यर्मिया 2 - लिम्बुनिङ्वाॽफुमाङ्ङिल्ले़ इस्राइले़न् कम्ब्राङ् मे़त्तुॽ 1 यहवे दाङ्बे़ल्ले़ कुइङ्घङ्ङिन् आङ्गाॽओ के़रे़, 2 “खे़ने़ॽ कन् इङ्घङ्ङिन् यरुसले़ःम्मो के़वाॽबाहाॽ के़रे़क् मे़त्ते़से़ॽ, यहवे दाङ्बे़ल्ले़ अक्खे पाःत्तुरो— “इस्राइलए, खे़ने़ॽ के़धाङ्बे़न् वे़म्मो आक्खे़न् नसाःन्साबा के़वये़ के़लॽबान् आङ्गाॽ आनिङ्वाॽसुम्मो वाॽरो, सिसामेःत्तिल्ले़ हे़क्के खे़ने़ॽ मिःम् के़मे़त्ताङ्लो॥ मुरे़क् खारे़क् थेआङ् के़होप्पादे़न्नो, थेआङ् मे़न्लिङ्मनाबा चिजि खक्खक्पा एःक्सादे़न्नो खे़ने़ॽ आङ्गाॽ आएगाङ् आएगाङ् के़नाःत्ताङ्लो॥ 3 इस्राइलए, खे़ने़ॽ आलागि सेसेबा के़वये़रो हे़क्क्याङ् चासुम्मा ये़म्मो आङ्गाॽओ मे़दोन्दुबा कुजाःल्ले़न् चासोक् हे़क्तङ्बा के़वये़रो॥ खे़ने़ॽ हान्ति के़जोःक्पा के़रे़क् आप्तिक्साबा लेःत्तुङ्सिङ्लो खे़ब्याङ् खे़ङ्हाॽरे़ खुन्छिॽ सम्धाङ् ये़त्तुक्खेन् पाङ्घुङ्लो॥” इस्राइलबा पाधे़बाहाॽरे़ खुन्छिॽ लायो 4 याकुबरे़ कुमुॽइदाङ्सासे, इस्राइलरे़ के़रे़क् कुधिन्दाङ् सायोबोरासे, यहवे दाङ्बे़ल्ले़ कुइङ्घङ्ङिन् खे़प्से़म्मे़ॽओ॥ 5 यहवे दाङ्बे़ल्ले़ अक्खे पाःत्तुरो— “के़धाःक्थे़बाहाॽरे़ आङ्गाॽ आदक्ले़ङ्वाओ ताप्फे़ःम्बा पान् थे मे़घोसुबे? थे़मा पाःन्निल्ले़ चोगुल्ले़ खे़ङ्हाॽ आङ्गाॽलाम्बा माःङ्घा मे़बोःक्खे़बे? खे़ङ्हाॽरे़ थेनाधेबा नावाइत्लाहाॽ से़वा मे़मे़त्तुसिरो हे़क्क्याङ् आबाङेआङ् हने़बा मे़बोःक्खे़रो॥ 6 आङ्गाॽ खे़ङ्हाॽ मिस्र लाजेॽलाम्बा लःत्तुङ् थाक्तुङ्सिङ्लो॥ मुरे़क् खारे़क्पा एःक्सादे़न्नो, नु मुरे़क् खारे़क्पा के़हेबा के़जप्पा हे़क्क्याङ् ये़ःङ्घा इसेःङ्बा थुप्थाॽ के़ने़बादे़न्नो, हाःत्ताङ् के़होप्पा लाङ्ङिल्ले़आङ् मे़दोॽरुम्बा के़हेबादे़न्नो किप्मा के़घुबा लाजेॽ लुम्मोलाम्बा आङ्गाॽ खे़ङ्हाॽ लाम्लोसुङ्सिङ्ङाङ् तारुङ्सिङ्लो हे़क्केसाङ् खे़ङ्हाॽरे़ आङ्गाॽ थेआङ् निनि खे़म्घे़म् मे़न्लाप्ताङ्ङिन्लो॥ 7 “हे़क्क्याङ् खुने़ॽ खिनिॽ लत्छा नुबा लाजेॽओ के़दारिरो, हे़क्केलॽरिक् खे़प्मोबा नुःब्नुबा पाःन्हाॽ नु पोगुगे़न् कुजान् के़जाम्लो॥ कर खे़ल्ले़ कुले़क्वाओ खे़ङ्हाॽरे़ आङ्गाॽ आलाजेन् मे़जिःन्दुरो हे़क्क्याङ् आङ्गाॽ पिरुङ्सिङ्बा लाजेन् खे़ङ्हाॽरे़ आसुत्थो मे़जोगुरो॥ 