यर्मिया 21 - लिम्बुयरुसले़ःम्मिन् हारि ताःॽ 1 मल्कियाहरे़ कुस्सा पसहुरे़न् नु मासेयाहरे़ कुस्सा निङ्वाॽफुसाम्बा सपन्याहःन् यहुदाबा हाङ् सिदकियाहःल्ले़ अक्खे मे़त्तुसिआङ् यर्मियाओ पाङ्घुसिल्ले़ यहवे दाङ्बे़ल्ले़ कुइङ्घङ्ङिन् यर्मियाओ के़रे़, खुन्छिॽ पाःत्ते़छु, 2 “आनिगे लागि यहवे दाङ्बान् से़ःन्लाप्ते़ आबिरे़ॽ थेआङ्भे़ल्ले़ बेबिलोनबा हाङ् नबुकदनेसरे़न् नु खे़ल्ले़ कुधक्सुबाहाॽ आनिगे ये़क्यक्किन् हुक्काप् चोःक्मा फाॽआङ् मे़दार मे़बत्॥ से़क्खाःल्ले़ के़बेःक्पा ये़म्मो यहवे दाङ्बे़ल्ले़ आनिॽ लागि निङ्वाॽ के़माबा याःम्बक् चोगुबा हे़क्के आल्लआङ् चोगुआङ् नबुकदनेसरे़न् नुःक्तुदेसुबि॥” 3 यर्मियाःल्ले़ खे़ङ्हाॽ मे़त्तुसि, सिदकियाहःन् मे़त्ते़म्मे़ॽ, 4 “यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, ‘लुङ्धाक् लाःक्कात् खे़ने़ॽ किर्गप् के़गप्पाआङ् के़ये़प्पा बेबिलोनबा हाङ्ङिन् नु थक्सुबाहाॽरे़ खुन्छिॽ तक्ले़ङ्वाओ थक्मारे़ लागि खे़ने़ॽ के़हुक्को के़गत्तुबा फे़जाफे़युम्हाॽ हाबा खे़ने़ॽ के़दक्ले़ङ्वाओ नुःक्तुङ्ॽ॥ आङ्गाॽ खे़ङ्हाॽ फुक्खुङ्सिङ्ङाङ् ये़क्यक् सिगाङ् तारुङ्सिङ्ॽ॥ 5 आङ्गाॽ के़रे़क् आमुक्साम्मिन्, आसिक् पोःक्मान् हे़क्क्याङ् आयाःक्ले़ॽमो आङ्गाॽए के़दक्ले़ङ्वाओ थक्का॥ 6 आङ्गाॽ कन् ये़क्यक्को के़युङ्बा मनाहाॽ, थक्साहाॽ के़रे़क् हदॽ से़रुङ्सिङ्ॽ॥ खे़ङ्हाॽ किप्मागे़घुबा यम्बा माङ्दुक्मे़ल्ले़ मे़सिःॽ॥ 7 कर खे़ने़ॽ यहुदाबा हाङ् सिदकियाहःन्, खे़ने़ॽ के़युक्साबाहाॽ, हे़क्क्याङ् ते़न्धङ्, साक्वान् नु मिङ्देॽलाम् के़हिङ्बा मनाहाॽ खक्पे़त् आङ्गाॽ नबुकदनेसर हाङ्ङिन् नु के़निङ्मिहाॽ, खे़ब्याङ् खिनिॽ मे़ङ्मा निङ्वाॽ के़जोःक्पाहाॽरे़ के़म्दे़म्सि के़म्देॽरिर चोगुङ्ॽ॥ खे़ल्ले़ खिनिॽ आत्तिन्नाङ् कुहिङ्वे़त् के़न्ले़रिन्ॽ इग्र कुलुङ्माॽ स्याःत् के़ल्लॽरिन्, कुलुङ्माॽ फ्याःङ् के़ल्लॽरिन् हे़क्क्याङ् लुङ्माॽआङ् के़न्दुक्तिन्ॽ॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽ॥’ 