यर्मिया 28 - लिम्बुइङ्ले़क् माङ्निङ्वाॽपान् के़बाःप्पा हनन्याहःन् 1 हाबा खे़न् तङ्बे, अज्जुरले़ कुस्सा गिबोन के़युङ्बा माङ्निङ्वाॽपान् के़बाःप्पा हनन्याहःल्ले़ यहवे दाङ्बे़ल्ले़ कुहिम्मो निङ्वाॽफुसाम्बाहाॽ नु मनाहाॽरे़ खुन्छिॽ तगि आङ्गाॽ कन् पाःन्निन् मे़त्ताङ्ङिल्ले़ सिदकियाहःल्ले़ यहुदाओ हाङ्युक् चोगुबा तङ्बे लिसिआङ् ङासिगेक्पा ला के़रे़आङ् वये़॥ 2 मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, “आङ्गाॽ बेबिलोनबा हाङ्ङिल्ले़ वेॽहाॽ एःप्मासि कुघे़ःप्सिङ्ङिन् ए़क्खुङ् पिरुङ्ॽ॥ 3 बेबिलोनबा हाङ् नबुकदनेसरे़ल्ले़ यहवे दाङ्बे़ल्ले़ कुहिम्मोलाम् कॽयोनु बेबिलोन तेॽरुआङ् वये़बा के़रे़क् चिगक्वाहाॽ, आल्ल तङ्बे ने़त्छिरे़सा आङ्गाॽ याम्मो कन् ते़न्नोए काक् नुःक्तुङ् फे़त्तुङ्ॽ॥ 4 आङ्गाॽ यहोयाकिमे़ल्ले़ कुस्सा, यहुदाबा हाङ् यहोयाकिने़न् नु बेबिलोनओ मे़दे़म्सु मे़देॽरुसिबा यहुदाबा के़रे़क् मनाहाॽनु सोरिक् नुःक्तुङ् फे़त्तुङ्सिङ्ॽ॥ हे़क्क्याङ् से़क्खासाङ् आङ्गाॽ बेबिलोनबा हाङ्ङिल्ले़ कुघे़ःप्सिङ्ङिन् ए़क्खुङ्ॽ॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽ॥” 5 खे़ब्याङ् यहवे दाङ्बे़ल्ले़ कुहिम्मो के़ये़प्पा निङ्वाॽफुसाम्बाहाॽ नु के़रे़क् मनाहाॽरे़ खुन्छिॽ तगि माङ्निङ्वाॽपान् के़बाःप्पा यर्मियाःल्ले़ माङ्निङ्वाॽपान् के़बाःप्पा हनन्याहःन् मे़त्तु, 6 “ओरो, हे़क्केए पोङ्ल! यहवे दाङ्बे़ल्ले़ हे़क्केए चोगुर! खे़ने़ॽ के़बाःत्तुबा कन् माङ्निङ्वाॽपान्हाॽ के़रे़क् खुने़ॽ के़त्तु के़बिर॥ हे़क्क्याङ् यहवे दाङ्बे़ल्ले़ कुहिम्मोबा चिगक्वा सामाहाॽ नु मे़दे़म्सु मे़देॽरुसिबा के़रे़क् मनाहाॽ खुने़ॽ बेबिलोनलाम्बा कन् ते़न्नो नुःक्तु फे़त्तुसिर॥ 7 करसाङ् आङ्गाॽ खे़ने़ॽ नु कन् के़रे़क् मनाहाॽरे़ मे़घे़प्सुर मे़त्तुङ्सिङ्बा पाःन्जाःक्किन् खे़ने़ॽ खे़प्से़ॽ॥ 8 आङ्गाॽ हे़क्क्याङ् खे़ने़ॽनुःल्ले़ तगि के़दाबा माङ्निङ्वाॽपान् के़बाःप्पाहाॽरे़ यरिक् हाङ्जुम्हाॽओ थङ् पोङ्ॽ, साक्वान् ताःॽ खे़ब्याङ् तुक्मा लाःक्मा मिङ्देॽ पोक् फाॽआङ् माङ्निङ्वाॽपान् मे़बाःत्तुआङ् वये़॥ 