यर्मिया 19 - लिम्बुके़हे़ःप्पा कुःन्दा 1 यहवे दाङ्बे़ल्ले़ आङ्गाॽ अक्खे मे़त्ताङ्, “खे़ने़ॽ कोःम्भाल्याओ पेगे़ॽआङ् लत्छा खाम् कुःन्दाधिक् इङे़ॽ हे़क्क्याङ् मनाहाॽरे़ खुन्छिॽ लुम्मोलाम् कुभा तुम्भाक्साहाॽ नु निङ्वाॽफुसाम्बाहाॽ सोरिक् तेॽरे़से़ॽ 2 खे़ब्याङ् हिन्नोम ने़ने़बादे़न्नोबा खाम्ले़क् के़हे़ःप्पा मे़प्मनाबा यम्बा लाम्धेःप्पोलाम् पेगे़ॽ हे़क्क्याङ् खे़प्मो आङ्गाॽ मे़त्ने़बा इङ्घङ्ङिन् मनाहाॽ मे़त्ते़से़ॽ॥ 3 यहवे दाङ्बे़ल्ले़ कुइङ्घङ्ङिन् खे़प्से़म्मे़ॽ, ‘यहुदाबा हाङ्हाॽ नु यरुसले़ःम्मोबा यक्युङ्बासे, मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ खिनिॽ अक्खे के़मे़त्ति, आङ्गाॽ कन् ते़न्नो के़साक्पा ये़त्तुक्खे तारुङ्ॽ खे़ल्ले़ कुयाःम्बेओ के़घे़म्बा के़रे़क्ले़ खुन्छिॽ ने़भाक्वा फिङ्ॽ॥ 4 “‘थेआङ्भे़ल्ले़ कन् मनाहाॽरे़ आङ्गाॽ लाप्मे़भुसाङ्ङाङ् मे़वाॽ हे़क्क्याङ् आप्फेक् नु आबाङे खुन्छिॽ पाधे़बाहाॽरे़ इग्र याम्मो यहुदाबा हाङ्हाॽरे़ कुसिङ् मे़न्निःत्तुन्छिन्बा साम्माङ्हाॽओ सिदुङ्जभा मे़दोन्दुआङ् कन् ते़न्निन् एयाङ्बा साम्माङ्हाॽरे़ खुन्छिॽ माङ्धाःन् मे़जोगुआङ् ने़॥ खे़ङ्हाॽरे़ कन् ते़न्निन् आप्तिक् मेःन्नेबा माक्खिॽइल्ले़ हे़ःत्ताङ्बा मे़जोगुआङ् ने़॥ 5 हे़क्क्याङ् मिओ खुन्छिॽ साहाॽ मिधिङ्मनादेमनाबा सिदुङ्जभा तोःम्मारे़सिरे़ लागि बाल साम्माङ्ङो ले़त्ति तोःम्मादे़न्हाॽ मे़जोगुआङ् ने़ःॽ॥ आङ्गाॽ आप्फाल्ले़आङ् खे़ङ्हाॽ हे़क्के चोःक्मा इङ्जाङ् मे़बिरुङ्सिङ्ङिन्, अक्तङ्बा पान् आङ्गाॽ आनिङ्वाॽओ आप्फाल्ले़आङ् मे़द्ये़ने़न्॥ 6 खे़ल्ले़चोगुल्ले़ अक्तङ्बा ये़म् ताःॽ, हे़क्क्याङ् खे़न् ते़न्निन् तोपेत इग्र हिन्नोमबा ने़ने़बादे़न् मे़म्मे़त्तुन्॥ कर मनासे़प्मा ने़ने़बादे़न् फाॽआङ् कुमिङ् पोङ्ॽ॥ खे़प्मो मनाहाॽरे़ चेहाॽ लुप्मादे़न् खोमे़न्दे़त्ते थारिक् चेहाॽ मे़लुप्तुसिॽ॥ 7 “‘आम्भा कन् ते़न्नो आङ्गाॽ यहुदा नु यरुसले़ःम्मोबा यक्युङ्बाहाॽरे़ चोःक्मा मे़गोःत्तुबान् कुसुम् मे़न्दम्मनाबा चोगुङ्ॽ, खे़ङ्हाॽ खुन्छिॽ निङ्मिहाॽरे़ मे़नाःन्दुसिर याःन्दुङ्सिङ् खे़ब्याङ् खे़ङ्हाॽ आङ्गाॽ ते़न्धङ्ङो मे़क्खुङ्सिङ् हे़क्क्याङ् खे़ङ्हाॽरे़ खुन्छिॽ चेहाॽ पुहाॽ नु ताम्भुङ् थक्साहाॽ कुजा चामारे़ लागि पिरुङ्सिङ्ॽ॥ 