यर्मिया 31 - लिम्बुइस्राइलिहाॽ आबाङे खुन्छिॽ लाजेॽओ मे़नुःङ् 1 यहवे दाङ्बे़ल्ले़ पाःत्तुॽ, “खे़न् ये़म्मिन् तार पत्, हे़क्क्याङ् आङ्गाॽ याम्मो इस्राइलबा के़रे़क् सुवाङ्हाॽरे़ खुन्छिॽ निङ्वाॽफुमाङ् पोङ्ङा हे़क्क्याङ् खे़ङ्हाॽ याम्मो आङ्गाॽ आमना मे़बोङ्ॽ॥” 2 यहवे दाङ्बे़ल्ले़ अक्खे पाःत्तुरो, “मुरे़क् खारे़क् थेआङ् के़होःप्पादे़न्नोआङ् थङ्ङोलाम् के़दाङ्बाहाॽरे़ मुॽइसाम् मे़घोसुरो॥ आङ्गाॽ इस्राइलबा मनाहाॽरे़ नाःम्सिङ्मा मे़घोसुर फाॽआङ् ताआरो॥ 3 “आङ्गाॽ माःङ्घालाम्बा त्याङ्लो हे़क्क्याङ् खे़ङ्हाॽओ थाःन्छिङ्ङाङ्लो॥ इस्राइलिसे, खिनिॽ सदादिङ् मिःम्जि मे़त्निङ्ङाङ् वाॽआरो हे़क्क्याङ् नुप्मे़न्दिङ् लुङ्माॽ तुक्निङ्लो खे़ब्याङ् आङ्गाॽ ले़प्माङ् ताःत्निङ्लो॥ 4 हे़क्क्याङ् सिसागे़न् मे़न्छिन् इस्राइलए, आङ्गाॽ खे़ने़ॽ के़मनाहाॽ याम्मो चोगुङ्सिङ्लो॥ खे़ङ्हाॽ याम्मो थिक्ले़ङ् खित्छिङ्छिङ्बा ताहिप्पिन् मे़याङ्सिङ्लो खे़ब्याङ् खे़न् मे़हिम्तुर मे़सःत्ताङ् मे़लाःङ्लो॥ 5 याम्मो थिक्ले़ङ् खिनिॽ सामरियाओबा कोःक्माहाॽओ चे़ल्ले़क्सेॽ इक्ताप्हाॽ के़गेःत्तुम्लो हे़क्क्याङ् आबाङे चे़ल्ले़क्सेॽ इक्ताप्पो के़धोःक्पा कुजान् खिनिॽ के़जाम्लो॥ 6 ओरो, अक्तङ्बा ये़म्मिन् तार पत्लो, हे़क्क्याङ् एफ्राइमबा कोःक्मा फाङ्जङ्हाॽओ इक्के़गोबाहाॽरे़ अक्खे मे़बाःत्तुबा इक्लान् खे़म्दे़त्लो, ‘सियोःन्नो थो आनिॽ यहवे दाङ्बा निङ्वाॽफुमाङ्ङो पेगिरो॥’” 7 यहवे दाङ्बे़ल्ले़ अक्खे पाःत्तुॽ, “मे़न्छाम् सुवाङ्हाॽओ के़रे़क्नुःल्ले़ यम्बा इस्राइल सुवाङ्ले़ लागि सःप्मा से़वासाम्लोन् साम्मे़त्ते़म्मे़ॽओ॥ खिनिॽ अक्खेलॽरिक् आबाङे नाराफोमा से़वासाम्लोन् साम्मे़त्ते़म्मे़ॽओ, ‘यहवे दाङ्बाए, इस्राइलबा के़हिङ्बा के़याःक्पा खे़ने़ॽ के़मनाहाॽ ताङ्से़ःप्ते़से़ॽओ॥’ 8 आङ्गाॽ खे़ङ्हाॽ थाङ्गे़त्लाम् युरुङ्सिङ्लो हे़क्क्याङ् इक्सादिङ् खाम्बेःक्माल्ले़ वेॽसमा कुयाओलाम्बा सुप्सुङ्सिङ्लो॥ खे़ङ्हाॽरे़ खुन्छिॽ लुम्मो मिक्फःम्बा नु लाङ्सक्पा, हे़क्क्याङ् मे़न्छुक्मा के़वाॽमा नु सागप्मा यारिप् के़बोङ्माहाॽआङ् मे़वाॽरो॥ लत्छा यम्बा चुम्भो मे़बोङ्ङाङ् खे़ङ्हाॽ मे़नुःङ् मे़दारो॥ 9 आङ्गाॽ आमनाहाॽ नुःक्तुङ् तारुङ्सिङ्ङिल्ले़ मे़हाःप्लो हे़क्क्याङ् पेलिगे़न् तुवा चोःक्नु मे़नुःङ् मे़दारो॥ आङ्गाॽ मनाहाॽ वहःङ् यङ्घङ्लाम्बा लाम् तोःन्दुङ्सिङ्लो, आघघबा के़होप्पा के़दङ्बा लाम्मो लाङ्घेःक्खुङ्सिङ्लो॥ आङ्गाॽ इस्राइलिहाॽरे़ लागि खुन्छिॽ पानुदिङ् पाआरो खे़ब्याङ् एफ्राइम्मिन् आङ्गाॽ आस्सा तुम्बारो॥ 10 “मे़न्छाम् सुवाङ्से, यहवे दाङ्बे़ल्ले़ कुइङ्घङ्ङिन् खे़प्से़म्मे़ॽओ हे़क्क्याङ् माःङ्घा माःङ्घा वरःङ्ङिल्ले़ कुयाओ थारिक्पा आङ्गाॽ आबाःन्जाक्किन् साॽरिक् इङ्भन् चोगे़म्मे़ॽओ॥ आङ्गाॽ आमनाहाॽ फुत्छिङ्ज्याःङ् से़सुङ्सिङ्लो कर आङ्गाॽ खे़ङ्हाॽ सुप्सुङ्सिङ्लो हे़क्क्याङ् पित्कम्बाहाॽरे़ पित्हाॽ कम्ब्राङ् मे़मे़त्तुसिबा हे़क्के खे़ङ्हाॽ कम्ब्राङ् मे़त्तुङ्सिङ्लो॥ 11 आङ्गाॽ इस्राइलबा मनाहाॽ से़न्लप् पिरुङ्सिङ्ङाङ् वाॽरो हे़क्क्याङ् लत्छा मुक्साम्साबा सुवाङ्ङिल्ले़ कुहुक्कोलाम् आङ्गाॽ खे़ङ्हाॽ ताङ्घुङ्सिङ्ङाङ् वाॽरो॥ 12 खे़ङ्हाॽ मे़दाआङ् मे़सःत्ल सियोन कोःक्माओ से़वासाम्लोन् साम्मे़मे़त्तुरो यहवे दाङ्बे़ल्ले़ पिरुसिबा यरिक् पर्धाःम्मिल्ले़ खे़ङ्हाॽ मे़सःत्लो— कुजा, कुबोक् चे़ल्ले़क्सेॽ थि, चैतुन निःङ्गेॽ, मे़ल्लुक् नु पित्हाॽ मे़घोसुसिरो खे़ल्ले़चोगुल्ले़ खे़ङ्हाॽरे़ खुन्छिॽ निङ्वाॽ पदादारो॥ खे़ङ्हाॽ नुरिक्काङ् योरुर च्वाःत्तिल्ले़ वागे़रक्पा इक्ताप् हे़क्तङ्बा मे़बोङ्लो हे़क्क्याङ् खे़ङ्हाॽ आप्फाल्ले़आङ् कुहोःप्मा कुसाक्मो मे़न्धाने़न्लो॥ 13 हे़क्क्याङ् मे़न्छ्याहाॽ मे़सःत्ताङ् मे़लाःङ्लो, थाङ्बे़न् नु तुम्भाक्साहाॽरे़ खुन्छिॽ निङ्वाॽ तारो॥ खे़ङ्हाॽरे़ खुन्छिॽ मे़रिङ्ङिन् हाङ्हाङ् लॽमो ले़क्खुङ् पिरुङ्सिङ्लो॥ आङ्गाॽ खे़ङ्हाॽ आःन्छिङ्मा पिरुङ्सिङ्लो खे़ब्याङ् खे़ङ्हाॽ खुन्छिॽ निङ्वाॽ तुक्खे चामारे़ कुले़क्वाओ आङ्गाॽ खे़ङ्हाॽ मे़सःत्ल याःन्दुङ्सिङ्लो॥ 14 निङ्वाॽफुसाम्बाहाॽ साॽरिक् कुजागे़नुॽबा कुजान् खुन्छिॽ खाघा चाःत्तुङ्सिङ्लो हे़क्क्याङ् आमनाहाॽ के़रे़क् नुबा पाःन्हाॽ पिरुङ्सिङ्लो॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥” इस्राइलिहाॽ यहवे दाङ्बे़ल्ले़ लुङ्माॽ तुक्तुसि 15 यहवे दाङ्बे़ल्ले़ अक्खे पाःत्तुरो, “रामाओ लत्छा इक्लाधिक् खे़म्दे़त्ते़रो, उःक्काङ् उःक् मे़रिङ् के़धक्पा इक्लान् खे़म्दे़त्ते़रो॥ राहेल्ले़न् कुस्साहाॽरे़ लागि हाःप्लो, खे़न् चिजि ये़म्ये़म् पोङ्मा मे़दे़न्ने़ल्लो थेआङ्भे़ल्ले़ खे़न् हिन्जाॽहाॽ आत्तिन्हाॽआङ् मे़न्हिङे़न्लो॥ 16 “यहवे दाङ्बे़ल्ले़ अक्खे पाःत्तुरो, ‘मे़हाबे़म्मिन्ने़ॽ, मिक्वान् तुगे़म्मे़ॽओ॥ खिनिॽ आबाङे मुॽइदाङ्साहाॽरे़ लागि यरिक् याःम्बक् के़जोगुम्माङ् वाॽरो खे़ल्ले़ लागि थुम्घो के़घोसुम्लो, खे़ङ्हाॽ निङ्मिहाॽरे़ खुन्छिॽ लाजेॽलाम्बा मे़नुःङ् मे़दारो॥ 17 के़दाबा ये़न्ले़ लागि खिनिॽ निङ्साङ् चोःक्मा लाम् वाॽरो॥ खिनिॽ हिन्जाॽबित्छाॽहाॽ हिम्मो मे़नुःङ् मे़दारो॥’ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥ 18 “एफ्राइमे़ल्ले़ कुदुक्खेओ अक्खे पाःत्तुबा खे़प्सुङ्लो, ‘यहवे दाङ्बाए मे़ङ्घुम्मे के़वाॽबा पित्सात् हे़क्तङ्बा वयाङ्लो कर आल्लो खे़ने़ॽ इङ्जाङ् इःप्मा नाःप्मा के़हुॽराङ्लो॥ आङ्गाॽ नुःक्ताङ् ताराङ्ङ़ेॽओ, यहवे दाङ्बा आनिङ्वाॽफुमाङ्ङे आङ्गाॽ नुःङ्मा तामा यारिप् वाॽआरो॥ 19 खे़ने़ॽलाम्बा माःङ्घा इःम्सिङ् पेगाङ्ङाङ् वयाङ्लो कर हाराए खे़ने़ॽओए नुःङ्मा तामा निङ्वाॽ चोगुङ्लो॥ खे़ने़ॽ आङ्गाॽ खुम्दिङ् के़बिराङ्लो हे़क्क्याङ् आये़त्तुक्खेओ आधेगेःक्किन् थुःक्खुङ्लो॥ आङ्गाॽग सिरिङ्ममो नु चाःत्थि पेःक्मो थ्याङ्लो थेआङ्भे़ल्ले़ थाङ्बे़न् वयाङ्ङिल्ले़ लायो चोगुङ्ङाङ् वयाङ्लो॥’ 