9 कर आत्तिन् माङ्निङ्वाॽपान् के़बाःप्पाल्ले़ नुॽमादामा सनारुङ् ताःॽ फाॽआङ् माङ्निङ्वाॽपान् पाःत्तुॽ, खे़ल्ले़ पाःत्तुबा पाःन्निन् कुजे़क् के़त्ताङ्लक् से़क्खाए यहवे दाङ्बे़ल्ले़ खे़न् पाङ्घुबारे़त्छ फाॽआङ् कुसिङ् निःत्ते़त्॥” 10 खे़ब्याङ् हनन्याहःल्ले़ यर्मियाःल्ले़ कुभक्ताङ्ङोलाम् खे़ःप्सिङ्ङिन् लःत्तुआङ् खे़न् फल्लक् ए़क्खु, 11 हे़क्क्याङ् खे़ल्ले़ के़रे़क् मनाहाॽरे़ खुन्छिॽ तगि मे़त्तुसि, “यहवे दाङ्बे़ल्ले़ अक्खे पाःत्तु, ‘अक्खेलॽरिक्के नबुकदनेसर हाङ्ङिल्ले़ यरिक् मे़न्छाम् सुवाङ्हाॽरे़ खुन्छिॽ फक्ताङ्ङो फत्छुबा खे़ःप्सिङ्ङिन् तङ्बे ने़त्छिरे़सा आङ्गाॽ ए़क्खुङ् पिरुङ्॥’” खे़ब्याङ् माङ्निङ्वाॽपान् के़बाःप्पा यर्मियान् खे़प्मोनु थासिङ्ङाङ् पे॥ 12 माङ्निङ्वाॽपान् के़बाःप्पा हननियाःल्ले़ माङ्निङ्वाॽपान् के़बाःप्पा यर्मियाःल्ले़ कुभक्ताङ्ङोलाम् खे़ःप्सिङ्ङिन् ए़क्खु पिरुबा कुभा ये़म् एगाङ् यहवे दाङ्बे़ल्ले़ कुइङ्घङ्ङिन् यर्मियाओ के़रे़, 13 “पेगे़ॽआङ् हनन्याहःन् मे़त्ते़ॽ, ‘यहवे दाङ्बे़ल्ले़ अक्खे पाःत्तुआङ् वाॽ, खे़ने़ॽ सिङ्ङिल्ले़न् खे़ःप्सिङ्ङिङ्ग ए़ङ्मा के़सुक्तुबिला, कर आङ्गाॽ खे़ल्ले़ कुले़क्वाओ फे़न्जेॽ खे़ःप्सिङ् कुःत्तुङ्ॽ॥ 14 आङ्गाॽ मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ पाःत्तुङ्ॽ, कन् के़रे़क् मे़न्छाम् सुवाङ्हाॽ फे़न्जेॽ खे़ःप्सिङ्ङिन् कुःत्तुङ्सिङ् हे़क्क्याङ् कङ्हाॽरे़ बेबिलोनबा नबुकदनेसर हाङ्ङिल्ले़ कुयाःम्बक् मे़जोगुर याःन्दुङ्सिङ्ॽ, आङ्गाॽ ताम्भुङ्ङोबा थक्साहाॽआङ् खुने़ॽ कुयुक्को वाॽमा पाङ्घुङ्सिङ्॥’” 15 हे़क्क्याङ् यर्मियाःल्ले़ माङ्निङ्वाॽपान् के़बाःप्पा हनन्याहःन् अक्खे मे़त्तु, “हनन्याहए, खे़प्से़ॽ! यहवे दाङ्बे़ल्ले़ खे़ने़ॽ के़बाङ्घे़बा मेःन्॥ हे़क्केसाङ् खे़ने़ॽ कन् मनाहाॽ लत्छा इङ्ले़क्पा पाःन्निन् नसान् चोःक्मा के़बाङ्घुसिर के़वाॽ॥ 16 खे़ल्ले़चोगुल्ले़ यहवे दाङ्बे़ल्ले़ अक्खे पाःत्तुॽ—‘आम्भा कन् तङ्बेओसा खे़ने़ॽ के़सिःॽ थेआङ्भे़ल्ले़ खे़ने़ॽ यहवे दाङ्बे़ल्ले़ कुदक्ले़ङ्वाओ मनाहाॽ इङ्भो के़जोगुसिआङ् के़वाॽ॥’” 17 हे़क्क्याङ् हाबा खे़न् तङ्बेबा नुसि लाओ माङ्निङ्वाॽपान् के़बाःप्पा हनन्याहःन् स्ये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.