8 निङ्वाॽफुसाम्बाहाॽरे़ अक्खेलॽरिक्काङ् पान् सेःन्मे़न्दोसुन्लो ‘यहवे दाङ्बान् आत्ता वाॽबे?’ साम्योइङ्जाङ् के़हुॽबाहाॽरे़ आबाङेआङ् कुसिङ् मे़न्निःत्ताङ्ङिल्लो युक्साबाहाॽरे़आङ् आङ्गाॽनु पिफ्युङ् मे़जोगुरो॥ माङ्निङ्वाॽपान् के़बाःप्पाहाॽरे़ग बाल साम्माङ्ङिल्ले़ कुमिङ्ङो माङ्निङ्वाॽपान् मे़बाःत्तुरो, हे़क्क्याङ् हने़बा नावाइत्लाहाॽ माङ्से़वा मे़मे़त्तुसिरो॥ निङ्वाॽफुमाङ्ङिल्ले़ कुमनाहाॽरे़ खुन्छिॽ लायो 9 कन् पाःन्निन् यहवे दाङ्बे़ल्ले़ उवा चोगुरो ‘खे़ल्ले़चोगुल्ले़, आङ्गाॽ आदुःन्दे़न् याम्मो खिनिॽ आमनाहाॽ चे़क्निङ्लो॥ हे़क्क्याङ् के़दाबा तङ्बेहाॽओ खिनिॽ सामे़न्छाॽहाॽ आप्तिक् कुःत्तुङ्सिङ्लो॥ 10 नाम्धा पिसाङ् साइप्रस वागप्खाम्मो खे़ङ्हाॽ ओमुसे़ मे़बेःक्लरो, नाम्गे़न् ले़प्माङ् केदार लाजेॽओ आत्तिल्ले़इ कुगोःत्छे़ मे़बाङ्घुसिररो, अक्तङ्बा पान् तगि आप्फाल्ले़आङ् पोःक्खे़बा के़न्निसुम्मिन्लो॥ 11 वेॽ आत्तिन् सुवाङ्ङिल्ले़आङ् आबाङे साम्माङ्हाॽ आप्फाल्ले़आङ् मे़न्ले़क्के कत्तुसिरो, हे़क्केसाङ् खे़न् साम्माङ्हाॽ से़क्खाबा माङ् मेःन्छिरो॥ कर आङ्गाॽ आमनाहाॽरे़ हे़क्तङ्बा साम्माङ्हाॽनु आङ्गाॽ मे़ले़क्ताङ्लो, खे़ङ्हाॽरे़ खुन्छिॽ मिमिदिङ्ङिन् खे़न् हने़बा साम्माङ्हाॽनु मे़ले़क्तुरो॥ 12 खे़ल्ले़चोगुल्ले़ ताङ्साक्पासे, खिनिॽ थे़गक्कक्ना यक्खे़म्मे़ॽओ, हे़क्क्याङ् किमा यङ्माओ थ्ये़म्मे़ॽआङ् खिनिॽ निङ्वाॽ मये़म्मे़ॽओ 13 थेआङ्भे़ल्ले़ आङ्गाॽ आमनाहाॽरे़ ने़त्छि लायो मे़जोगुआङ् मे़वाॽरो— खे़ङ्हाॽरे़ आहिङ्हिङ्बा के़बुम्बा च्वाःत्तिन् मे़नाॽरुआङ् मे़वाॽरो हे़क्क्याङ् वागे़युबा के़बेःक्पा च्वाःत्तिन् थुङ्मारे़ लागि वाबाक्हाॽ मे़दयुआङ् ने़रो॥’” लायोल्ले़ कुले़क्वा इस्राइलरे़ खोसुबा थुम्घो 14 “इस्राइले़न् योग्बा मेःन्लो, खे़न् योग्बा पोःक्खे़आङ् सावाःन्छिङ्बा मेःन्लो॥ हे़क्केःल्ले़ थेआङ् नाप्मनाबा चिगक्वा हे़क्के मे़बोःक्खे़बाबे? 15 खे़ङ्हाॽ खुने़ॽ कुसम्धाङ् खिरिङ्बान् हे़क्के मे़हुःक्काङ् मे़वाॽरो हे़क्क्याङ् खे़ल्ले़ लाजेन् चिजि खक्खक् पोःक्खे़आङ् वाॽरो॥ खे़ल्ले़ कुये़क्यक्हाॽ खाप्पुथ्यःङ् मे़जोगुरो हे़क्क्याङ् मे़नाॽरुआङ् ने़रो॥ 