20 “एफ्राइमे़न्, के़रे़क्नुःल्ले़ लुङ्माॽ तुक्तुङ्बा आस्सारो, के़रे़क्नुःल्ले़ यरिक् आलुङ्माॽ स्याःत् के़लॽबा आस्सारो कुदक्ले़ङ्वाओ पाःत्तासाङ् मिःम्जिनु निङ्वाॽ इःत्तुङ्लो॥ खुने़ॽ कुलागि आलुङ्माॽ फ्याःङ्भ्याःङ् लॽरो, कुत्चाॽए आङ्गाॽ खुने़ॽ लुङ्माॽ तुक्तुङ्लो॥ आङ्गाॽ यहवे दाङ्बे़ल्ले़ पाःत्तुङ्लो॥ 21 लाम्मो मिक्सेःन्हाॽ फत्छे़ॽओ हे़क्क्याङ् लाम् ओःन्गे़धाक्पा मिक्पेॽ युक्खे़ॽओ, निङ्वाॽ याक्मारे़ लागि माराम्हाॽ मिक्सेन् मे़त्ते़ॽओ खे़ने़ॽ के़बेबा लाम्मो नुःक्खे़ त्ये़ॽओ॥ सिसागे़न् मे़न्छ्या इस्राइलए, खे़ने़ॽ नुःक्खे़ त्ये़ॽओ खे़ने़ॽ के़ले़रुबा आबाङे ये़क्यक्को नुःक्खे़ त्ये़ॽओ॥ 22 “कुनसान् के़होःप्मा आस्साए, खे़ने़ॽ आप्फाल्ले़ थारिक् के़निङ्वाॽ पङ्बाबे? मे़न्छुमाःल्ले़ ये़म्बित्छान् ताङ्से़ःप्तुबान् वेॽ परिक्पा चोःक्पा हे़क्के कुसङ् नु वेॽ परिक्पा पान् नावागे़न् चइःत् चोगुङ्ङाङ् वाॽरो॥” के़दाबा ये़म्मो निङ्वाॽफुमाङ्ङिल्ले़ कुमनाहाॽ मे़नुॽ मे़दाःॽ 23 इस्राइलबा निङ्वाॽफुमाङ् मुक्साम्दाङ्बा यहवे दाङ्बे़ल्ले़ पाःत्तुॽ, “आङ्गाॽ आमनाहाॽ खुन्छिॽ आबाङे लाजेॽओ नुःक्तुङ् तारुङ्सिङ्, हे़क्केःल्ले़ यहुदा लाजेॽ नु खे़ॽयोबा ये़क्यक्हाॽओ याम्मो थिक्ले़ङ् खे़ङ्हाॽरे़ अक्खे मे़बाःत्तुॽ, ‘यरुसले़ःम्बा सेसे कोःक्माए, साम्योबा के़वाॽबादे़न्ने यहवे दाङ्बे़ल्ले़ हाङ्वागे़न् मुॽइसाम् के़बिररो॥’ 24 यहुदा नु खे़ॽयोबा ये़क्यक्हाॽओ मनाहाॽ सोरिक् मे़युङ् खे़ब्याङ् खे़प्मो याःन्गे़मबाहाॽ हे़क्क्याङ् खुन्छिॽ थक्सालुप्हाॽनु सोरिक् ताक्के़गम्बा मे़ल्लुक्कम्बाहाॽ मे़वाॽ॥ 25 आङ्गाॽ के़नाबाहाॽ याम्मो खुन्छिॽ सक्मा के़त्तुङ् पिरुङ्सिङ् हे़क्क्याङ् साक्किल्ले़ मे़न्धुम्मना के़बोङ्बाहाॽ कुजाःल्ले़ खाःत्तुङ्सिङ्॥” 26 खे़न् एगाङ्, आङ्गाॽ सोराङ्ङाङ् ओमयाङ् हे़क्क्याङ् आङ्गाॽ आमिक्युमे़न् कुजा के़नुॽबा चोगे़॥ 