यर्मिया 23 - लिम्बुके़दाबा ये़म्ले़ लागि निङ्साङ् 1 यहवे दाङ्बे़ल्ले़ उवा चोगुर पाःत्तुॽ, “आमे़ल्लुक् चाराम्दे़न्नो मे़ल्लुक्हाॽ के़मे़ङ्बा नु फुत्छिङ्ज्याङ् के़जोःक्पा मे़ल्लुक्कम्बाहाॽग मे़जिःत्ते़ मे़स्ये़!” 2 खे़ल्ले़चोगुल्ले़ यहवे दाङ्बा इस्राइलबा निङ्वाॽफुमाङ्ङिल्ले़ कुमनाहाॽ कम्ब्राङ् के़मे़प्पा मे़ल्लुक्कम्बाहाॽरे़ खुन्छिॽ याःम्बेओ खुने़ॽ अक्खे पाःत्तुॽ, “खिनिॽ आङ्गाॽ आमनाहाॽ कम्ब्राङ् के़म्मे़त्तुम्सिम्मिन्, खिनिॽ खे़ङ्हाॽ फुत्छिङ्ज्याङ् के़जोगुम्सिम्माङ् पुबेलाप्सा के़नाःत्तुम्सिम्॥ आल्ल खिनिॽ ताप्फे़ःम्बा याःम्बक्हाॽरे़ लागि खिनिॽ खुम्दिङ् पिनिङ्ॽ॥ 3 आङ्गाॽ आमे़ल्लुक् लुप्हाॽलाम् के़दाङ्बा के़याःक्पा आङ्गाॽ खे़ङ्हाॽ नाःत्तुङ्देसुङ्सिङ्बा लाजेॽहाॽलाम् खे़ङ्हाॽ सुप्सुङ् तारुङ्सिङ्ॽ हे़क्क्याङ् खे़ङ्हाॽ आबाङे खुन्छिॽ लाजेॽओ नुःक्तुङ् तारुङ्सिङ्ॽ॥ खे़ङ्हाॽरे़ खुन्छिॽ मुॽइदाङ्साहाॽ मे़बोन् मे़धे़ॽर खे़ब्याङ् खे़ङ्हाॽ यरिक् मे़बोङ्ल॥ 4 आङ्गाॽ कुसङ् मे़ल्लुक्कम्बाहाॽ खे़ङ्हाॽ कम्ब्राङ् मे़प्मा याःन्दुङ्सिङ्॥ आङ्गाॽ आमनाहाॽ आल्लआङ्धो किमा मे़बोङ्ने़न् इग्र किमा यङ्माओआङ् थामा मे़बोङ्ने़न्॥ खे़ङ्हाॽ याम्मो लत्थिक्काङ् मे़म्माने़न्॥ आङ्गाॽ यहवे दाङ्बे़ल्ले़ कन् पाःत्तुङ्ङाङ् वाॽरो॥” 5 यहवे दाङ्बे़ल्ले़ पाःत्तुॽ, “अक्तङ्बा ये़न्हाॽ तार पत्लो, हे़क्केःल्ले़ आङ्गाॽ दाउद हाङ्ङिल्ले़ कुधिन्दाङ् सायोबोराहाॽलाम् साम्योबा कुबोराक् थिक् लःन्ल याःन्दुङ्लो॥ खे़न् हाङ् पोङ्ङाङ् सिक्कुम् निङ्वाॽ नु हाङ् चोगुरो खे़म्ब्याङ् लाजेॽओ कुदोःप्मा खासे़न् नु के़वाॽबा याःम्बक् चोगुरो, 6 खे़न् हाङ् वाॽइल्ले़ यहुदाबा मनाहाॽ ताङ्मे़से़ःप्लो हे़क्क्याङ् इस्राइलबा मनाहाॽ थेआङ् मे़ल्लॽए मे़युङ्लो॥ खे़ल्ले़ कुमिङ् ‘यहवे दाङ्बा आनिॽ साम्योबा’ पोङ्लो॥ 7 “आङ्गाॽ यहवे दाङ्बे़ल्ले़ पाःत्तुङ्ॽ, खे़ल्ले़चोगुल्ले़ अक्तङ्बा ये़न्हाॽ तार पत्, मनाहाॽ माङ्मे़हे़क्सिङ्ङिल्ले़ आफाल्ले़आङ् अक्खे मे़म्बाःत्तुन्, ‘इस्राइलिहाॽ मिस्र लाजेॽलाम्बा के़लःप्पा के़भे़प्पा, से़क्खाए यहवे दाङ्बे़न् कुहिङ्वे़त् वाॽबा कुइसिक्॥’ 