8 “आल्लसाङ् मनाहाॽ अक्खे मे़त्ते़से़ॽ, ‘यहवे दाङ्बे़ल्ले़ आङ्गाॽ मे़त्ताङ्—खे़प्से़म्मे़ॽ, आङ्गाॽ खिनिॽ हिङ्मा लाम्मिन् नु सिमा लाम्मिन् सेःक्मा सुये़म् पिनिलङ्ल पत्ता॥ 9 कन् ये़क्यक्को आत्तिन् युङ्, खे़न् ते़न्धङ्, साक्वान् इग्र माङ्दुक्माल्ले़ सिःॽ कर आत्तिन् लःन्नाङ् पेक् हे़क्क्याङ् आल्लो ये़क्यक्किन् के़भप्पा के़दाःप्पा बेबिलोनिहाॽरे़ खुन्छिॽ हुक्को आबाङे हुक्सुप्सिङ्ॽ, खे़न् मे़सिने़न्॥ खे़ल्ले़ थे मेःन्छाङ् खुने़ॽ कुहिङ्मे़न् ताङ्घुॽ॥ 10 आङ्गाॽ कन् ये़क्यक्किन् ताङ्से़ःप्माग मेःन् कर मे़ङ्मा निःन्धो चोगुङ्ङाङ् वाॽ॥ खे़न् ये़क्यक्किन् बेबिलोनबा हाङ्ङिल्ले़ कुहुक्को चुक् हे़क्क्याङ् खे़ल्ले़ कन् मिःल्ले़ खाप्पुथ्यःङ् चोगुॽ॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥’” यहुदाबा हाङ्हाॽरे़ खुम्दिङ् मे़घोसु 11 “हे़क्क्याङ् यहुदाबा हाङ्थाःक्कोबा हिम्सयङ्हाॽ आल्लसाङ् अक्खे मे़त्ते़से़ॽ, ‘यहवे दाङ्बे़ल्ले़ कुइङ्घङ्ङिन् खे़प्से़म्मे़ॽ, 12 दाउदरे़ कुमुॽइदाङ्सा यहुदाबा हाङ् हिम्सयङ्से, यहवे दाङ्बे़ल्ले़ अक्खे पाःत्तुरो, “‘थिक्याःन्धक् कुदोःप्मा खासे़न्निन् तक्ते़म् कत्ते़म्मे़ॽओ॥ मना के़घुम्बाल्ले़ कुहुक्कोलाम्बा मे़नाप्तुसिबाहाॽ ताङ्से़ःप्ते़म्सिम्मे़ॽओ॥ मेःन्ने़भग्र खिनिॽ फे़न्याःम्बक्किल्ले़ आसिक् पोःक्काङ् मि पोङ्ङारो खे़ब्याङ् खे़न् हाःत्ले़आङ् से़प्मा मे़सुक्तुम्बा मि हे़क्के हुरुरुना तिःत्लो॥ 13 यरुसले़ःम्मे, खे़ने़ॽ ने़ने़बादे़न्नोलाम् थाःङ् के़युङ्लो, ते़म्बेॽओ के़ये़प्पा पयम् यम्बा याक्पेॽ कुइसिक् के़जोःक्लो॥ कर के़दक्ले़ङ्वाओ ते़न्धङ् चोगुङ्लो॥ के़बाःत्तुम्बिला आनिगे़ओ हाःत्ताङ् तामा मे़सुक्ने़न्लो, आनिगे यक्किन् आत्तिल्ले़आङ् लुःम्मा मे़सुक्तुन्लो॥ 14 कर खिनिॽ याःम्बक्हाॽरे़ लागि खुम्दिङ् पिनिङ्लो॥ आङ्गाॽ खिनिॽ ताम्भुङ्हाॽओ मि केःत्तुङ्लो हे़क्क्याङ् मिःल्ले़ खिनिॽ पिसाङ्बा काक् पाःन्हाॽ खाप्पुथ्यःङ् चोगुरो॥ आङ्गाॽ यहवे दाङ्बे़ल्ले़ पाःत्तुङ्ङाङ् वाॽरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.