यर्मिया 22 - लिम्बुयर्मियाःल्ले़ यहुदाबा हाङ्हाॽ इङ्घङ् हाक्तुसि 1 यहवे दाङ्बे़ल्ले़ आङ्गाॽ अक्खे मे़त्ताङ्, “यहुदाबा हाङ्हिम्मो पेगे़ॽआङ् अक्खे पाःत्ते़ॽ, 2 ‘दाउदरे़ कुहाङ्युक्नाओ के़युङ्बा यहुदाबा हाङ्ङे, खे़ने़ॽ के़सुहाङ्युक्पाहाॽ नु कन् यम्बा लाम्धेःप्पोलाम् सिगाङ् के़लाःप्पा मनासे, यहवे दाङ्बे़ल्ले़ कन् कुइङ्घङ्ङिन् खे़प्से़म्मे़ॽ॥ 3 यहवे दाङ्बे़ल्ले़ अक्खे पाःत्तुॽ—आङ्गाॽ यहवे दाङ्बे़ल्ले़ खिनिॽ कुदोःप्मा खासे़न् लोःम्मा नु के़लाॽबा याःम्बक् चोःक्मा इङ्जाङ् पिनिङ्ल पत्ता॥ मे़नाप्तुसिबाहाॽ के़घुम्बाहाॽरे़ खुन्छिॽ हुक्कोलाम्बा से़ःप्ते़म्सिम्मे़ॽ॥ वेॽ लाजेॽबा मे़न्छाम् सुवाङ्, ये़त्छाबासाहाॽ हे़क्क्याङ् मेमेदुमाहाॽ ताप्फे़ःल्लिक् नु मे़न्वाॽमना मे़मे़त्ते़म्सिम्मिन्ने़ॽ॥ कन् सेसेबादे़न्नो फोत्या मे़ःन्नेबाहाॽ मे़से़रे़म्सिम्मिन्ने़ॽ॥ 4 खिनिॽ से़क्खाए आङ्गाॽ पाःत्तुङ्बा हे़क्के के़जोगुम्ने़भग्र दाउदरे़ कुमुॽइदाङ्साहाॽ हाङ् मे़बोङ्ङाङ् मे़वाॽ॥ खे़ङ्हाॽरे़ आबाङे खुन्छिॽ सुहाङ्युक्पाहाॽ हे़क्क्याङ् मनाहाॽनु अन्ला खे़ब्याङ् अन्हाॽ मे़युक्तुसिआङ् कन् हाङ्हिम्मोबा मा लाम्धेःप्पोलाम् याङ्ना कत्ना मे़लॽआङ् मे़वाॽ॥ 5 कर खिनिॽ आङ्गाॽ आइङ्जाङ्ङिन् खे़म्मा के़न्दे़न्दिन्ने़भग्र कन् हाङ्हिम्मिन् खाप्पुथ्यःङ् पोङ् फाॽआङ् आमिङ्ङो माङ्हे़क्सिङाआङ् पाःत्तुङ्ॽ॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥’” हाङ्हिम्मिल्ले़ कुयाःम्बेओ इङ्घङ् 6 थेआङ्भे़ल्ले़ यहुदाबा हाङ्हिम्मिल्ले़ कुयाःम्बेओ यहवे दाङ्बे़ल्ले़ अक्खे पाःत्तुरो, “गिलाद लाजेॽ नु ले़बनानबा कोःक्मा फाङ्जङ्हाॽ हे़क्के यहुदाबा हाङ्हिम्मिन् पनुनुबा के़जोःक्लो॥ कर के़लुङ्धाक् सिगाङ् खे़ने़ॽ चिजि खक्खक् नु मना के़होःप्पादे़न् चोःक्ने़रो॥ 7 आङ्गाॽ खे़न् खाप्पुथ्यःङ् के़जोःक्पा मनाहाॽ पाङ्घुङ्सिङ्ल पत्तारो॥ खे़ङ्हाॽ के़रे़क् तःन्दिॽनु मे़दारो हे़क्क्याङ् खे़प्मोबा नुबा साम्माङ्सिङ् सित्लाङ्हाॽ मे़आःत्तु मे़सोःन्दुआङ् मिओ लाप्मे़भुसु मे़गेःत्तुरो॥ 