यर्मिया 16 - लिम्बुयर्मियाःल्ले़ कुलागि यहवे दाङ्बे़ल्ले़ कुनिङ्वाॽ 1 यहवे दाङ्बे़ल्ले़ कुइङ्घङ्ङिन् आङ्गाॽओ याम्मो के़रे़, 2 “कन् ते़न्नो खे़ने़ॽ ते़न्धाम्गे़न् मेःक्खिम् मे़जोगे़न्ने़ॽ इग्र साएआङ् मे़गत्ते़से़न्ने़ॽ॥ 3 कन् ते़न्नो सागे़वाःन्छिङ्बा साएहाॽ नु खे़ङ्हाॽरे़ खुन्छिॽ माबाहाॽ थे मे़बोङ्ॽ, खे़न् आङ्गाॽ पाःत्तुङ्ॽ॥ 4 खे़ङ्हाॽ किप्मागे़घुबा तुक्मे़ल्ले़ मे़सिःॽ, खे़ङ्हाॽरे़ खुन्छिॽ लागि मे़रिङ् के़धक्पा इग्र खे़ङ्हाॽरे़ खुन्छिॽ चेहाॽ के़लुप्पा मनाधिक्काङ् मे़वाॽने़न्॥ खे़ङ्हाॽरे़ खुन्छिॽ चेहाॽ खाम्मो चिधुक् हे़क्के ने़गन्॥ खे़ङ्हाॽ थङ्ङो इग्र साक्मे़न्जाए मे़सिःॽ हे़क्क्याङ् खे़ङ्हाॽरे़ खुन्छिॽ चेहाॽ पुहाॽ नु ताम्भुङ् थक्साहाॽरे़ खुन्छिॽ चामा कुजा मे़बोङ्लो॥” यहुदाःल्ले़ खोमा इःत्तुबा खुम्दिङ्ङिन् तार पत् 5 यहवे दाङ्बे़ल्ले़ अक्खे पाःत्तुॽ, “हाःम्लाक्वा के़बोःक्पा हिम्मो खे़ने़ॽ मे़लासे़न्ने़ॽ॥ आत्तिल्ले़ कुलागिआङ् मे़रिङ् मे़धक्ते़न्ने़ॽ॥ आल्लआङ्धो आप्फाल्ले़आङ् आङ्गाॽ आमनाहाॽरे़ खुन्छिॽ सम्धाङ् सनारुङ्ले़ हाङ्वागे़न् मुॽइसाम् मे़धासुङ्ङिन्, खे़ब्याङ् चक्मे़ल्लॽए लुङ्माॽ तुक्मासि नु लुङ्गुम् मे़प्मासि ओसेःन्धाङ् मे़जोक्कान्॥ 6 चुक्पा यम्बा के़रे़क् कन् लाजेॽओ मे़सिःॽ॥ आत्तिल्ले़आङ् खे़ङ्हाॽरे़ खुन्छिॽ चेहाॽ मे़जिक्खुन् इग्र खे़ङ्हाॽरे़ खुन्छिॽ लागि मे़रिङ् मे़धक्ने़न् इग्र कुनिङ्वाॽ स्रोःन् मे़लॽने़न् आबाङे खुने़ॽ कुधक्किन् मे़घाःन्दुन् इग्र खुने़ॽ कुधे़गेक्पान् मे़नःक्खुन्॥ 7 आत्तिल्ले़आङ् लुङ्माॽ तुक्तुबा मनान् सिःल्ले़ के़सिबाल्ले़ कुलागि मे़रिङ् के़धक्पान् हाङ्हाङ् मे़प्मारे़ लागि कुभारे़ कुम्बा कुम्माए मे़सिआङ् मे़ने़साङ् खुने़ॽनु कुभा कुजा चासे़ इग्र थुङ्से़ च्वाःत्नु मे़युङ्ने़न्॥ खुने़ॽ आत्तिन्हाॽरे़आङ् हाङ्हाङ् मे़म्मे़त्तुन्॥ 8 “चामुक् थिमुक् के़बोङ्बा हिम्मो मे़लासे़न्ने़ॽ, कुजा चामा थुङ्मा फाॽआङ् खे़ङ्हाॽनु खे़ने़ॽ मे़युङे़न्ने़ॽ॥ 9 थेआङ्भे़ल्ले़ आङ्गाॽ मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिल्ले़ थे पाःत्तुङ्ॽ, खे़प्से़ॽ॥ सःप्मा नु निङ्वाॽ तामा हयङ् किल्लिङ् नु ते़न्धाम् मेःक्खिम् साभःङ्जाःल्ले़ ससाङ्स्रोत्ते़न् आङ्गाॽ चिजि खक्खक् पोङ्ल चोगुङ्ॽ॥ कन् लाजेॽओबा मनाहाॽरे़ आप्फेक् खुन्छिॽ सिमानुःल्ले़ तगि खे़न् के़प्पा मे़निसुॽ॥ 10 “खे़ने़ॽ कन् सुवाङ्बा मनाहाॽ कन् के़रे़क् पाःन्हाॽ के़मे़त्तुसिॽ, हे़क्केःल्ले़ खे़ङ्हाॽरे़ खे़ने़ॽ अक्खेलॽरिक् सेःन्के़म्लाप्, ‘थेआङ् यहवे दाङ्बे़ल्ले़ आनिगे सम्धाङ् अक्तङ्बा के़साक्पा खुम्दिङ् पिमा निःन्धो चोगुबाबे? आनिगे थे फे़न्याःम्बक् चोगुम्बे़आङ् वये़बे? यहवे दाङ्बा आनिगे निङ्वाॽफुमाङ्ङिल्ले़ कुदक्ले़ङ्वाओ आनिगे थे लायो चोगुम्बे़आङ् वयिगे़बे?’ 11 “खे़ब्याङ् यहवे दाङ्बे़ल्ले़ खिनिॽ अक्खे के़मे़त्तिॽ फाॽआङ् खे़ङ्हाॽ मे़त्ते़से़ॽ, ‘खिनिॽ पाधे़बाहाॽरे़ आङ्गाॽ मे़नाॽराङ्ङाङ् कुसिङ् मे़न्निःत्तेबा साम्माङ्हाॽ माङ्मे़घयुसि हे़क्क्याङ् से़वा मे़मे़त्तुसि खम्भ्याङ् आङ्गाॽ आनिसाम्मिन् मे़न्इःत्तुन् मे़न्नाःत्तुन्॥ 12 कर खिनिॽ पाधे़बाहाॽनुःल्ले़आङ् यरिक् ताक्के़भे़ॽबा याःम्बक् के़जोगुम्॥ खिनिॽ के़रे़क् आधिङ्गानि के़बोःक्खिआङ् खिनिॽ आबाङे फे़न्याःम्बक्किन् के़नाःत्तुम् हे़क्क्याङ् आइङ्जाङ्ङिन् इःप्मा नाःप्मा के़न्दे़न्दिन्॥ 13 हे़क्केःल्ले़ आङ्गाॽ खिनिॽ कन् लाजेॽलाम्बा लःत्निङ्ङाङ् वेॽ अक्तङ्बा लाजेॽओ युङ्निङ्, खे़ल्ले़ कुयाःम्बेओ खिनिॽ नु खिनिॽ पाधे़बाहाॽरे़ थेआङ् कुसिङ् मे़न्निःत्ते के़वयिॽ॥ हे़क्क्याङ् खे़प्मो खिनिॽ से़न्दिक् ले़न्दिक् कुसिङ् मे़न्निःत्तेबा साम्माङ्हाॽ से़वा के़मे़त्तुम्सिम् थेआङ्भे़ल्ले़ आङ्गाॽ खिनिॽ आलुङ्माॽ स्याःत् के़न्लॽरिन्लो॥’” इस्राइलिहाॽ मे़दे़म्सु मे़देॽरुसिबालाम् मे़नुःक्खे़बा 14 यहवे दाङ्बे़ल्ले़ पाःत्तुॽ, “खे़ल्ले़चोगुल्ले़ अक्तङ्बा ये़न्हाॽ तार पत्, हे़क्क्याङ् मनाहाॽरे़ माङ्हे़क् मे़जोगुल्ले़ आल्लआङ्धो अक्खे मे़म्बाःत्तुन्ॽ, ‘इस्राइलिहाॽ मिस्र लाजेॽलाम् के़लःप्पाआङ् के़धाक्पा, से़क्खाए यहवे दाङ्बे़न् कुहिङ्वे़त् वाॽबा कुइसिक्॥’ 