27 यहवे दाङ्बे़ल्ले़ पाःत्तुॽ, “ओमे़त्ते़म्मे़ॽ, खे़न् ये़न्निन् तार पत्, आङ्गाॽ इस्राइल नु यहुदा लाजेन् मनाहाॽ नु थक्साहाॽरे़ सधे़क् मे़धिम्सुर चोगुङ्॥ 28 हे़क्क्याङ् आइन् खे़ने़ॽ यरिक् मे़न्छाम् सुवाङ्हाॽ नु हाङ्जुम्हाॽओ के़युङ्बाहाॽ आःङ्मासि, सोःम्मासि, मे़ङ्मासि इग्र लाप्फेमासि, फोङ्मासि नु युक्सिङ् चोःक्मासि मुरा मे़त्ने़,” यहवे दाङ्बे़ल्ले़ पाःत्तुॽ॥ 29 हे़क्क्याङ् खे़न् ये़न्निन् ताःल्ले़ मनाहाॽरे़ याम्मो आप्फाल्ले़आङ् अक्खे मे़म्बाःत्तुन्, “‘पामारे़ के़सुःप्पा चे़ल्ले़क्सेःन् मे़जरो, कर साहाॽरे़ खुन्छिॽ हाबोॽहाॽ पया यासिरो॥’ 30 “खे़ल्ले़ कुले़क्वाओ, आत्तिल्ले़ के़सुःप्पा चे़ल्ले़क्सेःन् चःॽ, खे़ल्ले़ए कुहाबोॽबान् याःॽ हे़क्क्याङ् के़रे़क् मनाहाॽ आबाङे लायोल्ले़ चोगुल्ले़ आबाङे मे़सिःॽ॥” 31 यहवे दाङ्बे़ल्ले़ अक्खे पाःत्तुरो, “खे़न् ये़न्निन् तार पत्लो, इस्राइल हे़क्क्याङ् यहुदाबा मनाहाॽनु आङ्गाॽ लत्छा कुसङ् माङ्हुप् चोगुङ्लो, 32 खे़ङ्हाॽरे़ खुन्छिॽ पाधे़बाहाॽनु आङ्गाॽ चोगुङ्बा माङ्हुप् हे़क्तङ्बा खे़न् मे़बोङ्ने़न्लो मिस्रलाम् लःत्तुङ् फे़त्तुङ्सिङ्ङिल्ले़ खे़ङ्हाॽ खुन्छिॽ हुक्को ते़म्सुङ् फे़त्तुङ्सिङ्लो॥ आङ्गाॽ खे़ङ्हाॽरे़ खुन्छिॽ हिम्दाङ्बा कुइसिक् वयाङ्लो हे़क्केसाङ् खे़ङ्हाॽरे़ खे़न् माङ्हुप्पिन् मे़भेःन्दुरो,” यहवे दाङ्बे़ल्ले़ पाःत्तुरो॥ 33 “इस्राइलबा आमनाहाॽनु चोःक्मा इःत्तुङ्बा कुसङ् माङ्हुप्पिन् अक्तङ्बा पोङ्लो” यहवे दाङ्बे़ल्ले़ पाःत्तुरो “खे़ङ्हाॽरे़ खुन्छिॽ निङ्वाॽओ आसाम्योथिम् इङ्जाङ्ङिन् युक्खुङ् पिरुङ्सिङ्लो हे़क्क्याङ् खुन्छिॽ सिक्लुङ्मो साप्तुङ् पिरुङ्सिङ्लो॥ खे़ङ्हाॽरे़ खुन्छिॽ निङ्वाॽफुमाङ् पोङ्ङारो खे़ब्याङ् खे़ङ्हाॽ आमना मे़बोङ्लो॥ 34 खे़ङ्हाॽरे़ खुन्छिॽ हिम्बेसाङ्बाहाॽ इग्र फुॽनुसाॽहाॽ यहवे दाङ्बान् कुसिङ् निःप्मारे़ लागि आत्तिन्हाॽआङ् हुॽमासि मे़बोङ्ने़न्लो थेआङ्भे़ल्ले़ यम्बा चुक्पा के़रे़क्ले़ कुसिङ् मे़निःत्तारो॥ खे़ङ्हाॽ खुन्छिॽ फे़न्याःम्बक्लाम् ले़प्मि पिरुङ्सिङ्लो हे़क्क्याङ् खुन्छिॽ लायोहाॽ आफाल्ले़आङ् निङ्वाॽ मे़इःत्तान्लो॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥” 35 यहवे दाङ्बे़ल्ले़ नाम्मिन् ले़न्दिक् से़दिङ्दिङ् ओःप्मा पाङ्घुरो हे़क्क्याङ् से़न्दिक् लाबान् नु खेःम्सिक्पाहाॽ मे़ओःत्ल याःन्दुसिरो॥ खुने़ॽ तुङ्गोदिङ् वरःङ्ङिन् छिम्लिङ् छिम्लिङ् मुन्दुरो हे़क्क्याङ् खे़ॽयोबा वाभे़ल्ले़ङ्हाॽ हुःक्मा पाङ्घुरो॥ खुने़ॽ कुमिङ्ङिन् मुक्साम्दाङ्बा यहवे दाङ्बारो, हे़क्क्याङ् खुने़ॽ अक्खे पाःत्तुरो, 36 “कन् इङ्जाङ्हाॽ पिमासि आभे़ल्ले़आङ् निङ्वाॽ मे़भेःनान्लो हे़क्क्याङ् इस्राइले़न् सुवाङ् मे़बोङ्ने़ल्ल चोःक्मा मे़भाःक्कान्लो आङ्गाॽ, यहवे दाङ्बे़ल्ले़ पाःत्तुङ्ङाङ् वाॽरो॥ 37 खे़ने़ॽ तरःङ्गे़न् ताङ्साङ्बे़न् सिःक्मा के़सुक्तुने़भग्र हे़क्क्याङ् खाम्बेःक्माल्ले़ कुयुक्नान् कोःम्भो चोःक्मा के़सुक्तुने़भग्ररक् लायो मे़जोगुबाल्ले़ चोगुल्ले़ इस्राइलिहाॽ सदादिङ्ले़ लागि लाप्फुसुङ्सिङ्लो, आङ्गाॽ, यहवे दाङ्बे़ल्ले़ पाःत्तुङ्ङाङ् वाॽरो॥” 38 यहवे दाङ्बे़ल्ले़ अक्खे पाःत्तुआङ् वाॽ, “खे़न् ये़म्मिन् तार पत्, हननेलरे़ कुजङ्हिम्मोलाम् कुसुक्पोबा ताःक्हन् थारिक् के़रे़क् यरुसले़ःम्मिन् आङ्गाॽ आलागि ये़क्यक् याम्मो मे़जोगुॽ॥ 39 हे़क्क्याङ् खे़ल्ले़ कुइःन्दोहाॽ खे़प्मोलाम् वेॽ नाम्धा पिसाङ् गारेब कोःक्माओ थारिक् के़त् खे़ब्याङ् खे़प्मोलाम् याम्मो हिआङ् गोआ थे़म्बा पेक्॥ 40 चेहाॽ लुप्मा नु ताम्जि लाप्फुमा काक् ने़ने़बादे़न् हे़क्क्याङ् नाङ्गे़न् पिसाङ्बा किद्रोन पाक्लुम्लुम्बादे़न् थारिक्पा के़रे़क् इक्ताप्हाॽ नु अन् लाम्धेःप्पाल्ले़ कुसुक्पो थारिक् आङ्गाॽ यहवे दाङ्बे़ल्ले़ लागि सेसेबा पोङ्ॽ, खे़ब्याङ् खे़न् ये़क्यक्किन् याम्मो आभे़ल्ले़आङ् हाॽयाक् मे़न्आःक्खुन् इग्र मे़न्यन्छुन्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.