यर्मिया 17 - लिम्बुयहुदाःल्ले़ कुलायो नु कुघुम्दिङ् 1 यहवे दाङ्बे़ल्ले़ पाःत्तुॽ, “यहुदाबा मनासे, खिनिॽ लायोन् फे़न्जेॽ नाक्चाःल्ले़ साप्सिङ्ङाङ् वाॽरो॥ खे़न् खिनिॽ सिक्लुङ्मो लुङ्से़रुङ्बाल्ले़ कुसम्मिल्ले़ लक्मनाआङ् पत्लो हे़क्क्याङ् ले़त्ति तोःम्मादे़न्नोबा हासोःक्सोःक्पाहाॽओ कुभुङ् मे़लक्तुआङ् पत्लो॥ 2 हुम्बे़त् के़दाप्पा सरेःक्याःप्पा के़रे़क् सिङ्बुङ्हाॽरे़ कुबेसाङ्बा हे़क्क्याङ् केःम्ब केःम्बा कोःक्मा फाङ्जङ् थे़गु माङ्वाहाॽओ खे़ङ्हाॽरे़ खुन्छिॽ ले़त्ति तोःम्मादे़न्हाॽ हे़क्क्याङ् असेरा साम्माङ्ङिल्ले़ कुसित्लाङ्हाॽ खे़ङ्हाॽरे़ खुन्छिॽ साएहाॽरे़आङ् से़वा मे़मे़त्तुरो॥ 3 लाजेॽ के़रे़क् लायो के़जोगुम्बाल्ले़ चोगुल्ले़ लाजेॽओबा आगोःक्मा नु खिनिॽ के़रे़क् याङ्साकुन्धेहाॽ हे़क्क्याङ् खिनिॽ केःम्ब केःम्बादे़न्हाॽ आङ्गाॽ खिनिॽ निङ्मिहाॽ नाप्मा तेॽमा पाङ्घुङ्सिङ्लो॥ 4 आङ्गाॽ खे़निॽ खोमा लक् हे़क्के पिनिङ्बा लाजेन् खे़निॽ ले़प्मा पोङ्लो हे़क्क्याङ् कुसिङ् के़न्निःत्तुम्मिन्बा लाजेॽओ खे़निॽ निङ्मिहाॽरे़ खुन्छिॽ याःम्बक् चोःक्मा पाङ्निङ्लो थेआङ्भे़ल्ले़ आङ्गाॽ आसिक्के़न् मि पोःक्खे़आङ् वाॽरो हे़क्क्याङ् खे़न् हुरुहुरुना सदादिङ् तिःत्लो॥” ये़मे़न्दङ्बा सिक्कुम्बा पाःन्मुराहाॽ 5 यहवे दाङ्बे़ल्ले़ अक्खे पाःत्तुरो, “खे़न् मनान् साङ्ग्रा माङ्देरे़ ते़त्तुररो, हे़क्क्याङ् नासिगे़न् थक्कोबा मुक्साम्मो ताःक्पो के़जोःक्पे़ल्ले़ आङ्गाॽलाम् कुसिक्लुङ्मान् लाःत्लाःत् चोगुरो॥ 6 खे़ङ्ग मुरे़क् खारे़क्पा ये़ःङ्घादे़न्नोबा पोःक्ला हे़क्के लॽरो, खे़न् के़हेबा नु मुरे़क् खारे़क्पा एःक्सादे़न्नो युङ्लो, थेआङ् मे़ल्लिङ्मनाबा युम् के़लाःक्पा खाम्मो वाॽरो, खे़न् आप्फाल्ले़आङ् मे़नुॽने़न् मे़दाने़न्लो॥ 7 “कर खे़न् मनाःङ्ग मुॽइसाबारो, खे़ल्ले़ यहवे दाङ्बाओ कुनिङ्वाॽ युक्खुरो खे़ल्ले़ग यहवे दाङ्बे़ल्ले़ कुलाम् ओमे़त्तुरो॥ 