यर्मिया 15 - लिम्बुयहुदाओ के़युङ्बाहाॽ मे़मे़क् 1 खे़ब्याङ् यहवे दाङ्बे़ल्ले़ आङ्गाॽ मे़त्ताङ्, “मोसान् नु सामुए़ले़न् आङ्गाॽ आदगि याप्मि पेलि फाक्ते़सिआङ् ये़बे़सिसाङ् आङ्गाॽ कन् मनाहाॽ थेआङ् लुङ्गुम् ओसेःन् मे़धाक्तुङ्सिङ्ङिम्बा वये़॥ खे़न् मनाहाॽ पाङ्घे़देसे़से़ॽ॥ खे़ङ्हाॽ आदगिलाम्बा लःत्ते़देसे़से़ॽ॥ 2 खे़ङ्हाॽरे़ खे़ने़ॽ ‘आनिगे आत्तान् पेगिगे़बा’ फाॽआङ् से़ःन्के़म्दोने़भग्र आङ्गाॽ अक्खे पाःत्तुङ्ङाङ् वाॽ फाॽआङ् खे़ङ्हाॽ मे़त्ते़से़ॽ, ‘यहवे दाङ्बे़ल्ले़ अक्खे पाःत्तुरो— “‘आत्तिन्हाॽ मिङ्देॽलाम्बा मे़सि, खे़ङ्हाॽ मिङ्देॽओ मे़बेःक्लरो! आत्तिन्हाॽ थङ्ङो मे़सि, खे़ङ्हाॽ थङ्ङो मे़बेःक्लरो! आत्तिन्हाॽ साक्मे़न्जाए मे़सि, खे़ङ्हाॽ साक्वाःन्नो मे़धाररो! हे़क्क्याङ् आत्तिन्हाॽ मे़दे़म्सु मे़देॽरुसि, खे़ङ्हाॽ मे़दे़म्सु मे़देॽरुसिररो!’ 3 “खे़न्हाॽरे़ खुन्छिॽ सम्धाङ् लिसि परिक्ले़न् मे़क्मासिमा तारुङ्ॽ फाॽआङ् आङ्गाॽ यहवे दाङ्बे़ल्ले़ पाःत्तुङ्ॽ॥ खे़ङ्हाॽ थङ्ङो मे़से़रुसिॽ, खे़ङ्हाॽरे़ खुन्छिॽ के़सिबा थक्हाॽ ख्याबाहाॽरे़ मे़जसिॽ हे़क्क्याङ् पुहाॽरे़ मे़अगु मे़जसिॽ खे़ब्याङ् के़नम्बा के़याःक्पाहाॽ ताम्भुङ् थक्साहाॽरे़ मे़हाॽरु मे़जसिॽ हे़क्क्याङ् मे़मे़क्खुसिॽ॥ 4 हिजकियाःल्ले़ कुस्सा मनस्सेन् यहुदाबा हाङ् वये़ल्ले़ यरुसले़ःम्मो खुने़ॽ थे़मा चोगुआङ् वये़, हाबा खे़ल्ले़चोगुल्ले़ आङ्गाॽ खे़ङ्हाॽ अक्तङ्बा के़साक्पा याक्नाम्मो थासुङ्सिङ्ॽ खे़ब्याङ् खे़न् मे़निसुआङ् इक्सादिङ् खाम्बेःक्मोबा के़रे़क् मनाहाॽ किमा यङ्माओ मे़धारो॥ 5 “यरुसले़ःम्मो के़युङ्बासे, आत्तिल्ले़ खिनिॽ लुङ्माॽ के़दुक्तिबे? आत्तिल्ले़ खिनिॽ लागि मे़रिङ्धक्मा निङ्वाॽ चोगुबे? आत्तिन् ये़म्सिङ्ङाङ् खिनिॽनु नुॽमादामा पान् सेःन्गे़लाप्तिबे? 6 खिनिॽ आङ्गाॽ याप्मि के़नाॽरिआङ् के़वयिरो हे़क्क्याङ् आङ्गाॽ ले़प्माङ् आबाङे खिनिॽ एःक्थाःक्मे़न् के़हिसुम्माङ् के़वयिरो॥ खे़ल्ले़चोगुल्ले़ आहुक्किल्ले़ए मे़ङ्निङ्ङाङ् वाॽआरो थेआङ्भे़ल्ले़ आसाक्के़न् थम्मारे़ आनिङ्ले़ॽले़ॽ लॽरे़आङ् वाॽरो॥ 7 लाजेॽबा के़रे़क् ये़क्यक्को खिनिॽ चासिप् हे़क्के सुरिःत्तो फे़निङ्लो॥ आङ्गाॽ आमनासे, आङ्गाॽ खिनिॽ मे़म्भै चोःक्निङ्लो, खिनिॽ साएहाॽ तेॽरुङ्सिङ्लो थेआङ्भे़ल्ले़ ताप्फे़ःम्बा याःम्बक्हाॽ के़न्ले़रुम्मिन्लो॥ 8 वरःङ्ङोबा ये़ःङ्घानुःल्ले़आङ् यरिक् खिनिॽ मेमेदुमाहाॽ मे़बोङ्लो॥ खिनिॽ थाङ्बे़न्हाॽ आङ्गाॽ से़रुङ्सिङ्लो हे़क्क्याङ् खिनिॽ माहाॽ मे़रिङ्ङो थासुङ्सिङ्लो॥ हक्चघत् तुक्मा नु किमान् खे़ङ्हाॽओ तारुङ्लो॥ 9 नुसि साहाॽरे़ खुन्छिॽ माःन् कुधना ले़क्खे़आङ् वाॽरो हे़क्क्याङ् सक्मा सोःम्मा के़साक्पा तुमुआङ् वाॽरो॥ खे़ल्ले़ ले़न्दिक्पा कुघाओःप्मान् खागे़धाम्बा पोःक्खे़आङ् वाॽरो, खे़ल्ले़ कुनामे़न्छाॽ पोःक्खे़आङ् वाॽरो खे़न् साॽरिक् निङ्वाॽ तुक्मो थ्ये़आङ् वाॽरो॥ खे़ङ्हाॽ आल्ल थारिक् मे़हिङे़आङ् मे़वाॽरो, खे़ङ्हाॽ निङ्मि हुक्को पिरुङ्सिङ्ङाङ् से़प्मा पाङ्घुङ्सिङ्लो॥ आङ्गाॽ यहवे दाङ्बे़ल्ले़ कन् पाःत्तुङ्ङाङ् वाॽरो॥” यहवे दाङ्बे़ल्ले़ कुदगि यर्मियाःल्ले़ कुलुङ्हान् 10 खे़ब्याङ् आङ्गाॽ मे़त्तुङ्लो, “चिःत्ताङ् स्याङ्लो! चिःत्ताङ् स्याङ्लो! आङ्गाॽ आम्मारे़ थेआङ् कत्ताङ्बाइरो? लाजेॽओबा के़रे़क् मनाहाॽनु आङ्गाॽ पाःन्धङ् नु खे़माॽ चोःक्मा पोङ्लो॥ आङ्गाॽ हाःत्ताङ् कुभा सिङ्नात् मे़म्बिए वाॽआरो, वेॽहाॽलाम्बा थे़माआङ् सिङ्नात् मे़न्दाःत्ते वाॽआरो हे़क्केसाङ् के़रे़क्ले़ माङ्दे साङ्ग्रा मे़मे़त्तारो॥” 11 यहवे दाङ्बे़ल्ले़ अक्खे मे़त्ताङ्लो, “आङ्गाॽ से़क्खाए खे़ने़ॽ नुरिक् मे़त्ने़रो खे़ल्ले़ लागि आङ्गाॽ खे़ने़ॽ ताङ्से़ःप्ने़रो॥ तुक्खे लाक्खे नु ये़त्तुक्खेबा ये़म्मो से़क्खाए आङ्गाॽ के़निङ्मिहाॽ खे़ने़ॽओ पेलिगे़न् तुवा मे़जोःक्ल याःन्दुङ्सिङ्लो॥ 12 थाङ्गे़त् पिसाङ्बा फे़न्जेन् मनाःल्ले़ ए़ङ्मा सुक्तुबि? इग्र कासाःल्ले़ कुलःप्लाःन् ए़ङ्मा सुक्तुबि? 13 आमनाहाॽरे़ खे़निॽ लुम्मो निङ्मिहाॽ पाङ्घुङ्सिङ्लो हे़क्क्याङ् खे़ङ्हाॽरे़ याङ्साकुन्धे नु याङ्भुहाॽ मे़नाप्तु मे़देॽरुसिरो, थेआङ्भे़ल्ले़ कङ्ग लाजेॽ के़रे़क् खे़निॽ के़जोगुम्बा लायोल्ले़ खुम्दिङ्लो॥ 14 आङ्गाॽ खे़निॽ कुसिङ् के़न्निःत्तुम्सिम्मे़म्बा लाजेॽओ खे़निॽ निङ्मिहाॽरे़ खुन्छिॽ याःम्बक् चोःक्मा पाङ्निङ्लो थेआङ्भे़ल्ले़ आङ्गाॽ आसिक्के़न् मि हे़क्के तिरे़आङ् वाॽरो हे़क्क्याङ् खे़न् खिनिॽ तक्ले़ङ्वाओ सदादिङ् हुरुरु तिःत्ल ने़रो॥” 