8 “ताःन्दि वेॽ लाजेॽबा यरिक् मे़न्छाम् सुवाङ्हाॽ कन् ये़क्यक्लाम्बा मे़बोङ्ङाङ् मे़बेःक् हे़क्क्याङ् खे़ङ्हाॽ सेःन्मे़दोसिङ्ॽ, ‘थेआङ् यहवे दाङ्बे़ल्ले़ कन् यम्बा ये़क्यक्किन् अक्खेलॽरिक् ताप्फे़ःल्लिक् मे़त्तुबाबे?’ 9 हे़क्क्याङ् खे़ङ्हाॽरे़ नुगप् मे़बिरुसिॽ, ‘निङ्वाॽफुमाङ्ङिन्नु मे़जोगुबा माङ्हुप्पिन् मे़नाॽरुआङ् वेॽ साम्माङ्हाॽ से़वा मे़मे़त्तुसिबाल्ले़ चोगुल्ले़ अक्खे पोःक्खे़बारो॥’” यहोआहाजरे़ कुयाःम्बेओ इङ्घङ् 10 यहुदाबा यक्युङ्बासे, योसियाह हाङ्ङिल्ले़ कुलागि मे़हाबे़म्मिन्ने़ॽओ हे़क्क्याङ् खे़न् सिःल्ले़ मे़रिङ् मे़धक्ते़म्मिन्ने़ॽओ॥ कर खे़ल्ले़ कुस्सा यहोआहाजरे़ कुलागि उःक्काङ् उःक् हाबे़म्मे़ॽओ॥ खे़न् मे़दे़म्सुआङ् मे़देॽरुरो हे़क्क्याङ् आप्फाल्ले़आङ् मे़नुःङ्ने़न् मे़दाने़न्लो॥ खे़ल्ले़ याम्मो आभे़ल्ले़आङ् खुने़ॽ सावाःन्छिङ्बा लाजेन् निमा मे़घोसुन्लो॥ 11 थेआङ्भे़ल्ले़ कुम्बारे़ कुएगाङ् यहुदाओ हाङ् के़बोङ्बा योसियाहरे़ कुस्सा यहोआहाजरे़ कुयाःम्बेओ यहवे दाङ्बे़ल्ले़ अक्खे पाःत्तुॽ, खे़न् कन् ते़न्नोलाम्बा पेआङ् वाॽ, “आप्फाल्ले़आङ् कॽयो मे़नुःङ्ने़न् मे़दाने़न्॥ 12 कर खे़ङ्हाॽरे़ आत्तिन् लाजेॽओ खे़न् मे़दे़म्सु मे़देॽरुआङ् वाॽ, खे़प्मो खे़न् सिःॽ खे़ब्याङ् खे़ल्ले़ याम्मो आप्फाल्ले़आङ् कन् लाजेन् निमा मे़घोसुन्लो॥” यहोयाकिमरे़ कुयाःम्बेओ इङ्घङ् 13 “चिःत्ते़ स्ये़ यहोयाकिमे़न् खाप्पुथ्यःङ् पोङ्लो, खे़ल्ले़ मे़न्वाॽमनाबा चोगुआङ् कुहिम्मिन् चोगुरो हे़क्क्याङ् फे़न् याःम्बक् चोगुआङ् कुहिम्मिन् थाःङ् चक्तुर तेॽरुरो, नाम्याक् मे़म्बिसे कुबाङ्भेॽसाबाहाॽ कुयाःम्बक्को फत्छुसिरो खे़ब्याङ् खे़ङ्हाॽरे़ खुन्छिॽ नाम्याक्किन् मे़बिरुन्सिन्लो॥” 14 खे़न् मनाःल्ले़ अक्खे पाःत्तुरो, “आलागि लत्छा यम्बा हिम् चोगुङ्लो कुदाःत्लाओ यम्बयम्बा याक्फाङ् के़ने़बा हिम् चोगुङ्लो॥ खे़ल्ले़ कुहिम्मो यम्बा पेधाःप्हाॽ फत्छुआङ् हे़क्मनाबा साम्माङ्सिङ्हाॽ थे़क्तुरो, हे़क्क्याङ् खे़न् पेधाःप्हाॽ हे़ःत्ताङ्बा चाःन्दुरो॥ 