‌देसुङ्‌सिङ्, कर आल्‍ल खे़न् लाजेॽहाॽलाम्‍बा याम्‍मो कन् ते़न्‍नो नुःक्‍तुङ् तारुङ्‌सिङ्‌ॽ हे़क्‍क्‍याङ् कॽयो नुरिक् तारिक्‍काङ् वाॽमा पाङ्‌घुङ्‌सिङ्‌ॽ॥

38 हे़क्‍क्‍याङ् खे़ङ्‌हाॽ याम्‍मो आङ्‌गाॽ आमना मे़बोङ् हे़क्‍क्‍याङ् आङ्‌गाॽ याम्‍मो खे़ङ्‌हाॽरे़ खुन्‍छिॽ निङ्‌वाॽफुमाङ् पोङ्‌ङा॥

39 के़रे़क् ये़म्‍मो खे़ङ्‌हाॽरे़ आङ्‌गाॽ मिङ्‌सो इङ्‌धाङ् पिमारे़ लागि आङ्‌गाॽ खे़ङ्‌हाॽ लत्‍छा निङ्‌सेक् नु लत्‍छा निङ्‌वाॽ पिरुङ्‌सिङ्, अक्‍खेलॽरिक् खे़ङ्‌हाॽ आबाङे नु ताःन्‍दि के़दाबा खुन्‍छिॽ मुॽइदाङ्‌साहाॽरे़ लागि नुबा पोङ्‌ॽ॥

40 आङ्‌गाॽ खे़ङ्‌हाॽनु आभे़ल्‍ले़आङ् मे़न्‍नुप्‍मनाबा लत्‍छा माङ्‌हुप् चोगुङ्‌ॽ॥ खे़ङ्‌हाॽरे़ खुन्‍छिॽ लागि नुॽमादामा के़बोङ्‌बा याःम्‍बक् चोःक्‍मा आङ्‌गाॽ आफाल्‍ले़आङ् मे़ले़रुङ्‌ङिन् हे़क्‍क्‍याङ् आबाङे खुन्‍छिॽ के़रे़क् सिक्‍लुङ्‌माल्‍ले़ आङ्‌गाॽ याप्‍मि इङ्‌धाङ् के़बिबा खे़ङ्‌हाॽ चोगुङ्‌सिङ्‌ॽ खे़ब्‍याङ् खे़ङ्‌हाॽ आफाल्‍ले़आङ् आङ्‌गाॽलाम्‍बा मे़न्‍इःम्‍सिङ् मे़म्‍बेःक्‍ने़न्॥

41 खे़ङ्‌हाॽरे़ खुन्‍छिॽ लागि नुॽमादामा चोगुङ्‌बा याःम्‍बक्‍को आङ्‌गाॽ आनिङ्‌वाॽ ताःॽ हे़क्‍क्‍याङ् के़रे़क् आनिङ्‌वाःल्‍ले़ आङ्‌गाॽ खे़ङ्‌हाॽ कन् लाजेॽओ सदादिङ्‌ले़ लागि युक्‍खुङ्‌सिङ्‌ॽ॥

42 “यहवे दाङ्‌बे़ल्‍ले़ अक्‍खे पाःत्तुॽ, आङ्‌गाॽ आक्‍खेलॽरिक् कम्‍भदाङ्‌बा ये़त्तुक्‍खेन् कन् मनाहाॽ सम्‍धाङ् तारुङ्, हे़क्‍केलॽरिक्‍के आङ्‌गाॽ आबाङे माङ्‌हुप् चोगुङ्‌बा के़रे़क् नुबा पाःन्‍हाॽ कन् मनाहाॽ पिरुङ्‌सिङ्‌ॽ॥

43 कन् लाजेॽओ याम्‍मो लाजेॽ सिङ्‌बुङ्‌हाॽ इङ्‌मा पोङ्‌ॽ, खे़ल्‍ले़ कुयाःम्‍बेओ आल्‍लो खिनिॽ अक्‍खे के़बाःत्तुम्‌ॽ, ‘कङ्‌ग मना नु थक्‍सा थेआङ् मे़न्‌वाॽमनाबा मुरे़क् खारे़क्‍पा ये़ःङ्‌घादे़न् चोक्, थेआङ्‌भे़ल्‍ले़ कन् बेबिलोनबाहाॽरे़ खुन्‍छिॽ हुक्‍को चुक्‍ते़आङ् ने़ःॽ॥’

44 मनाहाॽरे़ खे़न् खे़प्‍मो लाजेॽसिङ्‌बुङ् मे़इङु, सङ्‌मा नु इङ्‌मा ते़म्‍सक् साप्‍लाओ युक्‍छाप् मे़युक्‍तुॽ, एःप्‍साप् मे़एःप्‍तुॽ हे़क्‍क्‍याङ् के़निबा साखिहाॽरे़ युक्‍छाप् मे़युक्‍तुॽ॥ बेन्‍यामिन्‍ले़ कुदे़ःङ्‌गप्‍पो, यरुसले़ःम्‍बा के़रे़क् पिसाङ्‌बा चुक्‍सा पाङ्‌भेॽहाॽओ, यहुदाबा ये़क्‌यक्‍हाॽओ, कोःक्‍मा लाजेॽबा ये़क्‌यक्‍हाॽओ, उःक्‍चम्‍जम्‍बादे़न्‍हाॽओ नु यो लाङ्‌गे़त् यहुदाओ कन् याःम्‍बक्‍किन् पोङ्‌ॽ॥ मनाहाॽ आङ्‌गाॽ खे़ङ्‌हाॽरे़ खुन्‍छिॽ लाजेॽओ नुःक्‍तुङ् तारुङ्‌सिङ्॥ आङ्‌गाॽ यहवे दाङ्‌बे़ल्‍ले़ कन् पाःत्तुङ्‌ङाङ् वाॽरो॥”

© 2009, 2023, Wycliffe Bible Translators, Inc. All rights reserved.

Wycliffe Bible Translators, Inc.
Swiv nou:



Piblisite