16 आँ, नोप नु तहपनेसबा मनाहाॽ मे़दारो हे़क्क्याङ् खे़ल्ले़ के़धेगेःक्किन् लिगोॽ मे़नःक्खुआङ् वाॽरो॥ 17 इस्राइलए, आङ्गाॽ यहवे दाङ्बा के़निङ्वाॽफुमाङ्ङिल्ले़ खे़ने़ॽ के़लाम्मो लाम्लोने़र वयाङ्लो कर खे़ने़ॽग आङ्गाॽ के़नाॽराङ्लो हे़क्क्याङ् खे़ने़ॽ आबाङे कन् पाःन्निन् के़सम्धाङ् के़दारुरो॥ 18 निल वहःङ्ङोबा च्वाःत्तिन् थुङ्मारे़लागि मिस्रओ के़बेःक्लो इग्र युफ्रेतिस वहःङ्ङोबा च्वाःत्तिन् थुङ्से़ अस्सुर लाजेॽओ के़धासिङ्लो हे़क्केःल्ले़ खे़ने़ॽ के़लागि थे इन्धा पोङ्ङाङ्बे? 19 खे़ने़ॽ आबाङे कुॽइभे़म्माल्ले़ के़सम्धाङ् खुम्दिङ् तारुरो हे़क्क्याङ् खे़ने़ॽ के़नाॽराङ्बा पाःन्निल्ले़ए कुनामे़न्छाॽ के़जोःक्लो॥ आङ्गाॽ यहवे दाङ्बा के़निङ्वाॽफुमाङ्ङिन् नाॽमा नु आङ्गाॽओ से़वा मे़न्जोःक्मा साॽरिक् ताप्फे़ःम्बा नु निङ्वाॽ मे़न्दामा पोङ्लो, खे़न् खे़ने़ॽ कुसिङ् के़निःत्तुरो॥ आङ्गाॽ पयम् यम्बा मुक्साम्दाङ्बा यहवे दाङ्बे़ल्ले़ पाःत्तुङ्ङाङ् वाॽआरो॥” इस्राइलरे़ यहवे दाङ्बान् माङ्से़वा मे़प्मा ले़रुबा 20 यहवे दाङ्बे़ल्ले़ अक्खे पाःत्तुरो, “इस्राइलए, यरिक् ये़म्माङ्धो खे़ने़ॽ आङ्गाॽ आयुक्किन् के़नाॽरुरो, खे़ने़ॽ आइङ्जाङ्ङिन् इःप्मा नाःप्मा नु आङ्गाॽ माङ्से़वा मे़प्मा के़ले़राङ्लो॥ के़रे़क् केःम्बा कोःक्मा फाङ्जङ् थे़गु माङ्वाहाॽओ हे़क्क्याङ् के़रे़क् सरेःक्क्याःप्पा सिङ्बुङ् सिगाङ् खे़ने़ॽ वेॽ माङ् साम्माङ्हाॽनु के़त्निमा हे़क्के ताप्फे़ःम्बा याःम्बक् के़जोगुरो॥ 21 चे़ल्ले़क्सेॽबुङ् हे़क्के नुबा कुलिःम्बा तेॽने़आङ् वये़रो हे़क्क्याङ् खे़ने़ॽ लेःत्ने़आङ् के़युङे़रो॥ कर ओमे़त्ते़ॽ, आल्ल खे़ने़ॽ थे के़बोःक्खे़इरो॥ खे़ने़ॽग लत्छा के़गिबा हने़बा चे़ल्ले़क्सेॽ के़बोक्खे़आङ् के़युङ्लो॥ 22 नुरिक् मॽवा के़देॽबा फिःम्भ्रिक्पाल्ले़ साॽरिक् वागे़हप्सिङ्लो हे़क्क्याङ् माक्से़न्निन् यरिक् ओगप् के़जोगुरो हे़क्केसाङ् माक्के़धक्पा खे़ने़ॽ के़लायोन् आङ्गाॽ आमिक् तगिए वाॽरो॥ 23 कर खे़ने़ॽ के़बाःत्तु, ‘आङ्गाॽ आबाङे आसुत्थो होःप्पाआरो, बाल साम्माङ्ङिन् से़वा मे़मे़त्तुङ्ङिन्लो’ लॽरिक् खे़ने़ॽ आक्खेलॽरिक् पाःप्मा के़सुक्तुबे? खे़ने़ॽ सेःङ्घा ने़ने़बादे़न्नो लायो के़जोगुआङ् के़वये़रो हे़क्क्याङ् हे़न्हाॽ हे़न्हाॽ के़जोगुआङ् के़वये़, खे़न् ओमे़त्ते़ॽओ॥ कुम्बाबा के़गोःप्मा उमे हे़क्तङ्मा पान् मे़ङ्घे़म्मनाबा के़बोक्खे़आङ् के़वये़रो हे़क्क्याङ् खे़ने़ॽ याङ्ना कत्ना के़लोःक्ल के़वाॽरो॥ 24 मुरे़क् खारे़क्पा एःक्सादे़न्नो वाॽमा के़गाम्मा कुम्मामा ताम्भुङ् अदङ्ङिन् हे़क्के हे़क्क्याङ् कुम्बाबा अदङ् के़गोःप्माआङ् सुरिःत्तिन् सुःक्सुःक् के़नाम्मार के़वाॽमा हे़क्के खे़ने़ॽ के़बोक्खे़आङ् के़वाॽ खे़न् हाःत्ले़ युक्को कप्मा सुक्तुबे? खे़न् कोःप्मारे़ लागि कुम्बाबा अदङ्ङिल्ले़ थेआङ् तुक्खे चोःक्मा मे़बोङ्ङिन्लो, खे़ल्ले़ कुये़म्मो खे़न् कुम्मामा अदङ्ङिन् उसुरु तुमुरो॥ 25 इस्राइलए, वेॽ साम्माङ्हाॽरे़ खुन्छिॽ एगाङ् एगाङ् लाङ्घेगे़ॽआङ् के़लाङ्ङिन् तुक्ल मे़याःन्दे़न्ने़ॽओ, हे़क्क्याङ् कुजाबोःप्मे़न् सर्गे़ङ् हेर मे़जोगे़न्ने़ॽओ॥ कर खे़ने़ॽ के़बाःत्तुॽ, ‘मेःन्! आङ्गाॽ खे़न् ले़प्मा मे़सुक्कान्लो॥ आङ्गाॽ वेॽ सुवाङ्समा माङ्साम्माङ्हाॽ आसिराॽ मे़धाङे़आङ् मे़वाॽरो॥ आङ्गाॽग खे़ङ्हाॽ नाःप्मा तिम्मासिए पोङ्लो॥’” इस्राइलरे़ खोमा लाॽरुबा खुम्दिङ् 26 यहवे दाङ्बे़ल्ले़ अक्खे पाःत्तुरो, “लत्थिक् खुःन्द्रिक्पान् साक्पो थाःल्ले़ खे़ल्ले़ कुजाःत्थि पेःक्लो, हे़क्केलॽरिक्के खिनिॽ इस्राइलिहाॽ, हाङ्हाॽ नु युक्साबाहाॽ, खिनिॽ निङ्वाॽफुसाम्बाहाॽ नु माङ्निङ्वाॽपान् के़बाःप्पाहाॽ के़रे़क्ले़ खुन्छिॽ चाःत्थि पेःक्लो॥ 27 सिङ्ङिन् ‘आम्बौ’ नु लुङ्ङिन् ‘आम्मौ’ के़मे़त्तुम्लो आबाङे खिनिॽ नारान् आङ्गाॽ ले़प्माङ् के़न्हिसुम्मिन्लो, कर खिनिॽ एःक्थाःक्मान् के़हिसुम्माङ् के़वयिरो खे़ल्ले़चोगुल्ले़ खिनिॽ ये़त्तुक्खेओ के़ध्ये़ॽइरो, खे़ब्याङ् अक्खेलॽरिक् याप्मि पेलि के़भाक्तिरो, ‘ये़ॽआङ् आनिगे याप्मि ताङ्आसे़ःप्ते़ॽओ॥’ 28 “आङ्गाॽ यहवे दाङ्बे़ल्ले़ मे़त्निङ् खिनिॽ आबाङे लागि के़जोगुम्सिम्बा साम्माङ्हाॽ आत्तान् मे़वाॽबे? ये़त्तुक्खेओ खिनिॽ के़ध्ये़ॽइल्ले़ खे़ङ्हाॽरे़ मे़सुक्तुने़भग्र खिनिॽ ताङ्के़म्से़ःप्तिररो॥ यहुदाए, खे़ने़ॽ के़ये़क्यक्हाॽ यरिक् मे़ने़रो, खे़म्म्याक्के यरिक् खे़ने़ॽ के़माङ् साम्माङ्हाॽआङ् मे़वाॽरो॥ 29 खिनिॽ लुङ्हाःप्मा पान् थे़मा वाॽबे? खिनिॽ थेआङ् आङ्गाॽ आदक्ले़ङ्वाओ पिफ्युङ् के़जोगुम्बाबे? 