यर्मिया 18 - लिम्बुफुजिक् के़जोःक्पा नु सॽमनाबा खाम् 1 यहवे दाङ्बालाम् यर्मियाओ अक्तङ्बा इङ्घङ् के़रे़, 2 “यो फुजिक् के़जोःक्पा कोःम्भाल्याःल्ले़ कुहिम्मो पेगे़ॽ, खे़प्मो आङ्गाॽ खे़ने़ॽ आइङ्घङ्ङिन् मे़त्ने़॥” 3 आङ्गाॽ कोःम्भाल्याःल्ले़ कुहिम्मो पेगाङ् हे़क्क्याङ् खे़ल्ले़ खाम् सॽमा चाक्काओ थे़माइ चोगुर पत्छे़बा निसुङ्॥ 4 खे़ल्ले़ खाम्मिल्ले़ चोगुर पत्छे़बा फुजिक्के़न् नुबा मे़बोःक्खे़न् खे़ल्ले़चोगुल्ले़ खे़न् सॽमनाबा खाम्लाम्बा खुने़ॽ कुसिराॽ के़धाङ्बा वेॽ फुजिक् चोगु॥ 5 खे़ब्याङ् यहवे दाङ्बे़ल्ले़ कुइङ्घङ्ङिन् आङ्गाॽओ के़रे़, 6 “कोःम्भाल्याःल्ले़ खाम्मिन् फे़त्लाॽरे़आङ् याम्मो चोगुबा हे़क्के आङ्गाॽ इस्राइलबा हिम्सयङ्हाॽ मे़प्मासि आङ्गाॽ युक् मे़गत्ताम्बि? आङ्गाॽ आहुक्को खिनिॽग कोःम्भाल्याःल्ले़ कुहुक्कोबा सॽमनाबा खाम् हे़क्के के़लॽरि॥ 7 कुभा ये़न्नो कुभा मे़न्छाम् सुवाङ्हाॽ इग्र हाङ्जुम्हाॽ आङ्गाॽ हाॽयाक् आःक्खुङ्सिङ्ॽ, मे़क्खुङ्सिङ्ॽ इग्र खाप्पुथ्यःङ् चोगुङ्सिङ् पाःत्तुङ्ॽ, 8 कर खे़न् सुवाङ्ङिन् लायोलाम् हिःन्ने़भग्र आङ्गाॽ थे़मा चोगुङ् फाॽआङ् पाःत्तुङ्ङाङ् वयाङ्, हे़क्के मे़जोक्कान्॥ 9 कुभा ये़म्मो कुभा मे़न्छाम् सुवाङ्ङिन् इग्र हाङ्जुम्मिन् आङ्गाॽ फोःक्खुङ्सिङ् इग्र युक्सिङ् चोगुङ्सिङ् फाॽआङ् पाःत्तुङ्बिला, 10 कर खे़न् सुवाङ्हाॽरे़ आङ्गाॽ आइङ्जाङ्ङिन् मे़न्इःत्तुन् मे़न्नाःत्तुन् हे़क्क्याङ् ताप्फे़ःम्बा चोःक्मा मे़हेःक्तुने़भग्र आङ्गाॽ हे़न् चोगुङ् फाॽआङ् पाःत्तुङ्ङाङ् वयाङ्बा हे़क्के मे़जोगुङ्ङिन्॥ 11 “खे़ल्ले़चोगुल्ले़ आल्ल यहुदा नु यरुसले़ःम्मोबा यक्युङ्बाहाॽ मे़त्ते़ॽसे़ॽ, ‘यहवे दाङ्बे़ल्ले़ हाबा कन् पाःत्तु—ओमे़त्ते़म्मे़ॽ, आङ्गाॽ खे़निॽ खाप्पुथ्यःङ् के़बोःक्खिर चोःक्मा नु खे़निॽ मे़ङ्मालाम् चोगुङ्ल वाॽआ॥ कल्ले़चोगुल्ले़ खिनिॽ लायोबा हिङ्मन् ले़रे़म्मे़ॽ हे़क्क्याङ् खिनिॽ ये़प्ले़क्किन् तोःन्दे़म्मे़ॽ॥’ 