यर्मिया 25 - लिम्बुथाङ्गे़त् पिसाङ्लाम् के़युबा निङ्मिहाॽ 1 योसियाहःल्ले़ कुस्सा यहोयाकिमे़न् यहुदाबा हाङ् पोःक्खे़बा लिसिगेक्पा तङ्बेओ यहुदाबा मनाहाॽरे़ खुन्छिॽ याःम्बेओ यहवे दाङ्बे़ल्ले़ कुइङ्घङ्ङिन् यर्मियाओ के़रे़॥ 2 कल्ले़चोगुल्ले़ यर्मियाःल्ले़ यहुदा नु यरुसले़ःम्मोबा के़रे़क् मनाहाॽ मे़त्तुसि, 3 “आमोनरे़ कुस्सा यहुदाबा हाङ् योसियाहःल्ले़ हाङ्युक् चोगुबा थिबोङ्ङाङ् सुम्सिगेक्पा तङ्बेआङ्धो आइन् थारिक् कन् निबोङ्ङाङ् सुम्सि तङ्बे खाराक् यहवे दाङ्बे़ल्ले़ आङ्गाॽ इङ्घङ् पिआर वाॽ॥ हे़क्क्याङ् आङ्गाॽ खुने़ॽ खे़न् कुबाःन्जाक्किन् खिनिॽ ए़त्ले़ङ् मे़त्निङ्ल वाॽआ॥ कर खिनिॽ थेआङ् निङ्वाॽए मे़म्बिए के़वयि॥” 4 “यहवे दाङ्बे़ल्ले़ कुसे़वारोबा, माङ्निङ्वाॽपान् के़बाःप्पाहाॽ खिनिॽओ पाङ्घुसिरए वाॽ, हे़क्केसाङ् खे़न् पाःन्नो खिनिॽ ने़क्खोॽइन् अयाक् के़म्मे़त्तुम्मिन्॥ 5 खे़ङ्हाॽरे़ के़म्मे़त्तिॽ, ‘खिनिॽ आबाङे हिङ्मन्बा ताप्फे़ःम्बा सुत्ना नु फे़न्याःम्बक्हाॽलाम् नुःक्खे़म्मे़ॽ हे़क्क्याङ् यहवे दाङ्बे़ल्ले़ खिनिॽ नु खिनिॽ पाधे़बाहाॽ सदादिङ्ले़ लागि के़बिरिबा लाजेॽओ खिनिॽ युङ्मा के़घोसुम्ॽ॥ 6 खिनिॽ वेॽ साम्माङ्हाॽ से़वा मे़मे़त्ते़म्सिम्मिन्ने़ॽ हे़क्क्याङ् आबाङे हुक्किल्ले़ के़जोगुम्सिम्बा नावाइत्लाहाॽ से़वा मे़मे़त्ते़म्सिम्मिन्ने़ॽआङ् आङ्गाॽ आसिक् मे़भोक्खे़म्मिन्ने़ॽ॥ खे़ब्याङ् आङ्गाॽ खिनिॽ थेआङ् खुम्दिङ् मे़बिनिङ्ङिन्ॽ॥’” 7 यहवे दाङ्बे़ल्ले़ पाःत्तुॽ, “कर खिनिॽ आबाःन्निन् खे़म्मा के़न्दे़न्दिन्, खे़ल्ले़ कुले़क्वा आबाङे हुक्किल्ले़ के़जोगुम्बा नावाइत्लाहाॽलाम्बा खिनिॽ आङ्गाॽ आसिक् के़भोःक्खुम् हे़क्क्याङ् आबाङे सम्धाङ् खुम्दिङ् के़दारुम्॥ 8 कल्ले़चोगुल्ले़ आङ्गाॽ मुक्साम्दाङ्बा यहवे दाङ्बे़ल्ले़ अक्खे पाःत्तुङ्ॽ, खिनिॽ आङ्गाॽ आबाःन्जाःक्किन् नुरिक् के़ङ्घे़प्सुम्मिन्बाल्ले़ चोगुल्ले़, 9 थो पिसाङ्बा के़रे़क् मे़न्छाम् सुवाङ्हाॽ नु बेबिलोनबा हाङ् आसे़वारोबा नबुकदनेसरे़ल्ले़ कुउःत्छे़ आङ्गाॽ पाङ्घुङ्सिङ्ल पत्ता॥ कन् लाजेन् नु कप्मोबा यक्युङ्बाहाॽ हे़क्क्याङ् हिम्बेसाङ्बा वेॽ के़रे़क् मे़न्छाम् सुवाङ्हाॽनु थङ् चोःक्मारे़ लागि आङ्गाॽ खे़ङ्हाॽ तारुसिङ्ल पत्ता॥ कन् मे़न्छाम् सुवाङ्ङिन् नु कल्ले़ कुहिम्बेसाङ्बा मे़न्छाम् सुवाङ्हाॽ आङ्गाॽ मे़क्खुङ्सिङ्ॽ हे़क्क्याङ् खाप्पुथ्यःङ् चोगुङ्सिङ्ङाङ् ले़रुङ्सिङ्ॽ, खे़न् मे़निसुआङ् खे़प्मोलाम्बा लाङ्गे़घेःक्पाहाॽ के़रे़क् चिजिङ् यङ्मा मे़सिरो, हे़क्क्याङ् खे़न् ये़क्यक्किन् कुनामे़न्छाॽ मे़प्मा चाहाक् चोगुङ्ॽ॥ आङ्गाॽ यहवे दाङ्बान् पाराङ्ङाङ् वाॽ॥ 10 आङ्गाॽ खे़ङ्हाॽरे़ खुन्छिॽ सःप्मा नु ये़ये़लॽमा इक्लान् हे़क्क्याङ् ते़न्धाम् मेःक्खिम्बा साभःङ्जाःल्ले़ सिराॽथाङ्मा इक्लान् साक्तुङ् पिरुङ्सिङ्ॽ॥ खे़ङ्हाॽरे़ खुन्छिॽ सेमिओ ओःत्ति होप् हे़क्क्याङ् लुङ्सुम् लाइक्पान् खे़म्मे़दे़त्ने़न्॥ 11 कन् के़रे़क् लाजेन् चिजि खक्खक् नु मुरे़क् खारे़क् पोङ्ॽ हे़क्क्याङ् कन् सुवाङ्हाॽरे़ नुबोङ् तङ्बे थारिक् बेबिलोनबा हाङ्ङिल्ले़ कुसे़वा मे़जोगुॽ॥ 12 “खे़न् नुबोङ् तङ्बे एगाङ् आङ्गाॽ बेबिलोने़न् नु कुहाङ्ङिन् खे़ङ्हाॽरे़ खुन्छिॽ लायोल्ले़ लागि खुम्दिङ् पिरुङ्सिङ्ॽ॥ आङ्गाॽ खे़न् लाजेन् मे़क्खुङ् हे़क्क्याङ् सदादिङ्ले़ लागि खाप्पुथ्यःङ् चोगुङ्ङाङ् ले़रुङ् ने़स्सुङ्ॽ॥ 13 आङ्गाॽ यर्मियालाम्बा पाःत्तुङ्बा के़रे़क् ये़त्तुक्खेहाॽ, इक्सादिङ् खाम्बेःक्मोबा मे़न्छाम् सुवाङ्हाॽरे़ खुन्छिॽ सम्धाङ् तारुङ्ॽ फाॽआङ् किबु लाम्सुङ्सिङ्ङाङ् वयाङ् इग्र कन् साप्पन्नो साप्ते़बा के़रे़क् ये़त्तुक्खेहाॽ बेबिलोन लाजेॽ सम्धाङ् तारुङ्ङाङ् आङ्गाॽ खे़न् खुम्दिङ् पिरुङ्ॽ॥ 14 खे़ङ्हाॽरे़ मे़जोगुबा याःम्बक्किल्ले़ लागि आङ्गाॽ बेबिलोनबा मनाहाॽ खुम्दिङ् पिरुङ्सिङ्ॽ हे़क्क्याङ् यरिक् मे़न्छाम् सुवाङ्हाॽ नु यम्बयम्बा हाङ्हाॽरे़ खे़ङ्हाॽ योक् मे़जोगुसिॽ॥” निङ्वाॽफुमाङ्ङिल्ले़ कुसाक्के़न्ले़ खोर्या 15 यहवे दाङ्बा इस्राइलबा निङ्वाॽफुमाङ्ङिल्ले़ आङ्गाॽ अक्खे मे़त्ताङ्, “आङ्गाॽ आसाक्के़न्निल्ले़ के़दिम्बा लत्छा खोर्याधिक् कॽयो वाॽ॥ आङ्गाॽ खे़ने़ॽ पाङ्ने़बा के़रे़क् मे़न्छाम् सुवाङ्हाॽओ कन् खोर्यान् तेॽरे़ॽ हे़क्क्याङ् खे़ङ्हाॽरे़ मे़धुङुर याःन्दे़से़ॽ॥ 16 खे़न् खोर्याओलाम्बा मे़धुङुल्ले़ खे़ङ्हाॽ चोनाःम् चोनाःम् मे़लॽआङ् मे़नाङ् थेआङ्भे़ल्ले़ खे़ङ्हाॽरे़ खुन्छिॽ तक्ले़ङ्वाओ आङ्गाॽ थङ् के़जोःक्पाहाॽ पाङ्घुङ्सिङ्ल पत्ता॥” 17 खे़ल्ले़चोगुल्ले़ आङ्गाॽ यहवे दाङ्बे़ल्ले़ कुहुक्कोलाम्बा खे़न् खोर्यान् ताःक्तुङ् हे़क्क्याङ् खुने़ॽ आङ्गाॽ पाङ्घाङ्बा के़रे़क् मे़न्छाम् सुवाङ्हाॽओ खे़न् तेॽरुङ् खे़ब्याङ् खे़ङ्हाॽरे़ खे़न् खोर्यान् मे़धुङुर याःन्दुङ्सिङ्॥ 18 खे़न् ते़न्हाॽ चिजि खक्खक् नु ओमे़प्मा सुक्मे़न्दे़प्मनाबा मुरे़क् खारे़क्पा ये़ःङ्घादे़न् हे़क्तङ्बा पोङ्ल हे़क्क्याङ् खे़ङ्हाॽरे़ खुन्छिॽ मिङ्ङिन् मे़बाःत्तुआङ् मनाहाॽरे़ साक्मुरा माङ्दे मे़मे़त्तुसिर फाॽआङ् यरुसले़म नु यहुदाबा के़रे़क् ये़क्यक्हाॽ, खे़प्मोबा हाङ्ङिन् नु लाम्लोबाहाॽ के़रे़क् खे़न् खोर्याओलाम्बा आङ्गाॽ थुङ्मा पाङ्घुङ्सिङ्॥ आइन् थारिक्साङ् मनाहाॽरे़ हे़क्केलॽरिक्के साक्मुरा मे़मे़त्तुसिॽ॥ 19 खे़न्नुःल्ले़ वेॽ मिस्रबा हाङ् फारो, युक्साबाहाॽ नु लाम्लोबाहाॽ, के़रे़क् मिस्रिहाॽ 20 हे़क्क्याङ् खे़न् लाजेॽओ के़वाॽबा के़रे़क् वेॽ लाजेॽओबाहाॽ, खे़ब्याङ् उज लाजेॽबा के़रे़क् हाङ्हाॽ, पलिस्तिहाॽरे़ खुन्छिॽ ये़क्यक्हाॽ, (अस्कलोन, गाजा, एक्रोन हे़क्क्याङ् के़रे़क् अस्दोदबा के़हिङ्बा के़याःक्पाहाॽ) 21 ए़दोम, मोआब नु अम्मोने़न्, 22 तुरोस नु सिदोनबा के़रे़क् हाङ्हाॽ, वरःङ् नाधाःम्बिबा लाजेॽहाॽओबा के़रे़क् हाङ्हाॽ, 23 ददान, तेमा नु बुज, हे़क्क्याङ् माःङ्घा माःङ्घाबा ते़न्हाॽओ के़युङ्बा के़रे़क्, 24 अरब लाजेॽबा के़रे़क् हाङ्हाॽ नु मुरे़क् खारे़क्पा ये़ःङ्घादे़न्नो के़युङ्बा वेॽ लाजेॽबाहाॽरे़ खुन्छिॽ के़रे़क् हाङ्हाॽ, 25 जिम्रि, एलाम नु मादिबा के़रे़क् हाङ्हाॽ, 26 खे़ब्याङ् थाङ्गे़त् पिसाङ्बा, निःत्ताङ् नु माःङ्घा के़युङ्बा के़रे़क् हाङ्हाॽ, थिक्थिक् लॽरिक् आबाङे नु के़रे़क् हाङ्हाॽ इक्सादिङ् खाम्बेःक्मो के़वाॽबा के़रे़क् सुवाङ्हाॽ खे़न् खोर्यान् मे़धुङुर याःन्दुङ्सिङ्॥ के़रे़क्नुःल्ले़ एगाङ् बेबिलोनबा हाङ्ङिल्ले़आङ् आसिक्किल्ले़ के़दिम्बा खे़न् खोर्यान् थुङुॽ॥ 27 खे़न् एगाङ् यहवे दाङ्बे़ल्ले़ आङ्गाॽ अक्खे मे़त्ते़से़ॽ मे़त्ताङ्, “मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, ‘आङ्गाॽ आसाक्के़न्निल्ले़ के़दिम्बा कन् खोर्यान् थुङे़म्मे़ॽ, मआसिम्मे़ॽ हे़क्क्याङ् पे़से़म्मे़ॽ॥ हे़क्क्याङ् आभे़ल्ले़आङ् पोःक्मा मे़न्छुक्के हाम्ब्रिक् चोःन्दे़म्मे़ॽ॥ आङ्गाॽ खिनिॽ लुम्मो पाङ्घुङ्बा थङ्ङिल्ले़ चोगुल्ले़ हे़क्के पोङ्ॽ॥’ 28 खे़ङ्हाॽरे़ खे़न् खोर्यान् के़हुक्कोलाम्बा ताःक्माआङ् थुङ्मा मे़न्दे़न्ने़न्ने़भग्र खे़ङ्हाॽ मे़त्ते़से़ॽ, ‘मुक्साम्दाङ्बा यहवे दाङ्बे़ल्ले़ पाःत्तुॽ खिनिॽ खे़न् के़धुङुम्लए पोङ्॥ 29 आङ्गाॽ खाप्पुथ्यःङ् चोःक्मा के़बोङ्बा याःम्बक्किन् आङ्गाॽ आबाङे आये़क्यक्को हेःक्तुङ्ॽ॥ आनिगे खुम्दिङ् मे़ङ्घोए मे़ले़रिगे़ फाॽआङ् थे खे़ङ्हाॽरे़ मे़इःत्तुबि? मेःन्, खे़ङ्हाॽरे़ खुम्दिङ् मे़घोसुरए पोङ् थेआङ्भे़ल्ले़ आङ्गाॽ इक्सादिङ् खाम्बेःक्मोबा के़रे़क् मे़न्छाम् सुवाङ्हाॽओ ते़न्धङ् पोङ्ल चोगुङ्ॽ॥ आङ्गाॽ मुक्साम्दाङ्बा यहवे दाङ्बे़ल्ले़ पाःत्तुङ्ङाङ् वाॽ॥’ 30 “यर्मियाए, आङ्गाॽ पाःत्तुङ्बा के़रे़क् पाःन्हाॽ खे़ङ्हाॽरे़ मे़घे़प्सुर के़याःन्दुसिर पोङ्ॽ॥ खे़ने़ॽ कन् मनाहाॽ अक्खे मे़प्मासि पोङ्लो, “‘यहवे दाङ्बान् साङ्ग्राम्पेदाङ्लाम्बा हुःक्लो, साङ्ग्राम्पेदाङ्बा के़रे़क्नुःल्ले़ थाःङ्धाक्पा युङ्नादे़न्लाम्बा खुने़ॽ कुलाजेःल्ले़ कुदक्ले़ङ्वाओ आगिगिबा इक्ला लःत्तुरो, खुने़ॽ खाम्बेःक्मोबा मनाहाॽरे़ खुन्छिॽ तक्ले़ङ्वाओ हुःक्लो, चे़ल्ले़क्सेॽ के़दोॽबा मना कुइसिक् खुने़ॽ ने़भाक्वा फिङ्ल अःक्लो॥ इक्सादिङ् खाम्बेःक्मोबा के़रे़क् मनाहाॽरे़ खुने़ॽ कुइक्लान् मे़घे़प्सुरो॥ 31 खे़न् लोःक्खुबा इक्लान् इक्सादिङ् खाम्बेःक्माल्ले़ कुनुप्मो थारिक्के खे़म्दे़त्लो॥ थेआङ्भे़ल्ले़ इक्सादिङ् खाम्बेःक्मोबा मे़न्छाम् सुवाङ्हाॽ यहवे दाङ्बे़ल्ले़ पाःन्धिक्तुसिआङ् वाॽरो॥ हे़क्क्याङ् खुने़ॽ के़रे़क् मनाहाॽरे़ खुन्छिॽ तक्ले़ङ्वाओ खासे़न् लोःन्दुरो खे़ब्याङ् कुॽइगे़भे़म्बाहाॽ खुने़ॽ ताभेःल्ले़ से़रुसिरो॥ यहवे दाङ्बे़ल्ले़ कन् पाःत्तुआङ् वाॽरो॥’” 32 मुक्साम्दाङ्बा यहवे दाङ्बे़ल्ले़ अक्खे पाःत्तुरो, “ओमे़त्ते़म्मे़ॽ, ये़त्तुक्खेन् लत्छा सुवाङ्लाम्बा वेॽसमा सुवाङ् थारिक् पोर पेःक्लो हे़क्क्याङ् इक्सादिङ् खाम्बेःक्माल्ले़ वेॽसमा कुयाओ किप्मागे़घुबा यम्बा सुरित् केजङ्धिक् हुःक्ल पत्लो॥” 33 खे़न् ये़न्नो यहवे दाङ्बे़ल्ले़ स्ये़रुसिबाहाॽरे़ खुन्छिॽ चेहाॽ इक्सादिङ् खाम्बेःक्माल्ले़ लत्छा कुसुक्पोलाम् नासमा कुयाओ थारिक् मे़से़आङ् मे़ने़रो॥ आत्तिन्हाॽआङ् खे़ङ्हाॽरे़ खुन्छिॽ लागि मे़रिङ् मे़न्धक्ने़न्, आत्तिन्हाॽरे़आङ् खे़ङ्हाॽरे़ खुन्छिॽ चेहाॽ मे़म्भुक्खुसिन्नाङ् मे़न्लुप्तुसिन्॥ खे़न् चेहाॽ चिधुक् लुम्मनाबा हे़क्के खाम्मो आम्भा मे़ने़ मे़गन्लो॥ 34 खिनिॽ कुॽइगे़भे़म्बा मे़ल्लुक्कम्बासे, खिनिॽ यम्बा इक्लाओ हाबे़म्मे़ॽओ॥ मे़रिङ् थक्नु खाम्हिःक्को होःत्तासिम्मे़ॽओ॥ थेआङ्भे़ल्ले़ खिनिॽ से़प्मा ये़म्मिन् त्ये़आङ् वाॽरो नुबा खे़ःम्बान् हने़ यःप्पा हे़क्के फयःप्फयःप् के़यःप्सिरो॥ 35 मे़ल्लुक्कम्बाहाॽरे़ आत्तिआङ् खे़त्छिङ्मा लाम् मे़ङ्घोसुन्लो, मे़ल्लुक् लाम्गे़लोबाहाॽरे़ आत्तिआङ् चिङ्सिङ्मादे़न् मे़ङ्घोसुन्लो॥ 36 मे़ल्लुक्कम्बाहाॽ मे़हाःप्पान् खे़प्से़म्मे़ॽओ, मे़ल्लुक् लुप् लाम्गे़लोबाहाॽ मे़रिङ् मे़धक्पे़न् खे़प्से़म्मे़ॽओ, थेआङ्भे़ल्ले़ यहवे दाङ्बे़ल्ले़ खे़ङ्हाॽरे़ खुन्छिॽ मे़ल्लुक् चाराम्मादे़न्हाॽ मे़क्खुर पत्लो॥ 37 हे़क्क्याङ् यहवे दाङ्बे़ल्ले़ कुसाक्के़न्निल्ले़ चोगुल्ले़ खे़निॽ पित् चाराम्मा चिजि ये़म्ये़म्बादे़न्निन् खाप्पुथ्यःङ् पोङ्लो॥ 38 थे़रिङ्बे़ल्ले़ कुयाक्मादे़न् लुङ्फुक्कोन् सानाःप्मारे़ लागि ले़रुधरो हे़क्केलॽरिक्के यहवे दाङ्बे़ल्ले़ कुमनाहाॽ ले़रुसिआङ् वाॽरो॥ थङ्ङोबा किप्मागे़घुबा ताभे नु यहवे दाङ्बे़ल्ले़ यङ्मा के़गे़प्पा कुसाक्के़न्निल्ले़ कन् लाजेन् चिजि खक्खक् पोःक्खे़आङ् ने़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.