30 आङ्गाॽ खिनिॽ खुम्दिङ् पिनिङ् कर खे़ल्ले़ खिनिॽ थेआङ् के़म्मे़त्तिन्लो, आङ्गाॽ आघुम्दिङ्लाम्बा खिनिॽ के़न्हिन्दिन्लो॥ कुसाक्के़न्निल्ले़ मि के़बोङ्बा खिरिङ्बान् हे़क्के खिनिॽ सिक् पोगे़रो खे़ब्याङ् खिनिॽ माङ्निङ्वाॽपान् के़बाःप्पाहाॽ के़से़रुम्सिम्लो॥ 31 कन् थाःक्कोबा इस्राइलबा मनासे, यहवे दाङ्बे़ल्ले़ कन् कुइङ्घङ्ङिन् निङ्वाॽ इःत्ताम्मे़ॽओ॥ थे आङ्गाॽ खिनिॽ लागि लत्छा मुरे़क् खारे़क्पा ये़ःङ्घादे़न् पोःक्खाङ्बि? इग्र थे खागे़माक्पा लाजेॽ कुसिङ्बा पोःक्खाङ्बि? हे़क्केःल्ले़ थेआङ् खिनिॽ आनिगे आप्फेक् निङ्वाॽ तादा चोगुम्बे़ खे़ब्याङ् याम्मो खे़ने़ॽओ मे़द्ये़इगे़न् के़बाःत्तुम्बाबे? 32 थे मे़न्छ्याःल्ले़ आबाङे कुसामा कुभुमा वाःत्तिहाॽ निङ्वाॽ फेःत्छुबि? इग्र सिसामेःत्तिल्ले़ ते़न्धाम्गे़न् कुमेःक्खिम् कुजाङ्हाॽ निङ्वाॽ मुःत्छुबि? कर आमनाहाॽरे़ आङ्गाॽ यरिक् ये़म्माङ्धो निङ्वाॽ मे़भेःत्छाङ्लो, खे़न् ये़म्हाॽग निःप्माए सुक्मे़दे़त्ने़न्लो॥ 33 खे़ने़ॽग मिःम्जि कोःप्मा साॽरिक् के़ले़बा के़जोःक्लो, कुॽइगे़भे़म्मानुःल्ले़आङ् कुॽइगे़भे़म्मा मे़न्छुमाःल्ले़ खे़ने़ॽलाम्बा हुॽसिङ्मा सुक्तुरो॥ 34 खे़ने़ॽ के़जाङ् नु के़देत् के़भुङ्ङो याङ्गे़साॽबा फोत्या मे़ःन्नेबाहाॽरे़ खुनिॽ माक्खिॽइल्ले़ पित्तुआङ् पत्लो, फाःन्दाःल्ले़ कुमाक्खिङ्ग मेःन्लो॥ कर कन् के़रे़क् पोःक्खे़साङ् खे़ङ्हाॽ के़न्दे़म्सुन्छिन्लो! 35 हे़क्क्याङ् खे़ने़ॽ अक्खे के़बाःत्तुॽ, ‘आङ्गाॽग फोत्या मेःन्नेबा चोःक्कारो, से़क्खासाङ् यहवे दाङ्बान् आङ्गाॽनु कुयाःक्ले़ॽरे़बा होप्लो॥’ कर खे़ने़ॽ लायो मे़न्जोःक्के वाॽआ के़बाःत्तुरो खे़ल्ले़चोगुल्ले़ए आङ्गाॽ यहवे दाङ्बे़ल्ले़ खे़ने़ॽ खुम्दिङ् पिने़रो॥ 36 खे़ने़ॽग के़ये़प्ले़क्किन् के़ले़क्खुरो हे़क्क्याङ् के़बाःप्पाःत् ना नु कत्ना के़वाॽरो खे़ने़ॽ मिस्ररे़आङ् इङ्ले़क्को के़धासे़रो, हे़क्केलॽरिक्के अस्सुरे़ल्ले़ खे़ने़ॽ निङ्साङ् पुक्मो के़धारो॥ 37 सिरिङ्ममाल्ले़ के़धे़गेक्पान् ले़ब्जु के़मे़त्तुरो हे़क्क्याङ् खे़ने़ॽ मिस्रलाम् के़नुःङ् के़धाङ्लो॥ खे़ने़ॽ नागे़साॽरुसिबाहाॽ आङ्गाॽ यहवे दाङ्बे़ल्ले़ नाॽरुङ्सिङाङ् वाॽरो, खे़ङ्हाॽलाम्बा खे़ने़ॽ थेआङ् कुभाॽ के़ङ्घोसुन्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.