15 हे़क्क्याङ् आङ्गाॽ अक्खे मे़त्तुङ्लो, “यहवे दाङ्बाए, खे़ने़ॽ के़रे़क् पाःन्हाॽ के़निसुरो॥ आङ्गाॽ निङ्वाॽ इःत्ताङ्ङे़ॽआङ् कुभाॽ पिराङ्ङे़ॽओ॥ आङ्गाॽ तुक्खे के़जाःप्पाहाॽ खुम्दिङ् पिरे़से़ॽओ॥ खे़ङ्हाॽ ले़प्माङ्बा खे़ने़ॽ के़नासि थःप्माल्ले़ चोगुल्ले़ आङ्गाॽ आयाम्साम्मिन् मामा मे़बोङ्ने़न्लरो॥ के़लागि आङ्गाॽ सिरिङ्ममा पोःक्खे़बा पाःन्निन् निङ्वाॽ इःत्ते़ॽओ॥ 16 खे़ने़ॽ आङ्गाॽनु के़बारे़रो हे़क्क्याङ् के़रे़क् के़बाःन्जाःक्किन् कुजानुरे़र खे़प्सुङ्लो॥ यहवे दाङ्बा मुक्साम्दाङ्बा निङ्वाॽफुमाङ्ङे, आङ्गाॽ खे़ने़ॽ के़मिङ् तक्तुङ्लो हे़क्क्याङ् के़बाःन्जाःक्हाॽरे़ चोगुल्ले़ आसिक्लुङ्मान् सःत्ते़रो खे़ब्याङ् आङ्गाॽ साॽरिक् आनिङ्वाॽ त्ये़रो॥ 17 आङ्गाॽ आये़म्मिन् वेॽ मनाहाॽनु एःप्मा पाःप्माओ मे़देसुङ्ङिल्लो हे़क्क्याङ् सोसोत्लराङ्ङो मे़न्देबान्लो॥ आङ्गाॽ खे़ने़ॽ के़युक्को के़गत्ताङ्बाल्ले़ ए़क्लेःक् युङाङ्लो हे़क्क्याङ् आसिक्के़ल्ले़ मि पोःक्खाङ्लो॥ 18 आङ्गाॽ आये़त्तुक्खेन् थेआङ् चक् मे़लॽने़म्बाबे? आयाङ्घेःक्किन् थेआङ् मे़वेःत्ने़म्बाबे? हे़नाङ् चबे़ःत्छिक्काङ् मे़नुॽने़म्बाबे? के़हेबा याक्साङ्वा हे़क्के आङ्गाॽ इङ्गे़ले़क्काबाबि?” 19 खे़ल्ले़चोगुल्ले़ यहवे दाङ्बे़ल्ले़ अक्तङ्बा नुगप् पिराङ्लो, “खे़ने़ॽ लायोलाम् के़नुःङ् के़दाने़भग्र आङ्गाॽ खे़ने़ॽ याम्मो ताःक्मा ते़न्नारो हे़क्क्याङ् खे़ने़ॽ याम्मो आसे़वारोबा के़बोङ्लो॥ हने़बा पान् पाःप्मारे़ कुले़क्वाओ कुसि के़याक्पा याःम्बक् के़जोगुने़भग्र खे़ने़ॽ याम्मो आङ्गाॽ आनिङ्वाॽपान् के़बाःप्पा के़बोङ्लो॥ मनाहाॽ खे़ने़ॽ ले़प्माङ् मे़नुःङ्ङाङ् मे़दारो कर खे़ने़ॽ खुन्छिॽ ले़प्माङ् मे़बेगे़न्ने़ॽओ॥ 20 आङ्गाॽ खे़ने़ॽ खे़ङ्हाॽरे़ खुन्छिॽ तगि लत्छा कासा लुङ्धाक् हे़क्के के़धुम्बा चोःक्ने़रो॥ खे़ङ्हाॽ खे़ने़ॽनु हयङ्ते़न्धङ् मे़जोक्लो कर खे़ङ्हाॽरे़ खे़ने़ॽ थङ्ङो के़मे़न्दोःक्ने़न्लो॥ 21 ताक्के़भे़ॽबाहाॽरे़ खुन्छिॽ हुक्कोलाम्बा से़ःप्ने़रो, हे़क्क्याङ् कुॽइगे़भे़म्बा मनाहाॽरे़ खुन्छिॽ हुक्को थामालाम् ताङ्ने़रो॥ आङ्गाॽ यहवे दाङ्बे़ल्ले़ कन् पाःत्तुङ्ङाङ् वाॽरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.