यर्मिया 20 - लिम्बुयर्मियान् निङ्वाॽफुसाम्बाहाॽनु पाःन्धङ् चोक् 1 खे़प्मो इम्मेरे़ल्ले़ कुस्सा माङ्हिम्मोबा सुहाङ्युक्पा पसहुर निङ्वाॽफुसाम्बे़ल्ले़ यर्मियाःल्ले़ पाःत्तुबा कन् माङ्निङ्वाॽपान्हाॽ खे़प्सु, 2 खे़ब्याङ् खुने़ॽ माङ्निङ्वाॽपान् के़बाःप्पा यर्मियान् मे़हिप्ताङ्ल याःन्दुसि हे़क्क्याङ् माङ्हिम्मोबा थोसमा बेन्यामिन मा लाम्धेःप्पाल्ले़ कुबेसाङ् तुरुङ् मे़धे़प्ताङ्॥ 3 कुदाःन्दिक् तानाम् पसहुरे़ल्ले़ खुने़ॽ तुरोङ्ङोलाम् ले़रुआङ् मे़त्तु, “यहवे दाङ्बे़ल्ले़ पसहुर मिङ् के़वाःत्ते़बा मेःन् कर खुने़ॽग ‘के़रे़क् पिसाङ् किमा यङ्मा’ मिङ् के़वाःत्ते़॥ 4 थेआङ्भे़ल्ले़ यहवे दाङ्बे़ल्ले़ अक्खे पाःत्तुॽ, ‘आङ्गाॽ खे़ने़ॽ के़लागि नु के़न्जुम्हाॽरे़ खुन्छिॽ लागि किप्मागे़घुबा मना चोःक्ने़ हे़क्क्याङ् खे़ने़ॽ के़मिक्किल्ले़ कुदगि खे़ङ्हाॽ खुन्छिॽ निङ्मिहाॽरे़ ताभेःल्ले़ मे़ज्ये़प्तु मे़स्ये़रुसिॽ॥ यहुदाबा के़रे़क् यक्युङ्बाहाॽ आङ्गाॽ बेबिलोनबा हाङ्ङिल्ले़ कुहुक्को हुक्सुप्तुङ्सिङ्ॽ, खे़ल्ले़ यरिक्तङ्बा ते़म्सुसिआङ् बेबिलोनओ तेॽरुसि खे़ब्याङ् वेॽहाॽ ताभेःल्ले़ से़रुसिॽ॥ 5 आङ्गाॽ खे़ङ्हाॽरे़ खुन्छिॽ निङ्मिहाॽ कन् ये़क्यक्पा के़रे़क् याङ्साकुन्धेहाॽ नाप्मासि नु खे़प्मोबा चिगक्वाहाॽ, यहुदाबा हाङ्हाॽरे़ खुन्छिॽ याङ्साकुन्धेहाॽ नाप्मासिआङ् सामापुमाहाॽ खक्पे़त् बेबिलोनओ तेॽमा पाङ्घुङ्सिङ्ॽ॥ 6 हे़क्क्याङ् पसहुररे़, खे़ने़ॽ नु के़हिम्सयङ्ङाङ् साक्पा के़ध्ये़ॽइ खे़ब्याङ् बेबिलोनओ पुङ्लाधाबा के़बोःक्खिआङ् के़बेगिॽ॥ खे़ने़ॽ के़रे़क् के़न्देःङ् के़न्जुम्हाॽ खे़ने़ॽ इङ्ले़क्पा माङ्निङ्वाॽपान् के़मे़त्तुसिआङ् के़वये़, खे़ङ्हाॽनु खे़ने़ॽ के़सिआङ् खे़प्मोए के़म्हुम्लो॥’” यहवे दाङ्बाओ यर्मियाःल्ले़ कुलुङ्हान् 7 यहवे दाङ्बाए, खे़ने़ॽग आङ्गाॽ इङ्गे़ले़क्ताङ्लो हे़क्क्याङ् आङ्गाॽ इङ्ले़क्को सरम् थ्याङ्लो॥ खे़ने़ॽ आङ्गाॽनुःल्ले़आङ् के़धुम्बा के़जोःक्लो हे़क्क्याङ् खे़ने़ॽ आङ्गाॽ के़नाःन्दाङ्लो॥ के़रे़क्ले़ आङ्गाॽ येःप्मालाम् मे़जोःक्कारो खे़ब्याङ् ले़न्दिक् नाम्धाधा किनाःन्दि मे़बिआरो॥ 8 खे़प्मो आङ्गाॽ अक्खेलॽरिक् फिःक्मार पाःप्मा पोङ्लो, “खार्मे़न्दक्! मे़क्मासिमा पोःक्खे़रो!” खे़न् आङ्गाॽ पाःप्माए पोङ्लो॥ यहवे दाङ्बाए, खे़ने़ॽ के़इङ्घङ्ङिन् खे़म्मा पाङ्घुङ्सिङ्लो खे़ल्ले़चोगुल्ले़ आभे़ल्ले़साङ् मे़येःत्ता हे़क्क्याङ् मे़जिःत्तारो॥ 9 कर “आङ्गाॽ निङ्वाॽफुमाङ्ङिल्ले़ कुमिङ् मे़लोःङ्ङाल्लो हे़क्क्याङ् खुने़ॽ कुमिङ्ङो आङ्गाॽ मे़बाःत्तान्लो” हे़क्के लॽआने़भग्र खुने़ॽ कुबाःन्जाक्किन् मि हे़क्के हुरुरु तिःत्लो खे़ब्याङ् खे़ल्ले़ आसिक्लुङ्मे़न् हाम्हाम् मे़त्तुरो॥ आङ्गाॽ सदादिङ् खे़न् साक्मा तम्सिङ् चोगुङ्लो कर खे़न् आङ्गाॽ थम्मा मे़सुक्कान्लो॥ 10 के़रे़क्ले़ मुरा मुसिक् मुसिक् लॽरिक् मे़बाःत्तुबान् खे़प्सुङ्लो, “के़रे़क् पिसाङ् किमा यङ्मारक् वाॽरो, कल्ले़ कुदक्ले़ङ्वाओ आनिॽ सुहाङ्युक्पाहाॽओ लुङ्हाःन्पान् युक्खुम्लो!” आङ्गाॽ कुस्साङ् मे़ल्लःम्मनाबा पोङ्ङाबान् आनिःत्ताङ्बा आन्जुम्हाॽरे़आङ् मे़हाङ्घुर मे़वाॽरो॥ खे़ङ्हाॽरे़ मे़बाःत्तुॽ, “से़क्खाःल्ले़ खे़न् फे़न्पाःन्नो थाबिलारो, हे़क्केःल्ले़ खे़ल्ले़ ताप्फे़ःम्बा कुबाःन्निन् आघोसुम्माङ् खे़न् कुले़क्वा नुःक्मा आसुक्तुम्बिलारो॥” 11 कर के़धुम्बा नु मुक्साम्दाङ्बा यहवे दाङ्बाए, खे़ने़ॽ आङ्गाॽ ले़प्माङ् के़वाॽरो हे़क्क्याङ् आङ्गाॽ के़घुम्बाहाॽ मे़दोःक्काङ् मे़गे़ङ्लो॥ हे़क्क्याङ् खे़ङ्हाॽ सदादिङ् सिरिङ्ममो मे़धारो थेआङ्भे़ल्ले़ खे़ङ्हाॽ कुलिङ्दो के़गे़प्पा पोङ्मा मे़न्छुक्ने़न्लो हे़क्क्याङ् खे़ङ्हाॽरे़ खुन्छिॽ नाधामान् आप्फाल्ले़आङ् निङ्वाॽ मे़म्भेःत्छुन्लो॥ 12 मुक्साम्दाङ्बा यहवे दाङ्बाए, साम्योबाहाॽ के़साॽरुसिरो हे़क्क्याङ् मनाहाॽरे़ खुन्छिॽ निङ्वाॽ के़गोःत्तुरो, खे़ङ्हाॽरे़ खुन्छिॽ सिक्लुङ्मान् नु निङ्वाॽओ थे वाॽ, खे़न् के़निसुरो॥ खे़ल्ले़चोगुल्ले़ आनिङ्मिहाॽ खुम्दिङ् के़बिरुसिबान् ओमे़प्मा खोसुङ्लरो थेआङ्भे़ल्ले़ आबाःन्निन् खे़ने़ॽ के़हुक्को हुक्सुप्ने़आङ् वाॽरो॥ 13 यहवे दाङ्बे़ल्ले़ कुलागि से़वासाम्लो साम्मे़त्ते़म्मे़ॽओ! यहवे दाङ्बे़ल्ले़ कुनारा फोसे़म्मे़ॽओ! खुने़ॽ याङ्गे़साॽबाहाॽ नु कुहोःप्मा कुसाक्मो के़धाबाहाॽ ताक्के़भे़ॽबाहाॽरे़ खुन्छिॽ हुक्कोलाम् ताङ्से़ःप्तुसिरो॥ 14 सावाःन्छिङ्ङाबा ये़न्निन् माङ्दे साङ्ग्रारे़ ते़त्तुररो! आम्मारे़ कत्ताङ्बा ये़न्निन् निङ्वाॽसो मे़बोङ्ने़न्लरो! 15 खे़न् मनान् साङ्ग्रारे़ ते़त्तुररो, खे़ल्ले़ आङ्गाॽ आम्बा अक्खे मे़त्तुरो “खे़ने़ॽ अङे़ःक्वा सा के़गत्तुरो! खे़ने़ॽ ये़म्बित्छा के़स्सा पोःक्खे़रछ!” अक्तङ्बा इङ्घङ् पिरुआङ् खुने़ॽ कुनिङ्वाॽ त्ये़र चोगुआङ् वये़रो॥ 16 खे़न् मनान् खे़न् ये़क्यक्हाॽ हे़क्तङ्बा पोङ्लरो, खे़ङ्हाॽ यहवे दाङ्बे़ल्ले़ लुङ्माॽ मे़न्दुक्के मे़क्खुआङ् वये़रो॥ खे़ल्ले़ तानाम् के़हाःप्पा के़जिङ्बा हाःम्लाक्वा खे़प्सुररो खे़ब्याङ् ले़न्दिक् मसेरा ते़न्धङ्गे़न् इक्लान् खे़प्सुररो॥ 17 थेआङ्भे़ल्ले़ आङ्गाॽ साप्पोःक्पो यागाङ्ङिल्ले़ खे़ल्ले़ मे़से़राङ्ङिन्लो॥ हे़क्के पोःक्खे़ल्ले़ग आम्मारे़ कुभक्तुङ्ङिन्ने आइपुङ् पोःक्खे़बारो॥ 18 आङ्गाॽ थेआङ् सावाःन्छिङ्ङाबाइनु? थे आहिङ्हिङ् ये़त्तुक्खे तुम्मा, तुक्खे लाक्खे चामा हे़क्क्याङ् चाःत्थि पेःक्मारे़ लागि कन् सावाःन्छिङ्मान् आङ्गाॽ खोसुङ्बाबि? |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.