यर्मिया 27 - लिम्बुयर्मियाःल्ले़ कुभक्ताङ्ङो खे़ःप्सिङ् 1 यहुदाबा हाङ् योसियाहःल्ले़ कुस्सा सिदकियाहःल्ले़ हाङ्युक् चोःक्मा हेःक्तुबा ये़म्मो यहवे दाङ्बे़ल्ले़ कुइङ्घङ्ङिन् यर्मियाओ के़रे़॥ 2 यहवे दाङ्बे़ल्ले़ आङ्गाॽ अक्खे मे़त्ताङ्, “सिङ् नु सिहोब् इदाःक्हाॽलाम्बा लत्छा खे़ःप्सिङ् चोगे़ॽ, हे़क्क्याङ् के़सित्लाओ फत्छे़ॽ॥ 3 खे़न् एगाङ् यरुसले़ःम्मो सिदकियाह हाङ्ङिल्ले़ कुदुम्से़ के़दाबा ए़दोम, मोआब, अम्मोन, तुरोस नु सिदोनबा हाङ्लाइङ्बाहाॽलाम् खे़न् लाजेॽहाॽओबा हाङ्हाॽ लत्छा इङ्घङ्धिक् मे़त्ते़से़ॽ॥ 4 खे़न् हाङ्लाइङ्बाहाॽरे़ खुन्छिॽ दाङ्बाहाॽरे़ लागि कन् इङ्घङ्ङिन् पिरे़से़ॽआङ् अक्खे मे़त्ते़से़ॽ, मुक्साम्दाङ्बा यहवे दाङ्बा, इस्राइलबा निङ्वाॽफुमाङ्ङिल्ले़ अक्खे पाःत्तुॽ, ‘खिनिॽ दाङ्बाहाॽ अक्खे मे़त्ताम्सिम्मे़ॽ— 5 कन् इक्सादिङ् खाम्बेःक्के़न्, कन् इक्सादिङ् खाम्बेःक्मो के़युङ्बा मनाहाॽ हे़क्क्याङ् थक्सापुसाहाॽ आङ्गाॽए पयम् यम्बा आमुक्साम् नु आधुम्मिल्ले़ चोगुङ्सिङ्ङाङ् वाॽ, खे़ब्याङ् आङ्गाॽ आत्तिन् पिमा निङ्वाॽ चोगुङ् आङ्गाॽ खे़न् पिरुङ्ॽ॥ 6 आङ्गाॽ आसे़वारोबा बेबिलोनबा हाङ् नबुकदनेसरे़ल्ले़ कुयुक्को कन् के़रे़क् के़सुवाङ्हाॽ आङ्गाॽए थासुङ्सिङ् हे़क्क्याङ् आङ्गाॽ ताम्भुङ्ङोबा थक्साहाॽआङ् खुने़ॽ कुयुक्को वाॽ पाङ्सुङ्सिङ्ङाङ् वाॽ॥ 7 के़रे़क् मे़न्छाम् सुवाङ्हाॽरे़ खुने़ॽ कुयाःम्बक् मे़जोगुॽ हे़क्क्याङ् खुने़ॽ कुसुवाङ्हाॽरे़ खुन्छिॽ मे़क्मा ये़म्मिन् मे़न्दाए थारिक् खे़ङ्हाॽरे़ खुने़ॽ कुस्सान् नु कुम्मे़न्छाॽइन् याःम्बक् मे़जोगु मे़बिरुसिॽ॥ खे़न् एगाङ् यरिक् सुवाङ्हाॽ नु यम्बयम्बा हाङ्हाॽरे़ बेबिलोने़न् मे़नाःन्दुआङ् खे़प्मो हाङ्युक् मे़जोगुॽ॥ 8 कर कुभा मे़न्छाम् सुवाङ् इग्र हाङ्जुम्मिल्ले़ कुघे़ःप्सिङ्ङिन् पङ्मा इग्र कुयुक्को वाॽमा निङ्वाॽ मे़जोगुन्ने़भग्र खे़न् नबुकदनेसरे़ल्ले़ हदॽ मे़मे़क्खुन्ल थारिक् आङ्गाॽ खे़न् मे़न्छाम् सुवाङ्ङो थङ्, साक्वान् हे़क्क्याङ् मिङ्देॽ तारुङ्ङाङ् खुम्दिङ् पिरुङ्ॽ, यहवे दाङ्बे़ल्ले़ पाःत्तुॽ॥ 