8 खे़ङ्ग यङ्घङ्ङिल्ले़ कुबेसाङ् लेःप्मनाबा सिङ्बुङ् हे़क्के लॽरो, खे़ल्ले़ कुसाःप्पिन् च्वाःत् सिगाङ् थारिक् के़त्ताङ् ने़रो॥ हाङ्वामा ये़न्नो खे़न् थेआङ् मे़बोङ्ने़न्लो खे़ल्ले़ कुभे़क्वाहाॽ आभे़ल्ले़साङ् सरेःक्यारिक् पत्लो॥ साङ्याक्काङ् नाम्लाःङ्ङिल्ले़आङ् खे़न् थेआङ् मे़लॽने़न्लो थेआङ्भे़ल्ले़ खे़ल्ले़ आप्फाल्ले़साङ् कुजाॽ थोःक्काङ् पत्लो॥ 9 “मनाःल्ले़ कुनिङ्वान् इङ्ले़क्के चोक्लो खे़न् हे़क्तङ्बा इङ्ले़क्पा वेॽ थेआङ् होप्लो, खे़न् वेःत्ल चोःक्मा सुक्मे़दे़त्ने़न्लो॥ 10 आङ्गाॽ यहवे दाङ्बे़ल्ले़ मनाहाॽरे़ खुन्छिॽ निङ्वान् कोःत्तुङ्लो, खे़ङ्हाॽरे़ खुन्छिॽ सिक्लुङ्मान् आङ्गाॽ साॽरुङ्लो॥ खे़ङ्हाॽ के़रे़क्ले़ मे़जोगुबा याःम्बक् कुइसिक् खुन्छिॽ हिङ्मन्नो खोमा मे़यारुबा तुम्घोःन् आङ्गाॽ खे़ङ्हाॽ पिरुङ्सिङ्लो॥” यर्मियाःल्ले़ यहवे दाङ्बाओ कुनिङ्वाॽ युक्खु 11 फे़न्याःम्बक्लाम् याङ्साकुन्धे के़धक्पा मनाःङ्ग पु हे़क्तङ्बारो, खे़न् पुःल्ले़ वेॽइल्ले़ कुधिःन्नोलाम्बा कुस्सा लःत्तुसिरो॥ खुने़ॽ कुहिङ्मन् कुभ्रे़ःङ् के़त्तिल्ले़ खे़न् याङ्साकुन्धेःल्ले़ खुने़ॽ ले़रुरो हे़क्क्याङ् खुने़ॽ कुसिसि थारिक् खे़न् अदङ् पोङ्लो॥ 12 आनिॽ माङ्हिम्मिङ्ग मिमिदिङ्गे़न् हाङ्युक्ना हे़क्तङ्बा चोक्लो खे़ङ्ग कुहेःक्सिङ्माआङ्धोए केःम्बा कोःक्माओ युङ्लो॥ 13 यहवे दाङ्बाए, खे़ने़ॽग इस्राइलरे़ कुनिङ्साङ्ने़रो॥ खे़ने़ॽ के़नाॽबाहाॽ के़रे़क् सिरिङ्ममो मे़धारो, खाम्हिःक्को साप्मनाबा मिङ्हाॽ हे़क्के खे़ङ्हाॽ मे़मा मे़बेःक्लो थेआङ्भे़ल्ले़ खे़ङ्हाॽरे़ खे़ने़ॽ यहवे दाङ्बा आहिङ्हिङ्बा के़बुम्बा च्वाःत्तिन् के़म्नाॽरे़आङ् मे़वाॽरो॥ 14 यहवे दाङ्बाए, खे़ने़ॽ आङ्गाॽ वेःन्दाङ्ङे़ॽओ हे़क्क्याङ् आङ्गाॽ पवेःत् वेःत्तारो, आङ्गाॽ से़ःप्ताङ्ङे़ॽ हे़क्क्याङ् हिङ्ङारो॥ आङ्गाॽ खे़ने़ॽए के़नारा फोसुङ्लो! 15 मनाहाॽरे़ आङ्गाॽ अक्खे मे़मे़त्तारो, “यहवे दाङ्बे़ल्ले़ पिरिगे़बा कुबाःन्जाक्किन् आत्तो वाॽबे? खुने़ॽ खे़न् पाःन्हाॽ के़रे़क् चोगुररो!” 