यर्मिया 3 - लिम्बु1 यहवे दाङ्बे़ल्ले़ अक्खे पाःत्तुॽ, “कुभा मनाःल्ले़ आबाङे कुमेःत्तिन् नाॽरुरो हे़क्क्याङ् खे़न् मे़न्छुमाःल्ले़ खुने़ॽ ले़रुआङ् वेॽ ये़म्बित्छाःन्नु मेःक्खिम् चोगुरो हे़क्केने़भग्र खे़न् मनाःल्ले़ याम्मो खे़न् मे़न्छुमान् हिम्मो नुःक्मा ताःप्मा मे़सुक्तुन्लो॥ हे़क्के चोःक्माल्ले़ के़रे़क् लाजेन् चिःन्जिन् के़घुबा पोङ्लो॥ कर इस्राइलए, खे़ने़ॽ यरिक् के़धाङ्बे़न्हाॽनु के़बोःत्ते़रो हे़क्क्याङ् याम्मो आङ्गाॽओ नुःङ्मा तामा निङ्वाॽ के़जोगुरो!” 2 मुरे़क् खारे़क्पा कोःक्मा फाङ्जङ् थे़गु माङ्वाहाॽओ ओमे़त्ते़ॽओ॥ खे़ने़ॽ के़धाङ्बे़न्हाॽनु के़इप्से़म्बादे़न्निन् आत्ति ने़बे? लत्छा फाःन्दान् मुरे़क् खारे़क्पा ये़ःङ्घादे़न्नो मनाहाॽ नाप्मासि फाॽआङ् मना सुक्पा हे़क्केए खे़ने़ॽ लाम्बेसाङ् के़ये़प्पाङ् के़धाङ्बे़न्हाॽरे़ खुन्छिॽ लाम्मिन् ओगे़मे़त्तुरो॥ खे़ने़ॽग ताप्फे़ःम्बा फे़न्याःम्बक् के़जोःक्लो के़त्निमा के़जोःक्मारे़ लाजेन् के़जिःन्दुरो॥ 3 खे़ल्ले़चोगुल्ले़ चे़रे़ङ्नाम् थे़रे़ङ्नाम्बा पाङ्गे़न्दिङ् वहित्तिन् मे़ध्ये़ने़ल्लो, हे़क्क्याङ् हाङ्वामा ये़म्मो पाङ्गे़न्दिङ् वगेःक्माआङ् पप्मा नाॽरे़रो॥ खे़ने़ॽ के़नारान्नाङ् के़त्निमा कुइसिक् निदे़त्लो, खे़ने़ॽ के़नुःम्मा थेआङ् होप्लो॥ 4 “हे़क्क्याङ् खे़ने़ॽ आल्ल आङ्गाॽ अक्खे के़मे़त्तारो, ‘खे़ने़ॽग आङ्गाॽ पानुदिङ् आम्बा के़वाॽरो, आङ्गाॽ हिन्जाॽ वयाङ्ङाङ्धोए खे़ने़ॽ आङ्गाॽ लुङ्माॽ के़दुक्ताङ्ङाङ् के़वाॽरो॥ 5 थे खे़ने़ॽ आङ्गाॽनु आभे़ल्ले़साङ् के़सिक् पोःक्पि? थे खे़ने़ॽ सदादिङ् आदक्ले़ङ्वाओ के़वाॽबि?’ इस्राइलए, खे़ने़ॽ पाःप्माग हे़क्केए के़बाःत्तुरो कर खे़ने़ॽ के़सुक्सुक् ताप्फे़ःम्बा के़जोगुरो॥” याम्बोःप्मा याःम्बक् के़जोःक्मा इस्राइल 6 योसियाहन् हाङ् वये़ल्ले़ यहवे दाङ्बे़ल्ले़ आङ्गाॽ मे़त्ताङ्, “याम्बोःप्मा याःम्बक् के़जोःक्मा मे़न्छुमाःल्ले़ हे़क्के इस्राइलरे़ थेधे चोगु, थे खे़ने़ॽ के़निसुबि? खे़ल्ले़ आङ्गाॽ ले़प्माङ् आबाङे कुएःक्थाःक्मान् हिसाङ् पिराङ् हे़क्क्याङ् के़रे़क् कोःक्मा फाङ्जङ् थे़गु माङ्वाहाॽओ नु के़रे़क् सरेःक्याःप्पा सिङ्बुङ् सिगाङ् याम्बोःप्मा याःम्बक् चोगु॥ 