यर्मिया 14 - लिम्बुतुक्खे लाक्खे नु साङ्याक्मा 1 साङ्याक्मा पाःन्निल्ले़ कुयाःम्बेओ यहवे दाङ्बे़ल्ले़ कुइङ्घङ्ङिन् आङ्गाॽओ के़रे़रो— 2 “यहुदाबा मनाहाॽ मे़हाःप् मे़जिःङ्ल मे़वाॽरो, खे़न् ये़क्यक्हाॽओबा मनाहाॽ मे़मे़क्ल मे़बत्लो, खे़प्मो के़युङ्बाहाॽ खाम्मो मे़सॽसिङ्ल मे़रिङ् मे़धक्ल मे़युङ्लो हे़क्क्याङ् यरुसले़ःम्मोबा मनाहाॽ कुभाॽरे़ लागि मे़अःक् मे़भिःक्ल मे़याक्लो॥ 3 तुम्म्याङ्हाङ्हाॽरे़ खुन्छिॽ से़वारोबाहाॽ च्वाःत् फाःत्छे़ मे़बाङ्घुसिरो॥ खे़ङ्हाॽ च्वाःत् याङ्घोःप्मा वाबाक्को मे़बेःक्लो कर खे़ङ्हाॽरे़ च्वाःत् मे़ङ्घोसुन्लो, खे़ङ्हाॽ कुघाले़म् खप्प्या मे़नुःङ् मे़दारो॥ खे़ङ्हाॽ खुन्छिॽ सक्माबुॽआङ् हाब् मे़ले़क्लो हे़क्क्याङ् खुन्छिॽ नारान् मे़जिक्खुरो॥ 4 वहित् मे़धासुम्बाल्ले़ खाम्बेःक्मान् हेरे़रो हे़क्क्याङ् हर्गाॽ हर्गाॽ काॽरे़आङ् ने़रो॥ याःन्गे़मबाहाॽ खुन्छिॽ निङ्वाॽओ साॽइयगे़आङ् मे़वाॽरो हे़क्क्याङ् खे़ङ्हाॽरे़ आबाङे खुन्छिॽ नारान् मे़जिक्खुरो॥ 5 ताम्भुङ्ङो कुदाङ् के़होःप्मा पे़ःङ्वाःल्ले़आङ् खारक् थाप्तुबा कुस्सान् ले़रुधरो थेआङ्भे़ल्ले़ खे़प्मो यान् मे़युङ्ने़ल्लो॥ 6 ताम्भुङ्ङोबा कुम्मामा अदङ्हाॽ थेआङ् के़होप्पा कोःक्मा फाङ्जङ् सम्धाङ् मे़ये़प्लो हे़क्क्याङ् किधिःप्पान् हे़क्के हे़ङ्गे़ःक् हे़ङ्गे़ःक् मे़लॽरो खे़ङ्हाॽ यान् चामा मे़ङ्घोए मे़वाॽरो हे़क्केःल्ले़ खुन्छिॽ मिक्हाॽ साक्किल्ले़ तुम्बारि च्ये़ःङ्ज्ये़ःङ् लॽरो॥” 7 आङ्गाॽ आमनाहाॽरे़ अक्खे मे़बाःत्तुर पेलिगे़न् तुवा मे़जोःक्कारो, “आनिगे लायोल्ले़ आनिगे याप्मि फोत्याबाए लेःत्तिगे़रो, हे़क्केसाङ् यहवे दाङ्बाए, आबाङे के़मिङ्ङिल्ले़ चोगुल्ले़ आभाॽरे़ॽओ॥ यरिक्ले़ङ् आनिगे खे़ने़ॽनु लाःत्लाःत् पोःक्खिगे़आङ् वयिगे़रो, खे़ने़ॽ के़दक्ले़ङ्वाओ आनिगे लायो चोगुम्बे़आङ् वयिगे़रो॥ 8 इस्राइलिहाॽरे़ मे़जोगुबा निङ्साङ् खे़ने़ॽरक् के़वाॽरो, खे़ने़ॽ आनिगे ये़त्तुक्खेलाम्बा के़से़ःप्पा से़न्लप्दाङ्बाने़रो॥ खे़ने़ॽ आनिगे लाजेॽओ थेआङ् लत्छा वे़प्मिबा मना कुइसिक् के़बोःक्खे़बाबे? थेआङ् थिक् से़न्धिक् याङ्गे़धोःक्पा लाम्दिःक्पा हे़क्के के़बोःक्खे़बाबे? 9 थेआङ् खे़ने़ॽ के़नाक्पा के़बेःक्पा मना कुइसिक् के़बोःक्खे़बाबे? इग्र याप्मि फाॽमा मे़न्छुक्मनाबा मुक्के़गुबा थक्सुबा कुसिङ् थेआङ् के़बोःक्खे़बाबे? यहवे दाङ्बाए, खे़ने़ॽ से़क्खासाङ् आनिगे लुम्मो के़वाॽरो॥ आनिगे़ग खे़ने़ॽ के़मिङ् के़दक्पासिगे़ फाॽआङ् मे़निसिगे़रो, आनिगे याप्मि आन्नाॽरे़न्ने़ॽओ॥” 10 कन् मनाहाॽरे़ खुन्छिॽ याःम्बेओ यहवे दाङ्बे़ल्ले़ अक्खे पाःत्तुरो, “खे़ङ्हाॽ आङ्गाॽलाम्बा माःङ्घाए पोङ्मा सिराॽधाङ्लो हे़क्क्याङ् आबाङे खे़ङ्हाॽ युक्को मे़न्वाॽने़न्लो॥ खे़ल्ले़चोगुल्ले़ खे़ङ्हाॽनु आनिङ्वाॽ मे़दाने़न्लो॥ आङ्गाॽ खुन्छिॽ फे़न्याःम्बक्किन् निङ्वाॽ इःत्तुङ्लो खे़ब्याङ् खुन्छिॽ लायोल्ले़ कुले़क्वा खुम्दिङ् पिरुङ्सिङ्लो॥” यहवे दाङ्बे़ल्ले़ यर्मियान् पेलि फाक्मा मे़बाङ्घुन् 11 यहवे दाङ्बे़ल्ले़ आङ्गाॽ मे़त्ताङ्, “कन् मनाहाॽ मे़नुॽमे़दार फाॽआङ् पेलि मे़भाक्ते़न्ने़ॽ॥ 12 खे़ङ्हाॽ चाने़ःत्तो मे़युङ्साङ् आङ्गाॽ खे़ङ्हाॽरे़ खुन्छिॽ मे़जोगुबा तुवान् मे़घे़म्मान्, खे़ङ्हाॽरे़ आङ्गाॽओ मिधिङ्मनादेमनाबा सिदुङ्जभा नु पोगुगे़न् कुजा सिदुङ्जभा मे़दोन्दुसाङ् आङ्गाॽ खे़ङ्हाॽनु आनिङ्वाॽ मे़दाने़न्॥ परुमाल्ले़ आङ्गाॽ खे़ङ्हाॽ ते़न्धङ्, साक्वान् नु मिङ्देल्ले़ से़रुङ्सिङ्ॽ॥” 13 हे़क्क्याङ् आङ्गाॽ खुने़ॽ मे़त्तुङ्, “मुक्साम्दाङ्बा यहवे दाङ्बाए, माङ्निङ्वाॽपान् के़बाःप्पाहाॽरे़ग खे़न् मनाहाॽ अक्खे मे़मे़त्तुसिर मे़वाॽ ‘खिनिॽ हयङ्ते़न्धङ् के़न्निसुम्मिन्, इग्र खिनिॽओ साक्वान् मे़दाने़न् कर खिनिॽ कन् लाजेॽओ यरिक् ये़म् थारिक् सुक्खेवा सनारुङ् पोङ्॥’” 14 कर यहवे दाङ्बे़ल्ले़ आङ्गाॽ नुगप् पिराङ्, “माङ्निङ्वाॽपान् के़बाःप्पाहाॽरे़ आमिङ्ङो इङ्ले़क् पान् मे़बाःत्तुर मे़बत्॥ खे़ङ्हाॽ आङ्गाॽ पाङ्घुङ्सिङ्बा मेःन्॥ खे़ङ्हाॽनु आङ्गाॽ लत्छा पाःन्नाङ् मे़म्बाःत्ते वाॽआ, हे़क्क्याङ् थेआङ् इङ्जाङ् पिरुङ्सिङ्बा होप्॥ खे़ङ्हाॽरे़ आङ्गाॽ मे़बिरुङ्सिङ्ङिम्बा इङ्ले़क् सुफो पाःन्हाॽरे़ कुयाःम्बेओ मे़बाःत्तुॽ॥ खे़ङ्हाॽरे़ खुन्छिॽ निङ्वाॽओबा हने़बा सुप्फो, नु खाइक्माहाॽरक् माङ्निङ्वाॽपान् मे़बाःत्तुॽ॥ 15 खे़न् माङ्निङ्वाॽपान् के़बाःप्पाहाॽ, आत्तिन्हाॽआङ् आङ्गाॽ पाङ्घुङ्सिङ्बा मेःन्, हे़क्केसाङ् लाजेॽओ ते़न्धङ् नु साक्वान् मे़दाने़न् फाॽआङ् खे़ङ्हाॽरे़ आमिङ्ङो माङ्निङ्वाॽपान् मे़बाःत्तुॽ, आङ्गाॽ खे़ङ्हाॽ ते़न्धङ् नु साक्किल्ले़ए मे़क्खुङ्सिङ् फाॽआङ् आङ्गाॽ यहवे दाङ्बे़ल्ले़ खे़ने़ॽ मे़त्ने़रो॥ 16 हे़क्क्याङ् खे़ङ्हाॽरे़ माङ्निङ्वाॽपान् मे़मे़त्तुसिबा मनाहाॽरे़ खुन्छिॽ चेहाॽ साक् नु ताभेःल्ले़ चोगुल्ले़ यरुसले़ःम्बा लाम्हाॽओ ने़गन् हे़क्क्याङ् खे़न् के़लुप्पा मना थिक्काङ् मे़वाॽने़न्॥ खे़ङ्हाॽ के़रे़क्ले़ खुन्छिॽ मेःत्हाॽ नु साहाॽरे़आङ् हाबा हे़क्तङ्बाए मे़दुमुॽ॥ आबाङे खुन्छिॽ ताप्फे़ःम्बा याःम्बक्किल्ले़ तुम्घोःन् खे़ङ्हाॽ आबाङे खोमा पाङ्घुङ्सिङ्ॽ॥” 17 खे़ङ्हाॽ अक्खे मे़प्मासि इङ्जाङ् पिराङ्लो, “आङ्गाॽ आमिक्कोलाम् से़न्दिक् ले़न्दिक् आमिक्वा ते़रे़रे़ थाप्लो॥ खे़न् आप्फाल्ले़आङ् चक्मे़लॽने़ल्लरो थेआङ्भे़ल्ले़ सिसागे़न् मे़न्छ्या आस्सा इस्राइलरे़ साॽरिक् तुक्खे तुमुआङ् वाॽरो खे़ब्याङ् आमनाहाॽ यम्बा तुक्खेओ मे़ध्ये़आङ् मे़वाॽरो॥ 18 आङ्गाॽ इक्ताप्पो पेःक्काने़भग्र, खे़प्मो थङ्ङो के़सिबाहाॽरे़ खुन्छिॽ चेहाॽ निसुङ्लो॥ आङ्गाॽ ये़क्यक्को लाःत्ताने़भग्र, खे़ॽयो मनाहाॽ साक्मे़न्जाए मे़सिर मे़बप्पा निसुङ्सिङ्लो॥ माङ्निङ्वाॽपान् के़बाःप्पाहाॽ नु निङ्वाॽफुसाम्बा के़रे़क्ले़ आबाङे याःम्बक्किन् मे़जोगुर मे़बत्लो॥ कर खे़ङ्हाॽरे़ थे़मा याःम्बक् मे़जोगुर मे़बत्, खे़न् खे़ङ्हाॽरे़ थेआङ् मे़न्निसुन्लो॥” मनाहाॽरे़ यहवे दाङ्बे़न् पेलि मे़भाक्तु 19 यहवे दाङ्बाए, थे खे़ने़ॽ यहुदान् से़क्खाए के़नाॽरुबि? थे खे़ने़ॽ सियोनबा यक्युङ्बाहाॽ हिलाप्फु के़इःत्तुसिबि? थेआङ् वेःप्मा मे़न्छुक्के थारिक् खे़ने़ॽ आनिगे याप्मि के़घाःन्दे़बाबे? आनिगे सनारुङ् कोःत्तुम्बे़आङ् वयिगे़रो कर नुबा पान् थेआङ् मे़घोसुम्बे़न्लो॥ वेःप्मा ये़म्मिन् निङ्साङ् चोगुम्बे़आङ् वयिगे़रो कर किमा यङ्मारक् आनिगे तक्क्रुम्बो इरे़द्ये़रो॥ 20 यहवे दाङ्बाए, खे़ने़ॽ के़दक्ले़ङ्वाओ आनिगे लायो चोगुम्बे़आङ् वयिगे़रो, आनिगे आबाङे लायोन् नु आनिगे पाधे़बाहाॽरे़ खुन्छिॽ ताप्फे़ःम्बा याःम्बक्किन् निङ्वाॽ इःत्तुम्बे़रो॥ 21 खे़ने़ॽ के़मिङ्ङिल्ले़ चोगुल्ले़ आनिगे हिलाप्फु आन्जोगे़न्ने़ॽओ॥ खे़ने़ॽ मिमिदिङ्गे़न् के़हाङ्युक्नाओ ताप्फे़ःम्बा मिङ् मे़दारे़न्ने़ॽओ॥ आनिगे निङ्वाॽ आइःत्ते़ॽओ हे़क्क्याङ् के़जोगुबा के़माङ्हुप्पिन् मे़ले़रे़न्ने़ॽओ॥ 22 वेॽ मे़न्छाम् सुवाङ्हाॽरे़ खुन्छिॽ हने़बा माङ्साम्माङ्हाॽरे़ वहित् थामा मे़न्छुक्तुन्लो॥ ताङ्साङ्बाल्ले़ आबाङे वगेःङ्मा मे़सुक्तुन्लो॥ मेःन्लो, यहवे दाङ्बा आनिगे निङ्वाॽफुमाङ्ङे, आनिगे खे़ने़ॽए के़लाम् ओमे़त्तुम्बे़आङ् वयिगे़रो थेआङ्भे़ल्ले़ कन् के़रे़क् पाःन्हाॽ के़जोःक्पा खे़ने़ॽए के़वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.