16 यहवे दाङ्बाए, के़मनाहाॽ ओमे़प्मासि आयाःम्बक्किन् मे़ल्ले़त्ते कत्तुङ्लो॥ आङ्गाॽ आप्फाल्ले़आङ् मे़क्मासिमे़न् तारे़ॽ फाॽआङ् पेलि मे़भाक्ने़न्लो॥ खे़ङ्हाॽओ तुक्खे चामा ये़न्निन् तार के़लॽबा निङ्वाॽ मे़न्जोःक्पान्लो॥ यहवे दाङ्बाए, आङ्गाॽ हे़न् पाःत्तुङ्, खे़न् खे़ने़ॽ के़निसुरो॥ 17 आलागि खे़ने़ॽ किप्मा के़बोङ्बा मे़बोःक्खे़न्ने़ॽओ, ये़त्तुक्खे तुम्मा ये़न्नो खे़ने़ॽए आइःम्सिङ्मादे़न्ने़रो॥ 18 याप्मि के़घुम्बाहाॽओ ताप्फे़ःम्बा इङ् तारे़ॽओ कर आजाःत्थि पेःक्मालाम् से़ःप्ताङ्ङे़ॽओ, यहवे दाङ्बाए, खे़ङ्हाॽ किमा यङ्माओ थासे़से़ॽओ कर आङ्गाॽ किमा यङ्मालाम् से़ःप्ताङ्ङे़ॽओ॥ खे़ङ्हाॽरे़ खुन्छिॽ सम्धाङ् तुक्खे चामा ये़न्निन् तारे़ॽओ खे़म्ब्याङ् खे़ङ्हाॽ चियुःत् चियुःत् युःत्ते़से़ॽओ॥ नाःम्सिङ्मा ये़न्निन् इःप्मा नाःप्मा 19 यहवे दाङ्बे़ल्ले़ आङ्गाॽ अक्खे मे़त्ताङ्, “यर्मियाए, खे़ने़ॽ पेगे़ॽआङ् यहुदाबा हाङ्हाॽ सिगाङ् लाःप्मा नु लाःक्कात् लःम्मा यरुसले़ःम्मोबा यम्बा लाम्धेःत्तो ये़बे़ॽ॥ खे़न् एगाङ् यरुसले़ःम्मोबा वेॽ के़रे़क् यम्बा ताःक्हन्हाॽओ पेगे़ॽ॥ 20 यहुदाबा हाङ्हाॽ, के़रे़क् आमनाहाॽ हे़क्क्याङ् यरुसले़ःम्मोबा के़रे़क् यक्युङ्बाहाॽ नु खे़न् मा लाम्धेःप्पाहाॽओलाम् के़लाःप्पा मनाहाॽ आङ्गाॽ आबाःन्निन् खे़प्से़म्मे़ॽ मे़त्ते़से़ॽ॥ 21 यहवे दाङ्बे़ल्ले़ अक्खे पाःत्तुॽ—नाःम्सिङ्मा ये़न्नो खिनिॽ थे़मा कक्काङ् मे़गुये़म्मिन्ने़ॽ खे़ब्याङ् यरुसले़ःम्मोबा खे़न् मा लाम्धेःप्पाहाॽओलाम् थे़मा कक्काङ् मे़गुये़म्मिन्ने़ॽआङ् सिगाङ् मे़लासे़म्मिन्ने़ॽ फाॽआङ् साम्दिङ् पिनिङ्ॽ॥ 22 नाःम्सिङ्मा ये़न्नो खे़निॽ हिम्मोलाम्बा थे पाःन्हाॽआङ् मे़गुये़म्मिन्ने़ॽआङ् लाःक्कात् मे़लःत्ते़म्मिन्ने़ॽ॥ नाःम्सिङ्मा ये़न्नो खिनिॽ थेआङ् याःम्बक् मे़जोगे़म्मिन्ने़ॽ, कर आङ्गाॽ खिनिॽ पाधे़बाहाॽ इङ्जाङ् पिरुङ्सिङ्बा हे़क्के खे़न् सेसे ये़न्निन् इःत्ते़म् नाःत्ते़म्मे़ॽ॥ 