7 खे़ल्ले़ खे़न् के़रे़क् याःम्बक्किन् चोःक्मा सुरुआङ् आङ्गाॽ ले़प्माङ् से़क्खाए नुःङ् के़लॽबा इःत्तुङ्ङाङ् वयाङ् कर खे़न् मे़नुःक्खे़न्॥ खे़ल्ले़ कुन्साॽ इङ्आले़क्ले़क्मा यहुदाःल्ले़आङ् खे़न् निसु॥ 8 आङ्गाॽ नाॽराङ्ङाङ् याम्बोःप्मा याःम्बक् के़जोःक्मा पोःक्खे़बाल्ले़ चोगुल्ले़ आङ्गाॽ इस्राइले़न् नाॽरुङ्ङाङ् हिम्मोलाम्बा नाःत्तुङ्बा निसुसाङ् खे़ल्ले़ कुन्साॽ इङ्ले़क्सुवामा यहुदान् मे़गिसे़न्॥ 9 याम्मो खे़न्नाङ्नि मे़न्नुःन्ने के़त्निमा पोःक्खे़॥ खे़ल्ले़ लाजेन् याम्गे़सिङ्बा चोगु, सिङ्बुङ्ङिन् नु लुङ्हाॽ माङ्से़वा मे़त्तुसिआङ् याम्बोःप्मा याःम्बक् चोगु॥ 10 खे़न् एगाङ् याम्बोःप्मा याःम्बक् के़जोःक्मा इस्राइलरे़ कुन्साॽ इङ्आले़क्ले़क्मा यहुदान् आङ्गाॽ ले़प्माङ् के़नुःङ्मा लाम्सिङ् कर खे़ल्ले़ कुसिक्लुङ्मान् आङ्गाॽ ले़प्माङ् मे़नुःक्तुन्॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥” 11 खे़ब्याङ् यहवे दाङ्बे़ल्ले़ आङ्गाॽ मे़त्ताङ्, “याम्बोःप्मा याःम्बक् के़जोःक्मा इस्राइलरे़ आङ्गाॽ नाॽराङ्साङ् इङ्ले़क् के़जोःक्मा यहुदाःन्नुःल्ले़ सुःल्लिक्लक् आप्तिक्सामा चोक्॥” 12 खुने़ॽ आङ्गाॽ थो थाङ्गे़न् पिसाङ् पेःक्माआङ् इस्राइले़न् अक्खे मे़प्मा इङ्जाङ् पिराङ्लो, “याम्बोःप्मा याःम्बक् के़जोःक्मा इस्राइलए, आङ्गाॽ ले़प्माङ् नुःक्खे़ॽओ॥ आङ्गाॽ के़नुॽबा चोःक्कारो आङ्गाॽ आभे़ल्ले़साङ् खे़ने़ॽनु आसिक् मे़बोःक्ने़न्नाङ् मे़बत्ने़ल्लो॥ 13 खे़ने़ॽ आङ्गाॽ, यहवे दाङ्बा निङ्वाॽफुमाङ्ङिल्ले़ आदक्ले़ङ्वाओ के़बोगे़रो हे़क्क्याङ् आङ्गाॽ आइङ्जाङ्ङिन् इःप्मा नाःप्मा के़न्दे़न्दे़न्लो के़रे़क् सरेःक्याःप्पा सिङ्बुङ्मा सिगाङ् वेॽ माङ् साम्माङ्हाॽनु याम्बोःप्मा याःम्बक् के़जोगुरो खे़न् पाःन्नो आप्तिक्साबा पोङ्मा ते़न्दे़ॽओ॥” आङ्गाॽ, यहवे दाङ्बे़ल्ले़ कन् पाःत्तुङ्ङाङ् वाॽरो॥ 