9 “‘कल्ले़चोगुल्ले़ खिनिॽ माङ्निङ्वाॽपान् के़बाःप्पाहाॽ, खागे़इक्पाहाॽ, से़प्माङ्ङिल्ले़ कुबे के़हम्बाहाॽ, के़सिबा मनाःल्ले़ कुसाम् मुरा के़मे़प्पाहाॽ नु मिक्ले़ःङ्मा याःम्बक् के़जोःक्पाहाॽरे़ मे़बाःत्तुबान् मे़घे़प्से़म्मिन्ने़ॽ, खे़ङ्हाॽरे़ मे़बाःत्तुॽ, “बेबिलोनबा हाङ्ङिल्ले़ कुयुक्को खिनिॽ वाॽमा मे़बोङ्ने़न्॥” 10 खे़ङ्हाॽरे़ खिनिॽ इङ्ले़क्पा माङ्निङ्वाॽपान्हाॽ के़म्मे़त्तिर के़म्बत्छि हे़क्क्याङ् खे़ल्ले़ कुले़क्वा खिनिॽ आबाङे लाजेॽलाम्बा साॽरिक् माःङ्घा वेॽ ते़न्नो के़म्देॽरि॥ आङ्गाॽ खिनिॽ नाःत्निङ् लःत्निङ् हे़क्क्याङ् खिनिॽ खाप्पुथ्यःङ् के़मे़गिॽ॥ 11 कर आत्तिन् सुवाङ्हाॽरे़ बेबिलोनबा हाङ्ङिल्ले़ कुघे़ःप्सिङ्ङिन् पङ्मा हे़क्क्याङ् कुयुक्को वाॽमा निङ्वाॽ मे़जोगुॽ, आङ्गाॽ खे़ङ्हाॽ आबाङे खुन्छिॽ लाजेॽओ वाॽमा नु आबाङे लाजेन् थोःङ्मा याःन्ममाआङ् चामा पिरुङ्सिङ्ॽ॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽ॥’” 12 आङ्गाॽ हाबा खे़न् पाःन्निन् यहुदाबा हाङ् सिदकियाहःन् मे़त्तुङ्, “बेबिलोनबा हाङ्ङिल्ले़ कुघे़ःप्सिङ्ङिन् पङ्मा इग्र खुने़ॽ कुयुक्को वाॽमा ते़न्दे़ॽ॥ खुने़ॽ नु खे़ल्ले़ कुमनाहाॽरे़ लागि याःम्बक् चोगे़ॽ हे़क्क्याङ् खे़ने़ॽ के़हिङ्॥ 13 थेआङ् खे़ने़ॽ नु के़मनाहाॽ थङ्, साक्वान् इग्र मिङ्देॽलाम्बा के़स्ये़ॽइबाबे? बेबिलोनबा हाङ्ङिल्ले़ कुयुक्को मे़न्वाॽमना सुवाङ्हाॽ हे़क्तङ्बा मे़बोङ् फाॽआङ् यहवे दाङ्बे़ल्ले़ पाःत्तुआङ् वाॽ॥ 14 खे़ल्ले़ कुयुक्को वाॽमा मे़नुॽने़न् के़बाःप्पा माङ्निङ्वाॽपान् के़बाःप्पाहाॽरे़ खुन्छिॽ पाःन्निन् मे़घे़प्से़म्मिन्ने़ॽ॥ खे़ङ्हाॽरे़ खिनिॽ इङ्ले़क्पा सुजाहाॽ के़म्बिरिर के़म्बत्छि॥ 15 यहवे दाङ्बे़ल्ले़ अक्खे पाःत्तुॽ, ‘आङ्गाॽ खे़न् माङ्निङ्वाॽपान् के़बाःप्पाहाॽ पाङ्घुसिबा मेःन्! खे़ङ्हाॽरे़ आङ्गाॽ आमिङ्ङो खिनिॽनु इङ्ले़क्पा पान् मे़बाःत्तुर मे़बत्, खे़ल्ले़चोगुल्ले़ आङ्गाॽ खिनिॽ कन् लाजेःन्लाम् नाःत्निङ्दे़निङ्॥ खिनिॽ के़रे़क् के़स्ये़ॽइ॥ खिनिॽ हे़क्क्याङ् कन् माङ्निङ्वाॽपान् के़बाःप्पाहाॽ के़रे़क् के़मे़गिॽ॥’” 16 हे़क्क्याङ् निङ्वाॽफुसाम्बाहाॽ नु मनाहाॽ मे़त्तुङ्सिङ्, “यहवे दाङ्बे़ल्ले़ अक्खे पाःत्तुॽ, ‘माङ्हिम्मोबा याङ्साकुन्धेन् बेबिलोनलाम्बा मे़नुःक्तु मे़दारुॽ फाॽआङ् माङ्निङ्वाॽपान् के़बाःप्पाहाॽरे़ मे़बाःत्तुबा पाःन्निन् मे़घे़प्से़म्मिन्ने़ॽ॥ खे़ङ्हाॽरे़ खिनिॽ इङ्के़म्ले़क्तिर मे़बत्॥ 17 खे़ङ्हाॽरे़ खुन्छिॽ पाःन्निन् मे़घे़प्से़म्मिन्ने़ॽ॥ बेबिलोनबा हाङ्ङिल्ले़ कुयुक्को वये़म्मे़ॽ हे़क्क्याङ् खिनिॽ के़हिङिॽ॥ थेआङ् कन् ये़क्यक्किन् मे़क्ल याःम्माबे? 18 खे़ङ्हाॽ से़क्खाए माङ्निङ्वाॽपान् के़बाःप्पासि हे़क्क्याङ् खे़ङ्हाॽरे़ आङ्गाॽ आइङ्घङ्ङिन् मे़बाःत्तुआङ् मे़वाॽने़भग्र माङ्हिम् नु हाङ्हिम्मो के़नम्बा याङ्साकुन्धेन् बेबिलोन ये़क्यक्को तेॽमा मे़बाङ्घे़से़न्ने़ॽ फाॽआङ् खे़ङ्हाॽरे़ मुक्साम्दाङ्बा यहवे दाङ्बान् पेलि मे़भाक्तुर॥ 19-20 “थेआङ्भे़ल्ले़ बेबिलोनबा हाङ् नबुकदनेसरे़ल्ले़ यहुदाबा हाङ् यहोयाकिमे़ल्ले़ कुस्सा यहोयाकिने़न् हे़क्क्याङ् यहुदा नु यरुसले़मबा मिङ्सोदाङ्बा मनाहाॽ बेबिलोनओ ते़म्सुसिआङ् तेॽरुसिल्ले़ खुने़ॽ खे़प्मोबा सित्लाङ्हाॽ, पयम् यम्बा कासा फसिहाॽ, पित्लाधाहाॽ हे़क्क्याङ् माङ्हिम्मोबा वेॽ याङ्साकुन्धेहाॽ मे़देॽरुन्॥ 21 यरुसले़मबा माङ्हिम्मो नु हाङ्हिम्मो के़युङ्बा के़याःक्पा के़रे़क् याङ्साकुन्धेहाॽरे़ कुयाःम्बेओ यहवे दाङ्बा इस्राइलबा मुक्साम्दाङ्बा निङ्वाॽफुमाङ्ङिल्ले़ अक्खे पाःत्तुॽ, खे़न् खे़प्से़म्मे़ॽ॥ 22 ‘खे़ङ्हाॽ के़रे़क् बेबिलोनओ मे़देॽरुॽ हे़क्क्याङ् आङ्गाॽ याम्मो खे़न् कुलासे़ मना मे़म्बाङ्सिङ्ङे थारिक् आम्भा खे़प्मोए याःक्॥ खे़न् एगाङ् आङ्गाॽ खे़न् के़रे़क् याङ्साकुन्धेहाॽ नुःक्तुङ् फे़त्तुङ्ॽ हे़क्क्याङ् यरुसले़ःम्मो याम्मो युक्खुङ्ॽ॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽआरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.