12 “कर खे़ङ्हाॽरे़ अक्तङ्बा नुगप् के़म्बि, ‘आनिगे थेआङ् हे़क्के चोगुम्बे़? आहाॽ, आनिगे हे़क्के मे़जोगुम्बे़न्॥ आनिगे आबाङे निङ्वाॽ थाप्थाप् हादिङ् के़धक्पा नु ताक्के़भे़ॽबाए पोःक्खिगे़र वयिगे़रो॥’” 13 खे़ल्ले़चोगुल्ले़ यहवे दाङ्बे़ल्ले़ अक्खे पाःत्तुरो, “सिसागे़न् आस्सा मे़न्छ्या इस्राइलरे़ याम्गे़सिङ्बा याःम्बक् चोगुआङ् वाॽरो, के़रे़क् मे़न्छाम् सुवाङ्हाॽ से़ःन्लाप्ते़म्सिम्मे़ॽओ, अक्तङ्बाग तगि आफाल्ले़आङ् पोःक्खे़बा होप्लो॥ 14 ले़बनानबा केःम्ब केःम्बा याक्पेॽहाॽओ नाःङ्ङिन् आभे़ल्ले़आङ् मे़योःन्ने़न्लो खे़प्मोबा के़सेःम्बा कोःक्मा फाङ्जङ्लाम् के़युबा यक्साङ्वाहाॽओबा च्वाःत्तिन् आफाल्ले़आङ् मे़जप्तुन्लो॥ 15 कर आमनाहाॽरे़ निङ्वाॽ मे़भेःत्छाङ्ङाङ् वाॽरो, खे़ङ्हाॽरे़ हने़बा नावाइत्लाहाॽओ सुक्पा मे़हाःन्दुआङ् मे़वाॽरो हे़क्क्याङ् आप्फेक् लाङ्मे़घेःक्पा लाम्मो मे़घसिङ्ङाङ् मे़वाॽरो॥ खे़ङ्हाॽरे़ आबाङे खुन्छिॽ तगिबा लाम्मिन् निङ्वाॽ मे़मुःत्छुआङ् मे़वाॽरो हे़क्क्याङ् खे़ङ्हाॽ चिहुॽहुॽबा लाम्मो मे़धासिङ्ङाङ् मे़वाॽरो॥ 16 खे़ङ्हाॽरे़ कन् लाजेन् याम्गे़सिङ्बा मे़जोगुआङ् ने़रो, खे़ब्याङ् सदादिङ्ले़ लागि कन् कुनामे़न्छाॽ मे़प्मा चाहाक् पोङ्लो, खे़न् मे़निसुआङ् खे़प्मोलाम्बा लाङ्गे़घेःक्पाहाॽ के़रे़क् चिजिङ् यङ्मा मे़सिरो, खे़ङ्हाॽरे़ खुन्छिॽ निङ्वाॽ माआङ् आबाङे थे़गेःक्किन् हिल्लिङ् हिल्लिङ् मे़हिक्खुरो॥ 17 नाम्गे़त् पिसाङ्बा सुरिःत्माल्ले़ खाम्हिःक्किन् फे़सुरो हे़क्केलॽरिक्के खे़ङ्हाॽ खुन्छिॽ निङ्मिहाॽरे़ खुन्छिॽ तगि फुत्लुम् से़सुङ्सिङ्लो॥ खे़ङ्हाॽरे़ खुन्छिॽ मे़क्मासिमा ये़न्नो आनारान् मेःन्दुक्लो कर आङ्गाॽ आएःक्थाःक्मे़न् हिसुङ् पिरुङ्सिङ्लो॥” यर्मियाःल्ले़ कुदक्ले़ङ्वाओ चे़म्भन् 18 हे़क्क्याङ् मनाहाॽरे़ मे़बाःत्तु, “फे़रे़म्मे़ॽ, यर्मियान् पाःत् मे़म्बाङ्मारे़ लागि आनिॽ थेइ चोगुम्॥ आनिॽ लागि निसाम् के़हुॽबा निङ्वाॽफुसाम्बा, सुजा के़बिबा सिक्कुम्निबा ये़म्बित्छा नु निङ्वाॽफुमाङ्ङिल्ले़ कुइङ्घङ् के़बाःप्पा माङ्निङ्वाॽपान् के़बाःप्पाहाॽ आप्फाल्ले़आङ् मे़न्छुःन्ने़न्॥ आनिॽ खुने़ॽ कुजाःत्थि तेसुम् पिरुम् हे़क्क्याङ् खुने़ॽ कुबाःन्नाङ् खे़प्सुम् मेःन्॥” 19 आङ्गाॽ अक्खेलॽरिक् तुवा चोगुङ्लो, “यहवे दाङ्बाए, आबेलिन् खे़प्से़ॽओ हे़क्क्याङ् आनिङ्मिहाॽरे़ थे़मा मे़बाःत्तुर मे़बत्, खे़न्नाङ् खे़प्से़ॽओ॥ 20 नुबा याःम्बक्किल्ले़ हाङ्से़म्मिन् थे ताप्फे़ःम्बा पोङ्बि? कर खे़ङ्हाॽरे़ग आङ्गाॽ पाःन्नो थामा फाॽआङ् लत्छा लुम्बात् मे़दयुआङ् ने़रो॥ खे़ने़ॽ के़साक्के़न्निन् खे़ङ्हाॽओ मे़धाने़न्ल के़लॽबा निङ्वाॽ इःत्तुङ्लो हे़क्क्याङ् खे़ङ्हाॽ ले़प्माङ् पेलि फाक्कि पाराङ्लो, खे़न् निङ्वाॽ इःत्ते़ॽओ॥ 21 खे़ल्ले़चोगुल्ले़ आल्ल खे़ङ्हाॽरे़ खुन्छिॽ साहाॽ साक्मे़न्जाए मे़सिररो, खे़ङ्हाॽग हयङ् ते़न्धङ्ङो मे़से़रुसिररो, मे़न्छुमाहाॽरे़ खुन्छिॽ ये़म्बाहाॽ नु साहाॽ मे़मासुसिररो, ये़म्बित्छाहाॽ तुक्मा लाःक्मा मिङ्देल्ले़ मे़सिररो हे़क्क्याङ् नालिगे़न् थाङ्बे़न्हाॽ थङ्ङो मे़से़रुसिररो॥ 22 हक्चघत् कुलुप् थिक् मनाहाॽ खे़ङ्हाॽरे़ खुन्छिॽ हिम्हाॽ नाप्मासिरे़ लागि पाङ्घे़से़ॽओ हे़क्क्याङ् खे़ङ्हाॽ किमा यङ्मारे़ फिरिक् फिरिक् मे़भिःक्लरो॥ खे़ङ्हाॽरे़ आङ्गाॽ आदे़म्से़ लुम्बात् मे़दयुआङ् ने़रो हे़क्क्याङ् आङ्गाॽ पाःन्नो थामा फाॽआङ् इजो मे़दाःक्तुआङ् ने़रो॥ 23 कर यहवे दाङ्बाए, आङ्गाॽ से़प्मारे़ लागि खे़ङ्हाॽरे़ चे़म्भन् मे़जोगुरो खे़न् के़रे़क् खे़ने़ॽ के़दगि नुरिक्काङ् थाबे़आङ् वाॽरो॥ खे़ङ्हाॽरे़ खुन्छिॽ कुॽइभे़म्मान् ले़प्मि मे़बिरे़से़न्ने़ॽओ हे़क्क्याङ् खे़ङ्हाॽरे़ खुन्छिॽ लायोन् मे़घे़त्ते़न् मे़बिरे़से़न्ने़ॽओ॥ खे़ङ्हाॽ हारिमे़दार याःन्दे़से़ॽआङ् सोःन्दे़से़ॽओ हे़क्क्याङ् खे़ने़ॽ के़साक्के़न् पोःक्पा हे़क्केए खे़ङ्हाॽरे़ खोमा मे़यारुबा खुम्दिङ् पिरे़से़ॽओ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.