14 “नसान् के़होप्पा मनासे, आङ्गाॽ ले़प्माङ् नुःक्खे़म्मे़ॽओ, आङ्गाॽ खिनिॽ दाङ्बाआरो॥ आङ्गाॽ खिनिॽ के़रे़क् ये़क्यक्लाम्बा लत्छा हे़क्क्याङ् के़रे़क् थाःक्लाम्बा ने़प्फु ने़प्फु तेॽनिङ्लो हे़क्क्याङ् सियोन कोःक्माओ नुःक्निङ् ताःत्निङ्लो॥ 15 आङ्गाॽ आबाङे आसिक्लुङ्माॽ कुसिङ्गे़निःप्पा मे़ल्लुक्कम्बाहाॽ खिनिॽ पिनिङ्लो हे़क्क्याङ् खे़ङ्हाॽरे़ खिनिॽ सिक्कुम् निङ्वाॽ नु खासिङ्निःप्मा लाम्मो लाम् के़म्लोसिरो॥ 16 “हे़क्क्याङ् कन् लाजेॽओ खिनिॽ निःत्मे़न्दे़त्ते के़बोरिआङ् मनाहाॽरे़ आमाङ्हुप्पिल्ले़ सन्दोक्किल्ले़ कुयाःम्बेओ पान् पाःप्मा चाहा मे़जोक्ने़न्लो॥ खे़ङ्हाॽ खे़न् चाहा मे़जोक्ने़न्॥ खे़ब्याङ् खे़न् खे़ङ्हाॽ याम्मो चाहा मे़न्जोःक्ने़न्॥ 17 खे़न् ये़म्मिन् ताआङ् यरुसले़ःम्मिन् ‘यहवे दाङ्बे़ल्ले़ कुहाङ्युक्ना’ मे़मे़त्तुॽ हे़क्क्याङ् खे़प्मो के़रे़क् मे़न्छाम् सुवाङ्हाॽ यहवे दाङ्बे़ल्ले़ कुमिङ्ङिन् मिङ्सो इङ्धाङ् पिसे़ मे़जुम्॥ खे़ङ्हाॽ खुन्छिॽ हादिङ्धक्मा नु सिक्लुङ्मोबा ताप्फे़ःम्बा पाःन्हाॽओ याम्मो आफाल्ले़आङ् मे़म्बत्ने़न्॥ 18 खे़न् ये़म्मो यहुदान् इस्राइले़न्नु तङ्ॽ, हे़क्क्याङ् खे़ङ्हाॽ थिक्हुप्पो थाङ्गे़त् ले़प्माङ् मे़दे़म्सु मे़देॽरुसिबाहाॽ लाजेॽलाम्बा मे़नुःङ् हे़क्क्याङ् आङ्गाॽ खे़ङ्हाॽरे़ खुन्छिॽ पाधे़बाहाॽ सदादिङ्ले़ लागि खुन्छिॽ लक् हे़क्के पिरुङ्सिङ्बा लाजेॽओ खे़ङ्हाॽ मे़दारो॥” 19 यहवे दाङ्बे़ल्ले़ अक्खे पाःत्तुरो, “इस्राइलए, खे़ने़ॽ आबाङे आबुगे़न् आस्सा चोःक्माने़ आनिङ्वाॽ वये़रो लत्थिक् सुक्खेवाबा लाजेॽ नु खाम्बेःक्मोबा के़रे़क्नुःल्ले़ के़वे़म्बा लाजेॽ पिमाने़ निङ्वाॽ चोगुङ्ङाङ् वये़रो, खे़ने़ॽ आङ्गाॽ ‘आम्बौ’ लॽरिक् याप्मि के़उःत्ति फाॽआङ् इःत्तुङ्ङाङ् वये़रो हे़क्क्याङ् आङ्गाॽ आप्फाल्ले़आङ् याप्मि के़ल्ले़त्ने़म्बा आनिङ्वाॽ वये़रो॥ 