यर्मिया 30 - लिम्बुयहवे दाङ्बे़ल्ले़ मनाहाॽ चोःक्युम्भो पिमासि माङ्हुप् चोगु 1 यहवे दाङ्बालाम् यर्मियाओ अक्तङ्बा इङ्घङ् के़रे़, 2 “यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, खे़ने़ॽ मे़त्ने़बा के़रे़क् पाःन्हाॽ लत्छा साप्लाथःङ्मो साप्ते़ॽ॥ 3 थेआङ्भे़ल्ले़ अक्तङ्बा ये़म् तार पत्, हे़क्क्याङ् आङ्गाॽ आमना इस्राइले़न् नु यहुदान् मे़दे़म्सु मे़देॽरुसिबालाम् नुःक्तुङ् फे़त्तुङ्सिङ्ॽ॥ खे़ङ्हाॽरे़ खुन्छिॽ पाधे़बाहाॽ पिरुङ्सिङ्बा खुन्छिॽ लाजेॽओ आङ्गाॽ खे़ङ्हाॽ नुःक्तुङ्सिङ्ङाङ् फे़त्तुङ्सिङ् खे़ब्याङ् याम्मो खे़ङ्हाॽरे़ खे़न् लाजेन् हुक्काप् मे़जोगुॽ॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽ॥” 4 इस्राइल नु यहुदाबा मनाहाॽ यहवे दाङ्बे़ल्ले़ अक्खे मे़त्तुसिरो, 5 “आङ्गाॽ के़गिबाहाॽरे़ खुन्छिॽ इक्लान् नु किमा यङ्माओ के़धाबाहाॽ मे़हाःप्पा खे़प्सुङ्लो, कर चिजि ये़म्ये़म्बा सनारुङ्ङिल्ले़न् मेःन्लो॥ 6 हाङ्घे़म्मे़ॽ हे़क्क्याङ् निङ्वाॽ इःत्ते़म्मे़ॽओ! आत्तिन् ये़म्बित्छासाःल्ले़ सागप्मा सुक्तुबे? हे़क्केःल्ले़ सादुङ्ङिल्ले़ तरुमा मे़न्छुमान् कुइसिक् थेआङ् के़रे़क् ये़म्बित्छाहाॽरे़ खुन्छिॽ हुक्किल्ले़ साप्पोःक्किन् मे़दे़म्सुबा आङ्गाॽ निसुङ्बे? थेआङ् के़रे़क्ले़ खुन्छिॽ नारान् अम् के़लॽबा पोःक्खे़आङ् वाॽबाबे? 7 आयाक्को! लत्छा किप्मागे़घुबा ये़न्धिक् तार पत्लो, हे़क्तङ्बा वेॽ ये़न् आभे़ल्ले़आङ् मे़बोङ्ने़ल्लो॥ आमना इस्राइलिहाॽरे़ लागि खे़न् लत्छा ये़त्तुक्खेबा ये़न् पोङ्लो कर खे़ङ्हाॽ खे़न्लाम्बा मे़दाङ्लो॥” 8 मुक्साम्दाङ्बा यहवे दाङ्बे़ल्ले़ पाःत्तुरो, “हे़क्क्याङ् खे़न् ये़न्निन् ताःल्ले़ खे़न् खे़ःप्सिङ्ङिन् खे़ङ्हाॽरे़ खुन्छिॽ सित्लाओलाम् ए़क्खुङ् पिरुङ्सिङ्लो, खे़ब्याङ् खे़ङ्हाॽरे़ खुन्छिॽ इघेःङ्ङिन् फे़न्दुङ् पिरुङ्सिङ्लो॥ खे़ङ्हाॽ आफाल्ले़आङ् याम्मो वेॽ लाजेॽबाहाॽरे़ खुन्छिॽ योक् मे़म्बोङ्ने़न्लो॥ 9 कर खे़ल्ले़ कुले़क्वा खे़ङ्हाॽरे़ आङ्गाॽ यहवे दाङ्बा खुन्छिॽ निङ्वाॽफुमाङ्ङिन् हे़क्क्याङ् आङ्गाॽ हाङ्युक्नाओ युक्खुङ्बा खुन्छिॽ हाङ् दाउदे़ल्ले़ लत्छा कुमुॽइदाङ्साधिक् आङ्गाॽ फोःक्खुङ्लो॥ 