8 कर खे़ङ्हाॽरे़ मे़बाःत्तुॽ, ‘इस्राइलिहाॽरे़ खुन्छिॽ थाःक्हाॽ थाङ्गे़त् पिसाङ्बा लाजेॽ नु वेॽ के़रे़क् लाजेॽहाॽलाम् आत्तान् आत्तान् खुने़ॽ खे़ङ्हाॽ लःत्तुदेसुसिआङ् वये़, खे़न् के़रे़क् लाजेॽलाम्बा के़लःप्पा के़दाःप्पा से़क्खाए यहवे दाङ्बे़न् कुहिङ्वे़त् वाॽबा कुइसिक्॥’ खे़ब्याङ् खे़ङ्हाॽ आबाङे खुन्छिॽ लाजेॽओ मे़युङ्लो॥” इङ्ले़क् माङ्निङ्वाॽपान् के़बाःप्पाहाॽ खुम्दिङ्ङो मे़धाःॽ 9 माङ्निङ्वाॽपान् के़बाःप्पाहाॽरे़ खुन्छिॽ लागि कन् इङ्घङ्ङिन् वाॽरो— आङ्गाॽ आनिङ्वाॽ तुगे़आङ् वाॽरो आङ्गाॽ के़रे़क् आये़प्पाहाॽ यङ्लो थेआङ्भे़ल्ले़ निङ्वाॽफुमाङ्ङिन् नु खुने़ॽ सेसे कुबाःन्जाक्हाॽरे़ चोगुल्ले़ यरिक् सेजङ्वाःल्ले़ मयुबा लत्थिक् चोनाःम् चोनाःम् के़लॽबा मना हे़क्तङ्बा पोःक्खाङ्ङाङ् वाॽआरो॥ 10 याम्बोःप्मा याःम्बक् के़जोःक्पाहाॽरे़ लाजेन् मे़धिम्सुआङ् वाॽरो॥ खे़ङ्हाॽ फे़त्लाॽमा ताप्फे़ःम्बा हिङ्मन्नो मे़वाॽरो हे़क्क्याङ् माङ्निङ्वाॽपान् के़बाःप्पाहाॽरे़ खुन्छिॽ मुक्साम्मिन् पिर्बेःम्बा लाम्मो ओगप् मे़जोगुरो॥ यहवे दाङ्बे़ल्ले़ कुसाक्मुरा माङ्देःल्ले़ चोगुल्ले़ लाजेन् मे़रिङ् थक्लो हे़क्क्याङ् चाराम्मादे़न्हाॽआङ् हेरे़बेआङ् ने़रो॥ 11 यहवे दाङ्बे़ल्ले़ अक्खे पाःत्तुरो, “माङ्निङ्वाॽपान् के़बाःप्पा नु निङ्वाॽफुसाम्बा ने़प्माङ् निङ्वाॽफुमाङ्ङिन् मे़न्इःप्मना मे़न्नाःप्मनाबा पोःक्खे़सिआङ् वाॽसिरो, आहिम्मो खुन्छिॽ फे़न्याःम्बक् चोगुसिर यागे़सिबा आङ्गाॽ तुमुङ्सिङ्ङाङ् वाॽआरो॥ 12 खे़ङ्हाॽ लाङ्मे़घेःक्पा लाम्मिन् खागे़माक्पा नु आले़ःङ्ले़ःङ्बा पोङ्लो॥ खे़ल्ले़ खे़ङ्हाॽरे़ खुन्छिॽ लाङ्ङिन् खसुआङ् मे़जोःन्ल याःन्दुसिरो॥ आङ्गाॽ खे़ङ्हाॽरे़ खुन्छिॽ सम्धाङ् ये़त्तुक्खे तारुङ्लो॥ खे़ङ्हाॽरे़ खुम्दिङ् खोमा ये़म्मिन् तार पत्लो॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽआरो॥ 13 “सामरियाओबा माङ्निङ्वाॽपान् के़बाःप्पाहाॽरे़ खुन्छिॽ याम्गे़सिङ्बा लायोन् निसुङ्ङाङ् वाॽआरो॥ खे़ङ्हाॽरे़ बाल साम्माङ्ङिल्ले़ कुमिङ्ङो खालोःम्मा पान् मे़बाःत्तुआङ् वाॽरो हे़क्क्याङ् आमनाहाॽ ताप्फे़ःम्बा लाम्मो मे़दोन्दुसिरो॥ 14 कर यरुसले़ःम्मो के़वाॽबा माङ्निङ्वाॽपान् के़बाःप्पाहाॽओ आरसाङ् याम्गे़सिङ्बा याःम्बक् मे़जोगुबा आङ्गाॽ निसुङ्ङाङ् वाॽरो॥ खे़ङ्हाॽरे़ याम्बोःप्मा याःम्बक् नु नुबा ले़ङ्सिङ्मा, फे़न्याःम्बक् मे़जोगुरो ताप्फे़ःम्बा याःम्बक् के़जोःक्पा मनाहाॽ कुभाॽ मे़बिरुसिरो खे़ल्ले़चोगुल्ले़ आत्तिन्हाॽरे़आङ् फे़न्याःम्बक् चोःक्मा मे़न्ले़रुन्लो॥ आलागि खे़ङ्हाॽ के़रे़क् सदोम हे़क्तङ्बा नु यरुसले़ःम्बा मनाहाॽ गमोराबा हे़क्के ताक्के़भे़ॽबा मे़बोःक्खे़आङ् मे़वाॽरो॥” 15 खे़ल्ले़चोगुल्ले़ मुक्साम्दाङ्बा यहवे दाङ्बे़ल्ले़ खे़न् यरुसले़ःम्मोबा माङ्निङ्वाॽपान् के़बाःप्पाहाॽरे़ खुन्छिॽ याःम्बेओ अक्खे पाःत्तुरो, “आङ्गाॽ खे़ङ्हाॽ चामारे़ लागि साक्खिःक् के़घिःक्पा सुङ्घिःङ्बान् हे़क्क्याङ् थुङ्मारे़लागि निङ्ङिन् पिरुङ्सिङ्लो थेआङ्भे़ल्ले़ खे़ङ्हाॽरे़ के़रे़क् लाजेन् लायोल्ले़ थिम्सुबा मे़जोगुआङ् ने़रो॥” 16 मुक्साम्दाङ्बा यहवे दाङ्बे़ल्ले़ यरुसले़ःम्मोबा मनाहाॽ अक्खे मे़त्तुसिरो, “माङ्निङ्वाॽपान् के़बाःप्पाहाॽरे़ खुन्छिॽ पाःन्निन् खिनिॽ मे़घे़प्से़म्मिन्ने़ॽओ, खे़ङ्हाॽरे़ खिनिॽ इङ्ले़क् निङ्साङ् चोःक्मा के़म्बाङ्घिरो॥ खे़न् पाःन्हाॽ यहवे दाङ्बे़ल्ले़ पाःत्तुबा मेःन्लो कर खे़ङ्हाॽरे़ आबाङे मुरा नु निङ्वाॽओबा पाःन्हाॽ खिनिॽ के़म्जे़क्तिरो॥ 17 आबान् खे़म्मा मे़न्दे़म्मनाबाहाॽ खे़ङ्हाॽरे़ चक्मे़ल्लॽए अक्खे मे़मे़त्तुसिरो, ‘यहवे दाङ्बे़ल्ले़ पाःत्तुॽ—खिनिॽ लागि नुॽमादामा सनारुङ् पोङ्लो!’ पान् मे़ङ्घे़म्मनाबा आधिङ्गानि हादिङ् के़धक्पाहाॽ खे़ङ्हाॽरे़ अक्खे मे़मे़त्तुसिरो, ‘खिनिॽ सम्धाङ् थे़मा तुक्खे लाक्खेआङ् मे़दाने़न्लो॥’ 18 “कन् माङ्निङ्वाॽपान् के़बाःप्पाहाॽओ आङ्गाॽ यहवे दाङ्बे़ल्ले़ आजुम्लुङ्ङो पान् खे़म्से़ हाःत्छिआङ् आभे़ल्ले़आङ् आङ्गाॽओ मे़न्दाए मे़वाॽरो॥ खे़ङ्हाॽरे़ खुन्छिॽ लुम्मो आत्तिल्ले़आङ् आबाःन्जाःक्किन् मे़ङ्घे़म्मे वाॽरो इग्र खे़प्मो नुरिक्काङ् निङ्वाॽ मे़म्बिए वाॽरो॥ 19 “ओमे़त्ते़ॽ, आङ्गाॽ यहवे दाङ्बे़ल्ले़ आसाक्के़न्निल्ले़ सुरित् केजङ् पोःक्लो, ताक्के़भे़ॽबाहाॽरे़ खुन्छिॽ थे़गेःक्को खइक् खइक् के़इक्सिङ्बा वहित् साम्मिःत् चुक्लो॥ 20 हे़क्क्याङ् आङ्गाॽ निङ्वाॽ चोगुङ्बा पाःन्हाॽ मे़न्गे़त्ते थारिक् आङ्गाॽ यहवे दाङ्बे़ल्ले़ आसाक्के़न्निन् मे़जिःक्तुन्लो॥ के़दाबा ये़न्हाॽओ खिनिॽ आमनाहाॽरे़ कन् पाःन्निन् नुरिक्काङ् कुसिङ् के़निःत्तुम्लो॥” 21 यहवे दाङ्बे़ल्ले़ अक्खे पाःत्तुरो, “आङ्गाॽ कन् माङ्निङ्वाॽपान् के़बाःप्पाहाॽ मे़म्बाङ्बासिरो करसाङ् खे़ङ्हाॽ आबाःन्जाक् पाःत्छे़ मे़लोःक्ते़आङ् मे़बेरो॥ आङ्गाॽ खे़ङ्हाॽनु थे़मा पाःन्नाङ् मे़म्बाःप्पारो, हे़क्केसाङ् खे़ङ्हाॽरे़ आमिङ्ङो माङ्निङ्वाॽपान् मे़बाःत्तुरो॥ 22 कर खे़ङ्हाॽरे़ आजुम्लुङ्ङोबा पाःन्निन् मे़ले़सुआङ् वये़ल्ले़ग आबाःन्जाःक्किन् खे़ङ्हाॽरे़ आमनाहाॽ खे़म्मा मे़बाङ्घुसिबा वये़रो हे़क्क्याङ् खे़ङ्हाॽ ताप्फे़ःम्बा ये़प्ले़क् नु फे़न् याःम्बक् चोःक्मालाम् मे़नुःक्तुसिबा वये़रो॥ 23 आङ्गाॽग लत्थिक् ते़न्नोरक् मेःन्लो कर आत्तिसाङ् के़वाॽबा निङ्वाॽफुमाङ्आरो॥ 24 आत्तिन् मनान् निमे़न्दे़प्मनाबादे़न्नो चिङ्सिङ्मा सुक्काङ् आङ्गाॽ निमा मे़सुक्कान्बे़? आङ्गाॽ साङ्ग्राम्पेदाङ् नु इक्सादिङ् खाम्बेःक्मो आत्तिसाङ् वाॽआ फाॽआङ् थे खिनिॽ के़न्निसुम्मिन्बि? आङ्गाॽ यहवे दाङ्बे़ल्ले़ कन् पाःत्तुङ्ङाङ् वाॽरो॥ 25 “कन् माङ्निङ्वाॽपान् के़बाःप्पाहाॽरे़ अक्खे मे़बाःत्तुबान् खे़प्सुङ्ङाङ् वाॽ ‘आन्देन् से़न्दिक् निङ्वाॽफुमाङ्लाम् से़प्माङ्धिक् माक्तुम्बे़आङ् वाॽ! से़प्माङ्धिक् माक्तुम्बे़आङ् वाॽ!’ खे़ब्याङ् खे़ङ्हाॽ आङ्गाॽ आमिङ्ङो इङ्ले़क् पाःप्मारे़ लागि मे़बेःक्लो॥ 26 आल्ल आप्फाल्ले़ थारिक् कन् माङ्निङ्वाॽपान् के़बाःप्पाहाॽरे़ आबाङे मे़बाःत्तुबा इमाङ्बा पाःन्हाॽरे़ आमनाहाॽ ताप्फे़ःम्बा लाम्मो मे़देॽरुसिबाबे? 