20 कर नासाॽमा सुक्मे़न्दे़प्मनाबा मेःत्तिल्ले़ कुये़म्बाःन् ले़रुरो खे़न् कुइसिक् खे़ने़ॽ आङ्गाॽ याप्मि इङ्गे़ले़क्ताङ्ङाङ् वाॽरो, आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥” 21 मुरे़क् खारे़क्पा कोःक्मा फाङ्जङ्हाॽओ इक्लाधिक् खे़म्दे़त्लो, इस्राइलबा मनाहाॽ मे़हाःप् मे़भिःक्ल पेलि मे़भाक्लो थेआङ्भे़ल्ले़ खे़ङ्हाॽरे़ लायोओ खुन्छिॽ हिङ्मन् मे़देसुआङ् वाॽरो हे़क्क्याङ् खे़ङ्हाॽरे़ यहवे दाङ्बा खुन्छिॽ निङ्वाॽफुमाङ्ङिन् निङ्वाॽ मे़भेःत्छुआङ् मे़वाॽरो॥ 22 यहवे दाङ्बे़ल्ले़ अक्खे पाःत्तुरो, “याम्बोःप्मा याःम्बक् के़जोःक्पासे! खिनिॽ के़रे़क् आङ्गाॽओ नुःक्खे़म्मे़ॽआङ् त्ये़म्मे़ॽओ, आङ्गाॽ खिनिॽ वेःन्ने़निङ्ॽ हे़क्क्याङ् खिनिॽ नसाःन्साबा चोःक्निङ्लो॥” खे़ङ्हाॽरे़ मे़बाःत्तुॽ, “ओरो, यहवे दाङ्बाए, आनिगे खे़ने़ॽओ नुःक्खिगे़ त्ये़ॽइगे़रो हे़नाङ्भे़ल्ले़ खे़ने़ॽ आनिगे निङ्वाॽफुमाङ्ने़रो॥ 23 कोःक्मा फाङ्जङ्हाॽओ नावाइत्लाहाॽ से़वा मे़प्मासि, हे़क्क्याङ् थे़गु माङ्वाहाॽओ साम्योबा हयङ्किल्लिङ् चोःक्माग इङ्ले़क्लो॥ से़क्खासाङ् यहवे दाङ्बा आनिगे निङ्वाॽफुमाङ् लाम्बारक् इस्राइलिहाॽरे़ से़न्लप् मे़घोसुरो॥ 24 आनिगे पाधे़बाहाॽरे़ यरिक् तङ्बे तगिआङ्धो यरिक् पाःन्हाॽ मे़धगुआङ् वये़रो खे़न् के़रे़क् पाःन्हाॽ से़वा मे़प्मनाबा बाल साम्माङ्ङिल्ले़ आनिगे नाप्तिगे़रो, खे़न् सिरिङ् आममबा साम्माङ्ङिल्ले़ आनिगे मे़ल्लुक् मे़ःन्दाहाॽ, पित्थक्साहाॽ, साएहाॽ के़रे़क् हदॽ मे़क्खुसिरो॥ 25 आल्ल आनिॽ सिरिङ्ममो थ्ये़ॽइरो हे़क्क्याङ् आनिॽ चाःत्थि पेःक्मा पाःन्निल्ले़ आदे़प्लरो॥ आनिॽ नु आनिॽ पाधे़बाहाॽरे़ आभे़ल्ले़साङ् यहवे दाङ्बा आनिॽ निङ्वाॽफुमाङ्ङिल्ले़ कुदक्ले़ङ्वाओ आनिॽ आजुक्ते़आङ्धो लायो आजोगुम्माङ् आवाॽरो, आप्फाल्ले़आङ् आनिॽ खुने़ॽ कुइङ्जाङ्ङिन् आन्इःत्तुम्मिन् आन्नाःत्तुमिन्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.