यर्मिया 13 - लिम्बुयर्मियाःल्ले़ कुभॽइ 1 यहवे दाङ्बे़ल्ले़ आङ्गाॽ अक्खे मे़त्ताङ्, “पेगे़ॽआङ् लत्छा नुबा फॽइधिक् इङे़ॽ हे़क्क्याङ् खे़न् के़गेङ्ङो युप्से़ॽ कर खे़न् च्वाःत्तिल्ले़ वरक्मा मे़बाङ्घे़न्ने़ॽ॥” 2 खे़ल्ले़चोगुल्ले़ यहवे दाङ्बे़ल्ले़ मे़त्ताङ्बा कुइसिक् आङ्गाॽ नुबा फॽइधिक् इङुङ्ङाङ् युप्सुङ्॥ 3 हे़क्क्याङ् यहवे दाङ्बे़ल्ले़ कुइङ्घङ्ङिन् आङ्गाॽओ याम्मो के़रे़, 4 “परातओ पेगे़ॽआङ् खे़ने़ॽ के़गेङ्ङो के़युप्सुबा थाक्मनाबा फॽइःन् याक्पेॽ लुङ्भिःप्माहाॽओ चिक्खे़ ने़स्से़ॽ॥” 5 खे़ब्याङ् यहवे दाङ्बे़ल्ले़ मे़त्ताङ्बा कुइसिक् आङ्गाॽ पेगाङ्ङाङ् युफ्रेतिस वहःङ्ङिल्ले़ कुबेसाङ् खे़न् फॽइःन् चिक्खुङ्धाङ्॥ 6 यरिक् ये़म् एगाङ् यहवे दाङ्बे़ल्ले़ आङ्गाॽ मे़त्ताङ्, “पोगे़ॽ, याम्मो युफ्रेतिस वहःङ्ङो पेगे़ॽआङ् खे़न् थाक्मनाबा फॽइःन् याङ्ना फे़त्ते़ॽ॥” 7 खे़ल्ले़चोगुल्ले़ आङ्गाॽ खे़प्मो नुःक्खाङ्ङाङ् पेगाङ् हे़क्क्याङ् फॽइःन् चिक्खुङ्ङाङ् ने़स्से़बादे़न्नो ओमे़त्तुङ् हे़क्केःल्ले़ खे़न् यरे़आङ् युम्मा मे़न्नुॽमनाबा कुद्रे़क् पोःक्खे़बा खोसुङ्॥ 8 खे़ब्याङ् यहवे दाङ्बे़ल्ले़ कुइङ्घङ्ङिन् आङ्गाॽओ याम्मो के़रे़, 9 “यहवे दाङ्बे़ल्ले़ अक्खे पाःत्तु, ‘आङ्गाॽ अक्खेलॽरिक्के यहुदाबा मनाहाॽरे़ खुन्छिॽ आङ्दिङ् लॽमान् नु यरुसले़ःम्मोबा मनाहाॽरे़ खुन्छिॽ यम्बा हे़न्छिङ्मान् यो थासुङ् पिरुङ्सिङ्ॽ॥ 10 कन् ताक्के़भे़ॽबा मनाहाॽरे़ आङ्गाॽ आइङ्जाङ्ङिन् इःप्मा नाःप्मा मे़नाॽरुआङ् मे़वाॽ॥ खे़ङ्हाॽ आभे़ल्ले़साङ् कुॽइगे़भे़म्बा मे़बोःक्खे़आङ् मे़वाॽ हे़क्क्याङ् कुसिङ्मे़न्निःत्ते़बा साम्माङ्हाॽ माङ्से़वा मे़मे़त्तुसि खे़ब्याङ् माङ्मे़घयुसिॽ॥ खे़ल्ले़चोगुल्ले़ आल्ल खे़ङ्हाॽ कन् फॽइःन् हे़क्के कुसुम्मे़न्दम्मना हने़बा मे़बोङ्॥ 11 आक्खेलॽरिक् कन् फॽइःन् साप्पोःक्को लुम्बे़त् युम्मनाआङ् पत्, हे़क्केलॽरिक्के इस्राइल नु यहुदाबा के़रे़क् मे़न्छाम् याप्मिहाॽ आङ्गाॽनु मे़दङ्सिङ्ङाङ् मे़घिम्सिङ्ल फाॽआङ् आङ्गाॽ चोगुङ्सिङ्॥ खे़ङ्हाॽ आङ्गाॽ आप्फेक् आमना मे़बोङ्ल, खे़ङ्हाॽलाम्बा आङ्गाॽ आमिङ् पोङ्ल, आनारा फोमा पोङ्ल हे़क्क्याङ् मिङ्सो इङ्धाङ् मे़बिआर के़लॽबा आङ्गाॽ आनिङ्वाॽ वये़ कर खे़ङ्हाॽरे़ आइङ्जाङ्ङिन् मे़न्इःत्तुन् मे़न्नाःत्तुन्लो॥’” 