27 आमनाहाॽरे़ खुन्छिॽ पाधे़बाहाॽ बाल साम्माङ् ले़प्माङ् मे़लासे़आङ् निङ्वाॽ मे़भेःत्छाङ्बा हे़क्के कन् माङ्निङ्वाॽपान् के़बाःप्पाहाॽरे़ खुन्छिॽ मे़जोगुबा आबाङे से़प्माङ्बा पाःन्निल्ले़ चोगुल्ले़ आङ्गाॽ आमनाहाॽरे़ निङ्वाॽ मे़भेःन्ना के़लॽबा मे़इःत्तुआङ् मे़वाॽरो॥ 28 “माङ्निङ्वाॽपान् के़बाःप्पे़ल्ले़ से़प्माङ् माक्तुआङ् वाॽने़भग्र खे़ल्ले़ से़प्माङ्बा पाःन्लक् पाःत्तुररो कर माङ्निङ्वाॽपान् के़बाःप्पाल्ले़ आबाःन्जाःक्किन् खे़प्सुआङ् वाॽने़भग्र खे़ल्ले़ आबाःन्जाःक्किन् नसाःन्साबा पोङ्ङाङ् पाःत्तुररो॥ सिःन्नु सिलाङ्ङिन् तङ्मा सुक्ते़त्पि? 29 आबाःन्जाःक्किन् मि हे़क्के लॽरो, पयम् यम्बा लुङ्ङिन् फयःप्फयःप् के़यःम्बा लत्छा यम्बा थवा हे़क्तङ्बा चोक्लो॥ 30 “खे़ल्ले़चोगुल्ले़ आङ्गाॽ खे़न् माङ्निङ्वाॽपान् के़बाःप्पाहाॽरे़ खुन्छिॽ तक्ले़ङ्वाओ वाॽआ, खे़ङ्हाॽ आबाङे खुनिॽ लुम्मो इङ्ले़क्पा पाःन्हाॽ मे़घुःत्छिङ् मे़बिसिङ् हे़क्क्याङ् आबाःन्जाःक्किन् खे़प्से़ॽ फाॽआङ् खे़न् इङ्भो मे़जोगु॥ 31 आङ्गाॽ खे़न् माङ्निङ्वाॽपान् के़बाःप्पाहाॽरे़ खुन्छिॽ तक्ले़ङ्वाओआङ् वाॽआ, आत्तिन्हाॽरे़ आबाङे खुन्छिॽ पाःन्जाःक्किन्नाङ् आङ्गाॽ आबाःन्जाक् फाॽआङ् मे़बाःत्तुॽ 32 आङ्गाॽ यहवे दाङ्बे़ल्ले़ थे़मा पाःत्तुङ्ॽ, खे़प्से़म्मे़ॽ! आङ्गाॽ खे़न् माङ्निङ्वाॽपान् के़बाःप्पाहाॽरे़ खुन्छिॽ तक्ले़ङ्वाओ वाॽआ, आत्तिन्हाॽरे़ इङ्ले़क् पान् इसेःङ्बा खुन्छिॽ से़प्माङ्हाॽ मे़जे़क्खु मे़बाःत्तुॽ॥ खे़ङ्हाॽरे़ खे़न् से़प्माङ्हाॽ मे़बाःत्तुआङ् आमनाहाॽ खुन्छिॽ इङ्ले़क् नु आङ्दिङ् लॽमा पाःन्हाॽरे़ आङ्गाॽ आमनाहाॽ मे़नाक्ल मे़याःन्दुसिॽ॥ आङ्गाॽ खे़ङ्हाॽ पाङ्घुङ्सिङ्बा मेःन्, पेगे़म्मे़ॽ मे़त्तुङ्सिङ्बा मेःन् खे़ब्याङ् खे़ङ्हाॽलाम्बा आमनाहाॽरे़ थेआङ् कुभाॽ मे़ङ्घोसुन्॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥” यहवे दाङ्बे़ल्ले़ के़लिःप्पा कुगक् 33 यहवे दाङ्बे़ल्ले़ आङ्गाॽ मे़त्ताङ्, “यर्मियाए, आमनाहाॽरे़ खुनिॽ लुम्मो कुभारे़ इग्र कुभा माङ्निङ्वाॽपान् के़बाःप्पाहाॽरे़, निङ्वाॽफुसाम्बाहाॽरे़ खे़ने़ॽ ‘यहवे दाङ्बे़ल्ले़ थे़मा के़लिःप्पा कक् के़गुःत्ते़आङ् वाॽ?’ लॽरिक् से़ःन्गे़म्लाप्ने़भग्र खे़ने़ॽ खे़ङ्हाॽ अक्खे मे़त्ते़से़ॽ, ‘खिनिॽए निङ्वाॽफुमाङ्ङिल्ले़ के़लिःप्पा कुगक्निङ् हे़क्क्याङ् खुने़ॽ के़नाॽरि॥’ 34 “‘यहवे दाङ्बे़ल्ले़ के़लिःप्पा कुगक्’ के़बाःप्पा कुभा मना इग्र कुभा माङ्निङ्वाॽपान् के़बाःप्पाहाॽ, निङ्वाॽफुसाम्बाहाॽ के़रे़क् आङ्गाॽ खुम्दिङ् पिरुङ्सिङ्ॽ॥ 35 कर खे़ल्ले़ कुले़क्वा ‘यहवे दाङ्बे़ल्ले़ थे नुगप् पिरुसिबे? यहवे दाङ्बे़ल्ले़ थे पाःत्तु?’ के़रे़क्ले़ आबाङे तेःङ्जुम्हाॽ नु फुॽनुसाॽहाॽ सेःन्मे़दोसुसिर॥ 36 कर खे़ङ्हाॽरे़ ‘यहवे दाङ्बे़ल्ले़ के़लिःप्पा कुगक्’ फाॽआङ् पेलिगे़न् पाःन्जाःन् आप्फाल्ले़आङ् ओगाप् मे़न्जोगुन्ल थेआङ्भे़ल्ले़ कुभारे़ खे़न् हे़क्के मे़जोगुने़भग्र आङ्गाॽ आइङ्घङ्ङिन् खे़ङ्हाॽरे़ खुन्छिॽ लागि से़क्खाए के़लिःप्पा कक् पोङ्ॽ॥ मनाहाॽरे़ कुहिङ्वे़त् निङ्वाॽफुमाङ्, मुक्साम्दाङ्बा यहवे दाङ्बे़ल्ले़ कुबाःन्जाक्किन् मे़इगुआङ् वाॽ॥ 37 “यर्मियाए, माङ्निङ्वाॽपान् के़बाःप्पाहाॽ कन् पाःन्निन् से़ःन्लाप्ते़से़ॽ, ‘यहवे दाङ्बे़ल्ले़ खिनिॽ थे नुगप् के़बिरि? यहवे दाङ्बे़ल्ले़ थे पाःत्तु?’ 38 कर खे़ङ्हाॽरे़ अक्खे मे़बाःत्तु, ‘कङ्ग यहवे दाङ्बे़ल्ले़ के़लिःप्पा कुगक्लो!’ खे़ब्याङ् खे़ने़ॽ अक्खे के़मे़त्तुसिर पोङ्ॽ, ‘यहवे दाङ्बे़ल्ले़ अक्खे पाःत्तुॽ—आङ्गाॽ कन् पाःन्निन् मे़बाःत्ते़म्मिन्ने़ॽ मे़त्निङ्साङ् “यहवे दाङ्बे़ल्ले़ के़लिःप्पा कुगक्” के़लॽबा पाःन्निन् खिनिॽ के़बाःत्तुम्, 39 आङ्गाॽ से़क्खाए खे़निॽ निङ्वाॽ फेःन्निङ्ॽ हे़क्क्याङ् खे़निॽ नु खे़निॽ पाधे़बाहाॽ पिनिङ्बा ये़क्यक्किन्नु सोसोरिक् खे़निॽ खम्निङ्ङाङ् आङ्गाॽओलाम् माःङ्घा लाप्फुनिङ्ॽ॥ 40 आङ्गाॽ खे़ङ्हाॽ सदादिङ्ले़ लागि नुःम्मा नु आप्फाल्ले़आङ् निङ्वाॽफेःम्मा सुक्मे़न्दे़प्मनाबा सिरिङ्ममो थासुङ्सिङ्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.