यर्मिया 29 - लिम्बुयर्मियाःल्ले़ बेबिलोनबा यहुदिहाॽ सक्इङ्घङ् हाक्तुसि 1 के़दाङ्बा के़याःक्पा तुम्भाक्साहाॽ, साम्योसिक्साम्बाहाॽ, निङ्वाॽलुसाम्बाहाॽ नु के़रे़क् मनाहाॽ नबुकदनेसरे़ल्ले़ यरुसले़ःम्लाम्बा पुङ्लाधाबा चोगुसिआङ् बेबिलोनओ तेॽरुसिआङ् वये़, यर्मियाःल्ले़ खे़ङ्हाॽ हाक्तुसिबा सक्इङ्घङ्ङोबा पाःन्हाॽ आम्भा कन्लो॥ 2 यहोयाकिन हाङ्ङिन्, मानुदिङ् हाङ्मा, हाङ्हिम्मोबा सुहाङ्युक्पाहाॽ, यहुदा नु यरुसले़ःम्बा लाम्लोबाहाॽ, साम्म्याङ् युप्पा के़धक्पा चोबेगुहाॽ हे़क्क्याङ् नुरिक् सिङ्गाम्मा लुङ्गाम्मा के़ले़बाहाॽ यरुसले़ःम्लाम् मे़दे़म्सु मे़देॽरुसिआङ् एगाङ् खुने़ॽ कन् सक्इङ्घङ्ङिन् साप्तु॥ 3 खुने़ॽ कन् सक्इङ्घङ्ङिन् सापाने़ल्ले़ कुस्सा एलासान् नु हिल्कियाहःल्ले़ कुस्सा गमर्याहन् हुक्सुप्तुसि, यहुदाबा हाङ् सिदकियाहःल्ले़ खे़न् ने़प्माङ् बेबिलोनबा हाङ् नबुकदनेसरे़ल्लो पाङ्घुसिआङ् वये़॥ कन् सक्इङ्घङ्ङिन् अक्तङ्बा वये़रो— 4 इस्राइललाम्बा ते़म्सुसिआङ् बेबिलोनओ तेॽरुसिबा के़रे़क् मनाहाॽ मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे मे़त्तुसि, 5 “खे़प्मो खिनिॽ हिम्धाःङ् चोगे़म्मे़ॽआङ् युङे़म्मे़ॽ॥ सिङ्सेॽ इक्ताप्हाॽ केःत्ते़म्मे़ॽ हे़क्क्याङ् खे़प्मो के़धोःक्पा कुजान् चे़म्मे़ॽ॥ 6 ते़न्धाम् मेःक्खिम् चोगे़म्मे़ॽ हे़क्क्याङ् सा-ए कत्ते़म्सिम्मे़ॽ॥ खे़निॽ साएहाॽरे़आङ् ते़न्धाम् मेःक्खिम् मे़जोगुर खे़ब्याङ् हिन्जाॽबित्छाॽहाॽ मे़गत्तुसिर॥ खिनिॽ खानिःत्तिन् फोमा पोङ्ॽ, सुःम्मा मे़नुॽने़न्॥ 7 आङ्गाॽ आत्तिन् ये़क्यक्को खिनिॽ के़म्दे़म्सि के़म्देॽरिर चोःक्निङ्ङाङ् पाङ्निङ्, खे़प्मो सुक्खेवारे़ लागि याःम्बक् चोगे़म्मे़ॽ॥ खे़ल्ले़ लागि यहवे दाङ्बान् पेलि फाक्ते़म्मे़ॽ थेआङ्भे़ल्ले़ खे़प्मोबाहाॽ मे़नुॽ मे़दाने़भग्र खिनिॽआङ् के़नुरि के़दासिॽ॥” 8 यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, “खिनिॽ लुम्मो के़वाॽबा माङ्निङ्वाॽपान् के़बाःप्पाहाॽ इग्र ताःन्दि के़दाबा पाःन्हाॽ आनिगे आल्लोसा पाःप्मा सुक्तुम्बे़ लॽरिक् पान् के़धक्पा वेॽ मनाहाॽरे़ खुन्छिॽ इङ्ले़क्को मे़ध्ये़म्मे़न्ने़ॽ॥ खिनिॽ आबाङे के़इःत्तुम्माङ् के़माक्तुम्बा से़प्माङ्बा पाःन्नो निङ्वाॽ मे़बिरे़म्मिन्ने़ॽ॥ 9 थेआङ्भे़ल्ले़ आङ्गाॽ आमिङ्ङो खे़ङ्हाॽरे़ खिनिॽ इङ्ले़क्पा पान् के़म्मे़त्तिर मे़वाॽ॥ खे़ङ्हाॽ आङ्गाॽ पाङ्घुङ्सिङ्बा मेःन्॥” यहवे दाङ्बे़ल्ले़ पाःत्तुॽ॥ 10 यहवे दाङ्बे़ल्ले़ अक्खे पाःत्तुॽ, “बेबिलोनओ के़म्दे़म्सिआङ् के़म्देॽरिबा नुबोङ् तङ्बे के़त्ताङ् आङ्गाॽ खिनिॽ ओमे़त्छे़ ताआ, हे़क्क्याङ् खिनिॽ लाजेॽओ नुःक्निङ् फे़त्निङ्ङाङ् आङ्गाॽ आमाङ्हुप्पिन् के़त्तुङ्ॽ॥ 11 थेआङ्भे़ल्ले़ आङ्गाॽ खिनिॽ लागि चोःक्मा कोःत्तुङ्बा निलाम्हाॽ आङ्गाॽ आबाङे कुसिङ् निःत्तुङ्ॽ॥ खे़न् निलाम्हाॽलाम्बा खिनिॽ नुॽमादामा पोङ्ॽ कर खिनिॽ हान्ति के़म्बोःक्खिन् हे़क्क्याङ् नुॽमादामारे़ लागि खिनिॽ निङ्साङ् के़जोगुम्बा के़दाबा ये़म्मिन् खिनिॽ पिनिङ्ॽ॥ 12 खे़ब्याङ् खिनिॽ आङ्गाॽ याप्मि निङ्वाॽ के़इःत्तिॽ॥ खिनिॽ आङ्गाॽओ के़द्ये़ॽइआङ् तुवा के़जोगुम् हे़क्क्याङ् आङ्गाॽ खिनिॽ नुगप् पिनिङ्ॽ॥ 13 खिनिॽ आङ्गाॽ याप्मि के़गोःत्तिॽ, आबाङे खिनिॽ के़रे़क् सिक्लुङ्माल्ले़ आङ्गाॽ याप्मि के़हक्सिॽ हे़क्क्याङ् आङ्गाॽ याप्मि के़घोसिॽ॥ 14 से़क्खा, आङ्गाॽ मे़त्निङ्, खिनिॽ आङ्गाॽ याप्मि के़घोसिॽ खे़ब्याङ् आङ्गाॽ खिनिॽ आबाङे लाजेॽओ नुःक्निङ् ताःत्निङ्॥ आङ्गाॽ खिनिॽ नाःत्निङ्देनिङ्बा के़रे़क् लाजेॽ नु ते़न्नोलाम्बा आङ्गाॽ खिनिॽ सुम्निङ्॥ आत्तिन् लाजेॽलाम्बा आङ्गाॽ के़म्दे़म्सि के़म्देॽरिर याःन्निङ्ङाङ् वयाङ्, हाबा खे़न् लाजेॽओ आङ्गाॽ खिनिॽ नुःक्निङ् ताःत्निङ्॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽ॥” 15 यहवे दाङ्बे़ल्ले़ बेबिलोनओ माङ्निङ्वाॽपान् के़बाःप्पाहाॽ खिनिॽ के़बिरिआङ् के़वयि फाॽआङ् खिनिॽ के़बाःत्तुम्ॽ॥ 16 कर दाउदे़न् युङे़बा हाङ्युक्नाओ के़युङ्बा हाङ्ङिल्ले़ कुयाःम्बेओ नु कन् ये़क्यक्कोबा यक्युङ्बाहाॽ इग्र खिनिॽ काॽइहाॽ, खे़न् खिनिॽनु मे़दे़म्सुसिआङ् माःङ्घा लाजेॽओ मे़न्देॽरुसिन्, खे़ङ्हाॽरे़ खुन्छिॽ याःम्बेओ यहवे दाङ्बे़ल्ले़ थे़मा पाःत्तुॽ, खे़न् खे़प्से़म्मे़ॽ॥ 17 मुक्साम्दाङ्बा यहवे दाङ्बे़ल्ले़ अक्खे पाःत्तुॽ, “आङ्गाॽ खिनिॽ सम्धाङ् थङ्, साक्वान् नु मिङ्देॽ तारुङ्ॽ हे़क्क्याङ् खे़ङ्हाॽ चामा सुक्मे़न्दे़प्मनाबा हर्गिॽ के़गिबा पत्छेॽ हे़क्तङ्बा चोगुङ्सिङ्ॽ॥ 18 आङ्गाॽ खे़ङ्हाॽ ते़न्धङ्, साक्वान् नु मिङ्देल्ले़ पुबेलाप्सा नाःत्तुङ्सिङ्ॽ हे़क्क्याङ् खाम्बेःक्मोबा के़रे़क् मे़न्छाम् सुवाङ्हाॽरे़ खे़न् मे़निसुआङ् यङ्मा किमाओ मे़धारो॥ फुत्छिङ्ज्याङ् चोगुङ्सिङ्ङाङ् आङ्गाॽ आत्तातान् इमे़न्नि खामे़न्नि खे़ङ्हाॽ पाङ्घुङ्सिङ्ॽ, खे़ङ्हाॽरे़ मे़दुमुबा याक्नाम्मिन् मे़निसुआङ् मनाहाॽ हाब् मे़ले़क्काङ् पगि मे़गिरो॥ मनाहाॽरे़ खे़ङ्हाॽ किनाःन्दि मे़बिरुसि हे़क्क्याङ् खे़ङ्हाॽ मिङ् मे़लोःक्तुसिआङ् माङ्दे साक्मुरा मे़मे़त्तुसिॽ॥ 19 थेआङ्भे़ल्ले़ खे़ङ्हाॽरे़ पाःत्तुङ्बा पाःन्नो निङ्वाॽ मे़म्बिरुन् लॽरिक् आङ्गाॽ यहवे दाङ्बे़ल्ले़ पाःत्तुङ्ॽ॥ खे़न् आबाःन्निन् आङ्गाॽ आसे़वारोबा माङ्निङ्वाॽपान् के़बाःप्पाहाॽलाम् ये़त्ले़ङ् ये़त्ले़ङ् खे़ङ्हाॽ हाक्तुङ्सिङ्ङाङ् वये़॥ हे़क्क्याङ् खिनिॽ के़म्दे़म्सि के़म्देॽरिबाहाॽरे़आङ् आङ्गाॽ आइङ्घङ्ङिन् के़ङ्घे़प्सुम्मिन्॥ 20 “खे़ल्ले़चोगुल्ले़ यरुसले़मलाम् खिनिॽ के़म्दे़म्सि के़म्देॽरिर याःन्निङ्ङाङ् बेबिलोनओ पाङ्निङ्बा के़रे़क्ले़ आङ्गाॽ यहवे दाङ्बे़ल्ले़ थे इङ्घङ् पाःत्तुङ्ॽ, खे़न् खे़प्से़म्मे़ॽ॥” 21 यहवे दाङ्बे़ल्ले़ कुमिङ्ङो खिनिॽ इङ्ले़क् पान् के़मे़प्पा कोलायाहःल्ले़ कुस्सा आहाबे़न् नु मासेयाहःल्ले़ कुस्सा सिदकियाहःल्ले़ खुन्छिॽ याःम्बेओ मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुआङ् वाॽ, “आङ्गाॽ खे़ङ्हाॽ बेबिलोनबा हाङ् नबुकदनेसरे़ल्ले़ कुहुक्को पिरुङ्सिङ्ॽ हे़क्क्याङ् नबुकदनेसरे़ल्ले़ खिनिॽ तगि मिक्किल्ले़ के़निसुम्ल खे़ङ्हाॽ से़रुसिॽ॥ 22 यरुसले़ःम्लाम्बा मे़दे़म्सुसिआङ् बेबिलोनओ मे़देॽरुसिबा मनाहाॽरे़ खे़प्मो आत्तिन्हाॽसाङ् साङ्ग्रा माङ्दे मे़प्मासि निङ्वाॽ मे़जोगुल्ले़ खे़ङ्हाॽरे़ अक्खे मे़बाःत्तुॽ, ‘बेबिलोनबा हाङ्ङिल्ले़ कुहिङ्वे़त् मिधिक्खुसिबा सिदकियाहःन् नु आहाबबे़न् कुइसिक् यहवे दाङ्बे़ल्ले़ खे़ने़ॽआङ् के़मे़त्लरो॥’ 23 खे़ङ्हाॽरे़ मे़दुमुबा याक्नाम्मिन् अक्तङ्बाए पोङ् थेआङ्भे़ल्ले़ खे़ङ्हाॽरे़ इस्राइलओ किप्मागे़घुबा लायोहाॽ मे़जोगुआङ् वाॽ, खे़ङ्हाॽरे़ आबाङे हिम्बेसाङ्बा चुम्मिल्ले़ कुमेःत्तिन्नु चाराम्मा याःम्बक् मे़जोगु हे़क्क्याङ् आमिङ्ङो इङ्ले़क्पा पान् मे़बाःत्तुआङ् मे़वाॽ॥ कन् याःम्बक्हाॽ आनिङ्वाःल्ले़ कुदक्ले़ङ्वाओ वये़॥ खे़ङ्हाॽरे़ हे़न् मे़जोगुआङ् मे़वाॽ, खे़न् आङ्गाॽ निसुङ्ॽ खे़ब्याङ् खे़ङ्हाॽरे़ खुन्छिॽ तक्ले़ङ्वाओ आङ्गाॽ साखि पोःक्खाङ्ङाङ् वाॽआ॥ आङ्गाॽ यहवे दाङ्बे़ल्ले़ अक्खे पाःत्तुङ्ङाङ् वाॽरो॥” समायाहरे़ कुलागि सक्इङ्घङ् 24 नेहेमलाम के़युङ्बा समायाहःन् यहवे दाङ्बे़ल्ले़ बेबिलोनओ कन् इङ्घङ्ङिन् हाक्तु, 25 “मुक्साम्दाङ्बा यहवे दाङ्बा, इस्राइलबा निङ्वाॽफुमाङ्ङिल्ले़ अक्खे पाःत्तुॽ—खे़ने़ॽ आबाङे के़मिङ्ङो यरुसले़ःम्बा के़रे़क् मनाहाॽ हे़क्क्याङ् निङ्वाॽफुसाम्बा मासेयाहःल्ले़ कुस्सा सपन्याहःन् नु वेॽ के़रे़क् निङ्वाॽफुसाम्बाहाॽ लत्छा सक्इङ्घङ् के़हाक्तुसिआङ् वये़॥ खे़न् सक्इङ्घङ्ङो खे़ने़ॽ सपन्याहःन् अक्खे के़साप्तुआङ् पत्छे़, 26 “यहवे दाङ्बे़ल्ले़ खे़ने़ॽ यहोयादाःल्ले़ कुले़क्वाओ निङ्वाॽफुसाम्बा के़जोगे़ हे़क्क्याङ् आल्ल खे़ने़ॽ माङ्हिम् ओगे़मे़प्पा निङ्वाॽफुसाम्बा के़बोक्खे़आङ् के़वाॽ, माङ्निङ्वाॽपान् के़बाःप्पा के़लाम्सिङ्बार के़वाॽबा के़रे़क् के़नाङ्बाहाॽ तुरुङ् थे़प्मासिआङ् खुन्छिॽ सिक्कुमो फे़न्जेॽ ताङ् वाःप्मासि याःम्बक्किन् खे़ने़ॽइन्लो॥ 27 हे़क्केःल्ले़ खिनिॽ लुम्मो मनाहाॽनु माङ्निङ्वाॽपान् के़बाःप्पा अनातोतबा यर्मियान् खे़ने़ॽ थेआङ् हे़क्के मे़म्मे़त्ते के़गत्तुबाबे? 28 बेबिलोनओ खे़ल्ले़ आनिगे अक्तङ्बा इङ्घङ् हाक्तिगे़आङ् वाॽ, ‘खिनिॽ खे़प्मो यरिक् ये़न् के़म्दे़म्सि के़म्देॽरिआङ् के़वयिॽ हे़क्क्याङ् हिम्धाःङ् चोगे़म्मे़ॽआङ् युङे़म्मे़ॽ, सिङ्सेॽ फुङ्इक् केःत्ते़म्मे़ॽ, खे़ब्याङ् खे़प्मो के़धोःक्पा कुजान् चे़म्मे़ॽ॥’” 29 निङ्वाॽफुसाम्बा सपन्याहःल्ले़ खे़न् सक्इङ्घङ्ङिन् यर्मियान् निरु पिरु॥ 30 खे़ब्याङ् यहवे दाङ्बे़ल्ले़ अक्तङ्बा कुइङ्घङ्ङिन् यर्मियाओ के़रे़, 31 “मे़दे़म्सु मे़देॽरुसिआङ् के़वाॽबाहाॽ के़रे़क् इङ्घङ् हाक्ते़से़ॽ, ‘नेहेमलाम के़युङ्बा समायाहःल्ले़ कुयाःम्बेओ यहवे दाङ्बे़ल्ले़ अक्खे पाःत्तुॽ, आङ्गाॽ पाङ्माए मे़म्बाङ्ङे खे़न् समायाहःल्ले़ माङ्निङ्वाॽपान् पाःत्तुआङ् इङ्ले़क्पा कुबाःन्नो नसान् चोःक्मा के़बाङ्घि॥ 32 खे़ल्ले़चोगुल्ले़ खे़न् नेहेमलाम के़युङ्बा समायाहःन् नु कुमुइॽदाङ्साहाॽ खुम्दिङ् पिरुङ्सिङ्ॽ॥ खे़ल्ले़ आत्तिन् कुमुॽइदाङ्साहाॽआङ् खिनिॽलुम्मो कुहिङ्वे़त् मे़न्याःक्ने़न्, आङ्गाॽ आमनाहाॽरे़ लागि चोगुङ्बा नुबा याःम्बक्किन् खे़ल्ले़ निमा मे़घोसुन्ॽ थेआङ्भे़ल्ले़ खे़ल्ले़ आङ्गाॽ आमनाहाॽ आदक्ले़ङ्वाओ पिफ्युङ् चोःक्मा हुसुसिआङ् वये़॥ आङ्गाॽ कन् यहवे दाङ्बे़ल्ले़ पाःत्तुङ्ङाङ् वाॽरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.