10 “आसे़वारोबा याकुबे, मे़गिसे़न्ने़ॽओ॥ इस्राइलबा यक्युङ्बासे, किमा यङ्माओ मे़ध्ये़म्मिन्ने़ॽओ॥ खे़ने़ॽ नु खे़ने़ॽ के़मुॽइदाङ्साहाॽ माःङ्घाबा लाजेॽओ के़म्बाङ्घिआङ् के़वयिरो, खे़प्मोलाम् खिनिॽ थे़ॽनिङ्ङाङ् ताःत्निङ्लो॥ याकुबे़न् याम्मो नुॽदाआङ् ताप्थेक् याम्धेक् पोङ्लो॥ हाःत्ले़आङ् खुने़ॽ यङ्मा मे़से़रुन्लो॥ 11 आङ्गाॽ खिनिॽनु वाॽआरो हे़क्क्याङ् खिनिॽ ताङ्से़ःप्निङ्लो॥ आङ्गाॽग मे़न्छाम् सुवाङ्हाॽओ के़रे़क् पिसाङ् से़निङ्ङाङ् वयाङ्लो, खे़ङ्हाॽ के़रे़क् आङ्गाॽ युम्रे़क् मे़क्खुङ्सिङ्लो कर खिनिॽग आङ्गाॽ मे़मे़ङ्निङ्ङिन्लो॥ हे़क्केसाङ् आङ्गाॽ खिनिॽ खुम्दिङ् मे़म्बिएग मे़ले़त्निङ्ङिन्लो कर खुम्दिङ् पिनिङ्ङिल्ले़ कुदोःप्मा खासे़ःन्नो खुम्दिङ् पिनिङ्लो॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽआरो॥” 12 यहवे दाङ्बे़ल्ले़ कुमनाहाॽ अक्खे मे़त्तुसिरो, “खिनिॽ याङ्घेःक्किन् वेःम्मा सुक्मे़न्दे़प्मनाबा चोक्लो हे़क्क्याङ् खिनिॽ के़गाःन्दिबान् मे़न्नुॽमनाबा चोक्लो॥ 13 खिनिॽ कम्ब्राङ् के़मे़प्पा थिक्काङ् होप्लो॥ खिनिॽ याङ्घेःक्किल्ले़ लागि थेआङ् सिदाॽ होप्लो॥ खिनिॽ वेःप्मा नुॽमा निङ्साङ् चोःक्मा लाम् होप्लो॥ 14 खिनिॽ लुङ्माॽ के़दुक्पा के़रे़क्ले़ खिनिॽ निङ्वाॽ के़म्भेःत्छिरो, खे़ङ्हाॽरे़ खिनिॽ थेआङ् कम्ब्राङ् के़मे़म्मे़त्तिन्लो॥ आङ्गाॽ निङ्मिहाॽ कुइसिक् खिनिॽ तुक्खे चाःत्निङ्लो॥ खिनिॽ सम्धाङ् के़साक्पा खुम्दिङ्ङिन् चुक्ते़आङ् वाॽरो थेआङ्भे़ल्ले़ खिनिॽ लायोहाॽ यरिक् वाॽरो हे़क्क्याङ् खिनिॽ कुॽइभे़म्मे़न् साॽरिक् यम्बा चोक्लो॥ 15 खिनिॽ याङ्घेःक्किल्ले़ चोगुल्ले़ आल्ल लुङ्हान् मे़जोगे़म्मिन्ने़ॽओ, खे़न्लाम्बा वेःप्मा लाम् होप्लो॥ आङ्गाॽ अक्तङ्बा खुम्दिङ् पिनिङ्ङाङ् वाॽरो थेआङ्भे़ल्ले़ खिनिॽ लायोन् यरिक् वाॽरो हे़क्क्याङ् खिनिॽ कुॽइभे़म्मान् साॽरिक् यम्बा चोक्लो॥ 16 “कर आल्ल खिनिॽ के़लप्पाहाॽ के़रे़क् मे़लरुसिरो, खिनिॽ निङ्मिहाॽ मे़दे़म्सु मे़देॽरुसिरो॥ खिनिॽ तुक्खे के़जाःप्पाहाॽ के़रे़क् तुक्खे मे़जाःत्तुसिरो हे़क्क्याङ् खिनिॽ के़नाप्पाहाॽ के़रे़क् मे़नाप्तुसिरो॥ 17 आङ्गाॽ खिनिॽ याम्मो वेःन्निङ्लो॥ खिनिॽ याङ्घेःक्हाॽ नुसुङ् पिनिङ्लो॥ हे़क्केसाङ् खिनिॽ निङ्मिहाॽरे़ अक्खे मे़बाःत्तुरो, ‘सियोने़न् मनाहाॽरे़ मे़नाॽरुआङ् ने़रो, आत्तिन्हाॽरे़आङ् खे़न् कम्ब्राङ् मे़म्मे़त्तुन्लो॥’ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥” 18 यहवे दाङ्बे़ल्ले़ अक्खे पाःत्तुरो, “आमनाहाॽ खुन्छिॽ लाजेॽओ नुःक्तुङ् तारुङ्सिङ्लो हे़क्क्याङ् के़रे़क् हिम्सयङ्हाॽ लुङ्माॽ तुक्तुङ्सिङ्लो॥ यरुसले़म ये़क्यक्किन् के़लुःम्बादे़न्नो आङ्गाॽ याम्मो चोगुङ्लो खे़म्ब्याङ् खे़प्मो याम्मो तगि हे़क्के हाङ्हिम् युङ्सिङ्लो॥ 19 खे़प्मो के़युङ्बाहाॽरे़ नुगे़न् तोःम्मा साम्लोन् साम्मे़मे़त्तुरो हे़क्क्याङ् खुन्छिॽ निङ्वाॽ ताआङ् पसःत् मे़सःत्लो॥ आङ्गाॽ आहाङ्वा मुॽइःल्ले़ खे़ङ्हाॽ यरिक् चोगुङ्सिङ्लो॥ हे़क्क्याङ् खे़ङ्हाॽ सुःल्लिक् मे़म्बोङ्ने़ल्लो॥ आङ्गाॽ खे़ङ्हाॽ मिङ्सो इङ्धाङ् पिरुङ्सिङ्लो खे़ब्याङ् खे़ङ्हाॽ कुनामे़न्छाॽ मे़म्बोङ्ने़न्लो॥ 20 खे़ङ्हाॽरे़ खुन्छिॽ अङे़ःक्वा साहाॽ तगिबा हे़क्के मे़बोङ्लो हे़क्क्याङ् खे़ङ्हाॽरे़ खुन्छिॽ चुम्भोःन् आदगि याम्मो युङ्सिङ्लो॥ खे़ङ्हाॽ तुक्खे के़जाःप्पाहाॽ आङ्गाॽ खुम्दिङ् पिरुङ्सिङ्लो॥ 21 खे़ङ्हाॽरे़ खुन्छिॽ लाम्लोबाङ्ग खुन्छिॽ आबाङे सुवाङ्लाम्बा पोङ्लो हे़क्क्याङ् मनाहाॽरे़ खुन्छिॽ लुम्मोलाम्बा युक्साबाधिक् लःन्लो॥ आङ्गाॽ खे़न् उःत्तुङ्ङिल्ले़ खे़न् आबेसाङ् तारो थेआङ्भे़ल्ले़ आङ्गाॽ मे़न्उःत्ते थारिक् हात् आबेसाङ् तामा सुक्पे? आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥ 22 कम्भलॽरिक् खे़ङ्हाॽ याम्मो आङ्गाॽ आमना मे़बोङ्लो, हे़क्क्याङ् आङ्गाॽ याम्मो खे़ङ्हाॽरे़ खुन्छिॽ निङ्वाॽफुमाङ् पोङ्ङारो॥” 23 ओमे़त्ते़ॽ, यहवे दाङ्बे़ल्ले़ कुसाक्के़न्निङ्ग सुरित् केजङ्लो, कुसिक् पोःक्मो खे़न् सुरित् केजङ्ङिन् हुःक्लो, कुॽइगे़भे़म्बाहाॽरे़ खुन्छिॽ थे़गेःक्पो इस्वारि साम्मिःत्ते़न् सुःक्थारो॥ 24 खुने़ॽ कुनिङ्वाॽओ इःत्तुबा के़रे़क् पाःन्हाॽ मे़न्गे़त्ते थारिक् यहवे दाङ्बे़ल्ले़ किप्मागे़घुबा कुसिक् पोःक्मान् मे़जिप्तुन्लो॥ के़दाबा ये़न्हाॽओ खिनिॽ कन् पाःन्निन् नुरिक्काङ् कुसिङ् के़निःत्तुम्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.