23 हे़क्केसाङ् खिनिॽ पाधे़बाहाॽरे़ आङ्गाॽ आबाःन्निन् मे़ङ्घे़प्सुन् हे़क्क्याङ् आङ्गाॽ आबाःन्नो निङ्वाॽ मे़म्बिरुन् कर खे़ल्ले़ कुले़क्वा खे़ङ्हाॽ हादिङ् के़धक्पा मे़बोःक्खे़॥ खे़ङ्हाॽरे़ आइङ्जाङ्ङिन् मे़ङ्घे़प्सुन् खे़ब्याङ् आङ्गाॽ आनिसाम्मिन् मे़इःत्तुन् मे़न्नाःत्तुन्॥ 24 “कर खिनिॽ आइङ्जाङ्हाॽ के़रे़क् के़इःत्तुम् के़नाःत्तुम्ॽ हे़क्क्याङ् नाःम्सिङ्मा ये़न्नो कन् ये़क्यक्पा मा लाम्धेःप्पाहाॽओलाम्बा थे़मा कक्काङ् के़गुयुम्माङ् सिगाङ् के़न्देॽरुम्मिन् खे़ब्याङ् नाःम्सिङ्मा ये़न्निन् के़ने़त्तुम्माङ् थे़मा याःम्बक्काङ् के़न्जोगिन्ने़भग्र, 25 दाउद हाङ्ङिल्ले़ कुहाङ्युक्नाओ के़युङ्बा हाङ्हाॽ, खे़ङ्हाॽरे़ खुन्छिॽ युक्साबाहाॽ यरुसले़ःम्मोबा मा लाम्धेःप्पाहाॽलाम्बा सिगाङ् मे़लात्॥ खे़ब्याङ् खे़ङ्हाॽ यहुदा हे़क्क्याङ् यरुसले़ःम्मोबा मनाहाॽनु सोरिक् अन्ला नु अन्हाॽओ मे़लाःत्ताङ् मे़दाःॽ हे़क्क्याङ् यरुसले़ःम्मिन् सदादिङ् मनाहाॽरे़ सधे़क् मे़धिम्सुॽ॥ 26 यहुदाबा ये़क्यक्हाॽलाम्, यरुसले़म कुघिरिबा के़रे़क् पाङ्भेॽहाॽलाम् मनाहाॽ मे़दाःॽ॥ खे़ङ्हाॽ बेन्यामिन्ले़ कुदे़ःङ्गप्लाम्, उःक्चम्चम्बादे़न्लाम् हे़क्क्याङ् कोःक्मा फाङ्जङ् थे़गु माङ्वाहाॽलाम् नु यो यहुदालाम् खे़ङ्हाॽ मे़दाःॽ॥ खे़ङ्हाॽरे़ आङ्गाॽ आहिम्मो मिधिङ्मनादेमनाबा सिदुङ्जभा नु वेॽ ले़त्तिहाॽ, पोगुगे़न् कुजा सिदुङ्जभाहाॽ हे़क्क्याङ् ससिङ् सुक्पा नु नुगे़न् तोःम्मा सिदुङ्जभाहाॽ मे़दारुॽ॥ 27 “कर खे़ङ्हाॽ आङ्गाॽ आइङ्जाङ्ङिन् इःप्मा नाःप्मा मे़न्दे़न्ने़न् हे़क्क्याङ् खे़न् ये़न्नो खे़ङ्हाॽ कुभा के़लिःप्पा कक् मे़गुःत्छिङ्ङाङ् यरुसले़ःम्मोबा मा लाम्धेःप्पाहाॽओलाम् सिगाङ् नु लाःक्कात् मे़लॽ हे़क्क्याङ् खे़ङ्हाॽरे़ नाःम्सिङ्मा ये़न्निन् सेसे ये़न् फाॽआङ् मे़न्ने़त्तुन्ने़भग्र आङ्गाॽ यरुसले़ःम्मोबा मालाम्धेःत्हाॽओ मि केःत्तुङ्ॽ॥ यरुसले़ःम्मोबा हाङ्यक्हाॽ मिःल्ले़ खाप्पुथ्यःङ् पोङ्ॽ हे़क्क्याङ् मिन् आत्तिल्ले़आङ् से़प्मा मे़सुक्तुन्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.