8 आङ्गाॽ कन् ये़क्यक्को अक्तङ्बा मे़क्मासिमे़न् तारुङ्ॽ कन् लाम्बा के़बोङ्बाआङ् के़बेःक्पा के़रे़क् मनाहाॽ चिजिङ् यङ्मा मे़सिरो हे़क्क्याङ् खे़न् ये़क्यक्किन् कुनामे़न्छाॽ मे़मे़त्तुॽ॥ 9 निङ्मिहाॽरे़ ये़क्यक्किन् किर्गप् मे़गबु हे़क्क्याङ् खे़प्मोबा यक्युङ्बाहाॽ से़प्मा मे़गोःत्तुसिॽ॥ खे़ङ्हाॽ अक्तङ्बा किप्मागे़घुबा निङ्मिहाॽरे़ खुन्छिॽ इजोओ मे़धाआङ् मनाहाॽ आबाङे मे़जासिङ्ॽ हे़क्क्याङ् आबाङे खुन्छिॽ साहाॽरे़ ने़क्साःन्नाङ् मे़जःॽ॥ 10 “‘खे़न् एगाङ् यर्मियाए, खे़न् खाम् कुःन्दाःन् खे़ने़ॽनु के़बेःक्पा मनाहाॽरे़ खुन्छिॽ तगि फयःप् यःप्से़ॽ,’ 11 हे़क्क्याङ् खे़ङ्हाॽ मे़त्ते़से़ॽ, ‘मुक्साम्दाङ्बा यहवे दाङ्बे़ल्ले़ अक्खे पाःत्तु—आङ्गाॽ कन् सुवाङ्हाॽ नु कन् ये़क्यक्किन् थे़युःत् थे़युःत् युःत्तुङ्सिङ्ॽ हे़क्क्याङ् कोःम्भाल्याःल्ले़ के़हे़ःप्पा कुगुःन्दान् हे़क्के खे़ङ्हाॽ याम्मो काम्मा सुक्मे़न्दे़प्मनाबा मे़बोङ्ॽ॥ खे़प्मो मनाहाॽरे़ चेहाॽ लुप्मादे़न् खोमे़न्दे़त्ते थारिक् चेहाॽ मे़लुप्तुसिॽ॥ 12 कन् ये़क्यक्किन् नु कप्मोबा यक्युङ्बाहाॽआङ् हे़क्केए चोगुङ्सिङ् हे़क्क्याङ् तोपेतओ हे़क्के चोगुङ्सिङ् फाॽआङ् आङ्गाॽ यहवे दाङ्बे़ल्ले़ पाःत्तुङ्ॽ॥ 13 यरुसले़ःम्मोबा हिम्हाॽ, यहुदाबा हाङ्हाॽरे़ खुन्छिॽ हाङ्हिम्हाॽ नु खे़न् के़रे़क् हिम्हाॽओबा आःम्भोॽहाॽओ ताङ्साङ्बोबा मे़न्छ्याब्रुक्मा खेःम्सिक्पाहाॽओ सुक्पा मे़हाःन्दुआङ् वाॽ खे़ब्याङ् कुसिङ् निःत्मे़न्दे़प्मनाबा साम्माङ्हाॽओ सेजःङ्वा सिदुङ्जभा मे़दोन्दुआङ् वाॽ, खे़ङ्हाॽ के़रे़क् तोपेत हे़क्के आसुत्थो मे़बोङ्ॽ॥’” 14 खे़न् एगाङ् यर्मियान् तोपेतलाम् नुःक्खे़, खे़प्मो यहवे दाङ्बे़ल्ले़ कुइङ्घङ्ङिन् मनाहाॽ मे़प्मासि पाङ्घुआङ् वये़॥ खुने़ॽ पेआङ् यहवे दाङ्बे़ल्ले़ कुहिम् लक्खुम्मो ये़म्सिङ्ङाङ् मे़त्तुसि, 15 “मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, ‘आङ्गाॽ कन् ये़क्यक्किन् नु कुबेसाङ्बा के़रे़क् चुजुक्सा ये़क्यक्हाॽओ आबाङे पाःत्तुङ्बा के़रे़क् खुम्दिङ्हाॽ तारुङ्ॽ थेआङ्भे़ल्ले़ खिनिॽ हादिङ् के़धक्पा के़जोगि हे़क्क्याङ् आबाःन्जाःक्किन् के़ङ्घे़प्सुम्मिन्लो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.