12 “खे़ल्ले़चोगुल्ले़ खे़ने़ॽ खे़ङ्हाॽ मे़त्ते़से़ॽ, ‘यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ, चे़ल्ले़क्सेॽ थि याङ्मा के़रे़क् क्वाङ्हाॽ चे़ल्ले़क्सेॽ थिःल्ले़ थिम्मा पोङ्ॽ॥’ खे़ङ्हाॽरे़ खे़ने़ॽ अक्खेलॽरिक् नुगप् के़म्बि, ‘के़रे़क् चे़ल्ले़क्सेॽ थि याङ्मा क्वाङ्हाॽ चे़ल्ले़क्सेॽ थिःल्ले़ थिम्मासि पोङ् फाॽआङ् आनिगे निसुम्बे़!’ 13 खे़न् एगाङ् खे़ङ्हाॽ मे़त्ते़से़ॽ, ‘यहवे दाङ्बे़ल्ले़ अक्खे पाःत्तुॽ—कन् लाजेॽओबा के़रे़क् मनाहाॽ, दाउदरे़ कुमुइदाङ्सालाम्बा हाङ् के़जोःक्पा हाङ्हाॽ, निङ्वाॽफुसाम्बा यक्याबाहाॽ, माङ्निङ्वाॽपान् के़बाःप्पाहाॽ हे़क्क्याङ् यरुसले़ःम्मोबा के़रे़क् यक्युङ्बाहाॽआङ् आङ्गाॽ आसाक्के़न्निल्ले़ के़दिम्बा खोर्यान् थुङ्घुङ्सिङ्ङाङ् मसुङ्सिङ्ॽ॥ 14 हे़क्क्याङ् खे़न् एगाङ् आङ्गाॽ खे़ङ्हाॽ काप्पोबा तुम्भाक्साहाॽ खे़ब्याङ् थाङ्बे़न्हाॽ के़रे़क् लत्थिक् परिक्ले़ आबाङे खुन्छिॽ लुम्मो थक्खुङ्सिङ्ङाङ् फे़क्खुङ्सिङ्॥ चबे़ःत्छिक् लुङ्गुम्ले़, लुङ्माॽ स्याःत् लॽमारे़ इग्र लुङ्माॽ तुक्मासिरे़ चोगुल्ले़ आङ्गाॽ स्वाःत् मे़वाॽआन्लो॥’” आङ्दिङ् लॽमा मेःन् 15 इस्राइलिसे, चुङ्जिगे़न् नःम्नःम्बा पोःक्खे़म्मे़ॽओ हे़क्क्याङ् यहवे दाङ्बे़ल्ले़ कुइङ्घङ्ङिन् खे़प्से़म्मे़ॽओ, थेआङ्भे़ल्ले़ यहवे दाङ्बान् पारे़आङ् वाॽरो॥ 16 खुने़ॽ खामाक्मान् ताःप्मानुःल्ले़ तगिए, युःन्छिक्पा खाधाम्मो थे़गु माङ्वाहाॽओ खिनिॽ लाङ्हाॽ तोःक्मानुःल्ले़ तगिए यहवे दाङ्बा खिनिॽ निङ्वाॽफुमाङ्ङिन् मिङ्सो इङ्धाङ् पिरे़म्मे़ॽओ॥ खिनिॽग से़न्दाङ्गे़न् ओःत्तिःन् ओमे़प्मा निङ्वाॽ के़जोगुम्लो कर खुने़ॽ खे़न् खामाक्मो ले़क्खुआङ् माक्सिःङ्ग्याःप्पा चोगुरो॥ 17 कर खिनिॽ कन् आबाःन्निन् के़ङ्घे़प्सुम्मिन्ने़भग्र खिनिॽ आङ्दिङ् लॽमारे़ चोगुल्ले़ आङ्गाॽ स्वाःत्ताङ् हाःप्पारो॥ हे़क्क्याङ् आङ्गाॽ तुरुःङ् तुरुःङ्ङाङ् हाःप्पारो आङ्गाॽ आमिक्कोलाम् आमिक्वा ते़रे़रे़ थाप्लो थेआङ्भे़ल्ले़ यहवे दाङ्बे़ल्ले़ कुमनाहाॽ मे़दे़म्सु मे़देॽरुसिरो॥ 18 यहवे दाङ्बे़ल्ले़ आङ्गाॽ अक्खे मे़त्ताङ्, “हाङ्ङिन् नु हाङ्मान् मे़त्ते़से़ॽओ हाङ्युक्नाओलाम्बा खे़न्छिॽ लःन्दे़ ये़सेॽओ थेआङ्भे़ल्ले़ खुन्छिॽ नुवे़न्दिङ्बा तिचहाॽ थे़गेःक्कोलाम्बा मक्थारो॥ 19 यहुदाबा लाङ्गे़त् पिसाङ्बा ये़क्यक्हाॽ निङ्मिहाॽरे़ किर्गप् मे़गबुरो, खे़न् सिगाङ् आत्तिन्हाॽआङ् पेःक्मा मे़न्छुक्ने़न्लो॥ यहुदाबा के़रे़क् मनाहाॽ मे़दे़म्सु मे़देॽरुसिरो खे़ब्याङ् लाजेॽलाम् लाःक्कात् मे़देॽरुसिरो॥” 20 यरुसले़ःम्मे, के़मिक्किल्ले़ अदक्तक्ना ओमे़त्ते़ॽओ, खे़ने़ॽ के़निङ्मिहाॽ थाङ्गे़त् लाम्बा मे़युर मे़बत्लो॥ खे़ने़ॽ के़लक्पे़न्नो के़वाॽबा नुबा थक्सालुप् हे़क्तङ्बा मनाहाॽ आत्ति मे़वाॽबे? खे़ङ्हाॽओ खे़ने़ॽ के़न्बो के़भोसुबान् थे़मा पोःक्खे़बे? 21 खे़ने़ॽ आबाङे तेःङ्जुम् के़इःत्तुसिबा मनाहाॽरे़ खे़ने़ॽ थङ् थक्मा के़म्नाःन्दे़रो हे़क्क्याङ् हाङ्युक् चोःक्मा मे़इःत्तुल्ले़ खे़ने़ॽ थे़मा के़बाःत्तुइरो? सागप्मा तुङ्ङिल्ले़ तरुमा मे़न्छुमान् तुक्माल्ले़ याःप्पा हे़क्के खे़ने़ॽ के़बोङ्लो॥ 22 हे़क्क्याङ् खे़ने़ॽ के़निङ्वाॽओ अक्खे के़बाःत्तुरो, “अक्तङ्बा पाःन्हाॽ आङ्गाॽ सम्धाङ् थेआङ् चुक्ते़बाबे?” कङ्ग खे़ने़ॽ के़लायोल्ले़ चोगुल्ले़ अक्खे पोःक्खे़बारो के़सिम्मिन् ते़ःक्खे़आङ् साक्के़ल्ले़क् मेःत् के़म्देॽरे़बारो॥ 23 थे कुसबा मनाःल्ले़ आप्फेक् कुने़क्सान् फ लॽरिक् ले़ङ्मा सुक्तुबि? इग्र थे थे़रिङ्बाल्ले़ आबाङे ते़क्क्राबा कुहोरिक्पान् ले़क्मा सुक्तुबि? हे़क्केलॽरिक् खिनिॽआङ् नुबा चोःक्मा के़न्छुक्तुम्मिन्लो, थेआङ्भे़ल्ले़ खिनिॽ ताप्फे़ःम्बान् चोःक्मा के़हुॽआसिआङ् के़वयिरो॥ 24 यहवे दाङ्बे़ल्ले़ पाःत्तुरो, “मुरे़क् खारे़क्पा ये़ःङ्घादे़न्नोबा सुरिःत्तिल्ले़ याॽसिप्पे़न् फे़सुरो हे़क्केलॽरिक्के आङ्गाॽ खिनिॽ फुत्छिङ्ज्याङ् चोःक्निङ्लो॥ 25 अक्तङ्बाए पोङ्ल फाॽआङ् के़द्वाबो साप्तुङ्ङाङ् पत्लो॥ आङ्गाॽ खे़ने़ॽनु अक्खेए चोःक्मा निःन्धो चोगुङ्ङाङ् वाॽरो थेआङ्भे़ल्ले़ खे़ने़ॽ निङ्वाॽ के़भेःत्छाङ्ङाङ् वाॽरो हे़क्क्याङ् इङ्ले़क्पा साम्माङ्हाॽओ के़निङ्वाॽ के़युक्खुआङ् के़वाॽरो॥ 26 आङ्गाॽ आबाङे खे़ने़ॽ के़सिम्मे़न् के़नाराओ थारिक् सिन्दुङ् पिने़रो, हे़क्क्याङ् खे़ने़ॽ के़नुःम्मान् निधाःप्लो॥ 27 आङ्गाॽ चिःत्तुङ्बा पाःन्निन् खे़ने़ॽ के़जोगुर के़वाॽरो खे़न् आङ्गाॽए निसुङ्ङाङ् वाॽरो॥ खे़ने़ॽ कोःक्मा फाङ्जङ् नु ने़ने़बादे़न्नो याम्गे़सिङ्बा याःम्बक्हाॽ के़जोगुरो, खे़ने़ॽ चाराम्मा, याम्बोःप्मा याःम्बक् हे़क्क्याङ् के़त्निमान्नु के़गाम्सिङ्बान् निसुङ्ङाङ् वारो॥ यरुसले़ःम्मो के़युङ्बासे, के़जिःत्ति के़स्ये़ॽइरो, खिनिॽ से़क्खाए के़मे़गिरो, खिनिॽ आप्फाल्ले़ थारिक् आसुत्थो के़बोःक्खिबाबे?” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.