15 वेॽहाॽरे़ खुन्छिॽ हिम्हाॽनुःल्ले़ नुबा साम्माङ्सिङ्ङिल्ले़ हिम् के़जोगुसाङ् कर खे़ल्ले़ खे़ने़ॽ नुबा हाङ् के़म्बोङ्ने़न्लो खे़ने़ॽ के़म्बा कुहिङ्हिङ् कुनिङ्वाॽ त्ये़आङ् वये़रो, खुने़ॽ आभे़ल्ले़साङ् कुदोःप्मा खासे़न् नु के़वाॽबा याःम्बक् चोगुरो हे़क्क्याङ् खुने़ॽ हुक् केःत्तुबा के़रे़क् याःम्बक्हाॽ चोःक्मा थाःत्तुरो॥ 16 खे़ल्ले़ याङ्गे़साॽबा नु थेआङ् मे़ङ्गप्मनाबाहाॽ कुदोःप्मा खासे़न् लोःन्दु पिरुसिरो हे़क्क्याङ् खे़ङ्हाॽ के़रे़क्ले़ लागि नुबा पोःक्खे़रो आङ्गाॽ कुसिङ् आनिःत्ते़ॽ लॽआबे़न् हाबा कन्लो॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥ 17 कर खे़ने़ॽग खे़ने़ॽ के़लागिरे़ पाःन्निन्लक् के़निसुरो॥ हे़क्क्याङ् खे़ने़ॽ कुदोःप्मा मनाहाॽ के़से़रुसिरो आबाङे के़मनाहाॽ साक्के़ल्ले़क् नु मे़न्वाॽमना तुक्खे के़जाःत्तुसिरो॥” 18 खे़ल्ले़चोगुल्ले़ योसियाहःल्ले़ कुस्सा यहुदाबा हाङ् यहोयाकिमिल्ले़ कुयाःम्बेओ यहवे दाङ्बे़ल्ले़ अक्खे पाःत्तुरो— “ए, खे़न् सिःल्ले़ आत्तिन्नाङ् मे़रिङ् मे़धक्ने़न्लो॥ हाःत्ले़आङ् अक्खे मे़बाःत्तुन्लो ‘आम्भुॽए, आक्खे़न् साॽरिक् ये़त्तुक्खे त्ये़बे’ हे़क्क्याङ् एःन्नाङ् अक्खेलॽरिक् मे़रिङ् थक्नु मे़हाःप्ने़न्लो! ‘ए, आहाङ्ङे, खे़ने़ॽ के़हाङ्वान् पेरो!’ 19 कुसिवे़त् अदङ्ङिन् लुप्मनाबा हे़क्के खे़न् मे़लुप्तुरो खे़न् मे़उःक्खु मे़धे़मु मे़देॽरुरो हे़क्क्याङ् यरुसले़ःम्मोबा मा लाम्धेत् लाःक्कात् लाप्मे़भुसुरो॥ 20 यरुसले़ःम्मो के़युङ्बासे, ले़बनाननो पेगे़म्मे़ॽआङ् अःक्ते़म्मे़ॽओ, बासाःन्नो पेगे़म्मे़ॽआङ् हाबे़म्मे़ॽओ॥ मोआबि कोःक्माहाॽलाम् इनोगे़न् तुक्खेवा इक्लाःन्नाङ् लःत्ते़म्मे़ॽओ थेआङ्भे़ल्ले़ खे़ने़ॽ के़बेसाङ्बा के़रे़क् लाजेॽहाॽ हारिमे़द्ये़आङ् मे़वाॽरो॥ 21 खे़ने़ॽ के़नुरे़आङ् के़वये़बा ये़न्नो खे़ने़ॽ फे़ःक्ने़रो कर खे़ने़ॽ आबाःन्निन् के़ङ्घे़प्सुन्लो॥ खे़ने़ॽ के़बाःत्तु, ‘के़बाःन्निन् मे़घे़म्मान्लो॥’ खे़ने़ॽ के़जुक्ते़आङ्धोए आबाःन्निन् मे़ङ्घे़म्मे के़वाॽरो॥ यहवे दाङ्बे़ल्ले़ कुइङ्जाङ्ङिन् खिनिॽ आप्फाल्ले़आङ् खे़म्मा के़न्दे़न्दिन्लो॥ 22 खिनिॽ फे़न्याःम्बक्किल्ले़ चोगुल्ले़ खिनिॽ के़रे़क् लाम्लोबाहाॽ साम्मिःत्ते़ल्ले़ फे़सु तेॽरुसिरो, थङ् चोःक्मारे़ लागि खिनिॽ तेःङ्जुम् के़मे़प्पाहाॽ मे़देॽरुसिरो हे़क्क्याङ् खे़ङ्हाॽ माःङ्घा लाजेॽ मे़देॽरुसिरो खे़ब्याङ् खे़निॽ कुनामे़न्छाॽ नु सिरिङ्ममो के़ध्ये़ॽइरो॥ 