15 कर खे़ङ्हाॽरे़ मे़बाःत्तुॽ, ‘इस्राइलिहाॽ थो पिसाङ्बा लाजेॽ नु वेॽ के़रे़क् लाजेॽहाॽलाम्बा हे़क्क्याङ् आत्तान् आत्तान्लाम्बा खुने़ॽ खे़ङ्हाॽ लःत्तुदेसुसिआङ् वये़, खे़न् के़रे़क् लाजेॽलाम्बा के़लःप्पाआङ् के़दाःप्पा से़क्खाए यहवे दाङ्बे़न् कुहिङ्वे़त् वाॽबा कुइसिक्॥’ आङ्गाॽ खे़ङ्हाॽरे़ खुन्छिॽ पाधे़बाहाॽ पिरुङ्सिङ्बा आबाङे खुन्छिॽ लाजेॽओ खे़ङ्हाॽ नुःक्तुङ् तारुङ्सिङ्ॽ॥” 16 यहवे दाङ्बे़ल्ले़ पाःत्तुॽ, “कर आङ्गाॽ यरिक् योःङ् के़ले़प्पाहाॽ पाङ्घुङ्सिङ्ॽ हे़क्क्याङ् खे़ङ्हाॽरे़ कन् मनाहाॽ मे़दे़म्सुसिॽ॥ खे़न् एगाङ्, आङ्गाॽ यरिक् सावागे़म्बाहाॽ पाङ्घुङ्सिङ् हे़क्क्याङ् खे़ङ्हाॽरे़ कन्हाॽ के़रे़क् नाङ्जङ्लुङ्, कोःक्मा फाङ्जङ् नु याक्पेॽओबा लुङ्भुक्कोहाॽलाम् मे़गोःत्तु मे़लःत्तुसिॽ॥ 17 आङ्गाॽ खे़ङ्हाॽरे़ खुन्छिॽ याःम्बक्किन् नुरिक्काङ् निसुङ्ॽ॥ आङ्गाॽलाम्बा थे़माःन्नाङ् मे़जिङ्सिङ्ङिन्॥ खे़ङ्हाॽरे़ खुन्छिॽ लायोन् आङ्गाॽ आनिमोलाम्बा मे़जिङ्सिङ्ङिन्॥ 18 खे़ङ्हाॽरे़ खुन्छिॽ लायोन् नु फे़न्याःम्बक्किल्ले़ लागि आङ्गाॽ खे़ङ्हाॽ निले़ङ् खुम्दिङ् पिरुङ्सिङ्ॽ थेआङ्भे़ल्ले़ खे़ङ्हाॽरे़ आङ्गाॽ आलाजेन् कुसिवे़त् नावाइत्लाहाॽरे़ मे़जिःन्दुआङ् मे़वाॽ हे़क्क्याङ् आघोमा लक्किन् याम्गे़सिङ्बा साम्माङ्हाॽरे़ मे़धिम्सुआङ् वाॽरो॥” यर्मियाःल्ले़ यहवे दाङ्बे़न् पेलि फाक्तुबा 19 यहवे दाङ्बाए, आमुक्साम् नु आहाङ्यक्के, तुक्खेवा ये़न्नोबा आइःम्सिङ्मादे़न्ने़, इक्सादिङ् खाम्बेःक्माल्ले़ कुया नु कुसुक्पोलाम्बा मे़न्छाम् सुवाङ्हाॽ खे़ने़ॽओ मे़दारो हे़क्क्याङ् खे़ङ्हाॽरे़ मे़बाःत्तुरो, “आनिगे पाधे़बाहाॽनुग इङ्ले़क्पा साम्माङ्हाॽ नु हने़बा नावाइत्लाहाॽरक् मे़वये़रो कर वेॽ थेआङ् होःप्ते़रो॥ 20 थे मनाहाॽरे़ खुन्छिॽ माङ्हाॽ आबाङे चोःक्मा मे़सुक्तुसिबि? ओःक्, मे़सुक्तुसिने़भग्र खे़ङ्हाॽग माङ्सि मेःन्लो॥” 21 यहवे दाङ्बे़ल्ले़ अक्खे पाःत्तुरो, “खे़ल्ले़चोगुल्ले़ आङ्गाॽ थिक्ले़ङ्माल्ले़ खे़न् मनाहाॽ सदादिङ्ले़ लागि आमुक्साम्मिन् नु आमुक्किन् ओसेःन्धाक्तुङ्सिङ्लो॥ खे़ब्याङ् आमिङ्ङिन् यहवे दाङ्बा फाॽआङ् खे़ङ्हाॽरे़ मे़निसुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.