यर्मिया 24 - लिम्बुनुबा नु ताप्फे़ःम्बा पःत्छेॽहाॽ 1 बेबिलोनबा हाङ् नबुकदनेसरे़ल्ले़ यहुदाबा हाङ् यहोयाकिमिल्ले़ कुस्सा यहोयाकिने़न् नु यहुदाबा लाम्लोबा, चोबेगुहाॽ हे़क्क्याङ् वेॽ लुङ्गाम्मा सिङ्गाम्मा के़ले़बाहाॽ ते़म्सुसिआङ् यरुसले़ःम्लाम्बा बेबिलोनओ तेॽरुसि॥ खे़ब्याङ् यहवे दाङ्बे़ल्ले़ आङ्गाॽ माङ्हिम्मिल्ले़ कुदगि के़युङ्बा नॽइमा ने़त्छि पःत्छेॽहाॽ सुफोओ ओसेःन्धाक्ताङ्॥ 2 थिक्सिगेक्पा नॽइमाओ हाराए के़दुम्बा नुबा पःत्छेॽहाॽ यागे़ हे़क्क्याङ् निसिगेःक्पो ताप्फे़ःम्बा, चामा सुक्मे़न्दे़प्मनाबा पःत्छेॽहाॽ यागे़॥ 3 हे़क्क्याङ् यहवे दाङ्बे़ल्ले़ आङ्गाॽ सेःन्लाप्ताङ्, “यर्मियाए, खे़ने़ॽ थेःन् के़निसुर के़बत्?” आङ्गाॽ नुगप् पिरुङ्, “आङ्गाॽ पःत्छेॽहाॽ निसुङ्, नुबाहाॽग साॽरिक्के नुबा चोक् हे़क्क्याङ् ताप्फे़ःम्बाहाॽग के़रे़क् ताप्फे़ःम्बा चोक्, चामा के़नुॽबा मे़जोक्ने़न्॥” 4 हे़क्क्याङ् यहवे दाङ्बे़ल्ले़ कुइङ्घङ्ङिन् आङ्गाॽओ के़रे़, 5 “आङ्गाॽ यहवे दाङ्बा इस्राइलबा निङ्वाॽफुमाङ्ङिल्ले़ पाःत्तुङ्ॽ, बेबिलोनओ मे़देॽरुसिबा मनाहाॽ आङ्गाॽ कन् नुबा पःत्छेॽहाॽ हे़क्के ओमे़त्तुङ्सिङ् हे़क्क्याङ् आङ्गाॽ खे़ङ्हाॽ नुरिक् मे़त्तुङ्सिङ्ॽ॥ 6 आङ्गाॽ खे़ङ्हाॽ कम्ब्राङ् मे़त्तुङ्सिङ् हे़क्क्याङ् कन् लाजेॽओ याम्मो नुःक्तुङ् तारुङ्सिङ्ॽ॥ आङ्गाॽ खे़ङ्हाॽ चोगुङ्सिङ् कर मे़यन्छुङ्सिङ्ङिन्॥ आङ्गाॽ खे़ङ्हाॽ लेःत्तुङ्सिङ् कर मे़आःक्खुङ्सिङ्ङिन्॥ 7 आङ्गाॽ खे़ङ्हाॽ आङ्गाॽए यहवे दाङ्बाआ फाॽआङ् कुसिङ् निःप्मा निङ्वाॽ पिरुङ्सिङ्ॽ॥ हे़क्क्याङ् खे़ङ्हाॽ याम्मो आमना मे़बोङ् खे़ब्याङ् आङ्गाॽ खे़ङ्हाॽरे़ खुन्छिॽ निङ्वाॽफुमाङ् पोङ्ङा थेआङ्भे़ल्ले़ खे़ङ्हाॽ खुन्छिॽ के़रे़क् सिक्लुङ्माल्ले़ आङ्गाॽ ले़प्माङ् मे़नुःङ्ॽ॥ 8 “कर यहुदाबा हाङ् सिदकियाहःन्, खुने़ॽ कुसुहाङ्युक्पाहाॽ हे़क्क्याङ् कन् लाजेॽओ के़युङ्बा के़याःक्पा यरुसले़ःम्मोबा मनाहाॽ नु मिस्रओ के़बेःक्पाहाॽ, आङ्गाॽ खे़न् ताप्फे़ःम्बा चामा सुक्मे़न्दे़प्मनाबा पःत्छेॽहाॽ कुसिङ् इःत्तुङ्सिङ्ङाङ् हे़क्केलॽरिक्के ताप्फे़ःल्लिक् मे़त्तुङ्सिङ्ॽ॥ 9 आङ्गाॽ खे़ङ्हाॽ इक्सादिङ् खाम्बेःक्मोबा हाङ्जुम्हाॽओ नाःत्तुङ्देसुङ्सिङ्ॽ, खे़प्मो आङ्गाॽ खे़ङ्हाॽ चिःप्मा नु साःप्मा हे़क्क्याङ् एःप्मा नु माङ्दे साङ्ग्रा मे़प्मा चाहाक् चोगुङ्सिङ्ॽ॥ 10 आङ्गाॽ खे़ङ्हाॽ नु खे़ङ्हाॽरे़ खुन्छिॽ पाधे़बाहाॽ पिरुङ्सिङ्बा कन् लाजेॽओ खे़ङ्हाॽ खक्पे़त् मे़म्मे़क्ने़ल्ल थारिक् आङ्गाॽ खे़ङ्हाॽओ थङ्, साक्वान् नु मिन्देहाॽ तारुङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.