23 ले़बनानबा साम्माङ्सिङ्ङिल्ले़ चोःक्मनाबा हिम्मो खिनिॽ नुरिक्काङ् के़युङिरो कर सावाःन्दुङ् हे़क्तङ्बा ये़त्तुक्खेन् खिनिॽ सम्धाङ् इदारो, खे़ब्याङ् खिनिॽ तुक्मा साक्माल्ले़ के़यारिरो॥” निङ्वाॽफुमाङ्ङिल्ले़ यहोयाकिने़न् खुम्दिङ् पिरु 24 यहवे दाङ्बे़ल्ले़ पाःत्तुॽ, “आङ्गाॽ सदादिङ् वाॽआबा हे़क्के यहोयाकिमे़ल्ले़ कुस्सा यहुदाबा हाङ् यहोयाकिने़न् आङ्गाॽ खे़ने़ॽ ले़त्ने़॥ आङ्गाॽ आजुप्साङ् हुक्कोबा एःप्साप् स्वागेःप्ने़साङ् लिगक् लःत्ने़आङ् लाप्फुने़॥ 25 आत्तिन्हाॽ के़गिरुसिॽ हे़क्क्याङ् आत्तिन्हाॽरे़ खे़ने़ॽ से़प्मा निङ्वाॽ मे़जोगुॽ खे़न् मनाहाॽरे़ खुन्छिॽ हुक्को आङ्गाॽ थाने़॥ आङ्गाॽ खे़ने़ॽ बेबिलोनबा हाङ् नबुकदनेसरे़न् नु खे़ल्ले़ कुधक्सुबाहाॽरे़ खुन्छिॽ हुक्को हुक्सुप्ने़॥ 26 खे़ने़ॽ नु के़म्मा आङ्गाॽ साॽरिक् माःङ्घा लाजेॽओ लाप्फुने़त्छिङ्, खिन्छिॽ ने़प्माङ् सागे़न्वाःन्ने़सिबा वेॽ लाजेॽओ के़बित्छि खे़ब्याङ् खे़प्मोए के़सिसिॽ॥ 27 खिनिॽ कन् लाजेन् ओमे़प्मा निङ्वाॽ के़जोगुम् कर आफाल्ले़आङ् के़नुःक्खिआङ् कॽयो के़न्द्ये़ॽइन्॥” 28 “थेआङ् यहोयाकिन हाङ्ङिन् के़हे़ःप्पा नु लाप्फुमनाबा कुःन्दाःन् हे़क्के पोःक्खे़बाबे, थे खे़न् आत्तिन्हाॽआङ् चाहाब् मे़न्जोःक्ने़म्बि? खे़न् नु कुमुॽइदाङ्साहाॽ खुन्छिॽ कुसिङ् मे़न्निःत्तुम्बा लाजेॽओ थेआङ् पुङ्लाधाबा मे़जोगुसिआङ् मे़देॽरुसिबाबे?” 29 यहुदा लाजेॽए, यहुदा लाजेॽए, यहवे दाङ्बे़ल्ले़ कुइङ्घङ्ङिन् खे़प्से़ॽओ, 30 “कुस्साकुए मेःन्ने लुगे़बा हे़क्के कन् मनाःल्ले़ कुमिङ्ङिन् साप्ते़ॽओ कुहिङ्मन्नो खे़न् कुलिङ्दो मे़ङ्गे़प्मनाबा पोङ्लो॥ थेआङ्भे़ल्ले़ खे़ल्ले़ आत्तिन् कुस्साहाॽआङ् कुस्साङ् के़लबा मे़म्बोङ्ने़न्लो खे़ल्ले़ आत्तिन् कुमुॽइदाङ्साहाॽआङ् दाउद हाङ्ङिल्ले़ कुहाङ्युक्नाओ युङ्मा मे़ङ्घोने़न्लो इग्र यहुदाओ हाङ्चोःक्मा मे़ङ्घोने़न्लो॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽआरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.